4.
E tauturu Iesu Mesia ia ’oe
Salamo 147:3
’O Iesu Mesia tō ’oe pūai. ’Ua rave ’oia i te mau mea ato’a tei tītauhia ’ia noa’a ia ’oe te ’oa’oa i roto i teie orara’a ē a muri noa atu. Nā roto i te mā’itira’a iāna ’e i tāna ’evanelia, tē mā’iti ra ïa ’oe i te poupou ’e te ’oa’oa mure ’ore.
Noa atu e tāmata roa ’oe i te rave i te mau mā’itira’a maita’i, i te tahi taime e hape ’oe. E rave ’oe i te mau mea e tātarahapa ’oe. Mai te reira nō te mau ta’ata ato’a. ’Ia tupu ana’e te reira, e mea ’ōhie ’ia ha’aparuparu i te mana’o ’aore rā e uiui te mana’o ē, e tae ānei i terā fāito maita’i. E parau ’āpī ’oa’oa rā—e parau ’āpī fa’ahiahia e noa’a te ti’aturi ! Nō te here o te Atua ia ’oe, ’ua tono mai ’oia i tāna Tamaiti, ia Iesu Mesia, tei rave i ni’a iāna i tā ’oe mau hara ’ia ti’a ia ’oe ’ia tātarahapa, ’ia fa’a’orehia te hara ’e ’ia tāmau i te haere i mua.
Te mau parau mau mure ’ore
E ha’apūai Iesu Mesia ia ’oe. E tauturu ’oia ia ’oe ’ia taui i tō ’oe mau hia’ai, i tō ’oe mau mana’o ’e i tā ’oe mau ’ohipa e rave. ’Ia pe’ape’a ’oe ’aore rā ’ia mata’u ’aore rā ’ia fifi noa atu ’oe, e tāmāhanahana ’oia ia ’oe. E tauturu mai ’oia i roto i te mau mea ato’a o te orara’a. E nehenehe ’oe e ti’aturi iāna.
E ’ere te tātarahapara’a i te fa’autu’ara’a nō te hara ; ’o te rāve’a ho’i e fa’ati’amā ai te Fa’aora ia ’oe i te hara. E tātarahapa ra, e taui ïa—e fāriu ’ē i te hara ma te fāriu i ni’a i te Atua. Te aura’a ra, e ha’amaita’i ia ’oe ’e e fa’ari’i i te fa’a’orera’a hara. E ’ere teie huru tauira’a i te tauira’a nō te hō’ē noa taime ; e ’ohipa tāmau rā.
Te mau tītaura’a manihini
’A fa’ariro ia Iesu Mesia ’ei rōtahi o tō ’oe orara’a. ’A ’imi i tāna tauturu i roto i te mau mea ato’a tā ’oe e rave.
’A tātarahapa. ’A fāriu i ni’a i te Fatu ma te hia’ai e ha’amaita’i ia ’oe. ’Ia rave ana’e ’oe i te ’ohipa hape, ’a fā’i hua i te reira i mua i te Atua ’e, e mai te mea e tītauhia, i mua i tō ’oe episekōpo ’e te ta’ata ato’a tā ’oe i ha’apēpē. ’A fa’aitoito roa i te fa’atītī’aifaro i te mau mea.
’A ’oa’oa i te hōro’a nō te rave maita’i a’e ’e nō ha’amaita’i a’e ia ’oe. Noa atu ē, e ’ere i te mea ’ōhie ’e e mea maoro a’e i tā ’oe e hina’aro ra, ’eiaha roa atu e fa’aea i te tāmata. ’A tāmau noa i te ’ohipa ’e i te ti’aturi i te Fatu. E tauturu mai ’oia i tā ’oe mau ta’ahira’a ato’a i ni’a i te ’ē’a.
Te mau ha’amaita’ira’a i parauhia
E fa’a’ore Iesu Mesia i te hara ma te fa’aora i tō ’oe māuiui ’a tātarahapa noa ai ’oe. E mono ’oia i tō ’oe mana’o hapa i te hau ’e te ’oa’oa. E’ita ’oia e ha’amana’o fa’ahou i tā ’oe mau hara. ’O Iesu Mesia tō ’oe pūai, ’e ma tōna pūai, e rahi atu ā tō ’oe hina’aro ’ia ha’apa’o i tāna mau fa’auera’a.
