Si Elder Ronald A. Rasband Mibalik Alang sa Siyam ka Adlaw nga Apostolikanhong Pangalagad

“Kamo mga pinili sa Ginoo, dili lang aron lingkoran ang inyong pagkamiyembro apan aron molambo ug motubo, diha sa inyong pamilya, komunidad, ug calling,” si Visha Marie Gialolo mipakigbahin sa unsay gipahinumdom ni Elder Rasband sa mga miyembro sa Simbahan nga naminaw sa Apostol sa personal ug via livestream sa Iloilo ug Bacolod Combined Leadership Council Conference nga gipahigayon sa Iloilo City.

“Nagpahinumdom kini nako nga isip mga miyembro sa Simbahan sa Ginoo,” si Sister Gialolo, kinsa nagserbisyo isip presidente sa Young Women miingon, “kita gitawag sa paghimo sa buhat sa Ginoo diha mismo sa dapit diin kita gitawag. Makatampo kita sugod sa atong pamilya, atong komunidad ug diha mismo sa ward diin kita gitawag.”

Ang mga lider gikan sa lainlaing mga stake ug mga district tabok mga isla sa Panay ug Negros gitudloan sa Apostol sa Ginoo, kinsa mipaila og tulo ka Kristohanon nga mga pamahayag nga gusto ni Presidente Russell M. Nelson nga sundon ug gamiton sa mga miyembro sa Simbahan: (1) Gimahal ko kamo, (2) Salamat, ug (3) Gikinahanglan ko kamo. “Kini nga mga pulong, puno sa balaanong kahulogan, dili lamang gikan sa iyang kaugalingon apan usa ka pagpadangat sa gugma sa atong minahal nga propeta,” pahinumdom sa konseho sa komunikasyon sa Bago Stake.

“Usahay lagmit ibaylo nato ang mga pagpamatuod alang sa ginagmay nga mga butang ... ug ang atong mga sumbanan makalimtan,” miingon si Lunabelle Jessa Talidano, kinsa nagserbisyo isip presidente sa Relief Society sa Molo 2nd Ward, Iloilo Stake. “Apan sama sa gisulti ni Elder Rasband,” mibati siya og kaseguroan, “kita kinahanglang ‘dili mabalaka’, kay ang pagkadisipulo nagpasabot nga pagbarog diha sa balaang mga dapit niining peligro nga panahon.”

Usa ka maanindot nga panghitabo sa Simbahan nahitabo niadtong Pebrero 23 sa dihang si Elder Rasband mipahinungod sa BYU-Pathway Worldwide GEC nga nahimutang sa meetinghouse sa Lahug Stake sulod sa Cebu Philippines Temple Complex. Kuyog ni Elder Rasband sa kalihokan mao si Brother Matt Eyring, Bise-Presidente alang sa Advancement at BYU–Pathway Worldwide.

Ang sentro moserbisyo isip pundokanan sa mga estudyante nga na-enrol sa BYU–Pathway Worldwide, usa ka online nga insitusyon sa mas taas nga edukasyon nga gipasiugdahan sa Simbahan. Dugang pa, ang sentro mao ang labing una sa matang niini sa Asya ug usa sa upat lamang nga naglihok sa tibuok kalibotan.

“Mangayo kami og espesyal nga panalangin alang sa mga estudyante nga moanhi dinhi aron magkat-on ug molambo,” si Elder Rasband nangamuyo sa iyang pag- ampo sa pagpahinungod, “aron mahimong makabarog pinaagi sa kinaugalingong paningkamot, ug aron mangandam sa pagtuman sa mga responsibilidad ug mga hagit nga ilang atubangon sa ilang kinabuhi.”

Ang mga estudyante malipayong mipakita sa Apostol sa lainlaing mahinungdanon nga mga bahin sa pasilidad, nga naglakip sa mga dapit nga adunay ekipo ug mga kawani alang sa pagpangandam sa panarbaho, mga lawak alang sa pagpraktis sa interbiyo, mga luna nga trabahoanan, mga lawak alang sa pinulongan sa Iningles, ug mga dapit alang sa panagtinabangay sa pagtuon.

“Mapasalamaton kaayo kami nga ang matinud-anong mga estudyante sa Pilipinas mahimong makadawat og nag-una nga edukasyon tungod niini nga mga sentro,” si Elder Rasband mipahayag pinaagi sa online sa kaulahian. “Kini nga sentro dili lamang mopanalangin sa mga estudyante sa BYU-Pathway Worldwide—apan sa ilang mga pamilya usab ug sa mas halapad nga komunidad.”

