Tusi Lesona a le Faiaoga Seminare o le Feagaiga Tuai

Anotusi
Itulau Autu
Faatomuaga i le Tusi Lesona a le Faiaoga
Lesona o le Feagaiga Tuai
- Faafeiloai Atu Mai le Feagaiga Tuai
- Mose 1; Aperaamo 3
- Kenese 1–2; Mose 2–3; Aperaamo 4–5
- Kenese 3–4; Mose 4–5
- Kenese 5; Mose 6
- Mose 7
- Kenese 6–11; Mose 8
- Kenese 12–17; Aperaamo 1–2
- Kenese 18–23
- Kenese 24–33
- Kenese 37–41
- Kenese 42–50
- Esoto 1–6
- Eseta
- Esoto 7–13
- Esoto 14–18
- Esoto 19–20; 24; 31–34
- Esoto 35–40; Levitiko 1; 4; 16; 19
- Numera 11–14; 20–24; 27
- Teuteronome 6–8; 15; 18; 29–30; 34
- Iosua 1–8; 23–24
- Faamasino 2–4; 6–8; 13–16
- Ruta; 1 Samuelu 1–7
- 1 Samuelu 8–10; 13; 15–16
- 1 Samuelu 17–18; 24–26; 2 Samuelu 5–7
- 2 Samuelu 11–12; 1 Tupu 3; 6–9; 11
- 1 Tupu 12–13; 17–22
- 2 Tupu 2–7
- 2 Tupu 16–25
- 2 Nofoaiga a Tupu 14–20; 26; 30
- Esera 1; 3–7; Neemia 2; 4–6; 8
- Eseta
- Iopu 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Fa’ataoto 1–4; 15–16; 22; 31; Failauga 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Ieremia 1–3; 7; 16–18; 20
- Ieremia 31–33; 36–38; Auega 1; 3
- Esekielu 1–3; 33–34; 36–37; 47
- Tanielu 1–7
- Hosea; Ioelu
- Amosa; Opetaia; Iona
- Mika; Nauma; Sapakuka; Sefanaia
- Hakai 1–2; Sakaria 1–4; 7–14
- Malaki
Lesona o Sauniuniga mo le Olaga
- Atamai i Aoaoga Faavae: Mauaina o Tali i A’u Fesili
- Tomai i Suesuega o Tusitusiga Paia
- Taiala Mo Le Malosi o le Autalavou
- Atinaega o le Ola Tutoatasi o le Tagata Lava Ia
- Soifua Maloloina Faaletino ma Faalelagona
- Sauniuni mo Aoaoga ma Galuega i le Lumanai
- Faamanuiaina i le Aoga
- Sauniuniga Faafaifeautalai
- Sauniuniga mo le Malumalu
- Aoaoga a Taitai o le Ekalesia
Faaopoopoga

Kenese 42–45: “O A’u o Lo Outou Uso o Iosefa”

“Kenese 42–45: ‘O A’u o Lo Outou Uso o Iosefa,’” Tusi Lesona a le Faiaoga Seminare o le Feagaiga Tuai (2026)

“Kenese 42–45: ‘O A’u o Lo Outou Uso o Iosefa,’” Tusi Lesona a le Faiaoga Seminare o le Feagaiga Tuai

Kenese 42–45: Lesona 35

Kenese 42–45

“O A’u o Lo Outou Uso o Iosefa”

A painting by Ted Henninger showing Joseph of Egypt surrounded by his brothers, smiling and showing forgiveness toward them.

I le tele o tausaga talu ona faatau atu o ia i Aikupito o se pologa, na toe faatasia ai Iosefa ma ona uso. Sa mafai lava ona ia lagonaina le ita ma le faataute’e ona o mea uma na ia mafatia ai. Peitai, e faapei o le Faaola, sa filifili Iosefa e tuuina atu le alofa mutimutivale ma le faamagaloga i ona uso o e na agaleaga ia te ia. O lenei lesona e mafai ona fesoasoani i tagata aoga e mulimuli ai i le faataitaiga a le Faaola e ala i le loto faamagalo atili.

Sauniuniga a le tagata a’oga: Valaaulia tagata a’oga e mafaufau loloto i le poloaiga a le Faaola e “faamagalo atu i tagata uma” (Mataupu Faavae ma Feagaiga 64:10).Faatonu i latou e fai se lisi o ni o latou faamanuiaga, po o faamanuiaga o isi e ala i le faamagaloina atu i se tasi.

