Leksiyon 11

Tabangi ang mga Tawo sa Paghimo ug Pagtuman sa mga Pasalig

Isangyaw ang Akong Ebanghelyo, Kapitulo 11

“Ang pagtabang sa mga tawo nga mahimong makabig ngadto ni Jesukristo mao ang sentro [sa] misyonaryo nga katuyoan” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 232). Ang usa ka importanteng paagi sa pagtabang sa uban sa ilang pagkakabig mao ang pagdapit kanila sa paghimo ug pagtuman sa mga pasalig. Ang pagpadangat og epektibong mga imbitasyon mopalambo sa kalagmitan nga ang mga tawo mohimo ug motuman sa mga pasalig.

Magrebyo ug Mag-follow Up

Lider sa diskusyon: Dapita ang mga tigkat-on sa paghunahuna mahitungod sa ilang bag-ong mga paningkamot sa paggamit sa unsay ilang nakat-onan niini nga klase. Mahimo nimo silang dapiton sa pagpakigbahin og pipila sa ilang mga paningkamot uban sa kapares o isip tibuok klase.

Mga Opsiyon sa Kalihokan sa Pagkat-on

Lider sa diskusyon: Sa mainampoong paagi pilia ang (mga) opsiyon sa pagkat-on nga labing makaayo sa imong klase. Seguradoha ang pagbilin og taas nga oras sa pagpraktis ug paggamit.

Opsiyon A: Unsaon nako sa pagtabang sa uban nga makabig ngadto sa Ginoo?

Pagtuon

Lider sa diskusyon: Hisgoti ang mosunod nga pamahayag ni Elder David A. Bednar.

Ang awtorisadong mga sulugoon sa Ginoo nagbalik-balik sa pagtudlo nga usa sa importanteng mga katuyoan sa atong mortal nga kinabuhi mao ang pag-usab sa espirituhanong paagi ug pag-usab pinaagi sa Pag-ula ni Jesukristo. (“Kinahanglang Matawo Kamo Pag-usab,” Liahona, Mayo 2007, 19–20)

Sa inyong hunahuna ngano kaha nga ang esprituhanong pag-usab, o pagkakabig, mao ang usa sa kinatibuk-ang mga katuyoan sa atong panahon diri sa yuta?

Lider sa diskusyon: Ikonsiderar ang pagpakita sa mosunod nga wala makompletong mga kapahayag [sentence] isip ulohan diha sa pisara:

Ang pagkakabig ngadto sa Ginoo nagpasabot nga…

Kita makabig ngadto ni Jesukristo pinaagi sa…

Dapita ang mga sakop sa klase sa paghunahuna o pagpakigbahin giunsa nila sa pagkompleto ang duha ka kapahayag. Ipasabot nga kini nga kalihokan sa pagkat-on makatabang nila nga mas makasabot unsa ang pagkakabig ug sa unsang paagi kita makabig. Ipakita ang mosunod nga mga instruksiyon:

Kompletoha ang mosunod nga mga kalihokan sa pagtuon. Hatagi og gibug-aton ang mahitungod sa unsay inyong nakat-onan (1) unsa ang ipasabot mahitungod sa pagkakabig ngadto sa Ginoo ug (2) sa unsang paagi nahitabo ang pagkakabig.

Basaha ang mga seksiyon nga nag-ulohan og “Paghinulsol, Pasalig, ug Pagkakabig” sa kapitulo 11 sa Isangyaw ang Akong Ebanghelyo (mga pahina 231–232).
Tun-i ang labing minos duha sa mosunod nga mga tudling sa kasulatan: Juan 3:3–5; Mosiah 5:2; Mosiah 27:25–26; Alma 5:12–14.

Lider sa diskusyon: Human sa igong oras sa pagtuon, dapita ang mga sakop sa klase sa pagpakigbahin sa ilang nakat-onan. Mahimo nimong dapiton ang mga tigkat-on sa pagsulat sa ilang mga tubag ubos sa tukmang ulohan diha sa pisara.

