Leksiyon 5

Magtuon ug Motudlo sa Ebanghelyo ni Jesukristo

Isangyaw ang Akong Ebanghelyo, Kapitulo 3

Ang mga leksiyon nga gigamit sa mga misyonaryo sa pagtudlo sa ebanghelyo sa Manluluwas makita sa kapitulo 3 sa Isangyaw ang Akong Ebanghelyo. “Ang mga leksiyon dinhi niini nga kapitulo naglangkob sa gikinahanglan nga doktrina, mga baroganan, ug mga sugo sa ebanghelyo ni Jesukristo” (Isangyaw ang Akong Ebanghelyo [2023], 25). Samtang ang mga tigkat-on magtuon ug magpraktis sa pagtudlo gikan niini nga mga leksiyon, sila mahimong mas andam sa pagpakigbahin sa ebanghelyo sa Maluluwas ngadto sa uban.

Magrebyo ug Mag-follow Up

Lider sa diskusyon: Dapita ang mga tigkat-on sa paghunahuna mahitungod sa ilang bag-ong mga paningkamot sa paggamit sa unsay ilang nakat-onan niini nga klase. Mahimo nimo silang dapiton sa pagpakigbahin og pipila sa ilang mga paningkamot uban sa kapares o isip tibuok klase.

Mga Opsiyon sa Kalihokan sa Pagkat-on

Lider sa diskusyon: Sa mainampoong paagi pilia ang opsiyon sa pagkat-on o mga opsiyon nga labing makaayo sa imong klase. Seguradoha ang pagbilin og taas nga oras sa pagpraktis ug paggamit.

Opsiyon A: Unsa ang gitudlo sa misyonaryo sa Ginoo?

Pagtuon

Lider sa diskusyon: Pahinumdomi ang mga sakop sa klase sa “Ang Imong Katuyoan” (Isangyaw ang Akong Ebanghelyo, 1). Sag-uloha kini og dungan isip usa ka klase. Ipasabot nga usa ka importante nga paagi aron matuman sa mga misyonaryo kini nga katuyoan mao ang pagtudlo sa ebanghelyo ni Jesukristo sa mga tawo nga ilang mahimamat.

Ipasabot nga ang mga leksiyon nga itudlo sa mga misyonaryo makita sa kapitulo 3 sa Isangyaw ang Akong Ebanghelyo. Ipakigbahin ang mosunod nga mga instruksiyon:

Basaha ang unang duha ka parapo sa kapitulo 3 sa Isangyaw ang Akong Ebanghelyo, lakip ang gipabaga nga mga ulohan sa leksiyon, nga mangita unsa ang gisugo sa mga misyonaryo nga itudlo.

Lider sa diskusyon: Mahimo usab kamong dungan nga magtuon sa pipila sa mosunod nga mga bersikulo: Doktrina ug mga Pakigsaad 19:31 33:10–11; 34:4–6; 42:12. Ang mga tigkat-on mahimong maghisgot sa dugang mga panabot nga ilang makuha kabahin sa unsa ang gusto sa Ginoo sa Iyang mga misyonaryo nga itudlo.

Ipasabot nga sa mosunod nga kalihokan, ang mga partisipante magkat-on mahitungod sa porma ug sa estraktura sa mga leksiyon sa kapitulo 3 sa Isangyaw ang Akong Ebanghelyo. Sa pagsugod, ikonsiderar ang paghatag sa mga tigkat-on og usa ka daklit nga mubong pagpasabot sa usa sa mga leksiyon. Pwede nimong ipakita ang leksiyon sa screen samtang dungan kamong magrebyo. Ang mosunod nga mga instruksiyon makatabang kanimo sa paghatag og daklit nga mubong pagpasabot:

Pangitaa ang “Leksiyon 1: Ang Mensahe sa Pagpahiuli sa Ebanghelyo ni Jesukristo” (mga pahina 30–45). Tan-awa sa daklit ang mosunod nga mga seksiyon niini nga leksiyon. Hunahunaa ang mahitungod kon sa unsang paagi ang lahilahi nga mga bahin sa leksiyon makatabang nimo nga epektibong motudlo sa ebanghelyo sa Manluluwas.

