Leksiyon 9
Gamita ang Gahom sa Basahon ni Mormon
Isangyaw ang Akong Ebanghelyo, Kapitulo 5
“Ang Basahon ni Mormon, inubanan sa Espiritu, mao ang labing gamhanan nga kapanguhaan sa pagkakabig” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 129). Ang Basahon ni Mormon nagpamatuod ni Jesukristo ug mao ang instrumento nga giandam sa Dios sa pagpundok sa Israel sa kataposang mga adlaw. Samtang magtuon kita gikan sa Basahon ni Mormon ug mogamit sa mga pagtulun-an niini, mas makapaduol kita sa Dios.
Magrebyo ug Mag-follow Up
Lider sa diskusyon: Dapita ang mga tigkat-on sa paghunahuna mahitungod sa ilang bag-ong mga paningkamot sa paggamit sa unsay ilang nakat-onan niini nga klase. Mahimo nimo silang dapiton sa pagpakigbahin og pipila sa ilang mga paningkamot uban sa kapares o isip tibuok klase.
Mga Opsiyon sa Kalihokan sa Pagkat-on
Lider sa diskusyon: Sa mainampoong paagi pilia ang (mga) opsiyon sa pagkat-on nga labing makaayo sa imong klase. Seguradoha ang pagbilin og taas nga oras sa pagpraktis ug paggamit.
Opsiyon A: Ngano nga ang Basahon ni Mormon usa man ka importanteng himan sa pagpakigbahin sa ebanghelyo?
Pagtuon
Lider sa diskusyon: Hangyoa ang mga tigkat-on sa paghunahuna og usa ka himan nga kanunay nilang gamiton. Pwede pod ninyong hisgotan ang mga pangutana nga sama sa mosunod:
-
Sa unsang paagi kini nga himan mas makapasayon sa imong kinabuhi?
-
Unsa ang mga himan nga gihatag sa Dios aron malihok ang Iyang buluhaton?
Lider sa diskusyon: Pagdapit og usa ka sakop sa klase sa pagbasa og kusog sa kapitulo 5 sa Isangyaw ang Akong Ebanghelyo. (pahina 129). Hangyoa ang mga estudyante sa pagsunod ug mangita og usa sa mga himan nga gigamit sa Dios sa pagtabang sa mga tawo sa pagduol ngadto Kaniya. Mahimo usab nimong gamiton ang mosunod nga mga pamahayag isip kabahin niini nga diskusyon.
Si Elder David A. Bednar mitudlo:
Ang Basahon ni Mormon lain nga tugon ni Jesukristo ug ang labing maayo nga himan sa pagkakabig niining ulahing mga adlaw. (Uban sa Gahom sa Dios sa Dako nga Himaya,” Liahona, Nob. 2021, 28-30)
Si Elder Ulisses Soares mipamatuod:
Ang Basahon ni Mormon mao ang instrumento sa Dios sa pagpahinabo sa pagpundok sa Israel sa atong panahon ug sa pagtabang sa mga tawo nga mahibalo sa Iyang Anak, si Jesukristo. (“Ang Pagtungha sa Basahon ni Mormon,” Liahona, Mayo 2020, 33)
Lider sa diskusyon: Ikonsiderar ang pagsulat sa mosunod nga dili kompleto nga kapahayag [sentence] diha sa pisara: Ang Basahon ni Mormon mao ang usa sa labing importante nga mga himan sa pagpakigbahin sa ebanghelyo sa Manluluwas tungod kay …
Dapita ang mga tigkat-on sa pagtapos niini nga kapahayag. Isulat ang ilang mga tubag diha sa pisara. Dayon ipakigbahin ang mosunod nga mga instruksiyon:
Pagpili og seksiyon gikan sa kapitulo 5 sa Isangyaw ang Akong Ebanghelyo (mga pahina 129–40) aron tun-an. Samtang magbasa ka niini, pangita og dugang nga mga rason nga ang Basahon ni Mormon usa ka kinahanglanon nga himan o instrumento sa pagpakigbahin sa ebanghelyo sa Manluluwas.
Lider sa diskusyon: Human makatuon ang mga tigkat-on, dapita sila sa pagpakigbahin og dugang nga mga paagi nga makompleto nila ang tudling nga anaa sa pisara. Mahimo usab nga hisgotan sa mga tigkat-on ang usa o ang mga pangutana nga anaa sa ubos. Kon maghisgot sila og piho nga mga bersikulo gikan sa Basahon ni Mormon sa ilang mga tubag sa bisan hain nga pangutana, ikonsiderar ang pagbasa niini nga mga bersikulo nga magdungan ang tibuok klase.
