Pagbansay sa Kahanas 7

Pagtubag sa mga Pagbati nga Dili Angayan

Normal lamang nga mobati og kakulang kon makasinati kita og bag-ong mahagiton nga mga sitwasyon. Ang pagtutok sa unsay atong makontrol maoy usa ka paagi sa pagtabang kanato nga makabuntog sa mga pagbati nga dili angayan.

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Ipasabot nga kon magbuhat og bag-ong mga butang, normal lang nga mobati og kakulang. Mahimo kang mohatag og usa ka sanglitanan gikan sa imong kaugalingong kinabuhi dihang mibati ka og kakulang.

Unsa ang bag-ong sitwasyon nga mipabati nimo og kakulang?
Unsa ang imong gibuhat nga nakatabang o wala makatabang?
Nganong importante nga mosalig sa Ginoo kon mobati kita og kakulang? (tan-awa sa Mga Taga-Filipos 4:13; Alma 26:12)

Lider sa diskusyon: Magdungan og basa sa mosunod nga parapo. (Mahimo usab kang magdapit og mga tigkat-on sa pagpangita ug pagmarka niini nga parapo sa pahina 32 sa Pag-adjust ngadto sa Misyonaryo nga Kinabuhi.)

Ayaw sulayi sa pagkontrol ang mga butang nga dili ninyo makontrol. Ang pagsulay sa pagkontrol sa mga butang nga dili ninyo makontrol magdugang lamang sa inyong pagbati nga wala nay mahimo sa pagkontrol, nga magdugang sa inyong kahingawa. Itutok ang inyong kusog sa mga butang nga mahimo ninyong buhaton. (Pag-adjust ngadto sa Misyonaryo nga Kinabuhi [2013], 32)

Sa inyong hunahuna sa unsang paagi ang pagtutok sa unsay atong makontrol makatabang nato sa pagbuntog sa mga pagbati nga dili angayan?

Ipakita

Lider sa diskusyon: Aron matabangan ang mga sakop sa klase nga makat-on unsaon sa pagtutok sa unsay ilang makontrol, susiha ninyong tanan ang mosunod nga mga sanglitanan.

Mahimo ninyong hisgotan ngano nga ang mga ehemplo sa wala nga kolum dili makontrol sa usa ka tawo. Sa dili pa ipakigbahin ang mga tubag nga naa sa tuo nga kolum, dapita ang mga tigkat-on sa pagtan-aw kon makahunahuna ba sila og mga tubag sa ilang kaugalingon.

Dili makakontrol	Makakontrol
“Gusto kong mahimong maayong tawo, apan kanunay kong maguol tungod sa akong mga sayop.”	“Makahimo ko sa akong labing maayo ug moangkon nga usahay magkulang ko. Pinaagi sa inadlaw nga paghinulsol ug sa tabang sa Manluluwas, ako sa hinay-hinay mahimong mas sama ni Kristo.”
“Wala ko kahibalo kon makasulti ba gayod kaha ko sa pinulongan nga sama kamaayo sa akong kompanyon.”	“Makatuon ko nga makugihon sa pinulongan kada adlaw ug mainampoong makapangayo sa tabang sa Dios.”

Ipraktis

Lider sa diskusyon: Ipakita ang mosunod nga dugang nga mga sanglitanan ug hatagi ang mga sakop sa klase og panahon sa pagpraktis nga adunay mga kapares. Ang mga tigkat-on makahunahuna usab og lain-laing mga sanglitanan kay sa gihatag.

Dili makakontrol	Makakontrol
“Wala koy daghang higala sama sa ubang mga tawo.”
“Ang paghunahuna mahitungod sa pagserbisyo og misyon sobra ka lisod para nako. Morag lisod kini nga trabaho, mingawon ko sa akong pamilya ug mga higala, ug adunay daghang wala mahibaloi mahitungod sa umaabot.”
“Ang ubang mga misyonaryo mas daghang natabangan nga mga tawo aron mabunyagan kay kanako. Nakapangutana ko kon ang akong misyon wala ba magmalamposon.”

Gamita

Lider sa diskusyon: Tabangi ang mga estudyante sa paghunahuna kon unsaon nila paggamit kini nga kahanas sa ilang kinabuhi pinaagi sa pagpakigbahin sa mosunod nga pagdapit:

Sa tibuok sunod nga semana, paggahin og panahon sa pagmatikod kon kamo tingali mobati og kakulang. Dayon, hangyoa ang Langitnong Amahan sa pagtabang kaninyo sa pagtutok sa unsay inyong makontrol.