Mau uira’a e ui-pinepine-hia

’Aita ’oe e tītauhia i te hō’ē ’itera’a o te ha’api’ira’a nō te riro mai ’ei ’orometua nō te EnglishConnect. Penei a’e ’aita ’oe i ha’api’i a’enei i te reo peretāne nā mua a’e ’e ’aita i ’ite e nāhea ’ia ha’amata. ’Aita te reira e fifi. ’Ua fa’anahohia te mau ha’api’ira’a o te EnglishConnect ma te ara māite ’e te hi’opo’a maita’i, ma te fa’a’ohipara’a i te mau parau tumu o te ha’api’ira’a i te reo ’e te mau parau tumu pae vārua nō te tauturu ia ’oe ’ia manuia. ’Aita ’oe e tītauhia ’ia riro ’ei ’aivāna’a. ’Aita ’oe e tītauhia ’ia ’ite i te mau pāhonora’a ato’a. Tō ’oe ti’ara’a ’o te fa’a’ōhiera’a i te fa’ananeara’a i te reo ma te pupura’a i te mau rāve’a nō te fa’a’ohipara’a. ’Aita ’oe e tītauhia ’ia ha’api’i i te tarame ’aore rā ’ia māramarama i te mau mea ato’a nō te reo peretāne. ’Āhiri i te reira, ’a tūtonu i ni’a i te fa’anahora’a i te hō’ē vāhi au-maita’i i reira te mau pīahi e au ai ’ia parau i te reo peretāne ’e ’ia ha’api’i mai i tā rātou mau hapehape.

Te ha’api’ira’a i te reo peretāne ma te fa’a’ohipara’a noa i te reo peretāne e peu mātarohia te reira ’ati a’e te ao nei. ’Oia mau, e nehenehe te reira e riro ’ei hō’ē ha’amaita’ira’a nō te mea e ha’amara’a te reira i te fāito o te reo peretāne ’o tā te pīahi e fa’aro’o nei ’e e fa’a’ohipa nei. ’A ha’amana’o i te paraparau i te hō’ē reo peretāne ’ōhie. ’A fa’a’ohipa i te mau tao’a e hi’o-mata-hia, te ’apara’a-rima-ra’a ’e te reo o te tino nō te tauturu i te mau pīahi ’ia māramarama i te pu’eparau ’āpī ’e te mau hōho’a pereota. E nehenehe ’oe e fa’a’ite i te hō’ē hōho’a, e pāpa’i hōho’a i te hō’ē hōho’a ’aore rā e ha’uti ta’ata ora. E nehenehe ’oe e fa’a’ite atu i te mau pīahi i te mau mātēria tei ’īritihia i roto te EnglishConnect 1 for Learners ’aore rā te EnglishConnect 2 for Learners ’aore rā e nehenehe ’oe e fa’a’ohipa i te titionare nā ni’a te tu’urēni. E ha’api’i ato’a te reira i te mau pīahi nāhea ’ia fa’a’ohipa i te mau mātēria e vai ra nō te ’ite mai i te mau pāhonora’a. ’A ’ape i te mau fa’ata’ara’a roa. ’A fa’a’ite ’ōhie noa atu i te mau pīahi i te mea tā rātou e rave ma te fa’ata’ara’a atu.

’A ha’amana’o ē tē ha’api’i ’āmui nei ’outou. Ma te pinepine ’a ani i te mau pīahi ’ia fāriu atu i ni’a i te Fatu nō te fāri’i i te pāturura’a. ’Ei ’orometua nō rātou, e nehenehe ’oe e riro ’ei hi’ora’a nō te fa’aro’o ’e te tauto’ora’a. Te paraparaura’a i te reo peretāne ’e te mau pīahi e ’ohipa ïa nō te fa’aro’o. E ha’amaita’i te Fatu ia ’oe ’e te mau pīahi ’a paraparau ai ’oe i te reo peretāne nā roto i te fa’aro’o.

