« ពង្សាវតារក្សត្រ ទី២ ៦ ៖ ‹ ពួកដែលនៅខាងយើង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ពង្សាវតារក្សត្រ ទី២ ៦ ៖ ‹ ពួកដែលនៅខាងយើង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ពង្សាវតារក្សត្យ ទី២ ២–៧ ៖ មេរៀនទី ៨៥
ពង្សាវតារក្សត្រ ទី២ ៦
« ពួកដែលនៅខាងយើង »
ពេលឡោមព័ទ្ធដោយកងទ័ពស៊ីរី បាវបម្រើរបស់ព្យាការីអេលីសេបានស្រែកឡើងដោយភ័យខ្លាចថា ៖ « តើយើងនឹងធ្វើដូចម្តេច ? » ( ពង្សាវតារក្សត្រ ទី២ ៦:១៥ ) ។ អេលីសេបានលួងលោមដល់អ្នកបម្រើរបស់គាត់ ដោយជួយគាត់ឲ្យស្គាល់ជំនួយរបស់ព្រះអម្ចាស់ ។ យើងក៏អាចត្រូវបានសម្រាលទុក្ខដែរ ពេលយើងរៀនស្គាល់ជំនួយរបស់ព្រះអម្ចាស់ ។ មេរៀននេះអាចជួយសិស្សឲ្យមានអារម្មណ៍ជឿជាក់កាន់តែខ្លាំងលើការមើលថែដ៏ខ្ជាប់ខ្ជួន និងយកព្រះទ័យទុកដាក់របស់ព្រះអម្ចាស់ ។
ការរៀបចំសិស្ស ៖ សូមអញ្ជើញសិស្សឲ្យរៀបចំខ្លួនដើម្បីចែកចាយបទពិសោធន៍មួយអំពីពេលដែលព្រះអម្ចាស់បានប្រទានពរ ឬការពារពួកគេ ឬនរណាម្នាក់ដែលពួកគេស្គាល់ ។
សកម្មភាពរៀនសូត្រដែលអាចមាន
ការស្គាល់ការមើលថែរបស់ព្រះអង្គសង្រ្គោះ
ដើម្បីចាប់ផ្តើមមេរៀនរបស់អ្នក សូមពិចារណាគូររូបមនុស្សចង្កឹះនៅកណ្តាលក្តារខៀន ។
បទគម្ពីរមាននូវការសន្យារបស់ព្រះអង្គសង្គ្រោះសម្រាប់រាស្ដ្ររបស់ទ្រង់ដែលខិតខំបម្រើទ្រង់ ។ ដើម្បីស្រមៃឃើញពីការសន្យាមួយក្នុងចំណោមការសន្យាទាំងនេះ សូមគូររូបមនុស្សចង្កឹះនៅកណ្តាលទំព័រក្នុងសៀវភៅកំណត់ហេតុការសិក្សារបស់អ្នក ហើយដាក់ស្លាកវាថា ខ្ញុំ ។
បន្ទាប់មក សូមអាន គោលលទ្ធិ និងសេចក្តីសញ្ញា ៨៤:៨៨ ហើយគូរជុំវិញរូបមនុស្សចង្កឹះរបស់អ្នកពីរបៀបដែលអ្នកស្រមៃឃើញការសន្យារបស់ព្រះអម្ចាស់ ។
អ្នកអាចអញ្ជើញសិស្សម្នាក់ឲ្យបន្ថែមលើគំនូរនៅលើក្ដារខៀននូវអ្វីដែលពួកគេបានគូរនៅក្នុងសៀវភៅកំណត់ហេតុរបស់ពួកគេ ដោយពន្យល់ពីមូលហេតុដែលពួកគេគូរនូវអ្វីដែលពួកគេបានគូរ ។ សិស្សផ្សេងទៀតអាចត្រូវបានអញ្ជើញឲ្យបន្ថែមអ្វីខុសគ្នាដែលពួកគេប្រហែលជាបានគូរ ។ ជម្រើសមួយផ្សេងទៀត សិស្សអាចចែកចាយ និងពន្យល់គំនូររបស់ពួកគេជាមួយអ្នកជិតខាង ។
-
តើអ្នកគិតថា វាអាចជះឥទ្ធិពលដល់នរណាម្នាក់ដោយរបៀបណា ប្រសិនបើពួកគេអាចស្គាល់ការសន្យាទាំងនេះដែលកើតឡើងក្នុងជីវិតរបស់ពួកគេ ?
-
ហេតុអ្វីបានជាវាពិបាកក្នុងការមើលឃើញ ឬទទួលស្គាល់ពរជ័យ និងការការពាររបស់ព្រះអម្ចាស់នៅក្នុងជីវិតរបស់យើង ?
