E nehenehe ’oe e tauturu i te ’ohipa a te Atua

’O te ’ohipa ’e te hanahana a te Atua te fa’atupura’a i te tāhuti ’ore ’e te ora mure ’ore. Te tāhuti ’ore, ’o te orara’a ïa ē a muri noa atu ma te tino ti’afa’ahou. Te ora mure ’ore, ’aore rā te fa’ateiteira’a, ’o te riro-hau-atu-ā-ra’a ïa mai te Atua te huru ’e te orara’a iāna ra ’ei ’utuāfare. E tupu ai teie mau mea ato’a maoti Iesu Mesia ’e tāna tusia tāra’ehara. E nehenehe ’oe e ti’aturi iāna.

E nehenehe ’oe e tauturu i te ’ohipa a te Atua nā roto i te haerera’a mai i te Mesia ’e te tauturura’a ia vetahi ’ē ’ia nā reira ato’a. I te mau taime ato’a e rave ’oe i te hō’ē mea nō te tauturu i te hō’ē ta’ata ’ia pe’e ia Iesu Mesia, tē tauturu ra ïa ’oe i te ’ohipa a te Atua.

’A ora i te ’evanelia. ’A patu i tō ’oe fa’aro’o ia Iesu Mesia. ’A tātarahapa i te mau mahana ato’a. ’A fa’ari’i i te mau ’ōro’a autahu’ara’a a te Atua ’e ’a ha’apa’o i tā ’oe mau fafaura’a. ’A fa’ariro i te reira ’ei hōho’a fa’anahora’a nō te toe’a o tō ’oe orara’a.

’A aupuru i te feiā tei hina’aro i te tauturu. ’A ’imi i te mau rāve’a nō te tāvini ’e nō te aupuru ia vetahi ’ē, mai tō ’oe ’utuāfare, tō ’oe mau hoa, ’e tō ’oe huira’atira. Hō’ē rāve’a rahi nō te tauturu i te ta’ata tei hina’aro i te tauturu, ’o te ha’apa’ora’a ïa i te ture nō te ha’apaera’a mā’a ’e te hōro’ara’a i te mau ō ha’apaera’a mā’a.

’A ani i te mau ta’ata ato’a ’ia fa’ari’i i te ’evanelia. ’Ia fa’a’ite tā ’oe mau parau ’e te mau ’ohipa i tō ’oe fa’aro’o ia Iesu Mesia. ’Ia vai ineine ’oe nō te parau atu i te ta’ata e ui mai, i te tīa’ira’a ’e te poupou tā ’oe e putapū ra ’ei pipi nāna. Nō te feiā ’āpī tamāroa, e hōpoi’a autahu’ara’a te tāvinira’a i te hō’ē misiōni rave tāmau. Nō te feiā ’āpī tamāhine, e fāna’ora’a pūai rahi te reira ; ’a pure nō te ’ite ē, tē hina’aro ra ānei te Fatu ia ’oe ’ia tāvini. ’A fa’aineine nō te fa’a’ite i te ’evanelia i te roara’a o tō ’oe orara’a.

’A tāhō’ē i te mau ’utuāfare nō te tau mure ’ore nā roto i te ravera’a i te ’ohipa ’ā’amu ’utuāfare ’e te ’ohipa hiero. ’A ha’api’i i te parau nō tō ’oe mau tupuna. ’A hi’o mai nō vai e tītauhia te mau ’ōro’a nō te hiero. ’A haere pinepine i te hiero mai te mea e nehenehe ia ’oe, ’ia bāpetizohia ’e ’ia ha’amauhia nō rātou. ’Ia hina’aro ’oe i te tauturu, ’a haere i te FamilySearch.org.

E fa’ari’i ’oe i te tauturu a te Atua. ’Aita te Metua i te ao ra e tīa’i nei ia ’oe ’ia rave i teie ’ohipa ’o ’oe ana’e. Tei pīha’i iho ’oia ia ’oe. ’Ia pūpū ana’e ’oe i tō ’oe taime ’e tō ’oe ’ā’au ma te ha’eha’a, e rave ’oia i te mau mea fa’ahiahia nā roto ia ’oe. ’O Iesu Mesia tō ’oe pūai !

E ’ī ’oe i te ’oa’oa. E ’ohipa ’oa’oa te ’ohipa a te Atua ! ’A rave ai ’oe i te hō’ē tuha’a i roto, e nehenehe ’oe e putapū i te ’oa’oa tāna e putapū nei. ’A feruri na i te ’oa’oa ’āmui nō ’oe ’e te Metua i te ao ra ’e tāna mau tamari’i tā ’oe i tauturu i te ’āfa’i iāna ra !