E tauturu rahi a’e ’oe i te mau pīahi mai te mea e rōtahi ’oe i ni’a i te paraura’a i te reo peretāne, i te roara’a o te pupu ’āparaura’a. E nehenehe ’oe e nā reira ma te hōro’ara’a i te hō’ē hi’ora’a. ’A fa’aitoito i te parau noa nā roto i te reo peretāne. ’A fa’a’ohipa i te mau ta’o ’ōhie ’e te mau pereota pōpoto. ’A parau fa’ataere ’e ’a parau pinepine i te mau pereota. ’A pāpaʼi i te mau ta’o ’e te mau pereota faufa’a i ni’a i te tāpura ’ere’ere. E nehenehe ato’a ’oe e fa’a’ohipa i te hō’ē tao’a hi’o mata, e pāpa’i hōho’a i te hō’ē hōho’a ’aore rā e ha’uti ta’ata ora. E ’ape i te mau fa’ata’ara’a roa ’e te ’īritira’a i te mau mea ato’a tā ’oe e parau. Mai te mea e ti’a ia ’oe ’ia fa’a’ohipa i te reo tumu, ’a ani nā mua roa i te parau fa’ati’a ’e ’a fa’a’iti i te fa’a’ohipa i te reo tumu e ti’a ai, ’e ’a ho’i fa’ahou mai i te reo peretāne. ’A fa’aitoito i te mau pīahi ’ia parau hau atu nā roto i te reo peretāne e ti’a ai ’e ’eiaha e taiā i te rave i te mau hapehape. E tauturu ia rātou ’ia manuia ’e ’a ha’apōpou ia rātou nō te tauto’ora’a tāta’itahi. Mai te mea e hina’aro te mau pīahi i te tauturu hau atu, ’a fa’a’ite atu ia rātou i te mau buka nō te ha’api’ira’a nā te pīahi, i reira rātou e ’ite mai ai i te mātēria nō tō rātou reo tumu. ’A rōtahi ai ’oe i ni’a i te tauturura’a i te mau pīahi nō te ha’api’i mai ma te ravera’a, e iti mai tā ’oe tītaura’a ’ia fa’a’ohipa i te reo tumu.

Te ha’api’ira’a i te hō’ē pupu e rave rahi reo ’o te rāve’a fa’ahiahia roa ïa nō te fa’aitoito i te paraura’a nā roto i te reo peretāne, nō te mea te reo peretāne ’o te reo tumu ïa o te pupu. ’Ei ’orometua ha’api’i, ’a fa’a’ohipa i te parau huri reo peretāne o te buka a te pīahi. ’A tauturu i te mau pīahi ’ia fa’a’ohipa i te buka a te pīahi nā roto i tō rātou reo tumu, mai te mea tē vai ra, ’ia nehenehe ia rātou ’ia fana’o i te mau ’īritira’a parau. Mai te mea e nehenehe, ’a tu’u i te mau pīahi i roto i te mau pupu na’ina’i nō te ’āparau i te parau tumu o te ha’api’ira’a mai nā roto i tō rātou reo tumu, ’ia pāpū maita’i rā ia ’oe ’aita hō’ē i vaihohia i te hiti. Mai te peu tē vai ra hō’ē ana’e ta’ata e parau i te hō’ē reo ta’a ’ē i roto i te pupu, ’a parau i taua pupu ra ’ia ’āparau i te tumu parau o te ha’api’ira’a mai ma te reo peretāne ’ōhie, ’ia ō mai te tā’āto’ara’a i roto.

