« របាក្សត្រ ទី២ ១៤–១៦ ៖ ‹ បើអ្នករាល់គ្នាស្វែងរកទ្រង់ នោះនឹងរកឃើញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« របាក្សត្រ ទី២ ១៤–១៦ ៖ ‹ បើអ្នករាល់គ្នាស្វែងរកទ្រង់ នោះនឹងរកឃើញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
របាក្សត្រ ទី២ ១៤–២០; ២៦; ៣០ ៖ មេរៀនទី ៩០
របាក្សត្រ ទី២ ១៤–១៦
« បើអ្នករាល់គ្នាស្វែងរកទ្រង់ នោះនឹងរកឃើញ »
មនុស្សខ្លះអាចស្វែងរកព្រះវរបិតាសួគ៌ និងព្រះយេស៊ូវគ្រីស្ទ លុះត្រាតែអ្វីៗដំណើរការល្អ ។ អ្នកផ្សេងទៀតអាចអំពាវនាវរកជំនួយរបស់ទ្រង់ទាំងទ្វេតែនៅពេលពួកគេមានទុក្ខលំបាកប៉ុណ្ណោះ ។ ដូចជាអេសាជាស្ដេចយូដាដែរ យើងអាចស្វែងរកព្រះអម្ចាស់ក្នុងអំឡុងពេលមានសេចក្តីសុខសាន្ត និងទុក្ខលំបាក ។ មេរៀននេះអាចជួយសិស្សដាក់ផែនការដើម្បីស្វែងរកព្រះអម្ចាស់ ។
ការស្វែងរកព្រះអម្ចាស់ ៖ សូមអញ្ជើញសិស្សឲ្យធ្វើបញ្ជីពីរបៀបដែលពួកគេអាចស្វែងរកព្រះអម្ចាស់ក្នុងជីវិតរបស់ពួកគេ ។
សកម្មភាពរៀនសូត្រដែលអាចមាន
ស្វែងរកដើម្បីរកឃើញ
សូមពិចារណាចាប់ផ្តើមមេរៀនដោយការអញ្ជើញសិស្សឲ្យគិតអំពីរបៀបដែលយើងស្វែងរករបស់ដែលបាត់ ។ អ្នកអាចរាយបញ្ជី ឬដាក់បង្ហាញរបស់មួយចំនួនដែលមានតម្លៃខុសៗគ្នា ដូចជា ខ្មៅដៃ កិច្ចការផ្ទះដែលសំខាន់ ទូរសព្ទដៃ អំណោយពីមនុស្សជាទីស្រឡាញ់ជាដើម ។ សូមសួរសិស្សថា តើពួកគេនឹងដាក់ការខិតខំប្រឹងប្រែងប៉ុនណាក្នុងការស្វែងរកវត្ថុនីមួយៗ ប្រសិនបើវត្ថុនោះបានបាត់ ។
-
ហេតុអ្វីបានជាការខិតខំប្រឹងប្រែងរបស់អ្នកក្នុងការស្វែងរកអ្វីមួយខុសគ្នា អាស្រ័យលើអ្វីដែលអ្នកកំពុងស្វែងរក ?
សូមពិចារណាសរសេរ ស្វែងរកព្រះអម្ចាស់ នៅផ្នែកខាងលើនៃក្ដារខៀន ។
-
តើអ្នកគិតថា វាមានន័យយ៉ាងណាដើម្បីស្វែងរកព្រះអម្ចាស់ ?
ប្រសិនបើសិស្សពិបាកឆ្លើយ អ្នកអាចសួរពីរបៀបដែលពួកគេចាប់ផ្ដើមស្គាល់នរណាម្នាក់ និងបង្កើតទំនាក់ទំនងដ៏ល្អ ។ ក្រោយមកសួរពីរបៀបដែលពួកគេអាចស្វែងរកដើម្បីស្គាល់ និងអភិវឌ្ឍទំនាក់ទំនងជាមួយព្រះអម្ចាស់ ។ អ្នកអាចពន្យល់ថា ពាក្យហេព្រើរសម្រាប់ពាក្យ ស្វែងរក នៅក្នុងខគម្ពីរទាំងនេះដែលពួកគេនឹងសិក្សានៅថ្ងៃនេះ ( របាក្សត្រ ទី២ ១៤:៤; ១៥:២, ១២; ៦:១២ ) គឺ darash ហើយមានន័យថា ស្វែងរក សុំ ទៅជួប ទទួលបាន ប្រឹក្សា ឬខិតខំយ៉ាងឧស្សាហ៍ព្យាយាម ។
នៅក្នុងសៀវភៅកំណត់ហេតុការសិក្សារបស់អ្នក សូមឆ្លើយសំណួរដូចខាងក្រោមនេះ ៖
-
តើមានរឿងអ្វីខ្លះដែលអ្នក ឬអ្នកដទៃទៀតដែលអ្នកស្គាល់បានធ្វើដើម្បីស្វែងរកព្រះអម្ចាស់ ?
