“Iloilo Lou Aoaoina 2: Kenese 12–50; Aperaamo 1–2,” Tusi Lesona a le Faiaoga Seminare o le Feagaiga Tuai (2026)
“Iloilo Lou Aoaoina 2: Kenese 12–50; Aperaamo 1–2,” Tusi Lesona a le Faiaoga Seminare o le Feagaiga Tuai
Kenese 42–50: Lesona 37
Iloilo Lou Aoaoina 2
Kenese 12–17; Aperaamo 1–2
O le manatunatu ma le iloiloina o lo tatou aoaoina faaleagaga e mafai ona fesoasoani ia tatou faalatalata atili atu ai i le Tama Faalelagi ma Iesu Keriso. Ua faamoemoe lenei lesona e fesoasoani ai i tagata aoga e mafaufau i sini ua latou faatuina ma le tuputupu ae na latou oo i ai i le taimi o la latou suesuega o le Kenese 12–50 ma le Aperaamo 1–2.
Sauniuniga a le tagata a’oga: Valaaulia tagata a’oga e o mai saunia e faasoa mai ni auala ua latou tuputupu a’e ai faaleagaga, mai le suesueina o le Feagaiga Tuai ma le Penina Tautele i lenei tausaga.E mafai ona e fautuaina i latou e iloilo a latou api talaaga mo suesuega po o faamaumauga i totonu o a latou tusitusiga paia e fesoasoani ia i latou e iloa ai lo latou tuputupu a’e ma le aoaoina.
Gaoioiga E Ono Mafai Ona Aoao Ai
O le suesuega a lau vasega o le Aperaamo 1–2 ma le Kenese 12–50 atonu na taulai atu i taunuuga eseese nai lo taunuuga o loo iloiloina i lenei lesona. Afai o lea, fetuunai gaoioiga e iloilo ai le tuputupu ae na oo i ai tagata aoga mai taunuuga na taulai atu i ai lau vasega.
I lenei lesona, o le a maua ai e tagata aoga le avanoa e iloilo ai lo latou alualu i luma i vaega nei e tolu:
-
Faamatala le taua o le faaipoipoga e faavavau i le fuafuaga a le Tama Faalelagi. (Manatua: O lenei gaoioiga e faavae i aoaoga mai le Lesona 9: “Kenese 1:28–2:25” ma le Lesona 29: “Kenese 24.”)
-
Lagonaina se manao faateleina e osia ma tausia feagaiga ma le Atua. (Manatua: O lenei gaoioiga e faavae i aoaoga mai le Lesona 23: “Kenese 12, 17” ma le Lesona 31: “Kenese 28.”)
-
Auai ai i le faapotopotoina o Isaraelu. (Manatua: O lenei gaoioiga e faavae i aoaoga mai le Lesona 24: “Aperaamo 2:9–11.”)
Avea atili e faapei o Iesu Keriso
O le faailoaina o le auala o loo latou tuputupu ae ai faaleagaga e mafai ona fesoasoani i tagata aoga i a latou taumafaiga ia avea ma soo o Iesu Keriso. Ina ia fesoasoani ia i latou e faia lenei mea, mafaufau e faaali nisi o ata nei: I se isi faiga, e mafai foi e tagata aoga ona tusi se ata o ni laau se lua i a latou api faamaumau mo suesuega: o se laau laitiiti ma se laau matua.
Manatu faapea o ata nei o le laau lava lea e tasi na pueina i se va o nai tausaga mai le tasi ma le isi. I a outou api faamaumau mo suesuega, lisi ai soo se faamaoniga e te vaaia o loo tuputupu ae le laau.
E mafai ona galulue tagata aoga i ni paga po o ni vaega toalaiti e faasoa mai a latou lisi ma tali fesili nei.
-
E mafai faapefea ona tatou faatusatusaina nei ata o se laau i lo tatou tuputupu ae faaleagaga ina ia avea atili ai e faapei o le Tama Faalelagi ma Iesu Keriso?