Nō te ha’api’i mai i te reo peretāne, tītauhia i te mau pīahi ’ia fa’ananea i te hō’ē peu nō te fa’a’ohipara’a i te mau mahana ato’a. ’A fa’aitoito i te mau pīahi ’ia ha’amau i teie peu ma te ’itera’a mai i te mau rāve’a ’ōhie, nō te fa’a’ō mai i te reo peretāne i roto i tā rātou mau ’ohipara’a tāmahana (hi’o te tuha’a « Fa’a’ohipara’a tāmahana »). ’Ei hi’ora’a, e nehenehe te mau pīahi e mā’iti i te māta’ita’i i te mau ha’apurorora’a ’aore rā e fa’aro’o i te pehe nā roto i te reo peretāne. E nehenehe ’oe e fa’aitoito i te mau pīahi ’ia fa’a’ohipa i te tāpura nō te mau mana’o, nō te ha’amaita’i i tā rātou ’imira’a maita’i i te mau mahana ato’a e ’itehia i muri mai i te « Personal Study Tracker » i roto i te ’ōmuara’a o te buka nā te pīahi. ’A fa’a’ohipa i teie tāpura nō te fa’a’ana’anatae i te mau pīahi ’ia ’ite mai i te mau rāve’a ha’arau faufa’a, nō te fa’a’ohipa i te mau mahana ato’a.

I roto i te ’āmuira’a pupu, ’a ani manihini i te mau pīahi ’ia ’imi maita’i ’e ’ia fa’a’ohipa i te reo peretāne i te mau mahana ato’a, ’e ’ia pe’e atu i tā rātou mau tauto’ora’a. E nehenehe ’oe e ani i te tahi mau pīahi ’ia fa’a’ite mai i te mau ’ohipa ta’a ’ē tā rātou i rave, nō te fa’a’ohipa i te mau mahana ato’a. E nehenehe ’oe e feruri i te ha’amau i te hō’ē vāhi mauiha’a uira tānūmera, mai te hō’ē ’āparaura’a tāpupu, nō te mau pīahi o te pupu. ’A tuatāpapa ’e tā ’outou mau pīahi nō te ’ite mai i te mau rāve’a e tano, nō te tauturu i te pupu ’ia vai tū’ati noa i te roara’a o te hepetoma, nā roto i te mau parau poro’i a te pupu ’aore rā te tahi atu rāve’a. E nehenehe ’oe e turu i te mau pīahi i roto i tā rātou mau tītaura’a ’ia tae atu i tā rātou fā, ’eiaha rā ’ia mo’ehia, ’o rātou iho ā te ti’a’au nō tō rātou iho ha’api’ira’a mai.

’A tuatāpapa ’e te feiā fa’atere o te ’Ēkālesia o te fenua iho, nō te rave i te mau fa’aotira’a nō ni’a i te fa’anahora’a ’e te fa’aterera’a i te mau pupu EnglishConnect. Te tanora’a mau, e fa’ata’ahia e piti ’orometua ha’api’i nō te pupu tāta’itahi. ’A feruri i te mau hina’aro o te mau pīahi ’e te ’aravihi o te fenua iho, ’a rave ai ’oe i te fa’aotira’a nō te vāhi, te tarēna, te pinepinera’a.

E nehenehe te mau ha’api’ira’a o te EnglishConnect e rae’ahia e 60 ’aore rā e 90 minuti. ’A pe’e i te tāpura hora i fa’a’itehia nō te ’ohipara’a tāta’itahi. ’Eiaha e fa’a’ore hō’ē noa a’e ’ohipara’a ; ’a fa’a’ohipa noa i te taime iti roa a’e e tītauhia nō te hō’ē ’āmuira’a pupu poto roa a’e ’e ’a fa’a’ohipa i te taime roa a’e e tītauhia mai te mea e ti’a i te taime.

Fa’ata’ara’a : ’A fārerei atu i te feiā e ha’apa’o nei i te fa’anahora’a, ’e ’a feruri i te mau hina’aro o te mau pīahi ’e te ’aravihi o te vāhi iho ’a rave ai ’oe i teie mau fa’aotira’a.

Te ti’ara’a mau, e ’āmui te mau pupu hō’ē a’e taime i te hepetoma. Mai te peu e hina’arohia, e nehenehe te mau pupu e ’āmui pinepine atu ā. Nō te ha’amaita’i atu ā i te mau ’āmuira’a pupu, e mea ti’a ’ia rava’i maita’i te taime o te mau pīahi i roto i te ’āmuira’a nō te fa’aoti i te tuha’a « Personal Study ».