Ang disesiyete anyos nga mitambong nga si Haydin Valerie Porlage sa Kamputhaw Ward, Cebu City Stake mao ang usa sa mga makabenepisyo nga Santos sa Ulahing mga Adlaw sa BYU-Pathway Worldwide GEC. “Nakita nako ang kaimportante sa edukasyon sa atong kinabuhi,” siya mipasabot, “ug kon unsaon nga makatabang kini kanato sa pagdumala sa atong intelektuwal ug espirituwal nga mga kahanas.”

Agi og dugang sa pagpahinungod, si Elder Rasband mitambong usab sa panagtigom alang sa sakramento uban sa mga miyembro sa Apas Ward, nakighimamat sa mga misyonaryo sa Philippines Cebu ug Philippines Cebu East nga mga misyon, ug mibisita sa Cebu City Philippines Temple.

Si Elder Rasband namulong bahin sa kaimportante sa pagkahimong matinud- anon sa ebanghelyo ngadto sa sobra sa 800 ka miyembro sa Simbahan sa Legazpi Stake, Ligao District, ug Tabaco District sa Legazpi Stake Center. Si John Noel Dorosan natandog samtang naminaw siya sa istorya bahin sa Danish nga mga katigulangan ni Elder Rasband nga milawig ngadto sa layo kaayo nga Utah aron mapundok ngadto sa Zion ug maselyo isip pamilya.

“Ang asawa gipangutana kon mobalik ba sila sa Denmark tungod kay ang iyang bana namatay atol sa paglawig apan miingon siya nga dili kini maalamon,” si Brother Dorosan misaysay. “Ang tumong mao aron maselyo ug magpadayon sila aron matuman kini bisan pa kon sila namatyan, busa gihimo nila kini, ug karon ang ilang kaliwatan nagtagamtam sa mga bunga sa ilang hugot nga pagtuo. Si Elder Rasband miawhag kanato sa paghunahuna mahitungod sa mga henerasyon nga mosunod.”

Sa pagpangandam alang sa debosyonal, ang pamilya Loneza mipahimulos sa Meet the Apostle nga feature sa Gospel Library nga app atol sa family home evening. Human sa makalingaw nga kalihokan sa pagkat-on mahitungod sa mga apostoles sa moderno nga panahon, “gihangyo namo ang among mga anak nga lalaki nga si Lou Fredrich ug si Lourd Frincerich sa pagpakita namo og usa ka apostol nga ilang nailhan,” si Sister Marisol Loneza naghulagway, “ug nag-browse sila sa screen sa kompyuter ug gitudlo ang litrato ni Elder Rasband.”

Makaguol lang, si Marisol naospital sa adlaw sa debosyonal tungod sa problema sa pagginhawa, ug ang iyang bana nga si Rico kinahanglang mobilin sa ilang mga anak ngadto sa ilang mga paryente. Apan, nagtinguha gihapon nga makapaminaw sa mga pulong sa representante sa Ginoo, si Sister Loneza mitan-aw sa livestream sa debosyonal gamit ang iyang smartphone—ug gikan sa iyang higdaanan sa ospital.

“Ang iyang mga pulong dakong kahupayan ngari nako ug sa akong bana,” miingon si Sister Loneza, “ug mibati ko nga naayo samtang ang iyang mensahe midulot sa akong kasingkasing.” Samtang nagpahayag pag-usab si Elder Rasband sa tulo ka butang nga gusto sa Ginoo nga bation sa Iyang mga anak (Gimahal ko kamo, Salamat, ug Gikinahanglan ko kamo), gibati ni Sister Loneza ang usa ka mapamatud-anon, makapausab nga gahom: “Sa pagkatinuod, ang mensahe sa Ginoo adunay gahom sa pag- ayo sa nasamdan nga kalag.”

Ang full-time nga mga misyonaryo naminaw og maayo ni Elder Rasband atol sa debosyonal sa Philippines Missionary Training Center (MTC) Niadtong Pebrero 27. “Kamo anaa gayod sa lugar diin ang Ginoo gusto nga kamo moadto,” ang Apostol misulti sa mga batan-ong lalaki ug mga babaye, ug mipasabot nga “ang matag kalag importante sa Dios.”