-
Unsa ang inyong mga kasinatian sa pagpakigbahin og mga kamatuoran gikan sa Basahon ni Mormon ngadto sa uban?
-
Sa unsang paagi nga ang inyong pagkakita sa mga kamatuoran sa Basahon ni Mormon nakatabang ninyo o sa uban nga mas maduol ni Jesukristo?
Lider sa diskusyon: Ikonsiderar ang pagpakigbahin sa imong tubag sa miagi nga pangutana. Pwede usab nimong ipasalida ang bidyo nga “Shaquille’s Story about the Book of Mormon” (1:28, ChurchofJesusChrist.org). Hisgoti kon sa unsang paagi ang Basahon ni Mormon nakatabang sa iyang pangutana ug pagkakabig ngadto kang Jesukristo.
Ipraktis
Lider sa diskusyon: Ipasabot nga ang usa ka rason nga ang Basahon ni Mormon usa ka mahinungdanong kapanguhaan sa pagpakigbahin sa ebanghelyo mao nga kini naglangkob og mga tubag sa mga pangutana nga walay kataposan ang kamahinungdanon. Ang mosunod nga kalihokan makatabang sa mga tigkat-on alang sa pagbansay sa paggamit sa Basahon ni Mormon aron makakita ug makapakigbahin og mga tubag niini nga mga pangutana. Ipakita ang mosunod nga mga instruksiyon:
-
Pangitaa ang seksiyon nga nag-ulohan “Ang Basahon ni Mormon Makatubag sa Mahinungdanong mga Pangutana sa Kinabuhi” sa kapitulo 5 sa Isangyaw ang Akong Ebanghelyo. (mga pahina 134–35).
-
Pagpili og pangutana niana nga seksiyon nga gusto ninyong tutokan.
-
Basaha ang may kalabotan nga mga kasulatan ug hunahunaa kon sa unsang paagi ang mga kasulatan makatabang sa mga pangutana nga inyong pilion.
-
Pangandami ang pagpakigbahin og usa sa mga bersikuko nga imong gitun-an ug ipasabot kon sa unsang paagi kini mitubag sa pangutana.
Lider sa diskusyon: Bahina ang klase nga magpares. Dapita ang mga sakop sa klase sa pagpaambit kon unsa ang ilang giandam alang sa ikaupat nga lakang ngadto sa ilang kapares. Human nga ang magkapares makahuman sa pagtudlo sa usag usa, mahimo nimong ikonsiderar ang pag-assign kanila og lain-laing mga kapares, aron makapraktis sila sa pagtudlo sa laing higayon.
Alang sa dugang nga pagbansay, mahimo nimong gamiton ang Pagpraktis sa Kahanas 1: “Ipaila ang Basahon ni Mormon ngadto sa mga Tawo.”
Pagtakda og tumong
Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og tumong. Ang usa ka paagi nga mahimo nimo kini mao ang pagpakigbahin sa mosunod nga pamahayag ni Elder Ronald A. Rasband ug sa imbitasyon sa ubos niini:
Ako modapit ninyo, karong adlawa, sa paghatag og Basahon ni Mormon ngadto sa inyong mga higala ug pamilya, mga kauban sa trabaho, sa inyong coach sa soccer, o sa tindero diha sa inyong merkado. Sila nagkinahanglan sa mga pulong sa Ginoo nga makita dinhi sa basahon. Sila nagkinahanglan og mga tubag sa mga pangutana sa inadlaw nga kinabuhi ug sa kinabuhing dayon nga moabot. Sila nagkinahanglan nga masayod bahin sa dalan sa pakigsaad nga giandam alang nila ug sa gugma sa Ginoo alang nila. Kining tanan ania dinhi sa Basahon ni Mormon.
