E hōpoi mai Iesu Mesia i te ’oa’oa

’Ua ’ōpuahia ’oe ’ia roa’a te poupou ’e te ’oa’oa. Terā te fā o tō ’oe orara’a. ’O te fā te reira nō te fa’anahora’a a te Metua i te ao ra nō te ’oa’oa. E ’ere roa atu ïa e’ita roa ’oe e ’oto ’e e nā roto i te mau taime fifi. Te aura’a mau rā, ’oia ho’i, e nehenehe te Fa’aora e tauturu ia ’oe ’ia fa’aruru i te mau taime fifi ’e ’ia ’ite i te ’oa’oa.

E ’ere te ’oa’oa nō roto mai i tō ’oe vaira’a ; nō roto mai rā i te pe’era’a ia Iesu Mesia. E tupu paha te mahana ’ino, te hepetoma ’ino, ’aore rā te matahiti ’ino. E ’ere rā te ’oa’oa i te ’oto-’ore-ra’a i roto i te orara’a ; ’o te vaira’a rā te Mesia i roto i tō ’oe orara’a.

E rahi a’e te ’oa’oa ’e te vai maoro o te ’oa’oa o te Fa’aora i te tahi noa atu mea. E fa’ahema Sātane ia ’oe ’ia ’imi i te ’āreareara’a ’e te ho’onara’a nā roto i te mau rāve’a pipiri ’e te mau ’āreareara’a o te ao nei. E’ita te hō’ē noa atu mea e pāto’i ia Iesu Mesia ’e i tāna mau fa’auera’a e fa’atae mai i te ’oa’oa ’e te poupou mau ’e te vai maoro. ’A ha’amana’o ē, nō te hō’ē tau poto noa te mau mea o teie nei ao. Tē pūpū nei te ’evanelia a Iesu Mesia i te ’oa’oa ’e te poupou hōhonu ’e te mo’a ’e te mure ’ore.

’A mā’iti i te ’oa’oa. Noa atu ē, e parau mau tē vai ra te ’oto ’e te fifi i roto i teie ao, ’ua fa’a’ī ato’a te Metua i te AAo ra i te ao nei i te mau mea nehenehe e rave rahi ’e te maitata’i. ’A ’imi haere i te reira. ’A tāmata i te vai ara i te tumu nō te ’oa’oa i te mau mahana ato’a—e nehenehe ato’a paha e pāpa’i roa i te reira. E mau hōro’a teie nō ’ō mai i tō ’oe Metua here i te ao ra.

’A fa’atae i te ’oa’oa ’e i te poupou ia vetahi ’ē. ’Ua ’itehia ia Iesu Mesia te ’īra’a o te ’oa’oa i roto i te fa’ataera’a i te ’oa’oa ia tātou. E nehenehe ’oe e pe’e i tōna hi’ora’a nā roto i te ’itera’a i te ’oa’oa ’e i te poupou i roto i te tāvinira’a ia vetahi ’ē. ’A tauturu i te ta’ata ’ia putapū i te here. ’A fa’a’ite i te ha’apoupoura’a ’ā’au tae. ’A fa’aitoito i te hō’ē ta’ata e tāfifi ra i te hō’ē mea. Mai te mea noa atu e mana’o ’oe ē, tītauhia te ’oa’oa rahi a’e i roto i tō ’oe orara’a, ’a tāmata i te fa’atae i te ’oa’oa i te tahi atu ta’ata.

’A ’oa’oa i te ha’amorira’a i te Fatu. ’Ia haere ’oe i te purera’a, ’a rōtahi i ni’a i te ’oa’oa tā Iesu Mesia e hōro’a mai ia ’oe, ’e ’a ’ārue iāna nō te reira ! ’A amo i tā ’oe tuha’a nō te tauturu i te vārua ’oa’oa i roto i tā ’outou mau rurura’a a te ’Ēkālesia. ’A fa’ariro i te pehe mo’a ’ei tuha’a nō tā ’oe ha’amorira’a i te fare ’e i te fare purera’a.

E nehenehe ’oe e putapū i te ’oa’oa noa atu ē, e mea pa’ari te orara’a. E uiui paha te mana’o ē, e mea nāhea pa’i te reira, e parau mau rā. E nehenehe tō ’oe fa’aro’o ia Iesu Mesia, tōna mana fa’aora māuiui ’e tāna mau parau fafau mure ’ore, e hōro’a mai ia ’oe i te ’oa’oa tāmau. E tāpo’i tōna ’oa’oa i te ’oto ma te hōpoi mai i te hau tei hau atu i tei māramaramahia.

’O te ’īra’a o te ’oa’oa e tīa’i ra ia ’oe i roto i te bāsileia tiretiera o te Atua. ’Ua upo’oti’a Iesu Mesia i ni’a i te mau mea ato’a ’o tē nehenehe e ārai ia ’oe ’ia fa’ari’i i te ’oa’oa mure ’ore. ’A ti’aturi noa ai ’oe iāna ’e ’a pe’e noa ai iāna, nō ’oe ïa teie ’oa’oa.