Tē vai nei e 25 ha’api’ira’a i roto i te EnglishConnect 1 ’e te 2. Mai te peu e ’āmui te mau pupu hō’ē a’e taime i te hepetoma, e tītauhia e ono ’āva’e nō te fa’aoti i te hō’ē tuha’a. Mai te peu e ’āmui te mau pupu e piti taime i te hepetoma, e rave noa te reira e toru ’āva’e nō te fa’aoti. Mai te mea e hina’arohia, e nehenehe ’oe e vāhi i te fa’anahora’a nā roto i te mau tuha’a na’ina’i a’e. ’Ei hi’ora’a, e nehenehe ’oe e mā’iti e ha’amau i te hō’ē pupu ’o te ’āmui mai hō’ē taime i te hepetoma i te roara’a e toru ’āva’e, nō te fa’aoti i te tuha’a 1 ē tae atu i te 3. E nehenehe te fa’a’ohipara’a i teie rāve’a e tauturu i te mau pīahi ’ia vai itoito noa.

Fa’ata’ara’a : ’Ia tarēna-ana’e-hia hō’ē ’āmuira’a pupu ’o te ’ore e ha’amata nā te tuha’a 1, ’a feruri i te ha’amata i te fa’anahora’a o te mau ha’api’ira’a o tā ’oe pupu nā te ha’api’ira’a 1. E tauturu te reira ’ia ’āvei i te mau pīahi e nāhea ’ia fa’a’ohipa i te buka. ’A fārerei atu i te feiā e ha’apa’o nei i te fa’anahora’a ’e ’a feruri i te mau hina’aro o te mau pīahi ’e te ’aravihi o te vāhi iho, ’a rave ai ’oe i teie mau fa’aotira’a.

Mai te mea e hina’arohia, e nehenehe te mau pupu e ha’api’ihia hau atu i te hō’ē noa ha’api’ira’a, i roto i te hō’ē ’āmuira’a pupu. Nō te manuira’a rahi o te mau ’āmuira’a pupu, e ti’a i te mau pīahi ’ia rava’i maita’i i te taime nā mua a’e te ’āmuira’a pupu nō te fa’aoti i te tuha’a « Personal Study » nō te ha’api’ira’a tāta’itahi.

Hi’o « E hia pinepinera’a e tītauhia i tā’u pupu ’ia ’āmui ? » nō te tahi atu ha’amāramaramara’a nō ni’a i te tarēna ’e te taime o te mau ha’api’ira’a.

E tītau te EnglishConnect 1 i te hō’ē ’itera’a nō te tai’o ’e te pāpa’ira’a i te reo tumu o te ta’ata, ’e te ’aravihi nō te tai’o i te pi’apa ’e te mau ta’o tumu o te reo peretāne. ’Ua fa’ata’ahia te EnglishConnect 2 nō te mau pīahi ’o te nehenehe e parau i te mau pereota tumu ’e e pāhono i te mau uira’a tumu nā roto i te reo peretāne. Nō te fa’aoti e ti’a ānei i te hō’ē pīahi ’ia ’āmui atu i te EnglishConnect 1 ’aore rā i te EnglishConnect 2, e nehenehe ’oe e fa’a’ohipa i te uiuira’a hi’opo’ara’a i roto te parau hi’u B.

Te EnglishConnect 3 ’o te hō’ē ïa ha’api’ira’a ti’ahono ’o te tauturu i te mau pīahi ’ia fa’ananea i te mau ’aravihi hiva tahu’a nō te reo peretāne. Nō te ’āmui atu i te EnglishConnect 3, e ti’a i te mau pīahi ’ia tāpa’o ia rātou ’e ’ia roa’a te hō’ē fāito tai’o i te hi’opo’ara’a nō te fa’ata’ara’a. E nehenehe te mau pīahi e tāpa’o ia rātou i ni’a englishconnect.org/join.