Ang mga Tawo Mahimong Maghunahuna
Mga Sugyot alang sa Pagtudlo
Unsa Kaha ang Inyong Itudlo sa mga Tawo sulod sa 15–25 Minutos
Mga Pangutana nga Mahimo Ninyong Ipangutana sa mga Tawo
Mga Imbitasyon nga Mahimo Ninyong Ipadangat
Sukaranan nga Doktrina
Pagtudlo sa mga Panabot (makita sa tibuok leksiyon)
Mubo ngadto sa Kasarangan nga Latid sa Leksiyon

Lider sa diskusyon: Dapita ang mga tigkat-on sa pagpakigbahin unsa ang ilang nakita nga makatabang gikan sa leksiyon nga dungan ninyong girebyo. Kon aduna pay oras, pwede nimong ipasabot nga ang “Leksiyon 4: Pagkahimong mga Disipulo ni Jesukristo sa Tibuok Kinabuhi” lahi ang porma kaysa unang tulo ka leksiyon. Mahimo usab nimong rebyohon og dungan kini nga leksiyon.

Ipraktis

Lider sa diskusyon: Hatagi ang mga sakop sa klase og oras sa pagtuon sa usa sa mga leksiyon gikan sa kapitulo 3 sa Isangyaw ang Akong Ebanghelyo sa mas lawom nga paagi. Ipakita ang mosunod nga mga instruksiyon, ug hatagi ang mga tigkat-on og mga 10 ka minuto sa pagkompleto nga sila ra:

Pagpili og usa sa mga leksiyon gikan sa kapitulo 3 sa Isangyaw ang Akong Ebanghelyo nga ganahan nimong tun-an pa. Ania ang pipila ka ideya og unsay imong mabuhat:

Basaha ang seksiyon sa mga ulohan sa leksiyon. Dayon paggahin og panahon sa pagtuon sa mas lawon nga paagi o dugang pa nga mga seksiyon nga labing nakapainteres kanimo.
Basaha ang “Ang mga Tawo Natingala” nga kahon sa sinugdanan sa leksiyon (leksiyon 1–3 lamang). I-highlight ang mga pangutana nga imong matubag. Pangita sa mga tubag diha sa seksiyon nga “Doktrinal nga Pundasyon”.
Tun-i ang pipila sa mga summary sa seksiyon diha sa “Doktrinal ng Pundasyon”. Mahimo usab nimong tun-an ang pipila sa mga bersikulo sa “Pagtuon sa Kasulatan” nga mga kahon. Hatagi og pagtagad kon unsa ang itudlo niini nga mga kapanguhaan kanimo mahitungod ni Jesukristo ug sa Iyang ebanghelyo.

Lider sa diskusyon: Kon ang mga sakop sa klase mahuman sa pagtuon, bahina sila nga magkauban o sa gagmayng mga grupo. Dapita ang matag tawo sa pagpakigbahin unsa ang ilang gitutokan diha sa kalihokan sa pagtuon ug unsa ang ilang nakat-onan gikan sa ilang kasinatian.

Pagtakda og tumong

Lider sa diskusyon: Hatagi og panahon ang mga sakop sa klase sa pagpamalandong sa unsay ilang nakat-onan karong adlawa ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

Paghimo og plano kon unsaon nimo pagtuon sa doktrina gikan sa leksiyon sa kapitulo 3 sa imong personal nga pagtuon.
Pilia ang summary gikan sa usa sa mga seksiyon sa “Doktrinal nga Pundasyon” nga ganahan nimong tun-an. Tun-i ang hilisgotan, ug paghimo og mubo nga latid [outline] kon unsa ang imong nakat-onan. Gamita ang imong gilatid sa pagtudlo sa usa ka tawo nga imong kaila.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Lider sa diskusyon: Kon ang mga tigkat-on adunay grupo nga masultihan sa ilang mga tumong, hatagi sila og panahon sa pagpakigbahin kon unsaon nila sa pagsuporta o pagpahinumdom ang usag usa sa dili pa ang sunod nga klase.

Opsiyon B: Sa unsang paagi ang mga misyonaryo sa Ginoo epektibong motudlo sa ebanghelyo?