-
O a nisi o auala e mafai ona tatou iloa ai pe faapefea lo tatou tuputupu ae faaleagaga ma avea atili e faapei o le Tama Faalelagi ma Iesu Keriso?
Faamalamalama atu e mafai ona tatou iloa le tuputupu ae faaleagaga e ala i le toe iloiloina o mea ua tatou aoaoina e uiga i le Tama Faalelagi ma Iesu Keriso ma le auala ua fesoasoani ai ia i tatou e faaleleia atili la tatou sootaga ma i La’ua.
Valaaulia tagata aoga e faaalu ni nai minute e toe iloilo ai mea ua latou aoaoina ma faaaoga mai o latou aafiaga i le seminare i lenei tausaga. E mafai ona latou faia lenei mea e ala i le vaavaai i a latou tusitusiga paia ma faamatalaga.
-
O a mea o loo e aoaoina i le seminare o loo fesoasoani ia te oe e tuputupu ae faaleagaga ma avea atili ai e faapei o Iesu Keriso?
-
O le a se faamaoniga o le tuputupu ae faaleagaga ua e vaaia i lou olaga?
Faamatala le taua o le faaipoipoga e faavavau i le fuafuaga a le Tama Faalelagi
E mafai ona fesoasoani lenei gaoioiga i tagata aoga e faamatala ai le taua o le faaipoipoga e faavavau i le fuafuaga a le Tama Faalelagi. Valaaulia tagata aoga e vaai i le ata atonu na latou tusia i le Lesona 29: “Kenese 24.” Tuu atu i tagata aoga se taimi e toe iloilo ai mea na latou aoaoina e uiga i le faaipoipoga i le Lesona 9: “Kenese 1:28–2:25” ma le Lesona 29: “Kenese 24.”
E mafai e tagata aoga ona iloilo soo se faamatalaga po o ni malamalamaaga na latou faamaumauina i a latou api faamaumau mo suesuega. E mafai foi ona latou toe iloiloina fuaiupu nei ma soo se mea atonu na latou faailogaina ai:
Kenese 1:27–28
Kenese 2:18, 21–24
Mataupu Faavae ma Feagaiga 49:15–17
Mataupu Faavae ma Feagaiga 131:1–4
Ina ia fesoasoani i tagata aoga e faamatala lo latou malamalamaaga i le faaipoipoga e faavavau, faasoa atu se tulaga faataitai e pei o lenei. E mafai ona e fetuunaia lenei tulaga faataitai ina ia talafeagai ma manaoga o au tagata aoga.
I le aoga i le asō, sa tou talanoa ai ma nisi o uo e uiga i fuafuaga i le lumanai. Na e ta’ua le faaipoipoga o se tasi o au fuafuaga. Sa fesili se tasi o au uo: “E foliga mai e tele lou gafatia mo se matata. “Aisea e te manao ai e faaipoipo?
-
I le faaaogaina ai o mea ua e aoaoina e uiga i le faaipoipoga e faavavau i le fuafuaga a le Tama Faalelagi, o le a faapefea ona e tali atu i lau uo?
Atonu e faaalu e tagata aoga ni nai minute e fuafua ai a latou tali. Uunaia tagata aoga e sue ni nai mau na latou suesueina i le Feagaiga Tuai po o isi anotusi. Uunaia i latou e faasoa atu na mau o se vaega o le latou faamalamalamaga.
Mafaufau e faatulaga tagata aoga i ni paga. Valaaulia tagata aoga taitasi e faataitai le faamatalaina atu o mea latou te fai atu ai i a latou uo.
Lagona se manao faateleina e osia ma tausia feagaiga ma le Atua.