-
តើអ្នកខិតខំប្រឹងប្រែងប៉ុនណាដើម្បីស្វែងរកព្រះអម្ចាស់ ?
នៅពេលអ្នកសិក្សាថ្ងៃនេះ សូមរកមើលរបៀបដែលអ្នកអាចស្វែងរកព្រះអម្ចាស់ ។ សូមសរសេរគំនិត ឬអារម្មណ៍ណាមួយពីព្រះវិញ្ញាណបរិសុទ្ធដែលចូលមកក្នងគំនិតអ្នក ។
គំរូនៃការស្វែងរកព្រះអម្ចាស់
សូមពិចារណាអំពីការចែកចាយ ឬសង្ខេបកថាខណ្ឌខាងក្រោម ។
គម្ពីររបាក្សត្រ និងពង្សាវតារក្សត្រគ្របដណ្តប់ប្រហែលរយៈពេលដូចគ្នា ។ នៅក្នុង របាក្សត្រ ទី២ ១៤–១៦ និង ពង្សាវតារក្សត្រ ទី១ ១៥ យើងបានអានដំណើររឿងរបស់ស្តេចអេសា ជាស្ដេចទីបីនៃស្រុកយូដា ។
អ្នកអាចបង្កើតតារាងខាងក្រោមនៅលើក្ដារខៀន ដើម្បីជួយសិស្សធ្វើសកម្មភាពបន្ទាប់ ។ សិស្សក៏អាចបង្កើតតារាងនេះនៅក្នុងសៀវភៅកំណត់ហេតុការសិក្សារបស់ពួកគេផងដែរ ។
|
របៀបដែលអេសា និងប្រជារាស្ដ្ររបស់ទ្រង់បានស្វែងរកព្រះអម្ចាស់ |
របៀបដែលព្រះអម្ចាស់បានប្រទានពរដល់ពួកគេ |
|---|---|
របៀបដែលអេសា និងប្រជារាស្ដ្ររបស់ទ្រង់បានស្វែងរកព្រះអម្ចាស់ | របៀបដែលព្រះអម្ចាស់បានប្រទានពរដល់ពួកគេ |
សូមពិចារណាបំបែកសិស្សជាបួនក្រុមខុសៗគ្នា ។ សូមឲ្យក្រុមនីមួយៗអានវគ្គផ្សេងៗគ្នានៃខគម្ពីរខាងក្រោមនេះ ។ សិស្សមកពីក្រុមនីមួយៗអាចសរសេរអ្វីដែលពួកគេបានរៀននៅលើក្ដារខៀន ។
ប្រសិនបើសិស្សត្រូវការជំនួយដើម្បីយល់ពី « រូបព្រះ » នៅក្នុង របាក្សត្រ ទី២ ១៤:៣ សូមពន្យល់ថា វាជាកន្លែងដែលមនុស្សថ្វាយបង្គំព្រះក្លែងក្លាយ ។
សូមអានខគម្ពីរមួយក្នុងចំណោមខគម្ពីរខាងក្រោម ដោយរកមើលអ្វីដែលអេសា និងប្រជារាស្ដ្ររបស់ទ្រង់បានធ្វើ និងរបៀបដែលព្រះបានប្រទានពរដល់ពួកគេ ៖
-
របាក្សត្រ ទី២ ១៤:៣–៧ ។ ក្នុងអំឡុងពេលនៃសេចក្តីសុខសាន្ត
-
របាក្សត្រ ទី២ ១៤:៩–១៣ ។ នៅពេលដែលពួកអេភេសូរត្រូវបានវាយប្រហារ
-
របាក្សត្រ ទី២ ១៥:១–៩ ។ ក្នុងអំឡុងពេលនៃសេចក្តីសុខសាន្ត
-
របាក្សត្រ ទី២ ១៥:១០–១២, ១៥ ។ ក្នុងអំឡុងពេលនៃសេចក្តីសុខសាន្ត
សូមសួរសំណួរខាងក្រោមនេះ ដើម្បីជួយសិស្សឲ្យស្គាល់សេចក្តីពិតមួយពីអ្វីដែលពួកគេបានសិក្សា ។ នៅពេលសិស្សចែកចាយ សូមបន្ថែមចម្លើយរបស់ពួកគេទៅនឹងតារាងនៅលើក្ដារខៀន ។
-
តើអ្នកបានរៀនអ្វីចេញពីបទពិសោធន៍របស់អេសា និងប្រជារាស្រ្តរបស់ទ្រង់ ?
