Kapitulo 49
Ti Umuna a Sakramento
Tunggal tawen angayen dagiti Judio ti maysa a fiesta a maawagan iti Fiesta ti Paskua [Passover]. Daytoy ti mangtulong kadagiti tao a Judio a manglagip nga insalakan ti Dios dagiti kapuonanda iti panawen ni Moises.
Exodo 12:27; Lucas 22:7
Kasapulan ni Jesus ken dagiti Sangapulo-ket-dua nga Apostol ti lugar a panganan iti fiesta ti Paskua. Imbaon ti Mangisalakan da Pedro ken Juan a mangsapul iti siled ken mangkita a nakasaganan ti amin para iti fiesta.
Lucas 22:8
Nakasarakda iti siled ket insaganada ti fiesta.
Lucas 22:9–13
Adda idiay ni Jesus ken dagiti amin nga Apostolna. Naggigiddanda a nangan iti fiesta ti Paskua.
Lucas 22:14
Inted ni Jesus kadagiti Apostolna ti sakramento iti umuna a gundaway. Innalana ti tinapay kadagiti imana, binendisionanna daytoy, ket kalpasanna pinisina daytoy iti babassit. Imbagana kadagiti Apostol a mangan iti tinapay.
Mateo 26:26; Lucas 22:19
Imbaga ni Jesus kadakuada a panunotenda ti bagina no manganda iti tinapay. Indawatna kadakuada a manglaglagip a matay Isuna para kadakuada.
Mateo 26:26; Lucas 22:19
Imbukbok ni Jesus ti arak iti maysa a tasa. Binendisionanna ti arak ket imbagana kadagiti Apostol nga inumenda daytoy.
Mateo 26:27
Imbaga ni Jesus kadakuada a panunotenda ti darana no inumenda iti arak. Indawatna kadakuada a lagipenda nga agsayasay Isuna iti dara ket agsagaba para kadagiti basol ti amin a tao.
Mateo 26:28; Lucas 22:20
Imbaga pay ni Jesus kadagiti Apostol a patayen Isuna dagiti nadangkes a tao iti kabiitan a panawen. Nagladingit unay ti sangapulo-ket-maysa kadagiti Apostolna. Ay-ayatenda ti Mangisalakan ken saanda a kayat a matay Isuna. Ammo ni Jesus a maysa kadagiti Apostolna ti mangtulongto kadagiti nadangkes a tao. Ni Judas Iscariote ti naganna.
Mateo 26:2, 14–16, 21–25