E rave rahi fāito tō te EnglishConnect nō te tauturu i te mau ta’ata e ’āmui mai ’ia nu’u i mua. E tauturu te EnglishConnect 1 ’e 2 i te mau pīahi ’ia fa’ananea i te mau ’aravihi tumu nō te reo peretāne. Te EnglishConnect 3 ’o te hō’ē ïa ha’api’ira’a ti’ahono ’o te tauturu i te mau pīahi ’ia fa’ananea i te mau ’aravihi hiva tahu’a nō te reo peretāne. E tauturu te reira i te mau pīahi nō te BYU–Pathway Worldwide. (Ha’api’i rahi mai nō ni’a i te BYU–Pathway Worldwide i ni’a byupathway.org).

Te EnglishConnect 3 ’o te hō’ē ïa ha’api’ira’a nā ni’a te tu’urēni moni māmā roa, ma te hō’ē āmuira’a nō te ’āparaura’a tei fa’anahohia nā ni’a i te rorouira ānei ’aore rā i roto i te hō’ē fare purera’a i te vāhi iho. Tē vai ra i roto te EnglishConnect 3 te mau mātēria nō te ha’api’ira’a mai nā ni’a te tu’urēni, ’e te mau fa’ata’ara’a mana’o o te ta’ata nō ni’a te fa’aro’ora’a, te fa’ahitira’a parau, te tai’ora’a ’e te pāpa’ira’a. E nehenehe te mau pīahi e nu’u i mua i roto i te ha’api’ira’a i tō rātou iho tīhauhau [rythme]. E nehenehe te mau pīahi e fa’aho’i nā ni’a noa te EnglishConnect 3 e rave rahi taime ’o tā rātou e hina’aro nō te tāpae i tā rātou fā. E fa’ati’a te fa’aotira’a i te EnglishConnect 3 i te mau pīahi ’ia ’ape i te hi’opo’ara’a nō te reo peretāne, ’ia fa’aō ana’e atu rātou i roto te BYU–Pathway Worldwide.

Nō te fa’aineine i te EnglishConnect 3, e ti’a i te mau pīahi ’ia fa’aoti te EnglishConnect 1 ’e te 2—’oia ato’a te mau ’ohipara’a o te buka ’ātivite, te mau ’ohipara’a o te tai’ora’a ’e te pāpa’ira’a iho ā ra. ’A fa’aitoito i te mau pīahi nō te EnglishConnect 2 ’ia tāpa’o atu ia rātou i te EnglishConnect 3 i ni’a englishconnect.org/join.

’Ua hōro’ahia mai te EnglishConnect 3 e BYU–Pathway Worldwide, ma te pe’ehia mai e te feiā fa’atere o te fenua iho ’e te mau misiōnare o te tāvinira’a a te ’Ēkālesia. Te feiā fa’atere e ’ana’anatae nei e nehenehe rātou e ’ohipa ’e te mau ti’a’au nō te ’ohipa tōtauturu tōtiare ’e te fa’arava’ira’a iāna iho o tō rātou fenua, nō te fa’atere i te EnglishConnect 3 i tō rātou iho mau vāhi.

’Ua fa’ata’ahia te mau ha’api’ira’a ’ia nehenehe i te mau pīahi ’āpī ’ia fa’aō mai i roto i te hō’ē pupu EnglishConnect i te mau taime ato’a. Mai te peu e hina’aro te mau pīahi e ’āmui atu i te mau pupu ’o tei ha’amata a’ena, ’a hōro’a atu ia rātou, te buka EnglishConnect 1 nō te mau pīahi ’aore rā te buka EnglishConnect 2 nō te mau pīahi (’aore rā ’a fa’a’ite atu ia rātou nāhea ’ia roa’a te mau buka i roto te Vaira’a buka ’evanelia), ’e ’a tauturu ia rātou ’ia ’āmui mai. E nehenehe ’oe ’aore rā te tahi atu pīahi e tauturu i te mau pīahi ’āpī ’ia fa’aō mai i roto i te pupu, ma te fa’a’itera’a ia rātou nāhea ’ia fa’aineine nō te ha’api’ira’a i muri iho. ’Oia ato’a, e nehenehe te mau pīahi e mā’iti ’ia nā ni’a fa’ahou te hō’ē fāito, mai te mea e hina’aro rātou ’ia rave rahi atu ā.