ដោយប្រើពាក្យសម្តីរបស់សិស្ស សូមជួយពួកគេស្វែងរកសេចក្តីពិតដូចខាងក្រោម ៖
-
នៅពេលខ្ញុំស្វែងរកព្រះអម្ចាស់អស់ពីដួងចិត្ត នោះទ្រង់នឹងប្រទានឲ្យខ្ញុំបានសម្រាក ( របាក្សត្រ ទី២ ១៤:៧; ១៥:១៥ )
-
ប្រសិនបើខ្ញុំស្វែងរកព្រះអម្ចាស់ ខ្ញុំនឹងរកឃើញទ្រង់ (របាក្សត្រ ទី២ ១៥:២ )
នៅពេលសិស្សចែកចាយ សូមពិចារណាសួរសំណួរតាមដានដើម្បីជួយពួកគេគិតអំពីអត្ថន័យនៃពាក្យ ឬឃ្លាមួយចំនួន ។ ឧទាហរណ៍ អ្នកអាចនឹងសួរថា « តើអ្នកគិតថាការស្វែងរកព្រះអម្ចាស់មានន័យដូចម្តេច ? ឬ « តើព្រះអម្ចាស់ទ្រង់ប្រទានឲ្យយើងសម្រាកដោយរបៀបណា ? »
សម្រាប់ការបង្រៀនដែលអាចជួយជាមួយនឹងសំណួរទាំងនេះ ឬសំណួរផ្សេងទៀត សូមមើលផ្នែកធនធានបន្ថែមទាំងឡាយ ។
ការស្វែងរក និងការរកឃើញព្រះអម្ចាស់
សូមជួយសិស្សឲ្យភ្ជាប់ទំនាក់ទំនងរវាងជីវិតរបស់អេសា និងជីវិតរបស់ពួកគេផ្ទាល់ ។ អ្នកអាចដាក់ស្លាកឡើងវិញលើតារាងចាស់នៅលើក្ដារខៀនជាមួយ របៀបដែលខ្ញុំអាចស្វែងរកព្រះអម្ចាស់ នៅជួរឈរខាងឆ្វេង និង របៀបដែលព្រះអម្ចាស់អាចប្រទានពរដល់ខ្ញុំ នៅជួរឈរខាងស្ដាំ ។ បន្ទាប់មក សូមអញ្ជើញសិស្សឲ្យធ្វើសកម្មភាពខាងក្រោមជាក្រុម ឬដោយខ្លួនពួកគេផ្ទាល់ ។
បន្ថែមពីលើអ្វីដែលអេសា និងប្រជារាស្រ្តរបស់ទ្រង់បានធ្វើ សូមបន្ថែមទៅជួរខាងឆ្វេងនៃបញ្ជីរបស់អ្នកនូវរបៀបដែលអ្នកអាចស្វែងរកព្រះអម្ចាស់ ។ របៀបទាំងនេះអាចមកពីបទពិសោធន៍ផ្ទាល់ខ្លួនរបស់អ្នក ឧទាហរណ៍នៅក្នុងព្រះគម្ពីរ ឬប្រវត្តិសាស្រ្តសាសនាចក្រ ឬសុន្ទរកថាពីថ្នាក់ដឹកនាំសាសនាចក្រ ។
សិស្សអាចបន្ថែមឧទាហរណ៍របស់ពួកគេនៅក្នុងជួរឈរខាងឆ្វេងនៅលើក្ដារខៀនបាន ។
ប្រសិនបើអ្នកមានអារម្មណ៍ថា សកម្មភាពខាងក្រោមនេះនឹងជួយសិស្សឲ្យស្គាល់ពីរបៀបដ៏មានអត្ថន័យដើម្បីស្វែងរកព្រះអម្ចាស់ អ្នកអាចធ្វើមួយណាក៏បាន ឬក៏ទាំងពីរ ៖
-
ណែនាំសិស្សទៅផ្នែក « ការអញ្ជើញ » នៃផ្នែកសំខាន់ៗនីមួយៗនៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ឆ្នាំ២០២២ ) ។ ផ្នែកសំខាន់ៗរួមមាន « ព្រះយេស៊ូវគ្រីស្ទនឹងជួយអ្នក » « ស្រឡាញ់ព្រះ ស្រឡាញ់អ្នកជិតខាងរបស់អ្នក » ជាដើម ។
-
សូមមើល « មានពេលវេលាសម្រាប់ព្រះអម្ចាស់ » ចាប់ពីនាទីទី ១:០០ ដល់ ៣:២៩ ( ដែលមាននៅលើគេហទំព័រ ChurchofJesusChrist.org ) ។ នៅពេលសិស្សស្តាប់ប្រធាន រ័សុល អិម ណិលសុន សូមអញ្ជើញពួកគេឲ្យស្វែងរករបៀបដែលយើងអាចស្វែងរកព្រះអម្ចាស់ ។
អ្នកប្រហែលជាចង់ជួយសិស្សឲ្យគិតអំពីឧបសគ្គនានាដែលពួកគេអាចប្រឈម កាលពួកគេកំពុងខិតខំធ្វើសកម្មភាពដែលពួកគេទើបតែបានចែកចាយ ។ ដើម្បីធ្វើដូច្នេះ សូមពិចារណាសួរសំណួរខាងក្រោម ។
-
តើអ្វីអាចបង្អាក់យើងពីការស្វែងរកព្រះអម្ចាស់ ?
