« E aha tā te pīahi e rave ? », EnglishConnect nā te mau ’orometua ha’api’i (2023)
« E aha tā te pīahi e rave ? », EnglishConnect nā te mau ’orometua ha’api’i
E aha tā te pīahi e rave ?
’Ei ’orometua ha’api’i nō te EnglishConnect, e ti’a ia ’outou ’ia māramarama e aha tā te mau pīahi e rave ’ia nehenehe ia ’outou e tauturu ia rātou ’ia manuia. E manuia maita’i a’e te mau pīahi ’ia fa’aoti ana’e rātou i te mau ’ohipara’a nō te ’imi-maita’i-ra’a a te ta’ata iho, ’ia ’āmui mai rātou i te pupu ’āparaura’a ’e ’ia fa’ananea rātou i te peu ’ia fa’a’ohipa i te reo peretāne i te mau mahana ato’a. ’Ua vāhihia te ha’api’ira’a tāta’itahi i roto te EnglishConnect 1 nā te mau pīahi ’e te EnglishConnect 2 nā te mau pīahi i roto e piti tuha’a : « Personal Study » (’imira’a maita’i a te ta’ata hō’ē) ’e « Conversation Group » (pupu ’āparaura’a). ’A hi’o fa’ahou i te « ’Ōmuara’a » i roto i te mau buka pīahi EnglishConnect, nō te tauturu ia ’outou ’ia māramarama i te ’itera’a o te pīahi.
’A ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o
Te niu o te ’itera’a o te EnglishConnect ’o te tauturura’a ïa i te mau pīahi ’ia « ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o » (Te Ha’api’ira’a Tumu ’e te mau Fafaura’a 88:118). ’Ua fa’atumuhia te ha’api’ira’a tāta’itahi i roto te EnglishConnect i ni’a i te hō’ē parau tumu nō te ha’api’ira’a mai. E mau parau tumu pae vārua teie ’o te tauturu ia tātou ’ia tūru’i i ni’a i te Fatu, nō te fa’arahi i tō tātou ’aravihi nō te ha’api’i mai ’e nō te ha’api’i atu. E nehenehe i te mau parau tumu o te ha’api’ira’a mai e tauturu ia tātou ’ia hāro’aro’a i tō tātou fāito pūai mau ’e i te ’aravihi o te Fa’aora nō te tauturu ia tātou. Te mau parau tumu o te ha’api’ira’a mai ’o tā tātou e ’imi maita’i ’e e fa’ahōho’a i roto i te ’ohipa e tupu i roto te EnglishConnect, ’oia ho’i :
E tamari’i ’oe nā te Atua
E tamari’i au nā te Atua ma te fāito pūa’i ’e te fā mure ’ore.
(Hi’o Roma 8:16–17 ; « Te ’Utuāfare : E poro’i i tō te ao nei ».)
Fa’a’ohipa i te fa’aro’o ia Iesu Mesia
E nehenehe Iesu Mesia e tauturu iā’u ’ia rave i te mau mea ato’a ’a fa’a’ohipa ai au i te fa’aro’o Iāna.
(Hi’o Philipi 4:13 ; Etera 12:27 ; Moroni 7:33.)
Rave i te hōpoi’a
E mana tō’u nō te mā’iti, ’e ’o vau iho te ti’a’au nō tō’u iho ha’api’ira’a mai.
(Hiʼo 2 Nephi 2:14, 16 ; Te Ha’api’ira’a Tumu ’e te mau Fafaura’a 58:27–28.)
Here ’e e ha’api’i i te tahi ’e te tahi
E nehenehe au e ha’api’i mai nā roto mai i te Vārua Maita’i ’a here ai au, ’a ha’api’i ai ’e ’a ha’api’i mai ai ’e vetahi ’ē.
(Hiʼo Ioane 13:34–35 ; Ioane 14:26–27 ; Te Ha’api’ira’a Tumu ’e te mau Fafaura’a 84:106 ; 88:77, 122–23.)
Haere i mua
Ma te tauturu a te Atua, e nehenehe au e haere i mua ’oia ato’a ’ia fa’aruru ana’e au i te mau fifi.
(Hi’o 2 Nephi 31:20 ; 32:9 ; Te Ha’api’ira’a Tumu ’e te mau Fafaura’a 50:41–42.)
