Leksiyon 10

Pagtinguha og Kristohanon nga mga Hiyas

Isangyaw ang Akong Ebanghelyo, Kapitulo 6

“Usa ka importante nga paagi sa pagpangita ni Jesus mao ang paghimo og makugihon nga paningkamot nga magkat-on kabahin Kaniya ug mahimong mas sama Kaniya” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo. [2023], 142). Ang pagtinguha sa pagpalambo og mga hiyas ni Jesukristo makatabang nato sa pagpakigbahin sa ebanghelyo sa Manluluwas sa mas epektibong paagi. Pinaagi sa tabang sa Manluluwas, makahinay-hinay kita sa pag-ugmad og mga hiyas nga makatabang nato nga mas mahisama Kaniya.

Magrebyo ug Mag-follow Up

Lider sa diskusyon: Dapita ang mga tigkat-on sa paghunahuna mahitungod sa ilang bag-ong mga paningkamot sa paggamit sa unsay ilang nakat-onan niini nga klase. Mahimo nimo silang dapiton sa pagpakigbahin og pipila sa ilang mga paningkamot uban sa kapares o isip tibuok klase.

Gisugyot nga Kalihokan sa Pagkat-on

Unsaon nimo nga mahimong mas sama sa Manluluwas?

Pagtuon

Lider sa diskusyon: Pag-display og mga hulagway sa Manluluwas, sama niining mosunod. Awhaga ang mga tigkat-on sa pagpakigbahin sa mga Kristohanong mga hiyas nga nakita nila niini nga mga hulagway. Mahimo usab kamong motan-aw sa bidyo nga “Christlike Attributes” (2:53, ChurchofJesusChrist.org) aron matabangan ang mga sakop sa klase nga makakita og ubang ehemplo sa mga hiyas sa Manluluwas.

Unsa ang pipila sa mga hiyas sa Manluluwas nga imong gidayeg pag-ayo? Ngano man?

Lider sa diskusyon: Ipasabot nga niini nga leksiyon, ang mga sakop sa klase mas makat-on pa mahitungod sa importansiya sa pagtinguha og Kritohanong mga hiyas alang sa misyonaryo nga buhat. Dapita sila sa pagpangita og giya gikan sa Espiritu Santo aron makahibalo unsang mga hiyas ang gusto sa Ginoo nga ilang paningkamotan nga mapalambo sa ilang kaugalingong kinabuhi. Ipakigbahin ang mosunod nga mga instruksiyon:

Basaha ang “Pasiuna” ug “Pagpangita Niini nga Jesus” sa kapitulo 6 sa Isangyaw ang Akong Ebanghelyo (pahina 142). Timan-i ang mga panalangin nga nalangkit sa pagpalambo sa Kristohanong mga hiyas.

Lider sa diskusyon: Mahimo usab ninyong ikonsiderar ang dungan nga pagtuon sa Doktrina ug mga Pakigsaad 4 nga gihulagway diha sa kahon sa “Personal nga Pagtuon” (Isangyaw ang Akong Ebanghelyo, 123).

Dapita ang mga sakop sa klase sa paghisgot kon unsay nagpabilin sa ilang hunahuna gikan sa ilang gitun-an. Ang mosunod nga mga pangutana mahimong gamiton niini nga diskusyon:

Sa unsang paagi nga ang pagpaningkamot nga mahimong mas sama ni Jesukristo makatabang nimo nga mahimong mas maayong misyonaryo?
Unsa ang tahas sa Manluluwas sa pagtabang kanimo nga mahimong mas mahisama Kaniya?

Lider sa diskusyon: Samtang imong hisgotan ang miaging pangutana, ikonsiderar ang pagdapit sa mga tigkat-on sa pagbasa sa mga seksiyon nga “Mga Gasa gikan sa Dios” ug “Usa ka Inanay nga Proseso” (Isangyaw ang Akong Ebanghelyo, 142). Dapita sila sa pagpangita og mga pulong gikan niini nga mga seksiyon nga makatabang nila nga mas makasabot sa ilang panginahanglan nga mosalig sa Manluluwas sa pagpalambo og Kristohanong mga hiyas.

Unsa ang nakatabang nimo nga makahimo og pag-uswag sa pagkahimong mas sama sa Manluluwas?

Ipraktis

Lider sa diskusyon: Kini nga porsiyon sa leksiyon gituyo aron sa pagtabang sa mga estudyante sa pagtino kon hain sa mga hiyas sa Manluluwas ang gusto nilang palamboon. Ipakita ang mosunod nga mga instruksiyon.

Kompletoha ang “Kalihokan Kabahin sa Hiyas” sa kataposan sa kapitulo 6 sa Isangaw ang Akong Ebanghelyo (mga pahina 155–58).
Base sa imong mga tubag, pagpili og Kristohanong hiyas nga gusto nimong mas masabtan ug mapalambo.
Pangitaa ug tun-i ang seksiyon sa imong gipili nga hiyas diha sa kapitulo 6 sa Isangyaw ang Akong Ebanghelyo.

Lider sa diskusyon: Human sa igong panahon, dapita ang mga sakop sa klase sa pagpakigbahin ngadto sa kapares kon unsa nga hiyas ang ilang gipili nga tun-an, uban sa mubo nga summary sa unsay ilang nakat-onan.

Pagtakda og tumong

Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:

Paghimo og plano kon unsaon nimo pagtinguha nga makapalambo sa Kristohanong kinaiya nga imong gitun-an. Mahimo nimong gamiton ang mga sugyot ubos sa ulohan nga “Usa ka Sundanan alang sa Pagkahimong Mas Sama ni Kristo” (Isangyaw ang Akong Ebanghelyo, 153) aron matabangan ka. Ayaw kabalaka kon dili ka perpekto niini nga hiyas. Paningkamot kanunay ug ang Manluluwas motabang nimo.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Lider sa diskusyon: Kon ang mga tigkat-on adunay grupo nga masultihan sa ilang mga tumong sa tibuok nga kurso, hatagi sila og panahon sa pagpakigbahin kon unsaon nila sa pagsuporta o pagpahinumdom ang usag usa sa dili pa ang sunod nga klase.

Sa Sunod nga Higayon

Lider sa diskusyon: Kon andam ka na nga motudlo sa leksiyon 11 sa sunod higayon, ikonsiderar ang pagdapit sa mga sakop sa klase sa pagtuon sa kapitulo 11 sa Isangyaw ang Akong Ebanghelyo agig pagpangandam. Mahimo usab nimong padad-an sila og usa ka pahinumdom.