Tumana ang Imong Misyonaryo nga Katuyoan

Hunahunaa nga duna kay higala nga dili miyembro sa Simbahan. Dihang nangutana ang imong higala kon unsa ang imong mga plano karong adlawa, miingon ka nga motambong ka og klase sa pagpangandam sa misyonaryo. Dayon nangutana ang imong higala, “Unsa may buhaton sa mga misyonaryo?”

Basaha ang “Ang Imong Katuyoan:” (Isangyaw ang Akong Ebanghelyo, 1) ug ang mosunod nga pamahayag ni Elder D. Todd Christofferson.

Palihog ayaw ibaliwala ang kapitulo 1 sa Isangyaw ang Akong Ebanghelyo ug ang pangutana niini nga “Unsa man ang akong katuyoan isip usa ka misyonaryo?” Isulod gayod sa hunahuna ang katuyoan sa pagdala og mga tawo ngadto kang Kristo pinaagi sa mga baroganan ug mga ordinansa sa gipahiuli nga ebanghelyo, ug imong masabtan nga ang pagpakigbahin sa ebanghelyo dili usa ka programa; usa kini ka kawsa—ang kawsa sa Amahan, sa Anak, ug sa Balaang Espiritu. (D. Todd Christofferson, “Why We Share the Gospel,” Ensign, Aug. 2014, 36)

Hisgoti kon sa unsang paagi nga ang pagsulod gayod niini nga katuyoan sa atong hunahuna makaapekto sa mosunod:

• Giunsa nimo sa pagpangandam alang sa misyon

• Ang imong mga lihok isip usa ka misyonaryo

Basaha ang “Ang Imong Katungdanan sa Pagtudlo sa Gipahiuli nga Ebanghelyo ni Jesukristo” (Ipahiuli ang Akong Ebanghelyo, 1–2). Samtang magtuon ka, markahi ang:

1. Mga rason ngano nga atong dapiton ang uban sa pagduol ni Jesukristo.

2. Unsay atong mahimo sa pagtabang sa uban nga makaduol ni Jesukristo.

• Sa unsang paagi ang pagsunod sa Manluluwas nagdala og “mas dakong kalipay, paglaom, kalinaw, ug katuyoan.” (pahina 2) diha nimo ug sa mga tawo nga imong kaila?

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod o paghunahuna og imong kaugalingon.

• Padayona ang pagpraktis sa pagpamemorya sa misyonaryo nga katuyoan. Ipakigbahin kini gikan sa memorya ngadto sa usa ka sakop sa pamilya o higala. Paghunahuna kon unsa ang imo nang gibuhat o masugdan sa pagbuhat nga may kalabotan sa misyonaryo nga katuyoan.

• Bisitaha ang “Pagpakigbahin sa Ebanghelyo” nga pahina sa ChurchofJesusChrist.org. Pangita og mga ideya nga makatabang nimo sa pagpakigbahin sa ebanghelyo ngadto sa uban.

• Sa mainampoong paagi, paghunahuna og usa ka tawo nga gusto nimong tabangan nga maduol kang Jesukristo ug makasinati sa mga panalangin sa Iyang ebanghelyo. Tinoa kon unsay imong buhaton aron sa pagtabang niya (pananglitan, “Ako mag-ampo alang niining tawhana ug dapiton siya sa simbahan karong Dominggo”).

Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi. (“Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6)

• Kon dunay tawo nga mangutana ninyo kon unsa ang doktrina ni Kristo, unsay inyong isulti?

Pangitaa ang seksiyon sa kapitulo 1 sa Isangyaw ang Akong Ebanghelyo nga giulohan og “Ang Ebanghelyo ni Kristo ug ang Doktrina ni Kristo.” Basaha ang unang tulo sa parapo ug ang pamahayag gikan ni Hyrum Smith (pahina 6). Pangita og mga tubag niini nga mga pangutana:

• Unsa ang doktrina ni Kristo?

• Ngano nga ang tawo nga nangandam nga magmisyon magtinguha man sa pagsabot ug pagsunod sa doktrina ni Kristo?