Mahimo usab ninyong hisgotan ang mosunod nga mga pangutana:

Sa unsang paagi ang paghinulsol, mga pasalig, ug mga pakigsaad may kalabotan sa pagkakabig?
Sa inyong hunahuna ngano kaha nga ang pagkakabig mahimo lamang pinaagi ni Jesukristo ug sa Iyang Pag-ula?
Unsay nakatabang ninyo nga mapalawman ang inyong pagkakabig ngadto kang Jesukristo?

Ipraktis

Lider sa diskusyon: Ang mosunod nga kalihokan makatabang sa mga tigkat-on alang sa pagbansay sa pagpasabot sa mga kamatuoran nga ilang gitun-an sa nangagi nga kalihokan sa pagkat-on. Ipakita ang mosunod nga mga instruksiyon ug hatagi ang mga sakop sa klase og oras sa pagtubag. Mahimo nimong sangonan ang mga tigkat-on o mga kapares sa usa ka piho nga senaryo nga buhaton ug ilang tudloan ang uban kinsa nasangonan sa pagtrabaho sa lain nga mga senaryo.

Pagpili og usa sa mosunod nga mga senaryo. Pag-andam og tubag alang sa usa ka tawo nga naa sa senaryo pinaagi sa pagtubag sa mga pangutana sa ubos.

Si Christina wala pa gayod masakop og usa ka simbahan sukad. Bag-ohay lang gibati niya ang tinguha nga mopaduol sa Dios. Naghunahuna siya kon asa siya magsugod.
Si Isaac gitudloan sa mga misyonaryo. Atol sa usa ka sa mga leksiyon, ang mga misyonaryo mitudlo ni Isaac nga ang paghinulsol naglakip sa pagbalik ngadto sa Dios ug mopalayo gikan sa atong mga sala. Si Isaac mitubag pinaagi sa pag-ingon, “dili ako segurado kon makabuhat ko ana. Ingon ani na gayod ko.”
Si Jasmine nakabantay sa uban nga ingon og sayon ra para nila ang pagsunod sa mga sugo ug adunay mas lig-on nga pagpamatuod kay kaniya. Nawad-an siya og kadasig dihang iyang gikompara ang iyang kaugalingon ngadto sa uban.

Unsa ang imong ipakigbahin gikan sa mga kasulatan o sa Isangyaw ang Akong Ebanghelyo nga makatabang?
Unsa ang imong itudlo mahitungod sa Langitnong Amahan ug ni Jesukristo?
Unsa nga imbitasyon ang imong mahatag?

Lider sa diskusyon: Human sa igong panahon, dapita ang mga tigkat-on sa pagpakigbahin sa ilang mga tubag uban sa kapares o uban sa gagmay nga grupo.

Pagtakda og tumong

Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

Isulat ang inyong personal, nagpadayon nga istorya sa pagkakabig. Ilakip ang piho nga mga paagi nga ang Dios nakaimpluwensiya sa mga kausaban sa imong kinabuhi.
Hangyoa ang usa ka higala o sakop sa pamilya mahitungod sa ilang proseso sa pagkakabig ngadto ni Jesukristo.
Isulat ang tulo ka paagi nga makapangayo kamo og tabang ni Jesukristo sa paglig-on sa inyong personal nga pagkakabig.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Lider sa diskusyon: Kon ang mga tigkat-on adunay grupo sa mga kaedad nga pakigbahinan sa mga tumong sa tibuok kurso, hatagi sila og oras sa pagpakigbahin unsaon nila sa pagsuporta o pagpahinumdom ang matag usa sa dili pa ang sunod nga klase.

Opsiyon B: Sa unsang paagi ang epektibo nga mga imbitasyon makatabang sa mga tawo sa pagduol ngadto ni Jesukristo?

Pagtuon

Lider sa diskusyon: Ipakita ang mosunod nga mga pangutana ug dapita ang mga tigkat-on nga ilang hisgotan kini uban sa kapares. Mahimo nimong sugdan pinaagi sa pagpakigbahin og usa ka ehamplo gikan sa imong kaugalingong kinabuhi.

