« E aha te ’ohipa a te ’orometua ha’api’i ? », EnglishConnect nā te mau ’orometua ha’api’i (2023)

« E aha te ’ohipa a te ’orometua ha’api’i ? », EnglishConnect nā te mau ’orometua ha’api’i

E aha te ’ohipa a te ’orometua ha’api’i ?

Tā ’outou ’ohipa ’ei ’orometua ha’api’i nō te EnglishConnect ’o te tauturura’a ïa i te mau pīahi ’ia fa’ananea i te mau ’aravihi nō te ’āparaura’a nā roto i te reo peretāne, i roto i te hō’ē vāhi nō te fa’aro’o, te hoara’a ’e te tupura’a. ’O te Vārua te ’orometua mau. E nehenehe ’outou e tauturu i te mau pīahi ’ia putapū i te Vārua, ’ia ’ite i tō rātou rirora’a, ’e ’ia ti’aturi ē ma te tauturu a te Metua i te ao ra e nehenehe rātou e ha’api’i mai i te reo peretāne. E tauturu ’outou i te mau pīahi ’a fa’atumu ai ’outou i ni’a i te mau tumu i muri nei :

Fa’afaufa’a i te fa’aro’o

’A fa’aitoito i te mau pīahi ’ia ’imi ’e ’ia ’ite mai i te tauturu a te Fatu i roto i te ha’api’ira’a mai i te reo peretāne. ’A fa’aitoito ia rātou ’ia fa’a’ohipa i te mau parau tumu o te ha’api’ira’a mai « nā roto i te ha’api’i ’e nā roto ato’a i te fa’aro’o » (Te Ha’api’ira’a Tumu ’e te mau Fafaura’a 88:118). ’A tauturu i te mau pīahi ’ia ’ite mai i te here, te mana ’e te aroha o te Fatu i roto i tō rātou orara’a. ’A ani ia rātou ’ia fa’a’ite mai i tō rātou mau ’itera’a nō ni’a i te patura’a i te fa’aro’o. ’A fa’a’ite i tō ’outou mau ’itera’a nō ni’a i te fāri’ira’a i te tauturu a te Fatu. (Hi’o te tuha’a « Tauturu i te mau pīahi ’ia haere mai ia Iesu Mesia » nō roto mai i te Ha’api’ira’a mai tā te Fa’aora [2022].)

Fa’afaufa’a i te auhoara’a

’A ani i te Vārua ma te tauturura’a i te mau pīahi ’ia here ’e ’ia turu i te tahi ’e te tahi. ’A tauturu ia rātou ’ia putapū i te here o te Atua. ’A ha’amau i te hō’ē vāhi fa’ari’ira’a maita’i i reira te mau pīahi ato’a e ’ite ai e melo rātou. ’A ha’amātau mai i te mau pīahi ’e ’a tauturu ia rātou ’ia ha’amātau i te tahi ’e te tahi. ’A tauturu ia rātou ’ia patu i te ti’aturira’a ’a ha’api’ipi’i mai ai, ’a rave ai i te mau hape ’e ’a ha’amaita’i ’āmui ai rātou. (Hi’o te tuha’a « ’A here i te feiā o tā ’outou e ha’api’i ra » i roto i te Ha’api’ira’a mai tā te Fa’aora [2022].)

Fa’afaufa’a i te tupura’a

’A tauturu i te mau pīahi ’ia rave nā roto i te fa’aro’o nō te ha’api’ipi’i i te reo peretāne ’e nō te ha’amaita’i. E nehenehe te tahi mau pīahi e ’ore e ti’aturi i tō rātou ’aravihi nō te ha’api’i mai i te reo peretāne. E nehenehe ’outou e tauturu. ’Ia parau reo peretāne ana’e ’outou ia rātou, tē fa’a’ite ra ’outou i tō ’outou fa’aro’o ē, e nehenehe te Atua e tauturu ia rātou ’ia ha’api’i mai. ’A fa’aitoito i te mau pīahi ’ia parau i te reo peretāne. ’A ha’apōpou i tā rātou mau tauto’ora’a ’A tauturu i te mau pīahi ’ia ha’amana’o nō te aha rātou e ha’api’i mai ai i te reo peretāne. ’A fa’aitoito ia rātou ’ia ha’amau i te mau fā ’e ’ia ha’api’ipi’i i te reo peretāne i te mau mahana ato’a. (Hi’o i te tuha’a « Tītau manihini ’ia ’apo i te ha’api’ira’a ma te itoito » i roto mai i te Ha’api’ira’a mai tā te Fa’aora [2022].)

Tā’u ’ohipa

E fa’afaufa’a vau i te fa’aro’o ma tauturura’a i te mau pīahi ’ia ’imi ’e ’ia ’ite mai i te tauturu a te Fatu i roto i te ha’api’ira’a mai i te reo peretāne.
E fa’afaufa’a vau i te auhoara’a ’e e ani i te Vārua ma te tauturura’a i te mau pīahi ’ia here ’e ’ia turu i te tahi ’e te tahi.
E fa’afa’ufa’a vau i te tupura’a ma te tauturura’a i te mau pīahi ’ia rave nā roto i te fa’aro’o nō te ha’api’ipi’i i te reo peretāne ’e nō te ha’amaita’i.