Gaoioiga E Ono Mafai Ona Aoao Ai

Iosefa o Aikupito

Ina ia amata le vasega, mafaufau e valaaulia tagata aoga e toe iloilo puupuu le tala ia Iosefa o Aikupito i le Kenese 37–41. E mafai ona e fai atu ia i latou e aotele mai amioga agaleaga a uso o Iosefa ma mea na tutupu na oo atu ai i le tulaga o Iosefa o se pulelua ia Aikupito atoa.

O ata faafuainumera o loo maua i le Lesona 33: Kenese 37–41 e mafai ona faaaoga e fesoasoani ai i tagata aoga e aotele le tala.

O a nisi o auala na mafatia ai Iosefa ona o amioga a ona uso?
O le a sou lagona e uiga i se tagata na te faia ni mea faapea ia te oe?
O le a se mea e faafaigata ai ona faamagalo atu i se isi tagata?

Mafaufau i le auala e masani ona e tali atu ai pe a faia, pe fai mai foi e se tasi se mea e faatiga ia te oe. A o e suesue i le aso, ia gauai atu ma le toto’a i soo se uunaiga e te ono maua mai le Agaga Paia e fesoasoani ia te oe e iloa ai le auala e mafai ona e mulimuli ai i le faataitaiga a le Faaola e faamagalo atu.

Sa toefaatasia Iosefa ma ona uso.

Toe iloilo aotelega nei ma suesue fuaiupu o loo avatu faatasi ai.

Aotelega 1: I le tele o tausaga talu ona latou faatauina atu Iosefa o se pologa, na malaga atu ai ona uso i Aikupito e sa’ili se mapusaga mai se oge. O le tuuina atu o i latou lava i luma o Iosefa, lea ua i le tulaga lua nei i le taitaiga o Aikupito uma, sa le iloa o ia e ona uso. Ona sa latou le iloaina na iloa ma malamalama Iosefa ia i latou, na faailoa atu ai e uso lo latou faanoanoa ma le loto salamo mo mea na latou faia i tausaga ua mavae ia te ia.

Faitau le Kenese 42:21–24, ma vaavaai pe na faapefea ona tali atu Iosefa i le faalogo atu i ona uso o talanoa e uiga i le auala na latou taulimaina ai o ia.

Aotelega 2: Sa saunia e Iosefa meaai mo le aiga ae sa faafalepuipuiina Simeona ma faatonu isi uso e aua nei toe foi atu i Aikupito sei vagana ua latou aumaia le uso laitiiti, o Peniamina, faatasi ma i latou. Na toe foi atu uso i lo latou fale, ae ina ua toe leai ni meaai a le aiga, sa latou toe foi atu i Aikupito ma Peniamina.

Faitau le Kenese 43:30, ma vaavaai pe o a uiga faaalia o Iosefa i le vaai atu i lona uso o Peniamina.

Aotelega 3: Sa tofotofoina e Iosefa le alofa o ona uso mo Peniamina e ala i le tuuaia o ia i le gaoi ma le taufaamatau e lafo o ia i le falepuipui. Na ofoina atu e Iuta lona ola e sui ai le ola o Peniamina.

Faitau le Kenese 45:1–2, ma vaavaai pe o a uiga faaalia o Iosefa ina ua uma ona ofo atu Iuta e tuuina atu lona ola e puipuia ai Peniamina.

A uma ona maua e tagata aoga se avanoa e suesue ai aotelega, e mafai ona e valaaulia i latou e talanoaina le fesili lenei.

O le a se mea semanu e fesoasoani mo Iosefa e manatua ai e uiga i le Tama Faalelagi ma Iesu Keriso a o fegalegaleai o ia ma ona uso?

O le Tama Faalelagi ma Iesu Keriso e faamagalo

O mau nei o loo faaalia ai le natura faamagalo o le Tama Faalelagi ma Iesu Keriso. E mafai ona e faaali atu nei mau mo tagata aoga e suesue ai pe fai atu foi ia i latou e sue a latou lava fuaitau o mau e uiga i le natura faamagalo o le Tama Faalelagi ma Iesu Keriso.

Faitau mau nei, ma vaavaai mo mea o le a fesoasoani mo se tasi ua sauaina e iloa ai e uiga i le Tama Faalelagi ma Iesu Keriso.

Luka 6:36

Efeso 4:31–32

Kolose 3:13

O a ni mea o le a e faasoa atu mai i nei fuaiupu?