E taui ’oia i tō ’oe ’ā’au ’e tō ’oe orara’a. E tupu marū noa mai ’oe i te rahi ma te riro rahi atu ā mai iāna te huru.
Uira’a ’e Pāhonora’a
Nāhea vau i te ’ite ē ’ua fa’a’ore te Atua i tā’u hara ? ’Ua parau fafau te Atua ē, e fa’a’ore ’oia i te hara a te feiā e tātarahapa. ’Ia fa’ari’i ’oe i te tāmāhanahanara’a a te Vārua, e ’ite ’oe ē, tē ’ohipa ra te mana tāra’ehara a te Fa’aora i roto i tō ’oe orara’a.
E aha te taime e tītauhia te tauturu a te ’episekōpo nō te tātarahapa ? Tē mau nei tō ’oe ’episekōpo i te mau tāviri nō te autahu’ara’a, ’e e mau hōro’a pae vārua tōna nō te tauturu ia ’oe ’ia tātarahapa. E nehenehe tā ’oe e tītau i tāna tauturu ’e te parau a’o i te mau taime ato’a. Mai te mea ’ua rave ’oe i te tahi hape teimaha, mai te ’ōfatira’a i te ture nō te vi’ivi’i ’ore, ’a fārerei i tō ’oe ’episekōpo. E’ita ’oia e fa’ahapa ia ’oe. E ti’a ’oia nō Iesu Mesia, ’e e tauturu ’oia ia ’oe ’ia ’ite e nāhea i te tātarahapa hope roa ’e i te fa’ari’i i te mana fa’aora māuiui ’e te ha’apūai o te Fa’aora.
Tē tāmata nei au i te tātarahapa, terā rā, tē tāmau noa nei ā vau i te rave i terā mau hape. E aha te mea tā’u e ti’a e rave ? ’Eiaha e taora i te tauera. ’A fāriu atu i ni’a i te Mesia, ’e ’a tu’u i tō ’oe fa’aro’o iāna ra. E nāva’i tōna aroha. ’A tāmata fa’ahou ā. E’ita roa atu ’oe e vai ’ōtahi i roto i tā ’oe mau tauto’ora’a nō te haere i mua. Tei pīha’i iho noa Iesu Mesia ia ’oe.
Hi’o Enosa 1:6 (e ti’a i te mana’o hapa ’ia horoi-’ē-hia) ; Mosia 4:3 (nā roto i te Vārua Maita’i, e fa’a’ite mai te Atua ē ’ua fa’a’orehia tā ’oe hara) ; 26:30 (e fa’aore te Fa’aora i te hara, pinepine noa atu tātou i te tātarahapa) ; Etera 12:27 (e ti’a i te maita’i rahi o te Fa’aora e fa’ariro i te mau mea paruparu ’ei mea pūai) ; Moroni 6:8 (te feiā e tātarahapa, e fa’a’orehia ïa tāna hara) ; 10:32 (’ei ha’amaita’i-roa-hia i te Mesia) ; Te Ha’api’ira’a Tumu ’e te mau Fafaura’a 1:32 (tē fa’a’ore nei te Fatu i te hara o te feiā e tātarahapa) ; 58:42–43 (tei roto it e tātarahapara’a te fā’ira’a ’e te fa’aru’era’a i te hara).
Te mau uira’a nō te parau fa’ati’a nō te hiero
-
E ’itera’a pāpū ānei tō ’oe nō ni’a i te tāra’ehara a Iesu Mesia ’e i tōna ti’ara’a ’ei Fa’aora ’e ’ei Ora ?
-
Tē vai ra ānei te tahi mau hara teimaha o tō ’oe orara’a tei tītauhia e fa’a’āfaro ’e te mau ti’a mana o te autahu’ara’a ’ei tuha’a nō tō ’oe tātarahapara’a ?