Nāhea vau i te arata’i i te hō’ē pupu ’āparaura’a ?

E fa’a’ohipa ’oe i te EnglishConnect 1 nō te mau pīahi ’e ’aore rā i te EnglishConnect 2 nō te mau pīahi nō te arata’i i te pupu. E pe’e te ha’api’ira’a tāta’itahi i te hō’ē ā fa’anahora’a :

Mānava : ’A fa’ari’i pōpou i te mau pīahi ’e ’a fa’a’ite i te mau pīahi ’āpī. ’A fa’ata’a i te tītaura’a ē e paraparau ’oe i te reo peretāne ma te ’ani ia rātou ’ia fa’a’ohipa rahi i taua reo ra, te rahi e noa’a ia rātou. ’A vauvau poto i te tumu parau o te ha’api’ira’a.

Pure : ’A ani i te hō’ē pīahi ’ia pure pūai. ’A mā’iti mai i te tahi pīahi tei nehenehe e pure nā roto i te reo peretāne. E nehenehe ’oe e ’ani i terā ta’ata ’ia fa’aineine iāna nā roto i te ha’api’ira’a i te « Pure nā roto i te reo peretāne » e vai ra i roto i te parau hi’u nō te mau buka pīahi.

Parau tumu nō te ’apora’a ha’api’ira’a : Tai’o ’e paraparau i te parau tumu nō te ’apo i te ha’api’ira’a e vai ra i roto i te tuha’a « Personal Study » (Mā’imira’a ta’ata hō’ē) o te buka pīahi. Te fā nō te parau tumu nō te ’apora’a ha’api’ira’a, ’o te tītau-manihini-ra’a ïa i te Vārua ’a hōro’a ai ’e a ha’api’i āmui ai ’outou « nā roto i te ha’api’i ’e nā roto ato’a i te fa’aro’o » (Te Ha’api’ira’a Tumu ’e te mau Fafaura’a 88:118).

’A fa’a’ite e nahea i te ’āparau i te parau tumu ma te fa’a’ite poto noa e nahea ’oe e pāhono ai i te hō’ē o te mau uira’a nō te ’āparaura’a. ’A fa’a’ohipa i te mau ta’o ’e te mau pereota ’ōhie.

’A ani i te mau pīahi ’ia fa’a’ite i tō rātou māna’o ’e tā rātou i ’ite, i te tahi ’e te tahi. E nehenehe te mau pīahi e ’āparau nā roto i tō rātou iho reo tumu. Mai te mea e haere ia rātou, e nehenehe te mau pīahi e mā’iti i te fa’a’ohipa i te mau ta’o ’e te mau pereota nā roto i te reo peretāne ’a ’āparau noa ai rātou.

’Ātivite 1 : ’A arata’i i te mau pīahi nā roto i te mau ’ātivite i roto i te « Conversation Group » (Pupu ’āparaura’a) tuha’a i roto i te buka pīahi. E fa’aineine te mau ’ātivite tāta’itahi i te mau pīahi nō te ’ātivite nō muri iho. E tauturu te mau ’ātivite i te mau pīahi ’ia nu’u atu mai te ha’api’ipi’ira’a i te fa’atupura’a i tā rātou iho paraparaura’a.

I roto i te ’ātivite 1, ’a tauturu i te mau pīahi i te hi’o i tā rātou pu’eparau ’e te mau hōho’a pereota i roto i te tuha’a « Mā’imira’a ta’ata hō’ē » o te buka pīahi. Te fā, ’o te fa’aineinera’a ïa i te mau pīahi nō te ’ātivite 2 ’e te 3 nā roto i te tauturura’a ’ia rātou ’ia māramarama i terā ma’a ta’o ’e ’ia parau i te mau hōho’a pereota.

’Ātivite 2 : I roto i te ’ātivite 2, e fa’a’ohipa te mau pīahi i te pu’eparau ’e te mau hōho’a pereota nō te ha’api’ipi’i i te uira’a ’e te pāhonora’a i te hō’ē ’āpiti ma te fa’a’ohipa i te ha’amāramaramara’a i hōro’ahia mai. Te fā ’o te hāmanira’a ïa te mau pīahi e rave rahi pereota nā roto i te reo peretāne, te rahi a’e e noa’a ia rātou.