Makakat-on ka og dugang pa mahitungod sa doktrina ni Kristo pinaagi sa pagtuon sa mosunod nga seksiyon gikan sa kapitulo 1 sa Isangyaw ang Akong Ebanghelyo (mga pahina 7–9):

• “Pagtuo ni Jesukristo”

• “Paghinulsol”

• “Bunyag”

• “Kompirmasyon ug ang Gasa sa Espiritu Santo”

• “Paglahutay hangtod sa Kahangtoran” (Tun-i usab ang 2 Nephi 31:19–20.)

Samtang magtuon ka, markahi ang importanteng mga pulong ug hugpong sa mga pulong. Ikonsiderar ang pagbasa og ubang mga kasulatan nga may kalabotan sa seksiyon. Pangandam sa pagpakigbahin sa imong nakat-onan.

I-summarize ang bahin sa doktrina ni Kristo nga imong gitun-an. Ikonsiderar ang paglakip sa mosunod nga mga punto sa imong mubong saysay:

1. Daklit nga mubong saysay sa imong gitun-an

2. Sa unsang paagi kini nga bahin sa doktrina makatabang sa mga tawo sa pagduol kang Kristo ug makapahimulos sa Iyang makaluwas nga gahom

3. Sa unsang paagi ikaw o ang tawo nga imong kaila napanalanginan pinaagi sa pagsunod niini nga bahin sa doktrina ni Kristo

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod o paghunahuna og imong kaugalingon.

• Tun-i ang 2 Nephi 31, samtang mangita sa mga pagtulun-an ni Nephi mahitungod sa doktrina ni Kristo.

• Pag-ila og usa ka elemento sa doktrina ni Kristo nga gusto nimong mas hingpit nga malakip sa imong kinabuhi. Ikonsiderar kon unsaon nimo sa paghimo niana.

• Unsaon pagkahibalo sa tawo kon malamposon ba sila nga misyonaryo?

1. Basaha ang unang siyam ka parapo sa “Usa ka Malamposon nga Misyonaryo” sa kapitulo 1 sa Isangyaw ang Akong Ebanghelyo (pahina 14). Butangi og timailhan o markahi ang mga kinaiya sa malamposon nga mga misyonaryo. Sa lahing paagi (sama sa lahi nga kolor o paagi sa pagbadlis), markahi ang mga butang nga dili mahinungdanon alang sa kalamposan.

2. Tan-awa ang mga bullet sa ibabaw sa pahina 14. Pagpili og duha o mas daghan pa nga mga pakisayran sa kasulatan aron basahon, samtang mangita kon unsay ilang gitudlo niini mahitungod sa pagkahimong malamposon nga misyonaryo.

Hunahunaa nga nakadawat ka og mensahe gikan sa usa ka higala nga nagserbisyo og full-time nga misyon. Gibati nila nga daw napakyas sila isip usa ka misyonaryo tungod kay walay usa nga iyang gitudloan nga nabunyagan ug wala pa siya makahupot og posisyon sa pagpangulo. Hinayhinay niyang gibati nga nag-usik-usik ra siya sa iyang oras.

• Base sa unsay imong nakat-unan gikan sa “Usa ka Malamposon nga Misyonaryo” sa kapitulo 1 sa Isangyaw ang Akong Ebanghelyo (mga pahina 13–14), tabangi ang imong higala nga maghunahuna og lahi kon unsay ipasabot sa malamposon nga misyonaryo.

• Ipakigbahin kon sa unsang paagi ang pagtutok pag-ayo kang Jesukristo makausab sa gibati sa imong higala mahitungod sa iyang misyonaryo nga serbisyo.

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod o paghunahuna og imong kaugalingon.

• Paghunahuna og usa ka tawo nga imong kaila nga nagserbisyo og misyon. Padad-i siya og email o sulat nga nag-summarize sa imong nakat-onan karon mahitungod sa pagkamalamposon nga misyonaryo. Mahimo usab nimong pangutan-on ang misyonaryo kon unsay iyang nakit-an nga nakapahimo niya nga malamposon.

• Hunahunaa kon unsay imong mahimo karon aron makapangandam nga mahimong malamposon nga misyonaryo sa umaabot.