Haere nā roto i te māramarama o te Atua

E ti’a ia ’oe ’ia fāna’o i te Vārua Maita’i ’ei hoa tāmau. I te ha’amaura’ahia ’oe ’ei melo nō te ’Ēkālesia, ’ua anihia ’oe ’ia « fa’ari’i i te Vārua Maita’i. » Te fāna’ora’a i te Vārua ’ei hoa tāmau nō ’oe, ’o te hō’ē ïa o te mau hōro’a rahi roa a’e a te Atua nō ’oe.

Nā te ravera’a i te mau mā’itira’a maita’i e ha’amaita’i i tō ’oe ’aravihi ’ia putapū i te Vārua. E rave rahi ’ohipa maita’i ’e te au i roto i te ao nei. Mai te ’ohipa a te mā’a ’e te inu i ni’a i tō ’oe tino, e ’ohipa hōhonu ato’a tā te mea e tai’o ’oe ’e e māta’ita’i atu atu ’e e fa’aro’o atu, i ni’a i tō ’oe ferurira’a ’e tō ’oe vārua.

’A fa’ata’a i te taime nō te Fatu i te mau mahana ato’a. E ha’api’i nō ni’a iāna. Ha’amana’o ā iāna ē a muri noa atu. ’A pure i tō ’oe Metua i te ao ra. ’A tuatāpapa i te mau pāpa’ira’a mo’a ’e te mau parau a te mau peropheta ora. I muri iho, ’a tūtava i te ora ’ia au i te ha’api’ira’a tā ’oe i ’apo mai.

’A imi i te mea e fa’aitoito ’e e fa’auru ’e e tītau manihini i te Vārua. ’Ia rave ’oe i te mau mā’itira’a nō ni’a i te mea e māta’ita’i, te mea e tai’o, te mea e fa’aro’o ’e te mea e haere atu, ’a feruri i te mana’o e tupu i roto ia ’oe. Tē fa’atupu ra ānei te reira i te mau mana’o maita’i ? ’A fa’aātea ’ē atu i te mea ato’a ’o tē fa’ao’ō’o i te mau mea mo’a, ’e i te mea ato’a e ha’avi’ivi’i. ’Eiaha e ’āmui atu i te mau mea e ha’aparuparu i tō ’oe mana’o fa’aoti ’e tō ’oe mana’o ara i te Vārua, mai te hitahita, te ’ava ’e te rā’au ta’ero ’ino. ’Ei taure’are’a itoito ’oe nō te tūpohe i te hōho’a ’aore rā i te hō’ē ha’uti, nō te haere i rāpae i te teata ’aore rā i te ’orira’a, nō taui i te pehe, ’aore rā nō te fāriu ’ē i te hō’ē noa atu mea ’aita e tū’ati i te Vārua.

’A fa’a’ohipa i te rāve’a tūreiara’a sōtiare nō te fa’aitoito. E nehenehe te rāve’a tūreiara’a sōtiare e riro ’ei mauha’a tūreiara’a pūai rahi. Mai te mea e fa’a’ohipa ’oe i te reira, ’a fa’atumu i ni’a i te māramarama, te fa’aro’o ’e te parau mau. ’Eiaha e fa’ariro i te ’ohipa tei hi’ohia ra ē, tē tupu ra nō te tahi atu ta’ata, ’ei fa’aau nō tō ’oe orara’a. ’A ha’amana’o ē, tō ’oe faufa’a, ’oia ho’i e tamari’i ’oe a nā metua i te ra’i, e ’ere nō roto mai i te rāve’a tūreiara’a sōtiare.

’A tītau i te mau ’ohipa au, ’e te mau tā’amura’a mau ’e te vai maoro. E hi’o maita’i ē, e’ita tā ’oe fa’a’ohipara’a i te rāve’a ’āpī ’e te ha’apararera’a e mono i te taime e ’āmui tino atu ’oe i tō ’oe ’utuāfare ’e tō ’oe mau hoa. E nehenehe te mau rāve’a tūreiara’a sōtiare ’e te tahi atu mau rāve’a ’āpī e ha’apau rahi i tō ’oe taime, ’aita rā e ’āpī rahi e noa’a mai. ’A ha’apae ri’i i terā ao tu’urēni, ’e ’a tū’ati i te mau ta’ata nō te orara’a mau.

E nehenehe te Vārua e pārahi noa i pīha’i iho ia ’oe. E tuha’a teie parau fafau nō te fafaura’a tā ’oe e rave i te mau taime ato’a e rave ’oe i te ’ōro’a mo’a. E fa’a’ite pāpū mai te Vārua ia ’oe nō te Metua i te ao ra ’e nō Iesu Mesia. E tāmāhanahana ’oia ia ’oe, e arata’i ’oia, e fa’aara ’e e ha’amo’a ho’i. E tauturu ’oia ia ’oe ’ia ’ite e aha te parau mau ’e ’ia hi’o i te maita’i i roto i te ao.