Faitau le Kenese 45:3–8 ma le 9–15, ma vaavaai pe na faapefea ona tali atu Iosefa i ona uso.

O le a se mea tatou te aoaoina e uiga i le avea ai e faapei o le Tama Faalelagi ma Iesu Keriso mai i le faataitaiga a Iosefa?

E ono faailoa mai e tagata a’oga ni upumoni eseese. Faafetai atu ia i latou mo mea latou te faasoa mai ma fesili atu ia i latou pe aisea latou te lagona ai o se aoaoga faavae po o se mataupu faavae taua e ao ona tatou iloa. Afai e le o ta’ua e tagata aoga, faasoa atu le upumoni lenei ma tusi i luga o le laupapa: Tatou te avea e faapei o le Tama Faalelagi ma Iesu Keriso a o tatou faamagalo atu i isi.

O le faalagolago i le Faaola, e mafai ai ona tatou faamagalo atu i isi

Na fesoasoani Peresitene Russell M. Nelson ia i tatou ia malamalama i le auala tatou te faalagolago ai i le mana o le Faaola pe a tatou faamagalo atu i isi.

17:18

Afai e foliga mai e faafaigata ona faamagalo atu, aioi atu mo le mana e ala i le toto togiola o Iesu Keriso e fesoasoani ia te oe. A e faia lenei mea, ou te folafola atu le filemu patino ma se puna tele o le malosiaga faaleagaga.

Ina ua togiola le Faaola mo tagata uma, sa Ia tatalaina se ala ina ia mafai ai e i latou o ē mulimuli ia te Ia ona maua Lona mana faamalolo, [mana] faamalosiau, ma le [mana] togiola. O nei faamanuiaga faaleagaga ua avanoa i tagata uma o ē saili e faalogo ia te Ia ma mulimuli ia te Ia. (“O Le Mana o le Malosiaga Faaleagaga,” Liahona, Me 2022, 100)

E mafai faapefea e aoaoga a Peresitene Nelson ona fesoasoani ia i tatou e faamagalo atu ai i isi?
O le a se mea e te fautuaina se tasi e fai pe afai o loo tauivi e faamagalo atu? O le a se mea e te fautuaina i latou e fai e faalagolago ai i le Faaola?

Afai e manaomia e tagata aoga se fesoasoani i le fesili mulimuli, e mafai ona e fautuaina i latou e vaai i le fautuaga a le Alii i le Mataupu Faavae ma Feagaiga 64:9–11, aemaise lava le fuaiupu 11.

Mafaufau e valaaulia tagata aoga e faasoa mai se aafiaga lea na mafai ai e i latou po o se tasi latou te iloa ona faamagalo atu. Atonu e fesoasoani le faamanatu atu i tagata aoga e aua nei faasoaina atu ni faamatalaga e ono patino tele ia i latou po o se tasi latou te iloa. Atonu foi e te manao e faasoa atu sou lava aafiaga.

Fesoasoani ia i tatou ia faamagalo atu ma le lē mataofiofia

Ina ia fesoasoani i tagata aoga e toe mafaufau i mea ua latou aoaoina ma lagonaina e uiga i le avea ai faapei o le Tama Faalelagi ma Iesu Keriso, e mafai ona e faaali atu nisi o gaoioiga nei mo tagata aoga e faamaea i a latou apifaamaumau mo suesuega.

Mafaufau loloto ma le agaga tatalo i soo se uunaiga na e mauaina a o e suesue i le asō. Valaaulia le Agaga Paia e fesoasoani ia te oe ia iloa soo se suiga e tatau ona e faia. Ole atu i le Tama Faalelagi e fesoasoani ia faateleina lou gafatia e faamagalo atu i isi.

Filifili se tasi o gaoioiga nei e fai i lau apifaamaumau mo suesuega.

