Here i te Atua, here i tō ta’ata tupu

’Ua here te Atua ia ’oe. ’O ’oia tō ’oe Metua. E nehenehe tōna here fāito hope e fa’auru ia ’oe ’ia here iāna. I te taime ’o tō ’oe here i te Metua i te ao ra te mana fa’auru faufa’a roa a’e i roto i te orara’a, e ’ōhie a’e ïa te mau fa’aotira’a e rave rahi.

’O nā fa’auera’a rahi roa a’e e piti te herera’a i te Atua ’e te herera’a i tō ta’ata tupu. ’E ’o vai ïa tō ta’ata tupu ? Te mau ta’ata ato’a ïa ! Te tahi atu mau mea i ha’api’ihia i roto i te mau pāpa’ira’a mo’a ’e nā te mau peropheta, ’ua tū’ati ïa i teie nā fa’auera’a e piti.

Te mau ta’ata ato’a e mau taea’e’e e mau tuahine nō ’oe—’oia ato’a ïa te mau ta’ata ta’a ’ē ia ’oe, ’aore rā ’o tei ’ore i ’āfaro ia ’oe. Tē hina’aro nei te Metua i te ao ra i tāna mau tamari’i ’ia here i te tahi ’e te tahi. ’Ia tāvini ’oe i tāna mau tamari’i, tē tāvini ra ïa ’oe iāna.

’A fa’a’ite i tō ’oe here i te Atua nā roto i te ha’apa’ora’a i tāna mau fa’auera’a. ’Ei hi’ora’a, nā roto i te ha’amo’ara’a i te mahana sābati, mai te fa’aineine-māite-ra’a nō te rave i te ’ōro’a mo’a, tē fa’a’ite ra ïa ’oe i te Atua ē, ’ua ineine ’oe i te ha’amo’a i te hō’ē mahana iāna ra. ’Ia ha’apae ’oe i te mā’a ’e ’ua ’aufau ’oe i te tuha’a ’ahuru ’e te mau ō, tē fa’aite ra ïa ’oe i te Atua ē, ia ’oe, e mea faufa’a a’e tāna ’ohipa i te mau mea mātēria. ’Ia fa’a’ohipa ’oe i te i’oa o te Atua ’e o te Mesia ma te mana’o tura, ’e ’aita roa atu e fa’ahiti faufa’a ’ore i te reira, ’aore rā ma te tāu’a ’ore, tē fa’a’ite ra ïa ’oe i tō ’ā’au mēhara nō te mau mea ato’a tā rāua i rave nō ’oe.

’A rave i te mau ta’ata ato’a mai te hō’ē tamari’i nā te Atua. ’Ei pipi nā Iesu Mesia, e nehenehe tā ’oe e fa’a’ite i te hi’ora’a nō te huru rave-maita’i-ra’a i te ta’ata o te mau nūna’a ta’ata ato’a, o te mau ha’apa’ora’a fa’aro’o ’e o te tahi atu mau pupu, ma te here ’e te fa’atura—ia rātou iho ā rā e fa’aruru nei i te tahi taime i te mau parau ’e te mau ’ohipa ha’apēpē mau. ’A toro i te rima i te feiā e mana’o ’āta’a, e vai mo’emo’e ra, ’e ma te rāve’a ’ore. ’A tauturu ia rātou ’ia putapū i te here o te Metua i te ao ra nā roto atu ia ’oe. ’A fa’a’ite ia rātou i te mau ha’amaita’ira’a tāna i hōro’a mai ia ’oe, ’e ’a ani ia rātou ’ia pe’e ia Iesu Mesia.

’A hi’o maita’i ē tē fa’a’ite ra tā ’oe mau parau i tō ’oe here nō te Atua ’e nō te ta’ata—’ia paraparau ana’e ’oe i mua i te ta’ata ’aore rā nā ni’a i te tu’urēni. ’A parau i te mau parau fa’aitoito—’eiaha te parau vāvāhi ’e te fa’a’ino ’e te ha’amāuiui, noa atu ē e parau ha’uti noa. E nehenehe tā ’oe mau parau e riro ’ei parau pūai mau. ’A fa’ariro i te reira ’ei parau pūai mau nō te maita’i.

’A fa’a’ite i te here i tō ’oe ’utuāfare. I te fare e ha’amata ai te herera’a i te mau tamari’i ato’a a te Atua. ’A rave i tā ’oe tuha’a nō te fa’ariro i tō ’oe utuāfare ’ei vāhi e putapū ai te mau ta’ata ato’a i te here o te Fa’aora.

E hōhonu atu ā tō ’oe tā’amura’a i te Atua ’ia fa’a’ite atu ’oe i tō here nā roto i te ha’apa’ora’a i tāna mau fa’auera’a ’e te ha’apa’ora’a i tā ’oe mau fafaura’a iāna ra.

E hōhonu atu ā tō ’oe tā’amura’a ia vetahi ’ē ’ia fa’a’ite atu ’oe tō here nā roto i te tāvinira’a huru Mesia. E ’ite ’oe i te ’oa’oa i te fa’arirora’a i te ao nei ’ei vāhi nō te here rahi atu ā.