“Faaliliuga a Iosefa Samita Kenese 50: ‘O Le a Faatuina Ae e le Alii Lo’u Atua se Tagatavaai,” Tusi Lesona a le Faiaoga Seminare o le Feagaiga Tuai (2026)
“Faaliliuga a Iosefa Samita Kenese 50: ‘O Le a Faatuina Ae e le Alii Lo’u Atua se Tagatavaai,” Tusi Lesona a le Faiaoga Seminare o le Feagaiga Tuai
Kenese 42–50: Lesona 36
Faaliliuga a Iosefa Samita, Kenese 50
“O Le a Faatuina Ae e le Alii Loʼu Atua se Tagatavaai”
A o lei leva ae maliu o ia, sa valoia ai e Iosefa o Aikupito e faapea, i aso e gata ai o le a faatuina ae ai e le Alii ia Iosefa Samita e fai Lana galuega. E mafai ona tatou maua la tatou lava molimau faapea o Iosefa Samita o le auauna a le Alii. E mafai ona fesoasoani lenei lesona i tagata aoga e faamalosia a latou molimau faapea na valaauina e le Alii ia Iosefa Samita e avea ma perofeta.
Sauniuniga a le tagata a’oga: Valaaulia tagata a’oga e tusi i lalo mea na faia e le Perofeta o Iosefa Samita ua fesoasoani ia i latou e latalata atili atu ai ia Iesu Keriso.Latou te ono fai atu i se isi o le aiga po o se uo e faasoa mai foi o latou manatu ma lagona.
Gaoioiga E Ono Mafai Ona Aoao Ai
Laveaiina o tagata o le Alii
Mafaufau e faaali atu ata o Iosefa i Aikupito ma Mose. Fai atu i tagata aoga e faailoa mai pe na faapefea ona faaaoga e le Alii nei tagata taitoatasi e avea ma se laveai (o se tagata e laveaiina isi). O le isi, faaali atu le ata o Iosefa Samita ma fesili atu i tagata aoga pe na faapefea ona faaaoga o ia e le Alii e fai ma laveai. Ma le mea mulimuli, faaali atu se ata o Iesu Keriso, le Faaola, ma talanoaina auala e laveai ai i tatou e Iesu Keriso.
A uma ona faasoa mai e tagata aoga o latou manatu, faaaoga ata ma le parakalafa o loo i lalo e aotele ai mea na tutupu atoa ma valoaga i le Faaliliuga a Iosefa Samita o le Kenese 50.
I le taufaaiuga o lona soifua, na valoia ai e Iosefa o Aikupito o le a faatuina ae e le Alii ni perofeta se toalua, o e e tupuga mai ia Iakopo, e fesoasoani e laveai Lona nuu mai le pologa. O le a sau Mose e laveai le fanauga a Isaraelu mai le nofopologa faaletino i Aikupito (tagai i le FIS Kenese 50:24, 29). Ona oo lea, i aso e gata ai, o le a laveai ai e le Alii, Lona nuu mai le pogisa faaleagaga e ala mai i le Perofeta o Iosefa Samita.
Ina ia fesoasoani i tagata aoga e toe iloilo i mea ua latou iloa ma talitonu ai e uiga ia Iosefa Samita, mafaufau e valaaulia i latou e tali mai fesili nei i a latou api faamaumau mo suesuega.
-
O a ni manatu po o lagona e oo atu pe a e mafaufau e uiga i le Perofeta o Iosefa Samita?
-
E faapefea ona e faamatalaina le tulaga o i ai nei lau molimau faapea na valaauina o ia e le Atua e avea ma perofeta?
A o e suesue i le aso, faalogologo mo uunaiga mai le Agaga e faamautu ai na valaauina e le Alii ia Iosefa Samita e avea ma se perofeta. E mafai e le Tama Faalelagi ona auina atu manatu i lou mafaufau po o lagona i lou loto e ala i le Agaga Paia e tau atu ai ia te oe o mea o loo e suesueina e moni.
Ua vavalo Iosefa o Aikupito e uiga ia Iosefa Samita
Valaaulia tagata aoga e fatu se siata avanoa e talitutusa ma lea o loo i lalo i a latou api faamaumau mo suesuega. E mafai ona galulue tagata aoga i ni paga po o ni vaega toalaiti e faatumu le siata. E mafai ona e faaaogaina faamatalaga o loo tuuina atu i le siata e faaali atu ai le auala e mafai ona faia ai lenei mea ma fesoasoani ai i tagata aoga e mauaina tali a o manaomia ai.