Kon kamo mohatag nila og Basahon ni Mormon, kamo nag-abli sa ilang mga hunahuna ug mga kasingkasing ngadto sa pulong sa Dios. Kamo dili kinahanglan nga magdala og giimprinta nga mga kopya sa basahon. Kamo dali nga makapakigbahin niini gikan sa inyong mobile phone gikan sa seksiyon sa mga kasulatan sa Librarya sa Ebanghelyo nga app. (“Karong Adlawa,” Liahona, Nob. 2022, 27)
Ikonsiderar sa mainampoong paagi kon kang kinsa ninyo mapakigbahin ang Basahon ni Mormon. Tinoa kon unsa ang inyong matudlo nila mahitungod sa Basahon ni Mormon ug kon unsa pa ang inyong masulti. Irekord ang imong plano.
Akong tumong
-
Ako mo … (aksiyon nga imong himoon).
-
Akong kab-oton ang akong tumong pinaagi sa … (usa ka yano nga plano).
Lider sa diskusyon: Kon ang mga tigkat-on adunay grupo sa mga kaedad nga pakigbahinan sa mga tumong sa tibuok kurso, hatagi sila og oras sa pagpakigbahin unsaon nila sa pagsuporta o pagpahinumdom ang matag usa sa dili pa ang sunod nga klase.
Opsiyon B: Unsaon sa Basahon ni Mormon pagtabang nako ug sa uban nga mas mapaduol ngadto sa Langitnong Amahan ug ni Jesukristo?
Pagtuon
Lider sa diskusyon: Dapita ang usa ka sakop sa klase sa pagbasa og kusog sa mosunod nga pamahayag ni Presidente Russell M. Nelson. Dayon hatagi ang mga tigkat-on og panahon sa pagpamalandong kon unsaon nila pagtubag ang mga pangutana ni Presidente Russell M. Nelson sa personal nga paagi.
Akong kaigsoonan, unsa man kabililhon ang Basahon ni Mormon diha kaninyo? Kon tanyagan kamo og mga diamante o mga ruby o ang Basahon ni Mormon, hain man ang inyong pilion? Sa tinuod lang, hain man ang mas dako og bili nganha kaninyo? (“Ang Basahon ni Mormon: Unsa Kaha ang Imong Kinabuhi Kon wala Kini?,” Liahona, Nob. 2017, 61)
-
Unsa ang nakahimo sa Basahon ni Mormon nga labaw pa ka bililhon kay sa mahalon nga mga butang, sama sa mga diamante o mga ruby?
Lider sa diskusyon: Alang sa mosunod nga mga kalihokan, mahimong dapiton nimo sila sa pagtuon sa ”Ang Basahon ni Mormon Nagpamatuod ni Kristo” ug ang laing katunga magtuon sa ”Ang Basahon ni Mormon Nagtabang Kanato nga mas Maduol ngadto sa Dios.”
Basaha ang mga seksiyon nga nag-ulohan og “Ang Basahon ni Mormon nagpamatuod ni Kristo” and “Ang Basahon ni Mormon nagtabang Kanato nga mas Maduol ngadto sa dios” sa kapitulo 5 sa Isangyaw ang Akong Ebanghelyo (mga pahina 131-32, 134). Pangitaa ug butangi og timaan ang labing minos tulo ka tudling nga naghulagway ngano nga bililhon ang Basahon ni Mormon.
Lider sa diskusyon: Bahina ang klase nga magpares. Seguroha nga ang matag sakop sa klase nagtuon og lahi nga seksiyon kay sa ilang kapares. Dapita ang mga tigkat-on nga mopakigbahin ngadto sa ilang kapares og tulo ka tudling nga ilang gilinyahan ug ipasabot nganong gibati nila nga importante kining tulo ka tudling.
Human ang managpares magtinudloay sa usag-usa, mahimo kamong magbasa og dungan sa pipila ka bersikulo gikan sa “Pagtuon sa Kasulatan” nga kahon nga anaa sa pahina 132 (ubos sa ulohan nga ”Ang Basahon ni Mormon Nagpamatuod ni Kristo”). Pwede usab ninyong hisgotan ang mga pangutana sama sa mosunod:
-
Sa unsang paagi ang pagtuon sa Basahon ni Mormon ug ang paggamit niini nakatabang ninyo nga mas mapaduol sa Dios?
-
Unsa ang inyong nakat-onan mahitungod ni Jesukristo gikan sa inyong pagtuon sa Basahon ni Mormon?
-
Sa unsang paagi nga ang inyong pagpamatuod ni Jesukristo naimpluwensya pinaagi sa pagbasa sa Bashon ni Mormon?
