’Ua hina’aro te Atua e paraparau ia ’oe

E arata’i te Vārua ia ’oe i te Metua i te ao ra ’e ia Iesu Mesia. E ’ohipa faufa’a roa te reira nā te Vārua Maita’i. E fa’auru ato’a mai ’oia ia ’oe ’ia tātarahapa ’e ’ia pe’e ia Iesu Mesia, ’ia ti’a ia ’oe ’ia fa’ari’i i te mau ha’amaita’ira’a o tāna tāra’ehara. ’A tātarahapa ai ’oe, e tāmā te Vārua ia ’oe ma te tauturu ia ’oe ’ia taui.

E paraparau te Vārua Maita’i i tō ’oe ferurira’a ’e i tō ’oe ’ā’au. E nehenehe te mau poro’i a te Vārua e tae mai i roto i tō ’oe ferurira’a nā roto i te mau rāve’a e rave rahi—nā roto i te mau mana’o fa’auru, te mau fa’aarara’a, te māramaramara’a pāpū ’e te mau ha’amana’ora’a pae vārua. E nehenehe te Vārua Maita’i e paraparau i tō ’oe ’ā’au nā roto i te mau mana’o fa’aitoito mai te tāmāhanahanara’a, te ti’aturira’a, te hau, te here, te ’oa’oa, te ha’eha’a, te māuruuru ’e te fa’a’oroma’i.

« ’A fa’ari’i i te Vārua Maita’i. » ’Ua fa’ahitihia teie mau parau i te taime ’a ha’amauhia ai ’oe ’ei melo nō te ’Ēkālesia a te Mesia. Nāhea ’oe i te fa’ari’i i te Vārua Maita’i ? Nā roto i te ha’apa’ora’a i te mau ha’api’ira’a a Iesu Mesia. ’O ’oia tō ’oe pūai. Nā te pe’era’a iāna e tītau manihini i te Vārua Maita’i i roto i tō ’oe orara’a.

’A ’imi i tō ’oe Metua i te ao ra nā roto i te pure. ’A fā’i hua atu i tō ’ā’au iāna ra. ’A ha’amāuruuru iāna nō te mau ha’amaita’ira’a fa’ahiahia tāna i hōro’a ia ’oe. ’A fa’a’ite iāna i tō ’oe ’oa’oa, te mau ha’ape’ape’ara’a ’e te mau uira’a. ’A fa’aea hau ’e ’a fa’aro’o i tāna mau pāhonora’a ’o tē nehenehe e tae mai, mai te mana’o hau, te mana’o i te ferurira’a ’aore rā te mana’o e tae mai nō te rave i te hō’ē mea.

’A fa’aro’o i te reo o te Atua i roto i te mau pāpa’ira’a mo’a. ’O te mau pāpa’ira’a mo’a te mau parau a te Atua ia ’oe ! ’A ha’api’i i roto i te reira i te mau mahana ato’a nō te ’ite mai i tōna reo ’e nō te putapū i tōna here. ’A tai’o noa ai ’oe, ’a feruri i te mea tāna e ha’api’i ra ia ’oe, ’e ’a pāpa’i i te mau mana’o e tae mai. ’A fa’ariro i te tai’ora’a pāpa’ira’a mo’a ’ei peu mātau—te Buka a Moromona iho ā rā—i te roara’a o tō ’oe orara’a.

’A rave mai te au i te mau mana’o pae vārua tā ’oe e fa’ari’i. Mai te mea e mana’o i te ferurira’a, ’aore rā e mana’o e tae mai ’ia hāmani maita’i i te hō’ē ta’ata, ’a rave i te reira ! Nō ’ō mai i te Atua te mau mea maitata’i ato’a. ’A fa’a’ite i tō ’oe Metua i te ao ra ē, e nehenehe tāna e ti’aturi ia ’oe nō te pe’e i te mau mana’o e tae mai nō ’ō mai iāna ra.

E tāmāhanahana ’e e arata’i te Vārua Maita’i ia ’oe. ’Ua mātauhia ’oia ’o te Fa’aa’o. E turu ’oia ia ’oe i te mau taime fifi. E tauturu ’oia ia ’oe ’ia ’ite e aha tē parau ’aore rā, e aha tē rave. Nā roto i tāna fa’aurura’a, e nehenehe ’oe e fa’ata’a e aha te parau mau ’e e aha te parau hape. E nehenehe ’oia e tauturu ia ’oe ’ia ’ite mai i te maita’i i roto ia vetahi ’ē ’e ia ’oe iho. E nehenehe ato’a te Vārua e fa’aara ia ’oe i te ’ohipa ataata. E arata’i ’oia ia ’oe ia Iesu Mesia ra, ’e i te ātea o te hara.

E nehenehe ’oe e fa’ari’i i te mau hōro’a pae vārua. E rave rahi hōro’a a te Atua nō tāna mau tamari’i nā roto i tōna Vārua. Te tahi tei fa’ahitihia i roto i te mau pāpa’ira’a mo’a, ’oia ho’i te heheura’a, te ti’aturira’a ia Iesu Mesia, te ha’api’ira’a i te ta’ata, te hāro’aro’ara’a, ’e te pa’ari. ’A pure nō te ani i te Metua i te ao ra nō ni’a i te mau hōro’a pae vārua tāna i hōro’a ia ’oe, nāhea ’oe i te fa’ananea i te reira, ’e te huru ’oia e hina’aro ia ’oe ’ia fa’a’ohipa i te reira nō te ha’amaita’i ia vetahi ’ē.