Nāhea vau i te fa’aineine nō te hō’ē pupu ’āparaura’a ?

Mea faufa’a roa te pupu ’āparaura’a i roto i te EnglishConnect. I roto i te pupu ’āparaura’a, e fāna’o te mau pīahi i te raveravera’a i te mau ’āparaura’a au maita’i. ’Ia fārerei ana’e rātou, e nehenehe te mau pīahi e fa’ari’i i te ti’aturira’a, e ’apo i te ha’api’ira’a a te Vārua, ’e e turu i te tahi ’e te tahi.

E tauturu te paraparaura’a i te reo peretāne i te mau pīahi ’ia nu’u i mua ’e e rāve’a faufa’a roa nō te tītau i te hōro’a nō te mau reo. E nehenehe ’oe e arata’i i te hō’ē pupu ’āparaura’a ma te fa’a’ohipa i te reo peretāne ’ōhie. Mai te mea e hinaʼarohia, e hiʼo te mau pīahi i te mau hurira’a parau i roto i te buka pīahi EnglishConnect nā roto i tō rātou iho reo tumu. ’Ua hōro’ahia te hurira’a parau nō te mau fā, te mau parau tumu nō te ’apo i te ha’api’ira’a, te pu’eparau, ’e te mau arata’ira’a.

Hou tā ’oe pupu ’āparaura’a e tupu ai, ’a hi’o i te tuha’a tāta’itahi o te buka pīahi EnglishConnect. Teie i raro nei te tahi mau ta’ahira’a nō te tauturu ia ’oe ’ia fa’aineine :

1. Pure ’e ’imi i te tauturu a te Atua.

2. Feruri e nāhea ’oe ’ia fa’aitoito i te fa’aro’o, te hoara’a ’e te tupura’a i roto i te pupu.

   1. Nāhea vau e tītau ai i te Vārua ?

   2. Nāhea vau e tauturu ai i te mau pīahi ’ia ’imi ’e ’ia ’ite ē ’o te tauturu a te Fatu terā ?

   3. Nāhea vau e tauturu ai i te mau pīahi ’ia here ’e ’ia pāturu te tahi i te tahi ?

   4. Nāhea vau e fa’aitoito ai i te mau pīahi ’ia parau i te reo peretāne ’e ’ia maita’i atu ā ?

3. Tai’o māite i te parau tumu nō te ’apora’a ha’api’ira’a.

   1. Nāhea vau i te ’itera’a i teie parau tumu ?

   2. Nāhea vau e tauturu ai i te mau pīahi ’ia fa’a’ohipa i teie parau tumu ?

   3. Nāhea vau e fa’a’ohipa ai i teie parau tumu i roto i tā’u ha’api’ira’a ?

4. Hi’o i te pu’eparau ’e te mau hōho’a pereota.

   1. E nehenehe ānei iā’u ’ia fa’a’ohipa taiā ’ore i te pu’eparau ’e te mau hōho’a pereota i roto i te ’āparaura’a ?

5. Tai’o i te mau ’ātivite 1–3.

   1. Nahea vau ’ia fa’a’ite atu i te ’ātivite tāta’itahi ?

   2. Nāhea vau ’ia ’āpiti atu i te mau pīahi nō te ha’api’ipi’ira’a ?

   3. Nāhea vau ’ia turu atu i te mau pīahi i roto i tā rātou ha’api’ipi’ira’a ?

6. Hi’o i te tuha’a « Hi’opo’a ».

   1. Nāhea vau ’ia tauturu i te fa’atupu i te mana’o manuia i roto i te pīahi ?

   2. Nāhea vau ’ia tauturu i te mau pīahi i te fa’a’ohipa i « Te ’āpe’era’a mā’imira’a ta’ata hō’ē » i roto i te buka pīahi ?

7. Hi’o i te tuha’a « Rave nā roto i te fa’aro’o nō te ha’api’ipi’i i te reo peretāne i te mahana tāta’itahi ».

   1. Nāhea vau ’ia fa’aitoito i te mau pīahi ’ia rave i te tuha’a « Mā’imira’a ta’ata hō’ē » hou te pupu ’a fārerei ai, ’e ’ia ha’api’ipi’i i te reo peretāne i te mahana tāta’itahi ?

