Parau poro’i nā te Peresidenira’a Mātāmua

’Ua here mātou ia ’oe, ’e tei ni’a tō mātou ti’aturi ia ’oe. Tei roto mau ’oe i te mau vārua mā’itihia a te Metua i te ao ra, tei tonohia mai i te fenua i teie taime nō te rave i te tahi ’ohipa faufa’a rahi.

E mea pūai a’e ’oe ’e e mea ’aravihi a’e ’oe i tā ’oe e ’ite. ’E ’ia tūru’i ana’e ’oe i ni’a i te Fa’aora, e rahi atu ā tō ’oe pūai. ’O ’oia te « pūai o te feiā ’āpī. »

E tauturu teie buka iti arata’i ia ’oe ’ia ha’amau i te niu pāpū nō te rave i te mau mā’itira’a nō te fa’aea i ni’a i te ’ē’a e arata’i i te ora mure ’ore. E tauturu te reira ia ’oe ’ia fa’aineine ia ’oe nō te rave i te mau fafaura’a mo’a i roto i te hiero, ’ia fa’aineine nō te tāvini i te hō’ē misiōni, ’e ’ia ’ite i te ’oa’oa nō te pe’era’a ia Iesu Mesia i te roara’a o tō ’oe orara’a. E pārahira’a faufa’a rahi tō ’oe i roto i tāna ’Ēkālesia. E tauturu Iesu Mesia ia ’oe ’ia fa’atupu i tāna mau ’ōpuara’a nō ’oe.

’Ua ’ite mātou ē, tē ora nei te Atua. Tē pure nei mātou ’ia vai ’āueue ’ore noa ’oe i ni’a i te ’ē’a nō te fafaura’a—te ’ē’a nō te ravera’a ’e te ha’apa’ora’a i te mau fafaura’a mo’a ’e te Atua. Terā te ’ē’a e fa’aho’i atu ia ’oe i tō ’oe Metua i te Ra’i. ’A nā reira ai ’oe, e riro mai ’oe ’ei mana fa’aitoito nō te maita’i, i te ha’aputura’a i te mau tamari’i a te Atua ’e i te fa’aineinera’a i teie nei ao nō te Tae-Piti-Ra’a mai o te Fa’aora. ’A ha’amana’o : ’O Iesu Mesia tō ’oe pūai !