Pagbansay sa Kahanas 9

Gamiton sa Matarong ang Teknolohiya

Ang paggamit sa teknolohiya posible nga parehong makahatag og oportunidad ug mga hagit. Pinaagi sa matarong nga paggamit sa teknolohiya, mas makatuman kita sa mga katuyoan sa Ginoo alang kanato isip mga misyonaryo ug sa atong matag adlaw nga kinabuhi.

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Ipaila ang hilisgotan alang niini nga pagbansay sa kahanas pinaagi sa pagpasabot sa mosunod:

Ang electronic nga mga device sama sa mga phone ug computer mahimong gamhanang mga himan sa pagpadayon sa buhat sa Ginoo, pagpalambo sa atong pagka-produktibo, ug pagpalambo og positibong mga relasyon. Daghan usab ang mga tintasyon nga may kalabotan niini nga mga himan.

Basaha ang “Unsa ang Kinahanglan Nimong Buhaton Kon Ikaw Mibati nga Huyang o Delikado?” sa kapitulo 2 sa Isangyaw ang Akong Ebanghelyo ([2023], 24). Pangita og tulo ka baroganan nga makatabang nato sa pagbuntog sa mga tentasyon nga may kalabotan sa paggamit sa teknolohiya.

Lider sa diskusyon: Ikonsiderar ang pagsulat niini nga mga baroganan sa pisara:

Baroganan 1: Pagmabinantayon sa inyong mga hunahuna, mga pagbati, ug mga pamatasan.
Baroganan 2: Pilia ang paglihok.
Baroganan 3: Magkat-on, maghinulsol, ug mouswag.

Ipakita

Lider sa diskusyon: Pagpaambit og senaryo sama sa mosunod. Hisgoti ang mga pangutana aron makatabang sa pagpakita kon sa unsang paagi ang tulo ka baroganan magamit sa tinuod nga kinabuhi nga sitwasyon.

Adunay dula si James sa iyang phone nga ganahan niyang dulaon. Kanunay niyang kuhaon ang iyang phone aron magdula sa iyang dula atol sa panihapon, sa simbahan, o samtang anaa sa klase sa eskwelahan.

Baroganan 1: Pagmabinantayon sa imong mga hunahuna, mga pagbati, ug mga pamatasan.

Unsa ang ubang mga hunahuna o mga pagbati nga mahimong hinungdan sa paghimo ni James niini?
Unsa kaha ang importante nga masabtan niya mahitungod sa iyang paggamit sa teknolohiya niini nga mga sitwasyon?

Baroganan 2. Pilia ang Paglihok.

Unsa ang piho nga mga aksiyon nga mahimo ni James aron matabangan siya nga mas maapil niining sosyal nga mga kahimtang?

Baroganan 3: Magkat-on, maghinulsol, ug mouswag.

Unsa kaha ang makat-onan ni James gikan sa iyang kasinatian samtang maningkamot siya nga molambo?

Ipraktis

Lider sa diskusyon: Hatagi og panahon ang mga tigkat-on sa pagpraktis sa paggamit sa tulo ka mga baroganan ngadto sa ubang mga senaryo. Mahimo nimong ipakita ang mosunod nga mga senaryo ug bahinon ang klase ngadto sa gagmay nga mga grupo. Hangyoa ang matag grupo sa pagpili og duha o tulo ka senaryo ug hisgotan kon unsa kaha ang mahitabo kon gamiton ang tulo ka baroganan sa mga senaryo nga ilang gipili.

Nakakita si Sophia og diskusyon sa social media nga nakapasuko kaniya, ug gusto niya nga motubag.
Kon laayon si Gideon, sa kasagaran mag-scroll siya sa iyang phone. Karong bag-o, nadani siya sa pagtan-aw og pornograpiya.
Sa kasagaran ikompara ni Maria ang gidaghanon sa mga like ug iyang mga follower sa social media ngadto sa gidaghanon sa like ug sa mga follower sa iyang mga higala.
Kon maglakaw-lakaw si Lucas, hapit kanunay siyang maminaw og musika gamit ang iyang headphone.
Kanunay nga magtukaw si Amari nga gabii na kaayo nga magdula og mga video game.

Lider sa diskusyon: Kon itugot sa panahon, pagdapit og pipila ka tigkat-on sa pagpakigbahin og senaryo nga ilang gihisgotan sa ilang grupo ug giunsa nila paggamit ang tulo ka baroganan niana nga senaryo.

Gamita

Lider sa diskusyon: Hatagi og panahon ang mga partisipante sa paghunahuna kon unsaon nila paggamit niining tulo ka baroganan sa ilang kinabuhi. Dapita sila sa pagtakda og tumong sa paggamit sa teknolohiya sa matarong nga paagi ug pagtrabaho aron matuman kini.