Unsa nga imbitasyon ang imong nadawat ug gilihok nga nakatabang nimo nga maduol ngadto ni Jesukristo?
Sa unsang paagi kaha malahi ang mga butang alang ninyo kon wala kamo dapita?

Lider sa diskusyon: Aron matabangan ang mga tigkat-on nga makasugod sa pagtuon mahitungod sa epektibong mga pag-imbitar, ikonsiderar ang pagpakigbahin sa mga instruksiyon nga nakalista sa ubos. Pwede nimong bahinon ang klase nga magpares ug i-assign ang matag pares og usa sa mga opsiyon nga tun-an. Mahimo usab nimong imbitaron ang matag usa nga tigkat-on sa pagbasa sa usa o daghan pa sa mga kasulatan nga makita diha sa “Pagtuon sa Kasulatan” nga kahon sa pahina 233, ubos sa “Mga Baroganan alang sa Paghatag og mga Imbitasyon.”

Kat-oni ang paghatag og mga imbitasyon pinaagi sa pagtuon sa mosunod nga kapitulo 11 sa Isangyaw ang Akong Ebanghelyo:

Ang duha ka parapo ug mga bullet point ubos sa ulohan nga “Paghatag sa mga Imbitasyon” (pahina 232)
“Mga Baroganan alang sa Paghatag og mga Imbitasyon” (pahina 233)

Lider sa diskusyon: Kon mahuman na sila sa pagtuon, dapita ang mga sakop sa klase sa pag-summarize sa ilang mga nakat-onan uban sa ilang mga kapares. Dayon ikonsiderar ang paghisgot sa mosunod nga mga pangutana sa tibuok klase:

Unsa ang inyong nakat-onan mahitungod sa kaimportante sa paghatag og mga imbitasyon samtang mopakigbahin kita sa ebanghelyo ni Jesukristo?
Unsa ang mga ehemplo sa mga imbitasyon nga atong mahatag aron makatabang sa uban sa pagduol ngadto ni Kristo?

Lider sa diskusyon: Isip usa ka bahin sa inyong panaghigot, mahimo nimong ipasalida ang “Inviting Others to ‘Come and See’” (1:17) o “Inviting Others to ‘Come and Help’” (1:03). Ang duha ka bidyo anaa sa ChurchofJesusChrist.org:

Mahimo usab nimong ipakigbahin ang mosunod nga pamahayag ni Elder Gary E. Stevenson:

Adunay daghan kaayong mga pagdapit nga mahimo natong ipaabot sa uban. Kita makadapit sa uban sa “pagduol ug pagtan-aw” sa usa ka tulumanon sa sakramento, usa ka kalihokan sa ward, usa ka online nga bidyo nga nagpasabot sa ebanghelyo ni Jesukristo. Ang “pagduol ug pagtan-aw” mahimong mao ang usa ka imbitasyon sa pagbasa sa Basahon ni Mormon o pagbisita sa usa ka bag-o nga templo atol sa open house niini sa dili pa kini ipahinungod. (“Paghigugma, Pagpaambit, Pagdapit,” Liahona, Mayo 2022, 87)

Ipraktis

Paghatag sa mga Imbitasyon

Ang mosunod nga mga baroganan makatabang ninyo sa paghatag og epektibong mga imbitasyon:

Magmabination, piho ug klaro. Ipadangat ang imong imbitasyon sa porma sa pangutana nga “buhaton ba nimo”. Pananglit, tan-awa sa “Pangimbitar gamit ang Mabination ug Klaro nga Pinulongan” sa kapitulo 11 sa Isangyaw ang Akong Ebanghelyo (pahina 234).

Pagpamatuod sa mga panalangin. Ipakigbahin ang imong pagpamatuod nga ang Dios mopanalangin niadtong kinsa mosunod sa imbitasyon nga imong gihatag. Mahimo nimong ipasabot sa unsang paagi kamo sa personal napanalanginan. Alang sa dugang impormasyon, tan-awa sa “Mosaad sa mga Tawo og mga Panalangin” ug “Ipakigbahin ang Imong Pagpamatuod” sa kapitulo 11 sa Isangyaw ang Akong Ebanghelyo (pahina 235–236).