Ipraktis
Lider sa diskusyon: Hatagi ang mga tigkat-on og panahon alang sa pagpraktis sa pagpangita ug pagpakigbahin og mga pamahayag gikan sa Basahon ni Mormon nga nagpamatuod ni Jesukristo. Mahimo nimong itudlo kini nga kalihokan sa pagpraktis pinaagi sa pagpasalida sa bidyo nga “Book of Mormon Experiment Honolulu” (2:35, ChurchofJesusChrist.org). Ikonsiderar ang pagpakita sa mosunod nga mga instruksiyon:
Pangita og mga kasulatan diha sa Basahon ni Mormon nga nagpamatuod ni Jesukristo. Pwede kamong mangita og mga bersikulo gikan sa mga kapitulo nga gilista diha sa “Personal nga Pagtuon o Pagtuon uban sa Kompanyon” nga kahon diha sa kapitulo 5 sa Isangyaw ang Akong Ebanghelyo. (pages 131–132, ubos sa ulohan nga “Ang Basahon ni Mormon Nagpamatuod ni Jesukristo”). O makapangita kamo og ubang mga bersikulo sa inyong kaugalingon.
Alang sa matag tudling sa kasulatan nga inyong makit-an, irekord ang inyong mga tubag niini nga mga pangutana:
-
Unsa ang gitudlo niini nga tudling ngari kanako mahitungod kang Jesukristo?
-
Sa unsang paagi nga ang pagkahibalo niini mahitungod ni Jesukristo makaimpluwensiya nako ug sa uban?
Lider sa diskusyon: Bahina ang mga estudyante ngadto sa ginagmay nga mga grupo. Dapita ang matag sakop sa grupo sa pagpaambit og usa o duha sa mga tudling sa kasulatan nga ilang nakit-an ngadto sa ubang mga sakop sa ilang grupo. Dapita usab sila sa pagpakigbahin sa ilang mga tubag sa duha ka pangutana sa ibabaw.
Pagtakda og tumong
Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:
Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.
-
Tun-i ang Basahon ni Mormon kada adlaw. Hatagi og espesyal nga pagtagad ang unsay imong nakat-onan mahitungod ni Jesukristo.
-
Sa social media o sa usa ka tawo nga imong kaila, ipakigbahin ang usa ka bersikulo gikan sa Basahon ni Mormon nga labing makahuloganon para nimo. Ipasabot nganong imong gipili ang pagpakigbahin niini.
-
Suhira ang importanteng mga bahin sa Basahon ni Mormon nga app (pananglitan, audio, mga pinulongan, pagkonektar sa mga misyonaryo). Ipakigbahin ang Book of Mormon nga app sa usa ka tawo.
Akong tumong
-
Ako mo … (aksiyon nga imong himoon).
-
Akong kab-oton ang akong tumong pinaagi sa … (usa ka yano nga plano).
Lider sa diskusyon: Kon ang mga tigkat-on adunay grupo sa mga kaedad nga pakigbahinan sa mga tumong sa tibuok kurso, hatagi sila og oras sa pagpakigbahin unsaon nila sa pagsuporta o pagpahinumdom ang matag usa sa dili pa ang sunod nga klase.
Opsiyon C: Giunsa sa Basahon ni Mormon ug sa Biblia pagsuporta sa usag usa?
Pagtuon
Lider sa diskusyon: Ikonsiderar ang pagsugod niining kalihokan sa pagkat-on pinaagi sa pagpakigbahin og usa ka senaryo sama sa mosunod:
Hunahunaa nga nakig-istorya ka bahin sa imong relihiyoso nga mga pagtuo ngadto sa usa ka higala nga dili miyembro sa Simbahan. Human makahibalo nga mituo ka sa Basahon ni Mormon, ang imong higala nangutana, “Unsa man ang katuyoan sa Basahon ni Mormon nga aduna man kitay Biblia?”
Lider sa diskusyon: Dapita ang mga estudyante sa pagkonsiderar kon unsaon nila sa pagtubag ang ilang higala. Mahimo usab nimo silang hangyoon sa paghunahuna kon nakasinati na ba sila og susama nga sitwasyon. Dayon ipakigbahin ang mosunod nga mga instruksiyon:
Basaha ang seksiyon sa kapitulo 5 sa Isangyaw ang Akong Ebanghelyo nga giulohan og “Ang Basahon ni Mormon ug ang Biblia Nagsuporta sa Usag Usa.” (mga pahina 135-36). Pangita og mga pagtulun-an nga makatabang sa tawo nga gipangutana niana nga senaryo.