Pagtuon

Lider sa diskusyon: Dapita ang mga sakop sa klase sa paghunahuna mahitungod sa ilang nanglabay nga mga oportunidad nga motudlo sa ebanghelyo ni Jesukristo ngadto sa uban (pananglitan, diha sa ilang pamilya o mga higala, sa Simbahan, o sa seminary o institute). Mahimo nimong hangyoon ang usa o duha ka tigkat-on sa pagpakigbahin sa ilang mga kasinatian, lakip na ang unsay maayo ug unsay gibati nila nga mas maayo pa.

Ipasabot nga ang mosunod nga kalihokan sa pagtuon makatabang sa mga sakop sa pamilya nga makat-on unsaon sa pagtudlo sa mas epektibo ang ebanghelyo sa Manluluwas. Ang mga tigkat-on sa indibidwal mahimong mokompleto sa tanang upat ka lakang, o mahimo nimo silang bahinon sa upat ka grupo ug sangonan ang matag sakop sa grupo nga tun-an ang usa.

Tun-i ang mosunod nga mga seksiyon gikan sa pasiuna sa kapitulo 3 sa Isangyaw ang Akong Ebanghelyo. Mangita sa mga kamatuoran ug mga giya nga makatabang nimo nga makasabot unsaon nga epektibo ang pagtudlo sa mga misyonaryo sa ebanghelyo sa Manluluwas. Ikonsiderar ang pagmarka sa mga ideya nga gibati nimo nga labing importante.

“Pagtudlo gikan sa Inyong Kasingkasing ingon nga Gigiyahan sa Espiritu” (pahina 26)
“Pagtudlo ug Pagdapit segon sa Indibidwal nga mga Panginahanglan” (pahina 27)
Ang mga tudling sa kasulatan ubos sa ulohan nga “Unsa ang gitinguha nimong itudlo?” (diha sa “Pagtuon sa Kasulatan” nga kahon sa pahina 27)
Ang mga tudling sa kasulatan ubos sa ulohan nga “Nganong importante ang pagtuon sa doktrina sa mga leksiyon?” (diha sa “Pagtuon sa Kasulatan” nga kahon sa pahina 27)

Lider sa diskusyon: Dapita ang mga sakop sa klase sa pagpakigbahin unsa ang ilang nakit-an sa gagmay nga mga grupo o isip usa ka klase.

Ipraktis

Lider sa diskusyon: Hatagi og oportunidad ang mga partisipante sa pagpangandam ug pagpraktis sa pagtudlo sa yano nga mga summary gikan sa usa sa mga leksiyon sa kapitulo 3 sa Isangyaw ang Akong Ebanghelyo. Mahimo nimong gamiton ang mga lagda nga makita diha sa Leksiyon 6: “Pagpraktis sa Pagtudlo” aron matabangan sila sa pag-andam sa pagbuhat niini. Awhaga ang mga sakop sa klase sa paglakip sa mga baroganan nga ilang nakat-onan mahitungod sa epektibo nga pagtudlo samtang sila maghimo ug mopakigbahin sa ilang mga summary. Kon aduna pay oras, mahimo nimong ihatag sa mga tigkat-on ang daghang oportunidad sa pagtudlo sa summary nga ilang giandam.

Pagtakda og tumong

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

Pagpraktis sa pagtudlo sa imong summary ngadto sa sakop sa pamilya, o higala.
Ipakigbahin ang imong summary, uban sa imong pagpamatuod, sa social media.
Pagtuon sa dugang nga sulod gikan sa leksiyon sa kapitulo 3.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Sa Sunod nga Higayon

Lider sa diskusyon: Kon nagplano ka nga gamiton ang leksiyon 6 sa pagpangandam sa pagpraktis sa pagtudlo atol sa sunod klase, mahimo nimong dapiton ang mga tigkat-on sa pagtuon sa usa sa mga leksiyon gikan sa kapitulo 3 sa Isangyaw ang Akong Ebanghelyo. Kon andam ka na nga magtuon sa leksiyon 7 sa sunod higayon, ikonsiderar ang pagdapit sa mga sakop sa klase sa pagtuon sa “Ang Imbitasyon nga Magpabunyag ug Magpakompirma” agi og pagpangandam gikan sa kapitulo 3 sa Isangyaw ang Akong Ebanghelyo (mga pahina 32–34). Mahimo usab nimong padad-an sila og pahinumdom.