Kapitulo 51
Agsagaba ni Jesus iti Minuyongan ti Getsemani
Napan ni Jesus ken dagiti Apostol iti Minuyongan ti Getsemani. Saan a kimmuyog ni Judas kadakuada. Napanna imbaga kadagiti dadaulo a Judio no sadino ti yan ni Jesus.
Mateo 26:36; Marcos 14:43; Juan 18:2–3
Kiniddaw ni Jesus kada Pedro, Santiago, ken Juan a kumuyogda Kenkuana iti minuyongan. Indawatna kadakuada nga aguray bayat ti panagkararagna.
Mateo 26:36–39; Marcos 14:33–35
Ammo ni Jesus a kasapulanna ti agsagaba para kadagiti basol ti amin a sangkataw-an. Saanna a kayat ti agsagaba, ngem pinilina ti agtungpal iti Nailangitan nga Ama.
Mateo 26:39–44
Nakaturog da Pedro, Santiago, ken Juan kabayatan ti panagkararag ni Jesus. Dimteng ni Jesus ket nasarakanna ida a matmaturog. Indawatna kadakuada nga agtalinaedda a siririing.
Mateo 26:40–41
Napan Isuna manen nagkararag. Tinarigagayan da Pedro, Santiago, ken Juan ti agtalinaed a siririing, ngem nabannogda unay. Nakaturogda manen. Nakita ni Jesus manen ida a matmaturog. Napan Isuna ket nagkararag iti maikatlo a gundaway.
Mateo 26:42–44
Bayat ti panagkararag ni Jesus, nangrugi a nagtigerger gapu iti saem. Dimteng ti maysa nga anghel a nangpabileg Kenkuana. Nagsagaba iti kasta unay tapno agling-et iti kasla dagiti tedted ti dara. Nagsagsagaba para iti amin a basbasoltayo tapno mabalin a mapakawantayo no agbabawitayo.
Lucas 22:41–44; Doktrina ken Katulagan 19:16–19
Riniing ni Jesus da Pedro, Santiago, ken Juan. Imbagana kadakuada a maliputan ken mapapatayto Isuna. Kinuna ni Jesus nga umay dagiti nadangkes a tao a mangala Kenkuana.
Mateo 26:45–46