Atonu na tusia e tagata aoga se ata o le miti a Iakopo o se vaega o le Lesona 31: “Kenese 28.” E mafai ona latou faasino i a latou ata o se vaega o la latou toefaamanatuga o feagaiga. E mafai foi ona e faaali atu le ata lenei: Valaaulia tagata aoga e toe faamanatu mea latou te manatua mai le mea na tupu o loo faaalia e uiga i le osia ma le tausia o feagaiga (tagai foi i le Lesona 23: “Kenese 12, 17”). Afai e aoga, e mafai e tagata aoga ona toe iloilo le Kenese 28:10–21.
Atonu e te manao e faamanatu atu i tagata aoga e faapea na osia e Iakopo feagaiga ma le Atua ina ua tuua le fale o ona matua ma amata ai lona lava olaga. I le avea ai o se vaega o le Lesona 31: “Kenese 28,” na toe tomanatu ai tagata aoga i le avanoa o le a latou maua e osia ai feagaiga ma le Atua i le malumalu. Atonu na tusia e tagata aoga tali i a latou api faamaumau mo suesuega i fesili nei:
-
O a faamanuiaga folafolaina na e maua mai le taumafai ai e tausia au feagaiga ma le Atua po o le auauna atu i le malumalu?
-
O a ni tulaga e ono feagai ma oe i le lumanai ia o le a e manuia ai mai le tausiga ma le puipuiga ua folafola mai e le Atua i tagata o e osia feagaiga ma Ia?
Afai e talafeagai, valaaulia tagata aoga e toe iloilo tali na latou faamaumauina. Pe a uma o lava se taimi, tuu atu i tagata aoga ni pepa ma teutusi mo le gaoioiga lenei.
I le faaaogaina o mea ua e aoaoina e uiga i le osia ma le tausia o feagaiga ma le Atua, tusi se tusi ia te oe lava e mafai ona e tatalaina i le faaiuga o le aoga maualuga. Tusi e uiga i le mafuaaga e te lagona ai e taua le osia ma tausia feagaiga ma le Atua i le malumalu ma i lou olaga atoa. Ia aofia ai le auala e mafai ai e le osia o feagaiga ma le Atua ona faateleina lou mauaina o Lana taitaiga, tausiga, ma le puipuiga.
Auai ai i le faapotopotoina o Isaraelu
I le Lesona 24: “Aperaamo 2:9–11,” atonu na faia ai e tagata aoga se fuafuaga e auai i le faapotopotoina o Isaraelu. Afai o lea, tuu atu i tagata se taimi e iloilo ai a latou fuafuaga. Atonu na aofia i a latou fuafuaga ni auala e faasoa atu ai le talalelei, e fesoasoani ai i isi e osia pe tausia feagaiga ma le Alii, pe faamanuia isi e ala i galuega o le malumalu ma talafaasolopito o aiga. O tagata aoga e lei fatuina se fuafuaga e mafai ona faaaoga le ata lenei e amata ai ona faia se fuafuaga.
Atonu na e faia ni fuafuaga e auai ai i le faapotopotoina o Isaraelu. Tomanatu i nei fuafuaga e ala i le faatumuina o le ata nei i lau api faamaumau mo suesuega.
Valaaulia ni nai tagata aoga naunautai e faasoa mai po o a ni aafiaga na latou maua i le faatinoina o a latou fuafuaga ma pe na faapefea ona aafia i latou i na aafiaga. Fai atu i tagata aoga e faasoa mai pe na faapefea e le auai i le faapotopotoina o Isaraelu ona tosina ai o latou lagona mo le Tama Faalelagi ma Iesu Keriso.
Valaaulia tagata aoga e faaauau pea ona saili le fesoasoani a le Agaga Paia ia iloa auala e mafai ona latou auai ai i le faapotopotoina o Isaraelu. Uunaia tagata aoga atonu e lei faatinoina se fuafuaga e amata nei loa. Molimau atu i faamanuiaga o le a tuuina mai e le Alii ia i latou ma isi a o latou faataunuuina a latou fuafuaga.