   2. Nāhea vau ’ia fa’aitoito i te mau pīahi ’ia tūru’i i ni’a i te Fatu ?

’A hi’o i te tuha’a « Mātēria nō te pupu » i roto i teie buka. (’Ua tu’u-ato’a-hia teie mau mātēria i roto i te buka pīahi EnglishConnect.) ’A fa’anaho e nāhea ’oe ’ia fa’a’ohipa i teie mau mātēria. Tei roto i te tuha’a « Pereota nō te pupu ’āparaura’a » te mau pereota ’ōhie ’o tē nehenehe e tauturu i te pupu ’ia ’āparau nā roto i te reo peretāne. Tei roto i te « Pure nā roto i te reo peretāne » te mau hōho’a pereota ’ōhie nō te tauturu i te mau pīahi ’ia pure nā roto i te reo peretāne. E nehenehe ’oe e ani i te mau ta’ata ’ia hi’opo’a i teie tuha’a nō te fa’aineine nō te rave i te pure ’īritira’a ’e te ’ōpanira’a.

E ’itehia te tahi atu mau mātēria ’e te mau hi’ora’a i roto i te vaira’a buka ’evanelia ’e te englishconnect.org/teacher.

Te mau hoa nō te tahi atu ha’apa’ora’a fa’aro’o

Te rōtahira’a i ni’a i te ha’api’ira’a nā roto i te fa’aro’o, ’o te hō’ē ïa tumu e mea ta’a ’ē mau te EnglishConnect. E nehenehe ’oe e fa’aō i te mau ta’ata nō te mau ha’apa’ora’a fa’aro’o rau maoti te tauturura’a ia rātou ’ia feruri e nāhea te parau tumu nō te ’apora’a ha’api’ira’a e tano ai ia rātou. E nehenehe ’outou e fa’a’ohipa i te « Pu’e ta’o nō te mau parau tumu nō te ’apo i te ha’api’ira’a » i roto i te buka pīahi EnglishConnect nō te tauturu ’ia rātou ia māramarama i te mau ta’o ’evanelia. Ma te arata’ihia e te Vārua, ’a hi’o ma te ’ani ’ia rātou ’ia fa’a’ite mai e aha te mea tā rātou i ’apo mai ’a ’āparau ai ’outou i te parau tumu nō te ’apora’a ha’api’ira’a. ’A fa’a’ite noa i te fa’atura i tā vetahi ’ē tiaturira’a ma te fa’a’ite hua i tō ’oe fa’aro’o ē e nehenehe te Atua e tauturu ’ia rātou ’ia ha’api’i i te reo peretāne.

E itehia ’ia ’outou i te mau mana’o i roto i te parau ’omuara’a nō te buka ’Ia poro haere i tā’u nei ’Evanelia ; hi’o i te tuha’a « Te fa’a’ohipara’a te mau melo o te ’Ēkālesia i te ’Ia poro haere i tā’u nei ’Evanelia. »

Te ’ohipara’a ’e te feiā ’āpī

E nehenehe i te ’EnglishConnect e ha’amaita’i i te ’orara’a o te feiā ’āpī. E nehenehe te mau titi, te mau paroita ’e te mau misiōni e fa’anaho i te mau pupu nō te feiā ’āpī ’āna’e. Mai te mea e ’āmuihia te mau pupu feiā ’āpī ’e te mau pupu feiā pa’ari, e nehenehe e fa’ata’a i te feiā ’āpī nō te mau ha’api’ipi’ira’a.

’A ha’amana’o i te pe’e i te mau ture a te ’Ēkālesia nō te pārurura’a i te feiā ’āpī. Tītauhia i te mau tamari’i tauti’a ’ore (18 matahiti ’aore rā i raro a’e mai ’e e ora ra i te fare) ’ia fa’ari’i i te parau fa’ati’a tārimahia a te mau metua hou ’a fa’aō ai i roto i te pupu. E roa’a te mau ’api parau nā roto i te mau reo rau ato’a i ni’a ia englishconnect.org/resources/leader. Hau atu, tītau-roa-hia i te mau ha’api’ira’a EnglishConnect ’ia ha’apa’o i te ture a te ’Ēkālesia ē e piti a’e ta’ata pa’ari ha’apa’o i roto i te mau rurura’a pupu. Tītau-roa-hia ia ’oe ’ia pe’e i teie mau ture noa atu ē e ruru te pupu i nā ni’a i te tu’urēni.