I te tahi taime e mau tāfifira’a tō te mau pīahi ’o te ha’afifi i tō rātou ’āmuira’a mai i te pupu, ’e pinepine rātou i te fa’ataiā ’ia ho’i mai nō te ha’amā paha ’aore rā te ri’ari’a. E nehenehe rātou e mana’o ē ’ua ma’iri rahi roa rātou, ’e e’ita e roa’a ia rātou e tāpapa i tō rātou taere. ’A fārerei atu i te mau pīahi tei ma’iri ’e ’a ani manihini ia rātou ’ia haere mai i te ha’api’ira’a nō muri iho, noa atu te rahira’a ha’api’ira’a tei ma’irihia. ’A hōro’a ia rātou te pāturura’a ’e te mau fa’aitoitora’a. ’A ha’apāpū atu ia rātou, ’ua fa’ata’ahia te EnglishConnect ’ia nehenehe i te mau pīahi ’ia ’āmui fa’ahou mai i te mau taime ato’a. E nehenehe te mau pīahi e ha’amata fa’ahou ma te ’āmuira’a mai i te pupu ’e ma te fa’aineinera’a nō te ha’api’ira’a i muri iho. ’A feruri i te ani i te hō’ē ’aore rā hau atu mau melo o te pupu, ’ia fārerei atu i te pīahi tei ma’iri ’e ’ia fa’a’ite atu iāna tā rātou pāturura’a.

Fa’ata’ara’a : ’Eiaha e fa’a’ite atu i te mau parau ti’ara’a o te ta’ata, ma te ’ore e fāri’i i tā rātou parau fa’ati’a pāpa’i.

E hina’aro vetahi mau pīahi i te taime rahi nō te hāro’aro’a ’e nō te paraparau i te hō’ē reo. E fāna’o rahi a’e teie mau pīahi nā roto i te fa’aotira’a i te tuha’a « Personal Study », hou ’a ’āmui mai ai i roto i te pupu ’āparaura’a tāta’itahi. ’A ani ia rātou ’ia fa’a’ohipa i te pu’eparau ’e te mau hōho’a pereota hou ’a tupu ai te pupu ’āparaura’a. I roto i te ha’api’ira’a, ’a ’āpiti atu i teie mau pīahi i te tahi atu mau pīahi ’o te nehenehe e fa’aitoito ’e e turu ia rātou. ’A fa’aitoito i te mau pīahi ato’a ’ia rave hau atu ā mai tā rātou e nehenehe, ’e ’ia fāri’i i te mau hapehape ’ei tuha’a nō te rāve’a o te ha’api’ira’a mai. E nehenehe ato’a ’oe e mā’iti ’ia hi’o fa’ahou ’e ’ia nā ni’a iho fa’ahou te mau ’ohipara’a. ’A fa’aha’amana’o i te mau pīahi ē, te fa’aotira’a i te tuha’a « Personal Study » hou te ’āmuira’a mai i roto i te pupu ’āparaura’a nō muri iho, e mea faufa’a ïa nō tō rātou haerera’a i mua.