វាអាចជាប្រយោជន៍ក្នុងការថ្លែងទីបន្ទាល់ថា ព្រះវរបិតាសួគ៌ និងព្រះអង្គសង្គ្រោះបានចូលរួមយ៉ាងសកម្មនៅក្នុងជីវិតរបស់សិស្សម្នាក់ៗ ។
សូមជញ្ជឹងគិតថាតើអ្នកស្គាល់ព្រះវរបិតាសួគ៌ និងការចូលរួមរបស់ព្រះយេស៊ូវគ្រីស្ទក្នុងជីវិតអ្នកបានល្អកម្រិតណា ។ បន្ទាប់មក សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកអាចស្គាល់យ៉ាងហោចណាស់របៀបមួយដែលព្រះវរបិតាសួគ៌ និងព្រះយេស៊ូវគ្រីស្ទកំពុងប្រទានពរ ឬការពារអ្នកដែរឬទេ ? បើដូច្នេះ តើទ្រង់ទាំងទ្វេធ្វើវាយ៉ាងណា ?
-
តើស្ថានភាពអ្វីខ្លះដែលអ្នកកំពុងប្រឈមមុខក្នុងជីវិតរបស់អ្នក ដែលវាអាចជួយអ្នកឲ្យស្គាល់កាន់តែច្បាស់អំពីពរជ័យ និងការការពាររបស់ទ្រង់ទាំងទ្វេ ?
នៅពេលអ្នកសិក្សា ពង្សាវតារក្សត្រ ទី២ ៦ សូមយាងព្រះវិញ្ញាណបរិសុទ្ធ ដើម្បីជួយអ្នកឲ្យស្គាល់របៀបដែលព្រះវរបិតាសួគ៌ និងព្រះយេស៊ូវគ្រីស្ទកំពុងប្រទានពរ និងការពារអ្នក ។
ជំនួយដ៏ទេវភាព
សូមពិចារណាពន្យល់ព័ត៌មានខាងក្រោមនេះ ដើម្បីជួយសិស្សយល់ពីបរិបទនៃ ពង្សាវតារក្សត្រ ទី២ ៦ ។
ក្នុងអំឡុងនៃសង្គ្រាមរវាងអ៊ីស្រាអែល និងស៊ីរី ស្ដេចនៃស្រុកស៊ីរីបានពិភាក្សាអំពីផែនការប្រយុទ្ធរបស់ទ្រង់ជាមួយនឹងអ្នកបម្រើរបស់ទ្រង់ដោយសម្ងាត់ ។ ទោះជាយ៉ាងណា ព្រះអម្ចាស់បានបើកសម្ដែងម្ដងហើយម្ដងទៀតអំពីផែនការរបស់ស៊ីរីដល់ព្យាការីអេលីសេ ដែលលោកនឹងព្រមានដល់ស្ដេចអ៊ីស្រាអែល ។ ពេលស្ដេចនៃស្រុកស៊ីរីបានដឹងហេតុការណ៍នេះ ទ្រង់ក៏ចាត់កងទ័ពទៅចាប់អេលីសេ ( សូមមើល ពង្សាវតារក្សត្រ ទី២ ៦:៨–១៣ ) ។
សូមជ្រើសរើសរបៀបដ៏មានប្រសិទ្ធភាពសម្រាប់សិស្សក្នុងការសិក្សាខគម្ពីរខាងក្រោមនេះ ដើម្បីជួយពួកគេកំណត់គោលការណ៍នៃការប្រែចិត្តជឿ ។ ឧទាហរណ៍ វាអាចមានប្រយោជន៍សម្រាប់សិស្សក្នុងការសិក្សាពីទស្សនៈរបស់អ្នកបម្រើរបស់អេលីសេ ។ ពួកគេអាចផ្អាកម្តងម្កាល ហើយគិតអំពីអារម្មណ៍របស់ពួកគេប្រសិនបើពួកគេជាគាត់វិញនោះ ។ សិស្សក៏អាចអានជាថ្នាក់ ឬជាក្រុមតូចៗផងដែរ ដោយមានសិស្សផ្សេងៗគ្នាអានផ្នែកសម្រាប់អេលីសេ បាវបម្រើរបស់អេលីសេ និងស្តេចនៃអ៊ីស្រាអែល ។
វាប្រហែលជាមានប្រយោជន៍ក្នុងការពន្យល់ថាសាម៉ារី គឺជារាជធានីនៃនគរអ៊ីស្រាអែល ។
សូមអាន ពង្សាវតារក្សត្រ ទី២ ៦:១៤–២៣ ដោយរកមើលរបៀបដែលព្រះអម្ចាស់បានប្រទានពរ និងការពារអេលីសេ និងបាវបម្រើរបស់គាត់ ។
-
តើអ្វីដែលធ្វើឲ្យអ្នកចាប់អារម្មណ៍ចេញពីដំណើររឿងនេះ ?