E mafai ona e fesoasoani i tagata aoga e sue le Faaopoopoga o le Faaliliuga a Iosefa Samita i a latou tusitusiga paia po o Fesoasoaniga mo Suesuega i le Potutusi o le Talalelei.
E ono mafai foi ona e faamanatu atu i tagata aoga o se tagatavaai o se talifaaaliga ma se perofeta na te iloa le taimi ua tuanai, taimi nei, ma le lumanai (tagai Mosaea 8:17), o le “fua o ou sulugatiti” (FIS Kenese 50:27) e faatatau i fanau ma tupuaga o Iosefa o Aikuptio, o tusitusiga a fanau a Iosefa e faatatau i le Tusi a Mamona, ma o tusitusiga a fanau a Iuta e faatatau i le Tusi Paia (tagai FIS Kenese 50:31).
Faitau le Faaliliuga a Iosefa Samita Kenese 50:26–33 e faatumu ai le siata lenei.
|
Valoaga e uiga ia Iosefa Samita (e aofia ai le fuaiupu): |
O auala na ono faataunuuina ai lenei valoaga: |
|---|---|
Valoaga e uiga ia Iosefa Samita (e aofia ai le fuaiupu): “E ao ona faamamaluina tele o ia” (fuaiupu 27) | O auala na ono faataunuuina ai lenei valoaga: E faitau miliona tagata talitonu e manatu o Iosefa Samita o le Perofeta o le Toefuataiga. |
Valoaga e uiga ia Iosefa Samita (e aofia ai le fuaiupu): “Na te aumaia i latou i le malamalama o feagaiga na ou faia ma ou tama” (fuaiupu 28) | O auala na ono faataunuuina ai lenei valoaga: E ala mai i le perisitua toefuataiina, e mafai ai ona tatou osia feagaiga ma le Atua e ala i le papatisoga ma isi sauniga. O se tasi o faamoemoega o le Tusi a Mamona o le aumaia lea o le Aiga o Isaraelu i se malamalamaaga o feagaiga a le Alii. |
Valoaga e uiga ia Iosefa Samita (e aofia ai le fuaiupu): “Ou te tuuina atu ia te ia le mana e aumai ai la’u upu” (fuaiupu 30) | O auala na ono faataunuuina ai lenei valoaga: Na faaali mai e le Alii le Tusi a Mamona, le Mataupu Faavae ma Feagaiga, le Faaliliuga a Iosefa Samita, ma isi tusitusiga musuia e ala mai ia Iosefa Samita. |
Valoaga e uiga ia Iosefa Samita (e aofia ai le fuaiupu): “E afua mai i le vaivai e ao ina faamalosia ai o ia” (fuaiupu 32) | O auala na ono faataunuuina ai lenei valoaga: Mai amataga faatauvaa ma le itiiti o aoaoga aloaia, na avea ai Iosefa Samita ma se perofeta malosi. |
Valoaga e uiga ia Iosefa Samita (e aofia ai le fuaiupu): “E faafememeaiina i latou o e saili e faaumatia o ia” (fuaiupu 33) | O auala na ono faataunuuina ai lenei valoaga: O i latou o e saili e faaleaga Iosefa Samita ma lana galuega o le a le faamanuiaina. |
I le avea ai o se vaega o lau talanoaga, e mafai ona e faasino atu o le fuaitau “faatuina ae” e faafitu ona faaaoga i nei fuaiupu. O nisi o uiga e ono i ai mo lenei fasifuaitau o le valaauina, filifilia, pe saunia e fai se galuega o le a aumaia ai tagata o le Alii i le faaolataga (fuaiupu 33). E mafai foi ona e valaaulia tagata aoga e faailoa mai se isi mamanu e ala i le faailogaina o taimi taitasi e iloa ai o le Alii o loo ia ona faia le faatinoga, e pei o le “ou te faatuina ae” (fuaiupu 27) po o le “ou te tuuina atu le mana” (fuaiupu 30).
-
O a ni valoaga e tumatila ia te oe i totonu o nei fuaiupu? Aisea?
O nisi o upumoni e ono faailoa mai e tagata aoga, faasino atu le mea lenei: Na filifilia ma saunia e le Alii ia Iosefa Samita e aumaia le Tusi a Mamona. Valaaulia le vasega e mafaufau e tusi le mau lea i autafa o le fuaiupu 30–33.
-
O a upumoni e mafai ona e faailoa mai e uiga i le Alii mai mea na e suesueina e uiga ia Iosefa Samita?
-
E te manatu e faapefea ona aumaia e le Tusi a Mamona tagata o le Alii i le faaolataga?
-
Ua faapefea ona faamanuiaina lou olaga e le Tusi a Mamona?