-
តើអ្វីជួយអ្នកឲ្យស្វែងរកព្រះអម្ចាស់ ទោះបីជាមានការរំខាន ?
សូមពិចារណាអញ្ជើញពួកគេឲ្យគូសចំណាំឃ្លា « នោះនឹងរកឃើញពិត » នៅក្នុង របាក្សត្រ ទី២ ១៥:២ ។ ដើម្បីជួយសិស្សគិតអំពីរបៀបដែលយើងអាចរកឃើញព្រះអម្ចាស់ សូមសួរសំណួរខាងក្រោម ។
-
តើព្រះអម្ចាស់បានប្រទានពរដល់អ្នក ឬនរណាម្នាក់ដែលអ្នកស្គាល់ កាលអ្នកបានស្វែងរកទ្រង់យ៉ាងដូចម្ដេច ?
បន្ទាប់ពីសិស្សចែកចាយហើយ សូមលើកទឹកចិត្តពួកគេឲ្យសរសេរគំនិតរបស់ពួកគេនៅក្នុងជួរឈរខាងស្តាំនៃតារាងនេះ ។ អ្នកអាចនឹងចង់ថ្លែងទីបន្ទាល់ថាពរជ័យដែលសិស្សបានចែកចាយអាចជាភស្ដុតាងថា ពួកគេបានរកឃើញទ្រង់ ។
ការដាក់ផែនការ
សូមជួយសិស្សធ្វើអ្វីមួយដែលពួកគេមានអារម្មណ៍ ឬបានរៀនអំឡុងពេលមេរៀននេះ ។ ដើម្បីធ្វើដូច្នេះ សូមលើកទឹកចិត្តពួកគេឲ្យពិចារណាអំពីចំណាប់អារម្មណ៍ដែលពួកគេអាចនឹងបានទទួលពីព្រះវិញ្ញាណអំឡុងពេលរៀនមេរៀនទាំងមូល ។ ផងដែរនៅក្នុង មេរៀន ៨៧ សិស្សបានពិនិត្យមើលគោលដៅសិក្សាព្រះគម្ពីររបស់ពួកគេឡើងវិញ គឺជារបៀបមួយដើម្បីចូលទៅជិតព្រះអម្ចាស់ ។ ប្រសិនបើមានប្រយោជន៍ ពួកគេអាចវាយតម្លៃពីរបៀបដែលគោលដៅរបស់ពួកគេកំពុងដំណើរការ ហើយសម្រេចចិត្តថាតើពួកគេចង់ប្រើគោលដៅរបស់ពួកគេនៅក្នុងផែនការនេះដែរឬទេ ។
សូមជ្រើសរើសអ្វីមួយដែលអ្នកអាចធ្វើបាន ដើម្បីស្វែងរកព្រះអម្ចាស់ ។ សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ។ ដាក់ផែនការពីរបៀបដែលអ្នកអាចបញ្ចូលសកម្មភាពនេះនៅក្នុងជីវិតរបស់អ្នក ។
-
តើអ្នកគិតថា ហេតុអ្វីសកម្មភាពនេះអាចជួយអ្នករកឃើញព្រះអម្ចាស់បន្ថែមទៀតក្នុងជីវិតរបស់អ្នក ?
-
តើឧបសគ្គអ្វីដែលអ្នកអាចប្រឈមនៅពេលអ្នកខិតខំធ្វើកិច្ចការនេះ ?
-
តើជំហានជាក់លាក់អ្វីខ្លះដែលអ្នកអាចធ្វើវាបាន ទោះបីមានឧបសគ្គទាំងនេះក៏ដោយ ?
សូមពិចារណាបញ្ចប់ថ្នាក់ដោយទីបន្ទាល់ផ្ទាល់ខ្លួនរបស់អ្នកអំពីពរជ័យនៃការស្វែងរកព្រះអម្ចាស់ ។