E ha’amatara rahi atu ā te mau ’ōro’a ’e te mau fafaura’a o te hiero i te mau ha’amaita’ira’a a te Atua nō ’oe

Te ’ōro’a hiero e hōro’a ïa nō te ’ite ’e te mana. I roto i te mau ’ōro’a nō te ’ōro’a hiero, tē rave hope atu ā nei ’oe i te i’oa o te Fa’aora i ni’a ia ’oe. E fafau ’oe ia ha’apa’o i te parau a te Atua, ’ia fa’atusia nō te rave i tōna hina’aro, ’ia ora i te ’evanelia a Iesu Mesia, ’ia ha’apa’o i te ture nō te vi’ivi’i ’ore ’e ’ia ha’amo’a—’aore rā ’ia pūpū—i tō ’oe ora ’e i te mau mea ato’a tā te Atua i hōro’a ia ’oe, i tāna ’Ēkālesia. Teie tā ’oe mau parau fafau. E parau fafau mai te Atua e ha’amaita’i ia ’oe i te ’ite rahi a’e, i te pārurura’a rahi a’e ’e i te matarara’a rahi a’e tōna mana nō ’oe. E parau fafau ato’a mai ’oia e hōro’a ia ’oe i te ora mure ’ore ’e ’ōna. I roto i te ’ōro’a hiero, e fa’ari’i ’oe i te fāna’ora’a rahi e ’ō’omo i te ’ahu roto o te autahu’ara’a mo’a. E tāpa’o te ’ahu roto nō Iesu Mesia ’e e fa’aha’amana’ora’a nō tā ’oe mau fafaura’a o te hiero.

E tāhō’ē te tā’atira’a hiero i te mau ta’ata fa’aipoipo ’e i te mau ’utuāfare nō te tau mure ’ore. I roto i te ’ōro’a nō te tā’atira’a i te hiero, e rave ’oe ’e tō ’oe hoa fa’aipoipo i te hō’ē fafaura’a i mua i te Atua ’e i mua i te tahi ’e te tahi. E parau fafau ’oe ’ia vai tō ’oe atati’a hope i mua i te Atua ’e i te tahi ’e te tahi, ’ia here ’e ’ia tāvini i te tahi ’e te tahi, ’e ’ia ’ohipa ’āmui nō te ha’apa’o i te mau fa’auera’a a te Atua. ’O teie tā ’oe parau fafau. E parau fafau te Atua ē, e ti’a i tō ’oe tā’amura’a i tō ’oe hoa fa’aipoipo ’e i tā ’oe mau tamari’i ’ia vai ē a muri noa atu. E parau fafau ato’a ’oia ē e ti’a ia ’oe ’ia fa’ari’i i te hanahana teitei a’e i pīha’i iho iāna i roto i te bāsileia tiretiera, ’a ha’apa’o noa ai ’oe i tā ’oe mau fafaura’a. Tē parauhia nei teie ha’amaita’ira’a, te fa’ateiteira’a.

’Ia mau noa ’oe i te hō’ē parau fa’ati’a nō te hiero. ’A fārerei i te hō’ē melo o tō ’oe ’episekōpora’a nō te fa’ari’i i te reira. E ui mai ’oia i te mau uira’a nō ni’a i tō ’oe orara’a i te mau fa’aturera’a a te Fatu nō te tomo i roto i tōna fare mo’a. ’A hi’o pinepine i teie mau uira’a. (E nehenehe ’oe e ’ite mai i te reira i roto i te parau hi’u o teie buka iti.) Noa atu ē, e mea ātea ’oe i te hō’ē hiero, ’ia riro tā ’oe parau fa’ati’a ’ei tāpa’o nō tō ’oe here i te Fatu ’e ’ei parau fafau nō ’oe ’ia ora i tāna mau fa’aturera’a.

’A haere pinepine i te hiero. Ma te parau fa’ati’a nō te hiero, e nehenehe ’oe e tomo i roto i te fare o te Fatu ’e ’ia bāpetizohia ’e ’ia ha’amauhia nō tō ’oe mau tupuna, ’ia ti’a ia rātou ’ia fa’ari’i i te mau ha’amaita’ira’a tei hōro’ahia ia ’oe. ’A fa’aho’ona i te mau fāna’ora’a ato’a ’ia haere i te hiero. ’A ’imi i te Fatu i roto i tōna fare. ’A ’imi iāna i roto i te mau ’ōro’a, i te mau tāpa’o ’e i te Vārua tā ’oe e putapū. E ’itehia mai ’ōna e ’oe.

’A fa’aineine nō te rave i te mau fafaura’a i roto i te fare o te Fatu. Te hō’ē rāve’a nō te rave i te reira ’o te ha’apa’ora’a ïa i tā ’oe fafaura’a nō te bāpetizora’a. ’A fa’ariro i te reira ’ei fā arata’i nō te fa’ari’i i te mau ’ōro’a o te hiero ’e nō te riro mai ’ei ta’ata ha’apa’o fafaura’a nō te orara’a tā’āto’a. ’A ha’amata i teienei ’ia ora i te mau ture tā ’oe e parau fafau e ha’apa’o ’oe i roto i te hiero : te ha’apa’ora’a i te mau fa’auera’a a te Atua, te tusia, te ’evanelia a Iesu Mesia, te vi’ivi’i ’ore ’e te ha’amo’ara’a. E nehenehe tō ’oe ’utuāfare, te ’episekōpo ’e te tahi atu feiā fa’atere o te ’Ēkālesia e tauturu ia ’oe.

E nehenehe ’oe e riro rahi atu ā mai ia Iesu Mesia te huru. E tauturu ’oia ia ’oe ’ia riro ’ei ’āpe’e rahi atu ā o te parauti’a. Nā te mau ’ōro’a ’e te mau fafaura’a o te hiero e ha’api’i ia ’oe e nāhea i te tomo i mua i te aro o te Atua ’e i te fa’ari’i i te ora mure ’ore i pīha’i iho iāna.

E ha’anahia ’oe i te mana o te Atua. E tae mai te mau fafaura’a o te hiero ma te parau fafau ē, ’ei ni’a ia ’oe te mana ’e te hanahana o te Atua. E tīa’i tāna mau melahi ia ’oe.

Te taime i roto i te hiero, e tāhono ïa ia ’oe ia Iesu Mesia ra ’e i te Vārua Maita’i ato’a. E putapū ’oe i te hau ’e i te fa’afa’aeara’a o te Atua. E fa’aro’o ’oe i tōna reo ma te pāpū rahi a’e. E vēteahia te ra’i nō ’oe, ’e e māramarama maita’i a’e ’oe i tōna mau haere’a. E rahi atu ā tō ’oe pūai nō te fa’aruru i tō ’oe mau fifi, nō te mea ’ua tāhonohia tō ’oe ’ā’au i ni’a i tōna.