Tusi se parakalafa puupuu e aotele ai le auala na faamanuiaina ai oe e au taumafaiga e faamagalo atu i isi. Lisi mea na e faia e faaaofia ai le Faaola i au taumafaiga. O le a se mea e te lagona e taua ona e manatua i le isi taimi e te manaomia ai ona faamagalo atu i se tasi?
Mafaufau ma le agaga tatalo pe o i ai se tasi i lou olaga e manaomia ona e faamagalo atu i ai. Tusi se parakalafa puupuu e faailoa ai ou lagona e uiga i le faamagaloina o lena tagata. O le a se mea ua e iloa atonu o loo taotaomia ai lou gafatia e faamagalo atu? Lisi nisi o auala e mafai ona e sailia ai le fesoasoani a le Faaola i au taumafaiga.
Tusi se faamatalaga e mafai ona fesoasoani i se uo o loo tauivi e faamagalo se tasi. Faamatala faapuupuu pe na faapefea ona pei le filifiliga a Iosefa e faamagalo atu i ona uso o le Faaola. Ia faaaofia ai se mau sa taua ia te oe i au taumafaiga e faamagalo atu i isi.

E mafai ona e valaaulia ni nai tagata aoga naunau e faasoa mai mea na latou tusia. Mafaufau e faaiu le lesona i le valaaulia o tagata aoga e faatino soo se uunaiga faaleagaga atonu na latou mauaina. E mafai ona e faasoa atu lau molimau i faamanuiaga o loo i ai pe a tatou mulimuli i le faataitaiga a le Faaola e faamagalo atu i isi.

Punaoa Faaopoopo

O le a se isi mea e tatau ona ou manatua a o ou galue ai e faamagalo atu i isi?

16:12

Na faamanatu mai ia i tatou e Peresitene Jeffrey R. Holland o le Korama a Aposetolo e Toasefululua:

“Faamagalo atu, ona faamagaloina ai lea o outou,” sa aoao mai ai Keriso i le vaitaimi o le Feagaiga Fou. Ma i o tatou aso: “O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.” Ae peitai, e taua mo nisi o outou o loo ola i le tiga moni e maitau mea sa le’i fetalai iai o Ia. Sa le’i fetalai mai o Ia, “E le faatagaina outou e lagonaina le tiga moni po o le faanoanoaga moni mai aafiaga matuitui na e oo i ai mai lima o isi.” Pe na Ia fetalai foi, “Ina ia mafai ona faamagalo atu atoatoa, e ao ona e toe faia se sootaga faatiga pe toe foi atu i se tulaga faasaua, ma faataumaoi.” Ae e ui i ni faatiga sili ona ogaoga e ono oo mai ia i tatou, e mafai lava ona tatou tutulai a‘e i o tatou tiga pe afai tatou te savavali i luga o le ala i le faamalologa moni. O lena ala o le faamagaloga lea sa savalia e Iesu o Nasareta, lea o loo valaau mai ia i tatou taitoatasi, “Sau, mulimuli mai ia te a’u.” (“O Le Galuega o le Faaleleiga,” Liahona, Nov. 2018, 78- 79)

E mafai faapefea e le Faaola ona faamanuia a‘u pe a ou faamagalo atu i isi?

Na aoao mai Peresitene Russell M. Nelson:

“Lo’u Tama e, ia e faamagaloina atu ia te i latou; aua ua latou le iloa le mea ua latou faia.” (Luka 23:34).

“O nei upu, na gagana mai e le Faaola o Iesu Keriso a o tautau o Ia i luga o le satauro, ua tuuina mai ai ia i tatou se mamanu e mulimuli ai i o tatou lava olaga. Sa Ia aoaoina i tatou ia alolofa i o tatou fili, ia faia mea lelei i e inoino mai ia i tatou, ma tatalo mo e tuuaifua ma faasaua ia i tatou.

“Pe a tatou filifili e faamagalo atu i isi, ua tatou faataga le Alii e aveese le oona mai o tatou agaga. Ua tatou faataga o Ia e faafilemu ma faamaluluina o tatou loto tatou te vaai atu ai i isi, aemaise e na faia ni mea sese ia i tatou, o ni fanau a le Atua, ma o ni o tatou uso ma tuafafine.

… Ou te valaaulia outou ia mafaufau ma le agaga tatalo pe i ai se tasi e tatau ona e faamagalo atu i ai po o se tasi e tatau ona e ole atu e faamagalo ia te oe. Ou te folafola atu [a e faamagalo atu], o le a aveesea e le Faaola lou ita, lē fiafia, ma le tiga. O le a aumaia e le Aloalii o le Filemu ia te oe le filemu.