Ania ang ehemplo sa usa ka imbitasyon nga nagsunod niini nga mga giya:

Ang Ginoo misaad og dagkong mga panalangin niadtong kinsa nagsunod sa balaod sa ikapulo. Siya mipanalangin nako sa indibidwal ug sa akong pamilya sa among pagsunod niini nga balaod. Ako mosaad nga ang Dios mopanalangin kanimo samtang imong ipakita ang imong pagtuo ni Jesukristo pinaagi sa pagbayad sa ikapulo. Motuman ka ba sa balaod sa ikapulo human nga ikaw mabunyagan?

Gamita kini nga mga lakang aron matabangan kamo sa pagbansay sa paghimo ug paghatag sa usa ka imbitasyon.

Tinoa unsay imong mabuhat sa pagdapit sa usa ka tawo aron mapaduol ngadto ni Jesukristo. Mahimong usa ka tawo nga imong kaila o usa ka tawo nga imong gihunahuna nga tudloan isip usa ka misyonaryo.
Ang mga ehemplo sa mga aksiyon nga ilang mabuhat naglakip sa pakigkita sa mga misyonaryo, pagbasa sa Basahon ni Mormon matag adlaw, pagsimba uban ninyo, o pag-ampo ngadto sa Langitnong Amahan. Alang sa dugang nga mga ehemplo, tan-awa sa “Mga Imbitasyon nga Mahimo Ninyong Ipadangat” nga anaa sa mga leksiyon 1–3 sa kapitulo 3 sa Isangyaw ang Akong Ebanghelyo (mga pahina 38, 56, 74).
Irekord unsay imong isulti sa pagpadangat og imbitasyon. Hinumdomi nga magmabination, piho, ug klaro sa imong pag-imbita. Seguradoha ang paglakip sa imong pagpamatuod mahitungod sa mga panalangin nga atong madawat samtang atong sundon kini nga baroganan.

Lider sa diskusyon: Human ang mga tigkat-on makakompleto sa handout, hatagi sila og oras alang sa pagbansay sa paghatag sa ilang imbitasyon uban sa kapares. Mahimo nimong imodelo kini sa dili pa magbansay ang mga sakop sa klase sa ilang kaugalingon. Kon itugot sa panahon, mahimo nimong dapiton ang mga tigkat-on sa pagbansay uban sa daghang mga sakop sa klase.

Pagtakda og tumong

Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

Bansaya ang pagpadangat sa inyong imbitasyon ngadto sa usa ka pamilya o higala sa gawas sa klase.
Suhira ang “Pagpakigbahin sa Ebanghelyo” nga seksiyon sa Librarya sa Ebanghelyo ug pangitaa ang mga ehemplo sa mga imbitasyon nga tingali imong mahatag ngadto sa usa ka pamilya o mga higala. Lihoka ang unsay gibati nimong gidasig nga buhaton.
Dapita ang usa ka higala sa pagtambong sa simbahan o sa usa ka kalihokan sa simbahan uban nimo. Gamita ang mga giya nga imong gipraktis samtang inyo silang dapiton.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Sa Sunod nga Higayon

Lider sa diskusyon: Kon andam na ka sa pagtudlo sa leksiyon 12 sa sunod klase, ikonsiderar ang pagdapit sa mga tigkat-on nga mangandam pinaagi sa pagtan-aw sa tibuok Pag-adjust ngadto sa Misyonaryo nga Kinabuhi (2013). Mahimo nimong padalhan sila og link niini nga kapanguhaan o ipakita nila unsaon sa pagpangita niini diha sa Librarya sa Ebanghelyo (Librarya > Mga Tamdanan nga Basahon ug Mga Calling > Mga sa Misyon > Pag-adjust ngadto sa Misyonaryo nga Kinabuhi).