Sa wala pa makadawat sa iyang tawag nga moserbisyo sa Philippines Urdaneta Mission, si Elder Empleo naghunahuna kon mao ba gayod kini ang iyang panahon sa pagserbisyo. Apan tungod sa mensahe ni Elder Rasband, nakasabot na siya karon nga “ang Langitnong Amahan nasayod sa tanang butang ug nahibalo nga kini ang panahon diin ako mahimong misyonaryo nga gusto Niya nga ako mamahimo.”

Alang ni Sister Roberto sa Philippines Cavite Mission, “ang mensahe ni Elder Rasband dakong tabang alang nako ug sa tanang misyonaryo. Ang iyang mensahe makapahinumdom nato sa atong katuyoan isip mga misyonaryo, nga mao ang pagdapit sa uban sa pagduol ngadto kang Kristo, pinaagi sa pagtabang nila nga makadawat sa gipahiuli nga ebanghelyo.”

Pagkasunod adlaw, Pebrero 28, si Elder Rasband ang midumala sa paghatag sa donasyon didto sa Edsa Shangri-La Hotel sa mga kontribusyon nga nalikom gikan sa #LightTheWorld Giving Machines nga gibutang sa Metro Manila, Cebu, ug Davao. Gikuyogan siya sa pipila ka artista ug mga influencer nga mga Santos sa Ulahing mga Adlaw, sila si Eric ug Rona Tai, Jairus Aquino, Janella Renner, ug Nevin Garceniego, ang 2024 The Voice Kids Philippines Grand Champion.

Si Elder Rasband mitabang sa paghatag niining simbolikanhong tseke ngadto sa mga representate gikan sa walo ka kaubanan nga charity: UNICEF Philippines, Mabuhay Deseret Foundation, Ateneo de Davao University, Feed the Children Philippines, Alagang Kapatid Foundation, H.E.R.O. Foundation, Caritas Manila, ug Cebu Caritas.

“Ako adunay talagsaong impresyon nga mao kini ang hinungdan kon nganong atong gibuhat ang tanan nga atong mahimo,” nagluha-luha ang mata ni Elder Rasband samtang namulong siya sa dinapit nga mga bisita. “Gihimo nato kini alang sa kaayohan ug panalangin sa nagtubo nga henerasyon, sa tibuok Piliponas ug sa tibuok kalibotan.”

Niadtong 2018, si Elder Rasband ug ang iyang asawa, si Sister Melanie Rasband, mibisita sa umaabot nga luna sa templo sa amihanang bahin sa Luzon, diin mibati siya og kadasig sa pagpahayag: “Ang Ginoo mohatag og mga oportunidad alang sa dugang nga mga templo ug mas daghang akses alang sa mga sa miyembro sa Simbahan.” Karon, ang Urdaneta Philippines Temple nagbarog nianang balaan nga luna.

Sa pagbalik ngadto sa Urdaneta, si Elder Rasband nangulo sa Priesthood Leadership Conference sa Urdaneta Stake Center niadtong Marso 1, alang sa mga lider gikan sa Urdaneta ug Cauayan Coordinating Councils. latest”Mapasalamaton kami sa iyang dinasig nga tambag,” usa sa mga partisipante mipahayag. “Ang mga pulong nakapalig-on sa among tinguha sa pagserbisyo inubanan sa gugma ug kakugi.”

Ang mga lider sa pagkapari ug sa organisasyon gikan sa Burgos Branch nga gipangulohan sa ilang presidente sa branch, nga si Vincent Mark Jerusalem, mibiyahe gikan pa sa probinsya sa Isabela alang sa talagsaong oportunidad sa pagkat-on gikan sa usa ka Apostol. “Usa kadto ka kasinatian nga makapalambo sa espirituwal samtang among gidawat ang mahinungdanong pagbansay,” misaysay ang mga lider sa branch sa usa ka post account sa social media sa branch.

Namalandong bahin sa iyang pagpahinungod sa BYU-Pathway Worldwide GEC, si Elder Rasband mipasabot sa usa ka partikular nga kasulatan: “Ang himaya sa Dios mao ang kinaadman” (Doktrina ug mga Pakigsaad 93:36). Kini nga baroganan sa doktrina nakahatag og gibug-aton sa unsay gipakigbahin sa mga Apostol ngadto sa Pilipino nga mga Santos, nga ang Ginoo gusto nga ang Iyang mga anak makaambit sa Iyang himaya samtang naglambo sila sa temporal ug espirituwal nga kahibalo.

“Ang atong Amahan sa Langit nagpakabana sa matag usa kanato, ug gusto Niya nga kita adunay oportunidad sa pagkat- on, paglambo, ug mas mahisama Kaniya,” ang Apostol sa Ginoo mitapos.