-
តើសេចក្តីពិតអ្វីខ្លះពីដំណើររឿងនេះដែលអាចទាក់ទងនឹងយើងសព្វថ្ងៃនេះ ?
ប្រសិនបើសិស្សមិនបានចែកចាយសេចក្ដីពិតស្រដៀងគ្នានេះនៅក្នុងពាក្យសម្ដីរបស់ពួកគេផ្ទាល់ទេ សូមពិចារណាចែកចាយសេចក្ដីពិតដូចខាងក្រោម ៖ ព្រះអម្ចាស់អាចជួយយើងស្គាល់ពរជ័យរបស់ទ្រង់ និងការការពារនៅក្នុងជិវិតរបស់យើង ។
-
តើអ្នកគិតថា ការស្គាល់ពរជ័យ និងការការពាររបស់ព្រះអម្ចាស់ជះឥទ្ធិពលដល់អេលីសេ និងបាវបម្រើរបស់គាត់យ៉ាងដូចម្ដេច ?
ការស្គាល់ពរជ័យ និងការការពាររបស់ព្រះអម្ចាស់
ដើម្បីជួយសិស្សឲ្យស្គាល់នូវរបៀបមួយចំនួនដែលព្រះអម្ចាស់អាចប្រទានពរ និងការពារពួកគេ នោះអ្នកអាចដាក់ពួកគេជាគូៗ ឬក្រុមតូចៗសម្រាប់សកម្មភាពខាងក្រោម ។
ចំណាំ ៖ សិស្សនឹងទទួលបានឱកាសឲ្យឆ្លុះបញ្ចាំងពីបញ្ជីដែលពួកគេបង្កើតនៅក្នុងសកម្មភាពនេះនៅក្នុងមេរៀនទី ៩៦ ៖ « វាយតម្លៃការរៀនសូត្ររបស់អ្នកទី ៦ » ។
សូមធ្វើបញ្ជីពីរបៀបផ្សេងៗដែលព្រះអម្ចាស់អាចនឹងការពារ និងមើលថែយើង ។ រាយបញ្ជីឲ្យបានច្រើនតាមដែលអ្នកអាចគិតឃើញនៅក្នុងរយៈពេលពីរនាទី ។
បន្ទាប់ពីពីរនាទី អ្នកអាចអញ្ជើញពួកគេឲ្យរកមើលគំនិតបន្ថែមដែលពួកគេអាចរួមបញ្ចូលចេញពី ម៉ូសាយ ២៤:១៣–១៥; គោលលទ្ធិ និងសេចក្តីសញ្ញា ៨:២–៣; ៣៨:៧ ឬវគ្គបទគម្ពីរផ្សេងទៀតដែលអ្នកអាចផ្ដល់យោបល់ ។ អ្នកក៏អាចចែកចាយសេចក្តីថ្លែងការណ៍ដូចខាងក្រោមមកពីប្រធាន អាវរិង ។
ប្រធាន ហែនរី ប៊ី អាវរិង នៃគណៈប្រធានទីមួយបានបង្រៀនអំពីជំនួយរបស់ព្រះអម្ចាស់ដូចខាងក្រោម ៖
ដូចជាបាវបម្រើរបស់អេលីសេរូបនោះផងដែរ មានអ្នកនៅជាមួយបងប្អូនច្រើនជាងអ្នកដែលបងប្អូនអាចឃើញថាប្រឆាំងនឹងបងប្អូន ។ ពួកគេខ្លះដែលនៅជាមួយបងប្អូន ប៉ុន្តែកែវភ្នែករមែងស្លាប់របស់បងប្អូនមិនអាចមើលឃើញឡើយ ។ ព្រះអម្ចាស់នឹងលើកបងប្អូនឡើង ហើយនៅពេលខ្លះក៏ហៅអ្នកដទៃមកនៅជាមួយបងប្អូន ។ ( « O Ye That Embark » Liahona ខែវិច្ឆិកា ឆ្នាំ២០០៨ ទំព័រ ៥៨ )
សូមពិចារណាអំពីការអញ្ជើញក្រុមឲ្យប្ដូរវេនគ្នាចែកចាយឧទាហរណ៍ពីបញ្ជីរបស់ពួកគេ ខណៈពេលដែលអ្នក ឬអ្នកស្ម័គ្រចិត្តសរសេរវានៅលើក្តារខៀន ។ អ្នកអាចអនុញ្ញាតឲ្យក្រុមបន្តចែកចាយរហូតដល់គំនិតពិសេសៗទាំងអស់ត្រូវបានចែកចាយ ។
សូមអញ្ជើញសិស្សឲ្យចែកចាយឧទាហរណ៍ចេញពីព្រះគម្ពីរដែលពួកគេអាចគិតឃើញ នៅពេលព្រះអម្ចាស់បានការពារ ឬមើលថែនរណាម្នាក់តាមរបៀបដែលបានរាយបញ្ជីនៅលើក្ដារខៀន ។
នៅពេលអ្នកពិភាក្សាសំណួរខាងក្រោម អ្នកអាចជ្រើសរើសចែកចាយ នៅពេលអ្នកបានមើលឃើញពរជ័យ ឬជំនួយរបស់ព្រះក្នុងជីវិតរបស់អ្នក ។
-
តើអ្វីអាចធ្វើឲ្យពរជ័យមួយចំនួនទាំងនេះមកពីព្រះអម្ចាស់ពិបាកនឹងមើលឃើញជាងអ្វីផ្សេងទៀត ?