’A paraparau ai ’oe ’e te mau pīahi, e ’ite mai paha ’oe ē ’ua hāro’aro’a maita’i vetahi ’e e ti’a roa ia rātou ’ia rave fa’aoti i te mau ’ohipara’a ma te ’ōhie. ’A feruri i te tāmata i teie mau pīahi ’ia fa’ahōhonu atu ā i tō rātou ha’api’ira’a mai, ma te tu’ura’a i te mau fa’ahu’ahu’ara’a hau atu ’aore rā te ravera’a i te hō’ē ā ’ohipara’a ma te fa’anahora’a ta’a ’ē. ’Ei hi’ora’a, ’ia ha’api’ipi’i ana’e te mau pīahi nō te fārerei i te hō’ē ta’ata, e ani ia rātou ’ia ha’api’ipi’i mai nō te fārerei i te hō’ē hoa ’āpī ’aore rā i te hō’ē paoti ’āpī. E nehenehe ato’a teie mau pīahi e ha’apa’ari i tō rātou ’ite nō te reo peretāne, ma te turura’a i te mau pīahi ’o tē taere ri’i nei ’ia ha’api’i mai. E nehenehe te mau pīahi ato’a e fāna’o i te ha’api’ira’a ’āpiti, ’e te tauturura’a a vetahi ’ē nō te ’ohipa tāmau i te pu’eparau ’e te mau hōho’a pereota nā roto i te reo peretāne.

Te roa’ara’a te mau pīahi e mau fāito ’aravihi ta’a ’ē tō rātou nō te reo peretāne e ’ohipa mātauhia te reira, ’e ’ua riro ’ei rāve’a nō rātou ’ia tauturu i te tahi ’e te tahi. Te tauturura’a i te tahi ’e te tahi e ha’afaufa’a i te auhoara’a ’e te tupura’a. E ’ohipa tā tātou pā’āto’a nō te pupu atu. ’Ei hi’ora’a, vetahi mau pīahi e roa’a ia rātou i te tauturu ia vetahi ’ē ’ia putapū i te ti’aturira’a, nō te mea ’ua ineine rātou ’ia rave i te mau hapehape. E ’āpiti atu i te mau pīahi ma te rāve’a ta’a ’ē. E nehenehe ’oe e ’āpiti i te mau pīahi ma te hō’ē ā fāito maita’i, nō te tauturu ia rātou ’ia fa’ananea ’āmui i tō rātou mau ’aravihi. ’Aore rā, e nehenehe ’oe e ’āpiti i te mau pīahi i te hō’ē ta’ata e fāito ta’a ’ē tōna. E fana’o te pīahi fāito iti i te mau fa’ata’ara’a mana’o ’e te turura’a. E fana’o te pīahi fāito teitei i te ha’api’ira’a a te hō’ē ’āpiti ’e te fa’ata’ara’a nā roto te reo peretāne. ’A ha’amana’o, te roa’ara’a te hō’ē pupu ’e mau ’aravihi ta’a ’ē nō te paraura’a i te reo peretāne, e peu mātauhia te reira ’e ’ua riro ’ei rāve’a maita’i roa te reira nō te mau pīahi nō te tauturu te tahi ’e te tahi.

’Eiaha e hōro’a i te mau arata’ira’a roaroa nō te tarame ’aore rā e paraparau maoro nō ni’a i te mau ture o te reo, ’a fa’aho’i rā ia rātou i ni’a i te mau hōho’a pereota. E ’ape te mau pīahi e rave rahi hapehape te pe’e rātou i te mau hōho’a pereota. Mea maita’i a’e ’ia ha’api’i mai ma te fa’a’ohipara’a i te reo ’eiaha i te paraparaura’a nō ni’a i te reo. E ti’a i te mau fa’ata’ara’a nō ni’a i te tarame ia fa’a’ōhiehia, ’ia pāpū maita’i ’e e fa’a’ohipa. ’Ia ha’api’i ana’e ’oe i te hō’ē parau tumu, ’a hōro’a atu i te mau hi’ora’a pereota ’e e ani i te mau pīahi ’ia ha’api’ipi’i mai i te fa’a’ohipa i te parau tumu. E fana’o rahi te mau pīahi i te fa’aro’ora’a ’e te fa’a’ohipara’a i te reo peretāne.

