Nō ’oe te fa’anahora’a a te Atua

’O te Metua i te ao ra te ta’ata i feruri i te fa’anahora’a. ’O ’oia te Metua nō tō ’oe vārua, ’e ’ua here ’oia ia ’oe. Tē hina’aro nei ’oia e hōro’a ia ’oe i tāna ha’amaita’ira’a rahi a’e—te ora mure ’ore ’e ’ōna. ’Oia ho’i ē, tē hina’aro nei ’oia ’ia riro rahi atu ā ’oe mai iāna te huru ’e ’ia ora i te orara’a ’oa’oa ’e te hanahana tāna e ora nei. Tei iāna te mau mana ato’a ’e ’ua ’ite i te mau mea ato’a. E nehenehe ’oe e ti’aturi iāna, noa atu e mea pa’ari te orara’a.

Maoti Iesu Mesia e tupu ai te fa’anahora’a. Hou ’a hāmanihia ai te ao nei, ’ua mā’iti te Metua i te ao ra iāna nō te riro ’ei Fa’aora nō ’oe. ’O Iesu Mesia ana’e te ta’ata e nehenehe e fa’aho’i ia ’oe i tō ’oe Metua i te ao ra. Nō reira tātou e mā’iti ai e pe’e iāna. Te mau mea ato’a tei te huru ïa o terā mā’itira’a !

E faufa’a tumu tō te fa’aipoipora’a ’e te ’utuāfare nō te fa’anahora’a a te Atua. E tuha’a ’oe nō te ’utuāfare o te Atua, ’e e haere mai tāna mau tamari’i vārua pā’āto’a i te fenua nei nā roto i te hō’ē metua vahine ’e te hō’ē metua tāne. ’Ua hina’aro te Atua i tāna mau tamāhine ’e tāna mau tamāroa ’ia haere ’āmui i mua i te maita’i-roa-ra’a mure ’ore. E tauturu ’aifāito te tāne ’e te vahine ’ia tupu te hō’ē fa’aipoipora’a here ’e te tāhō’ē. E nehenehe te orara’a ’utuāfare i ni’a i te fenua nei—noa atu tō te reira mau hapehape ato’a—e fa’atupu i te ’oa’oa rahi. Tō te reira fā, ’o te tauturura’a ïa ia ’oe ’ia fa’aineine nō te ora mure ’ore ’e te Atua.

’A tāpe’a noa i te hi’ora’a ātea mure ’ore. I te mau taime ato’a e fa’aruru ’oe i te mau fa’ahemara’a, i te mau fifi, i te hepohepo, ’aore rā i te mau mā’itira’a fifi, ’a fa’aha’amana’o ia ’oe i te fa’anahora’a a te Atua. ’A hi’o nāhea te mau parau mau mure ’ore tā ’oe i ’ite nō ni’a i tāna fa’anahora’a e tauturu ai ia ’oe ’ia taui i tā ’oe huru hi’ora’a i tō ’oe mau fifi.

’A ’imi i tōna rima i roto i tō ’oe orara’a. ’A vai ara i te huru te Atua i te ha’amaita’i ia ’oe. Pēnei a’e e hāmani maita’i a te hō’ē ta’ata i ni’a ia ’oe, e taime hau, ’aore rā, e pāhonora’a i te hō’ē pure.

’A mā’iti i te pe’e i te fa’anahora’a a te Atua. ’A ’apo mai e aha tā tō ’oe Metua i te ao ra e hina’aro ia ’oe ’ia rave. ’A ’imi i tāna arata’ira’a ’a tai’o ai ’oe i te mau pāpa’ira’a mo’a, i te mau parau a te mau peropheta ora, i te poro’i nō ni’a i te ’utuāfare ’e i tō ’oe ha’amaita’ira’a patereareha. E tauturu te reira ia ’oe ’ia fa’aineine nō te tāvini i te Fatu, ’ei misiōnare ’e i tō ’oe orara’a tā’āto’a. ’A fa’ariro i te tāvinira’a i te Fatu, i te fa’aipoipora’a mure ’ore ’e i te ’atu’atura’a i te tamari’i ’ei ’ohipa mātāmua roa. ’A rave i tā ’oe tuha’a nō te fa’atupu i te hō’ē ’utuāfare ’oa’oa i teienei, nā roto i te pe’era’a i te mau ha’api’ira’a a Iesu Mesia.

E nehenehe ’oe e fa’aruru i te mau fifi o te orara’a ma te itoito ’e te tīa’ira’a i te Mesia. Nō te mea ’ua ’ite ’oe nō ni’a i te fa’anahora’a mure ’ore a te Atua, e mauha’a faufa’a rahi ïa tā ’oe e nehenehe e tauturu ia ’oe i roto i te mau taime fifi. ’Ua ’ite ’oe ē, e hau atu te orara’a i te ’ohipa e tupu mai te fānaura’a ē tae noa atu ai i te pohe. ’Ua ’ite ’oe ’o vai mau ’oe, e aha tā ’oe fā, ’e ’o vai tā ’oe e nehenehe e riro mai nā roto i te tauturu a te Fa’aora. ’O Iesu Mesia tō ’oe pūai !

E nehenehe ’oe e fa’ari’i i te ora mure ’ore ’a pe’e noa ai ia Iesu Mesia. E hōro’a ’oia ia ’oe i te mana nō te riro rahi atu ā mai iāna te huru, nō te ho’i i tō ’oe nā metua i te ra’i ra, ’e nō te ora i roto i te ’oa’oa ’e tei herehia ē a muri noa atu. ’A ti’aturi ia Iesu Mesia.