-
តើនៅពេលណាដែលព្រះអម្ចាស់បានប្រទានពរ ឬការពារអ្នក ឬនរណាម្នាក់ដែលអ្នកស្គាល់ តាមរបៀបមួយក្នុងចំណោមរបៀបទាំងនេះ ?
-
តើបទពិសោធន៍នេះបង្រៀនអ្នកអំពីព្រះអម្ចាស់ដោយរបៀបណា ?
ការបើកភ្នែករបស់យើង
សូមពិចារណាបញ្ចប់មេរៀននេះដោយបង្ហាញសម្រង់សម្តី និងការណែនាំខាងក្រោម ។
ស៊ីស្ទើរ មីឈែល ឌី ក្រេហ្គ អតីតសមាជិកគណៈប្រធានយុវនារី បានពន្យល់នូវអ្វីដែលយើងអាចធ្វើ ប្រសិនបើយើងពិបាកមើលឃើញពីរបៀបដែលព្រះធ្វើការនៅក្នុងជីវិតរបស់យើង ៖
ពេលខ្លះបងប្អូនដូចអ្នកបម្រើនោះ បងប្អូនមានការពិបាកក្នុងការមើលឃើញពីរបៀបដែលព្រះកំពុងធ្វើការនៅក្នុងជីវិតរបស់បងប្អូន—ពេលដែលបងប្អូនមានអារម្មណ៏ថាកំពុងត្រូវឡោមព័ទ្ធ—នៅពេលការសាកល្បងក្នុងជីវិតរមែងស្លាប់ធ្វើឲ្យបងប្អូនលុតជង្គង់ចុះ ។ រង់ចាំហើយទុកចិត្តទៅលើព្រះ និងពេលវេលារបស់ទ្រង់ពីព្រោះបងប្អូនអាចជឿជាក់លើដួងចិត្តរបស់ទ្រង់ដោយអស់ពីដួងចិត្តរបស់បងប្អូន ។ ប៉ុន្តែ វាមានមេរៀនទីពីរនៅទីនេះ ។ បងប្អូនប្រុសស្រីជាទីស្រឡាញ់របស់ខ្ញុំ បងប្អូនក៏អាចអធិស្ឋានសុំព្រះអម្ចាស់ឲ្យបើកភ្នែកបងប្អូនមើលឃើញនូវការណ៍ទាំងឡាយដែលភ្នែកធម្មតាមិនអាចមើលឃើញបាន ។ ( « Eyes to See » Liahona ខែវិច្ឆិកា ឆ្នាំ២០២០ ទំព័រ ១៥ )
សូមពិចារណាឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកបានរៀនអ្វីខ្លះនៅថ្ងៃនេះ ដែលជួយអ្នកឲ្យមានទំនុកចិត្តថា ព្រះអម្ចាស់ការពារ និងយកព្រះទ័យទុកដាក់ចំពោះអ្នក ?
ថ្លែងទីបន្ទាល់អំពីសេចក្តីស្រឡាញ់របស់ព្រះអម្ចាស់ និងអំពីសមត្ថភាពរបស់ទ្រង់ក្នុងការជួយសិស្សឲ្យស្គាល់ជំនួយរបស់ទ្រង់នៅក្នុងជីវិតរបស់ពួកគេ ។