’A fa’aitoito i te mau pīahi ’ia taui i te ’āpiti nō te fa’arahi i tā rātou rāve’a ha’api’ipi’ira’a. ’Ia haere ’oe nā roto i te mau pīahi, ’a tāmata i te hi’o i te feiā tei hina’aro i te tahi atu ā tauturu. ’A fa’aitoito noa, ’e ’a fa’a’ana’anatae.

’Ātivite 3 : I roto i te ’ātivite 3, e fāna’o te mau pīahi i te fa’a’ohipa i te pu’eparau ’e te mau hōho’a pereota ’ia nehenehe ’ia noa’a ia rātou i te ta’ato’ara’a o te parau i roto i te orara’a e ora hia ra. Te fā, ’ia noa’a ïa i te mau pīahi te aura’a pāpū nō te parau nā roto i te reo peretāne.

’A fa’aitoito i te mau pīahi ’ia taui pinepine i te ’āpiti nō te fa’arahi i tā rātou rāve’a ha’api’ipi’ira’a. ’Ia hōpe āna’e te ’ātivite 3, i roto i te hi’ora’a, ’ua noa’a i te mau pīahi ato’a te ’āravihi no te parau i te reo peretāne mā te hi’o ’ore i tā rātou buka ha’api’ira’a. ’Ia vai te ’ana’anatae ’e te ’aitauira’a ’a ’ohipa ’āmui ai te mau pīahi nō te ha’api’ipi’i. ’A haere ai ’oe nā roto i te mau pīahi, e ’ite paha ’oe ē tē vai ra tei māramarama maita’i ’e tei pūai roa i roto i teie ’ātivite. E nehenehe e tu’u i mua i teie mau pīahi i te fā ’ia fa’ahōhonu atu ā i tō rātou ’ite maoti te fa’arahi-atu-ā-ra’a i tā rātou mau parau, ’e ’aore rā te rāvera’a i tō ’ātivite na ma te taui ri’i i te huru. ’Ei hi’ora’a, ’ia ha’api’ipi’i te mau pīahi i te fārereira’a i te hō’ē ta’ata, ’a ani ia rātou ’ia ha’api’ipi’i i te mau vaira’a ’e’ē mai te fārereira’a i te hoa ’āpī ’e ’aore rā te fārereira’a i te fatu ’ohipa ’āpī.

Hi’opo’a : Tauturu i te mau pīahi ’ia hi’opo’a i tō rātou nu’ura’a i mua ’e tā rātou mau tauto’ora’a. ’A tauturu i te fa’atupu i tō rātou mana’o manuia nā roto i te fa’a’itera’a e aha tā rātou e nehenehe e rave nō te ha’amaita’i atu ā. Tauturu i te mau pīahi ’ia fa’a’ohipa i te « Personal Study Tracker » (Te ’āpe’era’a mā’imira’a ta’ata hō’ē) nō te ha’amau i te fā nō te ha’api’ipi’ira’a tāmahana.

Rave nā roto i te fa’aro’o nō te ha’api’ipi’i i te reo peretāne i te mahana tāta’itahi : ’A tai’o pūai i te parau fa’ahiti ’e tā ’outou pupu. ’A fa’a’ite i tō fa’aro’o ē e tauturu mai te Fatu ia rātou ’ia ha’api’i i te reo peretāne. ’A ani ’ia rātou ’ia ha’api’ipi’i i te reo peretāne i te mahana tāta’itahi ’e ’ia fa’aineine nō te ha’api’ira’a nō muri iho maoti te mau ’ātivite a te « Personal Study » (Mā’imira’a ta’ata hō’ē) .

Pure : E ani i te hō’ē pīahi ’ia hōro’a mai i te pure hope’a nā roto i te reo peretāne. ’A mā’iti i te hō’ē pīahi tei ’ite ē e haere iāna, ’aore rā te hō’ē tā ’oe i ani a’ena.

’Ua ha’amauhia te mau ha’api’ira’a EnglishConnect i ni’a i te mau parau tumu tei ’ite-pāpū-hia i roto i te ’ohipa ha’api’i reo. E mānuia ’oe ’ia pe’e āna’e ’oe i te mau ha’api’ira’a ma te ha’amau i te vāhi nō te fa’aro’o, te hoara’a ’e te tupura’a.