’Āparaura’a ’e te Fatu
E ha’amaita’i au i tā’u ha’api’ira’a mai ma te ’āparaura’a i te Atua i te mau mahana ato’a nō ni’a i tā’u mau tauto’ora’a.
(Hi’o Maseli 3:5–6 ; Mataio 7:7–8 ; Alama 37:37.)
’Imira’a maita’i a te ta’ata hō’ē
Hou ’a fa’aō mai ai i roto i te pupu ’āparaura’a, e fa’a’ī te mau pīahi i te tuha’a « Personal Study » (’Imira’a maita’i a te ta’ata hō’ē) i roto i te buka pīahi. I roto i teie tuha’a, e ’imi maita’i te mau pīahi i te hō’ē parau tumu nō te ’apora’a, e tāmau ’ā’au i te pu’eparau ’e e ha’api’ipi’i ma te fa’a’ohipa i te mau hōho’a pereota.
Te tāmau-’ā’au-ra’a i te pu’eparau ’e te ha’api’ipi’ira’a i te mau hōho’a pereota, ’o te mau ’ātivite ïa e au ’ia rave i roto i te ’imira’a maita’i a te ta’ata hō’ē. E fa’ati’a te reira i te mau pīahi ’ia ha’avī i te mau mana’o ’ia au i tō rātou iho tīhauhau.
Pupu ’āparaura’a
I roto i te pupu ’āparaura’a, e fa’a’ī te mau pīahi i te mau ’ohipara’a o te « Conversation Group » (Pupu ’āparaura’a) i roto i te buka pīahi. Te ’ohipara’a i roto i te mau pupu na’ina’i ’aore rā te mau ’āpiti, e ’āparau ïa te mau pīahi i te hō’ē parau tumu nō te ’apora’a, e tāmau i te pu’eparau ’e te mau hōho’a pereota, ’e e ha’api’ipi’i i te ’āparaura’a. E fa’aineine te ’ohipara’a tāta’itahi i te mau pīahi nō te ’ohipara’a i muri mai. I te hope’a o te pupu ’āparaura’a tāta’itahi, e fāito te mau pīahi i tō rātou haerera’a i mua ’e e ha’amau i te mau fā nō te ha’api’ipi’i i te mau mahana ato’a.
Ha’api’ipi’i i te mau mahana ato’a
Nō te ha’api’i maita’i mai i te reo peretāne, e hina’aro te mau pīahi e fa’ananea i te hō’ē peu ha’api’ipi’ira’a i te mau mahana ato’a. Nō te ha’amau i teie peu, e hina’aro te mau pīahi ’ia ’ite mai i te mau rāve’a nō te fa’aō mai i te reo peretāne i roto i tā rātou mau ’ohipara’a i te mahana tāta’itahi. ’Ei hi’ora’a, ’ia fa’aro’o ana’e rātou i te pehe, e nehenehe rātou e fa’aro’o nā roto i te reo peretāne. E nehenehe ato’a te mau pīahi e fa’atupu i te mau ’āparaura’a ’ōhie nā roto i te reo peretāne i te fare, i te vāhi ravera’a ’ohipa, ’aore rā i te fare purera’a. (Hi’o te tahi atu mau mana’o i roto i te tuha’a « Study Suggestions » i roto i te mau buka pīahi EnglishConnect). Te tāviri nō te ha’api’ipi’ira’a i te mau mahana ato’a ’o te tauturura’a ïa i te mau pīahi ’ia ’ite mai i te mau rāve’a nō te fa’a’ohipa i te reo peretāne i roto i tā rātou mau ’ohipa i mātarohia.
’Ei tuha’a nō tā rātou ha’api’ipi’ira’a i te mau mahana ato’a, e nehenehe te mau pīahi e fa’a’ī i te tuha’a « Personal Study » (’Imira’a maita’i a te ta’ata hō’ē) i roto i te buka pīahi. E nehenehe ato’a rātou e fa’a’ī i te mau ’ohipara’a o te ha’api’ira’a ’e te mau fāitora’a nā ni’a te tu’urēni i te englishconnect.org/learner/resources ’e i roto te EnglishConnect 1 Vaira’a buka and EnglishConnect 2 Vaira’a buka.