Pagbansay sa Kahanas 1

Ipaila ang Basahon ni Mormon ngadto sa mga Tawo

Ang Manluluwas mihatag kanato sa Basahon ni Mormon aron makatabang sa pagkabig. Kini nga kalihokan makatabang sa mga tigkat-on nga makapraktis sa pagpakigbahin sa usa ka mubo nga pagpaila sa Basahon ni Mormon ngadto sa uban.

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Ipaila ang hilisgotan alang niini nga pagbansay sa kahanas pinaagi sa pagpasabot sa mosunod:

“Ang Basahon ni Mormon, inubanan sa Espiritu, mao ang imong labing gamhanan nga kapanguhaan sa pagkabig” (Isangyaw ang Akong Ebanghelyo [2023], 129). Isip usa ka misyonaryo, aduna kay daghang oportunidad nga ikapaila ngadto sa mga tawo ang Basahon ni Mormon.

Handurawa nga aduna kay higala nga nangutana nimo, “Unsa ang Basahon ni Mormon?”

Kon aduna lamang kay usa o duha ka minuto sa pagtubag, unsa kaha ang labing importanteng mga butang nga ilang masabtan?

Lider sa diskusyon: Ikonsiderar ang pagsulat sa mga tubag sa mga tigkat-on sa nag-unang pangutana diha sa pisara. Ipasabot nga kon magpaila ngadto sa mga tawo sa Basahon ni Mormon, mahimong makatabang ang pagtutok sa labing importante. Ang yanong mga punto nga atong tutokan makita ubos sa ulohan nga “Pagpaila sa Basahon ni Mormon” diha sa “Leksiyon 1—Ang Mensahe sa Pagpahiuli sa Ebanghelyo ni Jesukristo” (Isangyaw ang Akong Ebanghelyo, kapitulo 3, 47). Dapita ang mga sakop sa klase sa pagpangita niini nga ulohan. Dayon ipakigbahin ang mosunod nga mga instruksiyon:

Basaha ang “Pagpaila sa Basahon ni Mormon ngadto sa mga Tawo” nga anaa sa “Mga Panabot sa Pagtudlo” nga kahon (Isangyaw ang Akong Ebanghelyo, 48). Pangitaa ang makatabang nga mga punto nga tutokan sa pagpaila sa mga tawo ngadto sa Basahon ni Mormon.

Lider sa diskusyon: Dapita ang mga tigkat-on nga ipakigbahin ang ilang nakit-an. Kon gikinahanglan, mahimo nimong usbon ang unang gihimo nimo nga lista sa pisara.

Ipakita

Lider sa diskusyon: I-modelo ang ehemplo kon unsaon nga mapaila ngadto sa uban ang Basahon ni Mormon. Mahimo nimo kini pinaagi sa pagpaila sa Basahon ni Mormon ngadto sa klase, o modapit sa usa ka sakop sa klase nga moadto sa atubangan sa lawak aron idrama-drama ang pagpaila sa basahon ngadto kanila.

Ang alternatibong opsiyon mao ang pagpakita sa “Unsa ang Basahon ni Mormon? Usa ka 60 segundo nga Pagpasabot” (1:08) o “What is the Book of Mormon about?” (1:53). Ang duha ka bidyo anaa sa ChurchofJesusChrist.org. Ang mga sakop sa klase pwede nga mangita sa mga ideya nga ilang iapil ngadto sa ilang kaugalingong pagpaila.

Ipraktis

Lider sa diskusyon: Ipakigbahin ang mosunod nga mga instruksiyon. Hatagi ang mga tigkat-on og oras sa pagpangandam ug pagpraktis.

Pangandami ang pagpaila sa Basahon ni Mormon ngadto sa usa ka tawo pinaagi sa pagbuhat sa mosunod:

Isulat ang mahinungdanong mga punto nga imong ipakigbahin, lakip ang kon unsa ang Basahon ni Mormon ug sa unsang paagi kini nakaimpluwensiya sa imoha sa personal.
Uban sa kapares, magpulipuli sa pagpaila sa Basahon ni Mormon, ngadto sa mga 1–2 ka minuto ang matag usa.

Lider sa diskusyon: Human ang usa ka sakop sa klase matapos sa pagpraktis, dapita sila sa pagtino unsa nga mga pag-adjust ang ilang himoon sa paagi nga ilang gipaila ang Basahon ni Mormon. Dayon i-assign sila sa pagtrabaho uban sa laing kapares ug dapita sila sa pagpraktis og usab.

Gamita

Lider sa diskusyon: Pagpakigbahin og imbitasyon sama sa mosunod aron sa pagtabang sa mga tigkat-on nga gamiton kini nga kahanas:

Pangita og higayon sa pagpaila sa Basahon ni Mormon ngadto sa usa ka tawo sa sunod nga adlaw o ikaduha. Tingali usa kini ka tawo nga dili kaayo pamilyar sa basahon, o mahimo kang magpraktis sa imong pagpaila ngadto sa usa ka higala o sakop sa pamilya.