… Ia tatou liliu atu i le Alii toetu a o Ia fesoasoani mai ia i tatou ia lagona le olioli ma le vavega o le faamagalo atu. (Facebook, Ape. 2, 2023, facebook.com/russell.m.nelson)

Gaoioiga Faaopoopo e Aoao Ai

Kenese 48–49; Faamanuiaga o le perisitua

Manatua: O le faamanuiaina e Iakopo o ona atalii i faamanuiaga faapeteriaka o le a aoaoina o se vaega o le lesona O Faamanuiaga Faapeteriaka . O lenei gaoioiga e taulai atu i faamanuiaga faaleperisitua i se tulaga lautele.

Ina ia fesoasoani i tagata aoga ia malamalama i le mana o faamanuiaga o le perisitua, e mafai ona e valaaulia tagata aoga e faitau le Kenese 48:8–16, ma vaavaai mo faamanuiaga o le perisitua na tuuina atu e Iakopo (ua faaigoa nei o Isaraelu) ia Iosefa, Efaraima, ma Manase.

Na faapefea ona faamanuiaina oe po o se isi e te iloa e ala i faamanuiaga o le perisitua?

E mafai e tagata aoga ona faasoa mai ni aafiaga e aofia ai faamanuiaga a tamā, faamaloloina o e mamai, po o le vaetofiaina mo valaauga po o faauuga. Valaaulia tagata aoga e faasoa mai pe na faapefea ona fesoasoani faamanuiaga o le perisitua ia i latou e lagona ai le latalata atili atu i le Tama Faalelagi ma Iesu Keriso. Atonu e te faamanatu atu i tagata aoga na aoao mai Peresitene Dallin H. Oaks o le Au Peresitene Sili:

E tatau foi i tamā ona faafaileleina sootaga alofa faaleaiga ina ia mananao ai tagata o le aiga e talosaga atu i o latou tamā mo ni faamanuiaga. Ma e tatau i matua ona faamalosia atili faamanuiaga faaleperisitua i totonu o le aiga. (“O Mana o le Perisitua,” Liahona, Me 2018, 67).

O le avega mamafa o le musu e faamagalo atu

Afai e manuia tagata aoga mai le malamalama i le avega mamafa e le manaomia tatou te tauaveina pe a tatou mumusu e tuuina atu le faamagaloga, e mafai ona e faaalia le lesona o mea faitino lenei.

Fai atu i tagata aoga e fai se vaalele pepa. Ona faapipii lea o se tupe siliva, maa, po o se fasimea mamafa i le tasi itu o le vaalele. Fai atu i tagata aoga e togi lemu le vaalele agai i le isi itu o le potu. Ona sosoo ai lea, piki i luga le vaalele ma aveese le mea faitino sa faapipiiina i ai. Tuu atu i le tagata aoga na te toe togi le vaalele. E mafai ona e valaaulia tagata aoga e faasoa mai pe faapefea ona faaalia i lenei lesona o mea faitino le manaomia ona faamagalo atu. O fesili o talanoaga e mafai ona aofia ai:

E mafai faapefea e le fasimea mamafa laitiiti e tasi ona taofia le vaalele mai le lele sao? E mafai faapefea ona pei lenei mea o le musu e faamagalo atu?
A o tatou galulue i le faatuatua e faamagalo atu i se tasi, e mafai faapefea e le Faaola ona faamanuiaina a tatou taumafaiga?

Iosefa o se faatusa o Keriso

I le Lesona 33: Kenese 37–41, atonu na fatuina ai e tagata aoga se siata e fesoasoani ia i latou e faailoa ai auala o Iosefa o se faatusa o Keriso. Ina ia faaopoopo atu i a latou suesuega, mafaufau e faaali atu le siata lenei ae tau lava na o mau faasino. E mafai ona e valaaulia tagata aoga e aotele ia fuaitau faatasi ma se paga po o se vaega. O le vaai atu i le soifuaga o Iosefa o se faatusa ma se atalafoia o Keriso e mafai ona fesoasoani i tagata aoga e iloa ai Lona mana pe a latou feagai ma luitau.

Iosefa o Aikupito	Iesu Keriso
Iosefa o Aikupito Kenese 45:3–5 (Na faamagalo e Iosefa i latou o e na faia ni mea sese ia te ia)	Iesu Keriso Mosaea 26:30
Iosefa o Aikupito Kenese 45:1–5 (Ua faaali atu Iosefa o ia lava i ona uso ina ua latou o mai i le taimi lona lua)	Iesu Keriso Mataio 24:30–31
Iosefa o Aikupito Kenese 47:13–19 (Ua laveai e Iosefa tagata i meaai)	Iesu Keriso Ioane 6:35, 51