Leksiyon 1

Kita Modapit sa Uban nga Moduol ngadto ni Kristo

Ang tanang buhat sa misyonaryo nakatutok ni Jesukristo. Tinuod, ang importanteng katuyoan sa misyonaryo mao ang “pagdapit sa uban sa pagduol ngadto ni Kristo pinaagi sa pagtabang kanila nga makadawat sa gipahiuli nga ebanghelyo” (Isangyaw ang Akong Ebanghelyo [2023], 1). Gidapit ni Jesukristo ang Iyang mga sumusunod sa pagpakigbahin sa mensahe sa ebanghelyo ngadto sa tanan. “Samtang ang [atong] pagsabot ug pagpamatuod sa Manluluwas ug sa Iyang Pag-ula motubo, ang [atong] tinguha sa pagpakigbahin sa ebanghelyo modako.” (Isangyaw ang Akong Ebanghelyo, 2).

Welcome!

Lider sa diskusyon: Ang pipila ka sakop sa klase tingali mobati sa walay kasegurohan mahitungod sa pagsugod sa usa ka bag-ong klase ug sa pakighimamat sa bag-ong mga tawo. Mahimo kamong magdungan sa pagbasa sa Juan 13:34–35 ug dapita ang mga sakop sa klase sa pagpakigbahin sa mga ehemplo kon sa unsang paagi gihigugma sa Manluluwas ang uban. Ikonsiderar ang pagpangutana sa mosunod:

Unsaon sa atong klase sa paggamit sa ehemplo sa Manluluwas sa paghigugma sa uban?
Sa imong hunahuna unsa kaha nga pagtagad ang gusto sa Manluluwas nga imong ipakita ngadto sa mga tawo nga wala nimo nailhi o murag lahi kay kanimo?

Lider sa diskusyon: Ang mosunod nga mga kalihokan makatabang sa mga tigkat-on nga makaila sa matag usa ug mobati nga nahisakop. Ipakita ang mga instruksiyon, ug hatagi ang mga sakop sa klase og oras nga makigsulti sa matag usa. Mahimo usab nimong gamiton kini nga oportunidad sa pagpasabot nga ang paghimamat ug pagtagad sa mga tawo sa “mainiton, tinuod, ug mahigalaon” nga paagi usa ka importanteng bahin sa pagpakigbahin sa ebanghelyo (Isangyaw ang Akong Ebanghelyo, 189).

Gamita ang mosunod nga pipila ka minuto sa pakighimamat sa tulo ngadto sa upat ka bag-ong mga tawo dinhi sa atong klase. Ania ang pipila ka sugyot aron ikaw makasugod sa pakig-istorya:

Hibaloi ang ngalan sa usag usa.
Pangutana mahitungod sa mga interes, mga talento, eskwelahan, trabaho, o mga hilig.
Pangutana mahitungod sa bag-ohay nga bakasyon, kalingawan, o hagit o butang nga ilang gipaabot.

Gisugyot nga Kalihokan sa Pagkat-on

Nganong importante man ang pagtabang sa uban nga moduol ngadto ni Jesukristo?

Pagtuon

Lider sa diskusyon: Ipakita ang mosunod nga imahe, ug dapita ang mga sakop sa klase sa pagpakigbahin kon unsay ilang nahibaloan mahitungod sa gihulagway nga asoy. Dayon ipakigbahin ang mosunod nga mga instruksiyon:

Tun-i ang Mateo 28:18–20, nga mangita unsa ang gitudlo sa Manluluwas sa Iyang Apostoles niini nga okasyon.

Ngano kaha nga ang Manluluwas midapit sa Iyang mga sumusunod sa pagpakigbahin sa ebanghelyo ngadto sa uban?

Si Jesus nagtudlo sa Napulog Duha ka Apostoles

Lider sa diskusyon: Ipasabot nga ang gitudlo ni Jesukristo alang sa Iyang Apostoles nga ipakigbahin ang ebanghelyo maggamit usab sa Iyang sumusunod karon.

Ipakita ang mosunod nga mga instruksiyon, ug hatagi ang mga sakop sa klase og oras sa pagtuon sa pipila ka bersikulo nga sila ra. Agi og dugang, mahimong dungan ninyong tun-an ang mensahe ni Presidente Russell M. Nelson “Pagsangyaw sa Ebanghelyo sa Kalinaw” (Liahona, Mayo 2022, 6–7) o magpasalida sa “Propetikanhong Tawag: Sinatia ang hingpit nga kalipay sa Misyonaryo nga Pagserbisyo” (2:12; Librarya sa Ebanghelyo).

Tun-i ang pipila sa mosunod nga mga kasulatan, nga mangita sa mga kamatuoran mahitungod ni Jesukristo nga makatabang sa uban nga moduol Kaniya. Mahimo usab nimong gamiton ang mga himan sa pagtuon diha sa Librarya sa Ebanghelyo aron mangita sa laing mga kasulatan o mga pamahayag gikan sa mga lider sa Simbahan.

Lider sa diskusyon: Bahina ang klase ngadto sa gagmay nga mga grupo, ug dapita ang matag sakop sa grupo sa pagpakigbahin sa ilang mga tubag sa mosunod nga mga pangutana:

Unsa nga mga kamatuoran ang imong nakat-onan mahitungod ni Jesukristo ug sa Iyang ebanghelyo?
Sa unsa nga paagi kining mga kamatuoran nakaimpluwensiya nimo?
Sa unsang paagi kini nga mga kamatuoran makatabang nimo sa pagtudlo sa uban mahitungod ni Jesukristo?