Mauaina o se molimau faaleagaga i le Perofeta o Iosefa Samita
Na aoao mai Elder Neil L. Andersen o le Korama a Aposetolo e Toasefululua:
E manaomia e tagata talitonu taitasi se faamaoniga faaleagaga e uiga i le misiona paia ma le ituaiga tagata e i ai le Perofeta o Iosefa Samita. E moni lenei mea mo augatupulaga uma. (“Iosefa Samita,” Liahona, Nov. 2014, 29–30)
-
Aisea e te manatu ai e taua mo i tatou taitoatasi ona maua se faamaoniga faaleagaga mai le Tama Faalelagi, e ala i le Agaga Paia, e uiga i le misiona paia a Iosefa Samita?
Faasoa atu le saunoaga lenei a Elder Andersen pe faaali le vitio “Iosefa Samita” ChurchofJesusChrist.org mai le faailo taimi o 11:44 i le 12:48.
Na faasoa mai e Elder Andersen ni auala se lua e mafai ona tatou maua pe faamalosia ai la tatou molimau i le Perofeta o Iosefa Samita.
Mo le autalavou o loo faalogologo mai i lenei aso pe o faitauina nei upu i aso o i luma, ou te tuuina atu se lui faapitoa: Ia maua sau oe lava molimau e uiga i le Perofeta o Iosefa Samita. Tuu atu lou leo e fesoasoani i le faataunuuina o upu faavaloaga a Moronae ina ia tautala i upu lelei e uiga i le Perofeta. O manatu nei e lua: Muamua, saili ni mau i le Tusi a Mamona e te lagona ma iloa e matuai moni lava. Ona faasoa atu lea i le aiga ma uo i le afiafi faaleaiga, seminare, ma a outou vasega o Alii ma Tamaitai Talavou, faailoa atu ai o Iosefa sa avea ma se meafaigaluega i aao o le Atua. O le isi, faitau le molimau a le Perofeta o Iosefa Samita i le Penina Tau Tele. … O le molimau lenei a Iosefa e uiga i le mea tonu lava na tupu. Faitau soo i ai. (“Iosefa Samita,” Liahona, Nov. 2014, 30)
A uma ona faasoa atu lenei faamatalaga, valaaulia tagata aoga e filifili se tasi o fautuaga a Elder Andersen e faamalosia ai la latou molimau patino faapea na valaauina e le Alii ia Iosefa Samita e avea ma perofeta.
Filifiliga 1: Saili se mau se tasi pe sili atu ona anoa patino i le Tusi a Mamona. Fai se ata pe tusi se parakalafa e faapupula ai lau filifiliga. Ia faaaofia ai ou manatu ma lagona e uiga i le auala e fesoasoani ai le Tusi a Mamona ma ona aoaoga ia te oe e aoao ai e uiga i le Faaola ma alofa ia te Ia. Ia faaaofia ai foi le auala e fesoasoani ai lenei mea e faamautu ai o Iosefa o se meafaigaluega i aao o le Atua.
Filifiliga 2: Faitau le molimau a Iosefa Samita e pei ona faamaumauina i le Talafaasolopito o Iosefa Samita 1:15–20 ma le molimau a Iosefa Samita o loo faamaumauina i le Mataupu Faavae ma Feagaiga 135:3. Fai se ata pe tusi se parakalafa e uiga i mea ua e aoaoina ma lagonaina e uiga i le auala na filifilia ma saunia ai e le Faaola ia Iosefa Samita e avea ma perofeta o le Toefuataiga.
Molimau e uiga i le Perofeta o Iosefa Samita.
A maea le gaoioiga a tagata aoga, valaaulia i latou e faasoa mai mea na latou fatuina ma se tagata o le vasega.
Ona mafai lea ona e valaaulia ni nai tagata aoga naunautai e molimau atu e uiga i le auala na valaauina ai e Iesu Keriso ia Iosefa Samita e avea ma perofeta. E mafai ona fesoasoani fesili nei.
-
O le a se mea ua e aoaoina i lenei aso lea ua faamalosia ai lau molimau e uiga ia Iosefa Samita?
-
E faapefea e le i ai o se molimau ia Iosefa Samita ona faamalosia ai lau molimau ia Iesu Keriso?
Mafaufau e faaiu i lau molimau i le galuega na faia e le Alii e ala mai ia Iosefa Samita. Valaaulia tagata aoga e faaauau pea ona faalogologo mo uunaiga mai le Agaga ia iloa ai mo i latou lava na valaauina e Iesu Keriso ia Iosefa Samita e avea ma perofeta.