Lider sa diskusyon: Dapita ang mga tigkat-on sa pagpakigbahin unsa ang ilang nakita nga makatabang sa ilang higala gikan niana nga senaryo. Isip kabahin niini nga panaghisgotan, ang mga estudyante mahimong magtuon sa pipila ka mga bersikulo nga gilista sa seksiyon nga ilang gitun-an, sama sa Ezequiel 37:16–17 ug 1 Nephi 13:40. Mahimo usab kang mohatag og mga pangutana nga sama sa mosunod:
-
Nganong makatabang nga adunay daghang mga saksi ni Jesukristo?
-
Sa unsang paagi nga ang pagtuon sa Biblia ug sa Basahon ni Mormon nakapalig-on sa inyong pagtuo ni Jesukristo?
Ipraktis
Lider sa diskusyon: Hatagi ang mga tigkat-on og panahon alang sa pagpraktis sa pagpangita ug mga kasulatan gikan sa Biblia ug sa Basahon ni Mormon nga nagsuporta sa usag usa. Ikonsiderar ang pagpakita sa mosunod nga mga instruksiyon:
Pangita og mga panig-ingnan diha sa mga kasulatan nga nagpakita kon sa unsang paagi ang Biblia ug ang Basahon ni Mormon nagsuporta sa usag usa. Pagpili og usa o daghan pa sa mosunod nga mga opsiyon aron matabangan ka niini:
-
Tun-i ang mga panig-ingnan nga gilista diha sa “Personal nga Pagtuon o Pagtuon uban sa Kompanyon” nga kahon sa kataposan sa “Ang Basahon ug ang Biblia Nagsuporta sa Usag Usa” sa kapitulo 5 sa Isangyaw ang Akong Ebanghelyo. (pahina 135).
-
Gamita ang Giya ngadto sa mga Kasulatan sa pagpangita og hilisgotan nga nakapa-interes kanimo. Pangita og mga kasulatan gikan sa Biblia ug sa Basahon ni Mormon nga gilista alang niana nga hilisgotan.
-
Pangitaa kon asang dapita ang inyong paborito nga mga bersikulo sa Basahon ni Mormon. Susiha ang mga footnote aron masuta kon aduna bay mga bersikulo sa Biblia nga makapalapad sa inyong pagsabot niining mga bersikulo.
Lider sa diskusyon: Dapita ang klase sa pagpakigbahin og pipila sa mga panig-ingnan nga ilang nakaplagan kauban sa ilang kapares o gamay nga grupo. Pwede usab nimong hangyoon ang pipila ka matinguhaon nga mga tigkat-on sa pagpakigbahin sa ilang nakaplagan ngadto sa klase.
Pagtakda og tumong
Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:
Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.
-
Samtang magtuon ka sa Basahon ni Mormon, sunora og tan-aw ang mga footnote ug pangita og mga pakisayran ngadto sa Biblia nga mga kasulatan nga may kalabotan sa inyong nakat-onan.
-
Tun-i ang usa sa upat ka Ebanghelyo sa Bag-ong Tugon sa (Mateo, Marcos, Lucas, o Juan). Samtang magbasa ka, hatagi og pagtagad ang unsay imong nakat-onan ug gibati mahitungod ni Jesukristo. Tan-awa og maayo ang mga footnote ug pangita og mga pakisayran sa mga kasulatan sa Basahon ni Mormon nga may kalabotan sa unsay inyong nakat-onan.
Akong tumong
-
Ako mo … (aksiyon nga imong himoon).
-
Akong kab-oton ang akong tumong pinaagi sa … (usa ka yano nga plano).
Lider sa diskusyon: Kon ang mga tigkat-on adunay grupo sa mga kaedad nga pakigbahinan sa mga tumong sa tibuok kurso, hatagi sila og oras sa pagpakigbahin unsaon nila sa pagsuporta o pagpahinumdom ang matag usa sa dili pa ang sunod nga klase.
Sa Sunod nga Higayon
Lider sa diskusyon: Kon andam ka na nga motudlo sa leksiyon 10 sa sunod higayon, ikonsiderar ang pagdapit sa mga sakop sa klase sa pagtuon sa kapitulo 6 sa Isangyaw ang Akong Ebanghelyo agig pagpangandam. Mahimo usab nimong padad-an sila og usa ka pahinumdom.