Lider sa diskusyon: Human ang mga grupo makahuman sa ilang panaghisgot, dapita ang mga tigkat-on sa pagpakigbahin sa kamatuoran nga ilang nadiskobrehan diha sa tibuok klase. Gamit ang ilang kaugalingon nga mga pulong, mahimong ilhon sa mga tigkat-on ang mga kamatuoran nga susama niini:

Kon moduol kita ni Kristo, makahimo Siya sa pagpagaan sa atong palas-anon (tan-awa sa Mateo 11:28–30).
Si Jesukristo mao ang atong agianan balik sa Langitnong Amahan (tan-awa sa Juan 14:6).
Kita maluwas pinaagi sa mga tabang, kaluoy, ug grasya ni Jesukristo (tan-awa sa 2 Nephi 2:6–8).
Samtang kita mosunod sa ehemplo ni Jesukristo ug molahutay sa kataposan, makadawat kita og kinabuhing dayon uban sa Langitnong Amahan (tan-awa sa 2 Nephi 31:17–21).
Kon kita maghinulsol ug moduol ni Jesukristo, ug nagpabunyag nan kita mabalaan pinaagi sa Espiritu Santo ug mobarog nga walay lama sa atubangan ni Kristo sa ulahing adlaw (tan-awa sa 3 Nephi 27:20–22).
Tungod kay ang bili sa mga kalag dako sa panan-aw sa Dios, mobati Siyag dako nga kamaya kon kita maghinulsol (tan-awa sa Doktrina ug mga Pakigsaad 18:10–16).

Ipraktis

Lider sa diskusyon: Hatagi ang mga tigkat-on og oportunidad sa pagpraktis sa pagtudlo sa kamahinungdanon ni Jesukristo. Ang usa ka paagi nga mahimo nimo kini mao ang pagpakita sa mosunod nga senaryo ug mga instruksiyon. Hatagi ang mga sakop sa klase og igong oras aron makahimo og tubag. Kon kinahanglan nila og dugang tabang, ipatan-aw nila ang mga bullet ubos sa ulohan nga “Ang Pag-ula ni Jesukristo” (Isangyaw ang Akong Ebanghelyo, 55).

Paghunahuna nga aduna kay usa ka higala kinsa dili miyembro sa Simbahan ug kuryoso mahitungod sa imong mga gituohan. Atol sa usa ka panag-istorya sa imong higala nagsulti nga, “nakabantay ko nga si Jesus murag importante nganha kanimo. Ngano kana?”

Pag-andam og tubag alang sa imong higala nga maglakip sa mosunod:

Usa ka mubo nga pagpasabot mahitungod sa atong panginahanglan ni Jesukristo
Usa ka may kalabotan nga kasulatan
Imong pagpamatuod

Lider sa diskusyon: Bahina ang klase nga magkauban, ug dapita ang matag tawo sa pagpakigbahin sa ilang tubag diha sa ilang kauban. Pagkahuman nila, mahimo nimong dapiton ang mga tigkat-on nga tagsatagsahon sa pagtimbangtimbang ang ilang tubag ug tinuon unsa nga mga pagpahaom nga ilang gusto nga buhaton. Dayon i-assign ang mga tigkat-on sa lain nga kauban, ug dapita sila sa pagpakigbahin og usab sa ilang tubag, lakip ang bisan unsa nga mga pagpahaom.

Pagtakda og tumong

Lider sa diskusyon: Hatagi ang mga sakop sa klase og panahon sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an karon. Gamita ang pipila sa mosunod nga mga ideya, o maghunahuna og imong kaugalingong ideya.

Atol sa imong personal nga pagtuon sa kasulatan, markahi o i-highlight ang mga tudling nga nakatabang nimo nga mas masabtan si Jesukristo ug ang Iyang Pag-ula.
Ipakigbahin ang imong pagpamatuod ni Jesukristo ug sa Iyang pag-ula ngadto sa usa ka tawo—sa personal, pinaagi sa text nga mensahe, o sa online.
Dapita ang usa ka higala nga wala karon sa pagsugod sa pag-apil sa klase uban nimo.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Lider sa diskusyon: Ikonsiderar ang paghatag sa mga tigkat-on og oras sa pagpili og usa ka klasmeyt o usa ka grupo sa mga magkauban nga ilang mapakigbahinan sa ilang mga tumong sa tibuok kurso. Pwede nimong tudloan ang mga grupo sa paghunahuna og paagi sa pagpahinumdom sa matag usa mahitungod sa ilang mga tumong sa dili pa ang sunod klase. Pwede usab nimong padad-an ang mga tigka-on og mensahe sa pahinumdom sa dili pa ang sunod klase.

Sa Sunod nga Higayon

Lider sa diskusyon: Kon andam ka na nga motudlo sa leksiyon 2 sa sunod higayon, ikonsiderar ang pagdapit sa mga sakop sa klase sa paggahin og pipila ka oras nga mapamilyar sa Isangyaw ang Akong Ebanghelyo agig pagpangandam sa klase. Mahimo usab nimong padad-an sila og pahinumdom.