’Eiaha e rave i te taime rahi nō te fa’atītī’aifaro i te fa’ahitira’a parau. ’A fa’aha’amana’o i te mau pīahi ē mea faufa’a a’e ’ia ta’ahia mai rātou, i te noa’ara’a te hō’ē fa’ahitira’a parau maita’i roa. ’A fa’aitoito i te mau pīahi ’ia ha’api’ipi’i mai i te fa’ahitira’a parau i te taime nō tā rātou ’imira’a maita’i a te ta’ata hō’ē, ’ia nehenehe ia rātou ’ia ha’api’ipi’i ’ia au i tō rātou iho tuatāpapara’a ’ia ’ore rātou e ha’ape’ape’ahia i tō rātou tīhauhau. ’Eiaha ’ia mo’ehia ē, mai te mea e ha’ape’ape’a rahi te mau pīahi nō tā rātou fa’ahitira’a parau, e nehenehe rātou e fa’ataiā i te fa’a’ohipa i te tāu’ara’a parau e vetahi ’ē. ’A fa’aitoito i te mau pīahi ’ia fa’a’ohipa i te mau rāve’a nō te fa’ahitira’a parau nā ni’a te tu’urēni i te englishconnect.org/learner/resources.

’A fa’a’ohipa i te fa’anahora’a QuickReg (quickreg.englishconnect.org) nō te tāpa’ora’a ’e nō te fa’aterera’a i tā ’oe pupu EnglishConnect. E mauiha’a nō te tāpa’ora’a i te pupu te QuickReg tei hōro’ahia mai e Te ’Ēkālesia a Iesu Mesia i te Feiā Mo’a i te mau Mahana Hope’a nei. E nehenehe ’oe e fa’a’ohipa te QuickReg nō te :

• Ha’amau i te hō’ē pupu : Mā’iti i te mahana, te hora ’e te vāhi i reira te pupu e vai ai.

• Fa’atere i te hō’ē pupu : Pia i te mau ha’amāramaramara’a nō ni’a i te feiā e ’āmui mai ’e ’a hi’o fa’ahou i te mau ha’amāramaramara’a o te pupu.

• Tītau manihini i te mau ta’ata nō te ’āmui mai : E tāpurahia tā ’oe pupu nā ni’a te tu’urēni i te englishconnect.org/join. E nehenehe ’oe e fa’a’ite i te hō’ē hono nō te tītau manihini i te mau ta’ata ’ia tāpa’o ia rātou i roto i tā ’oe pupu.

• ’Ōpere i te parau ha’apāpūra’a : I te hope’a o tā ’oe pupu, e nehenehe e roa’a ia ’oe te mau parau ha’apāpūra’a ’e ’ia nene’i atu i te reira.

EnglishConnect 1 ’e te 2 : I te hopera’a te pupu, e nehenehe te mau pīahi e fāri’i i te mau parau ha’apāpūra’a nō te ’āmuira’a mai. E nehenehe te feiā fa’atere, te feiā tahu’a ’aore rā te mau ’orometua e ’ōpere i te mau parau ha’apāpūra’a. E ’ōpani te tahi mau fenua ’ia ’ōperehia te mau parau ha’apāpūra’a EnglishConnect. ’A hi’o i te mau fa’aturera’a o te fenua iho hou ’a ’ōpere atu ai i te mau parau ha’apāpūra’a (hi’o englishconnect.org/leader/approved-locations).

Fa’ata’ara’a : Nō te noa’a ’e te ’ōperera’a i te mau parau ha’apāpūra’a, e ti’a i tā ’oe pupu ’ia tāpa’ohia i roto i te mauha’a QuickReg i te quickreg.englishconnect.org. (Hi’o « Nāhea vau ’ia tāpa’o ’e ’ia fa’atere i tā’u pupu EnglishConnect ? » i roto i teie tuha’a FAQ).

EnglishConnect 3 : E nehenehe te mau pīahi e fāri’i i te mau parau ha’pāpūra’a nō te fa’aotira’a, ’ia rae’ahia ia rātou te mau fāito e tītauhia i roto i te ha’api’ira’a. Ma te fa’aotira’a i te EnglishConnect 3, e nehenehe te mau pīahi e ’ape i te hi’opo’ara’a o te reo peretāne i te taime nō te fa’aōra’a i te BYU–Pathway Worldwide.