Pagtukod sa Zion diha sa Atong mga Ward ug mga Branch: Kini Mahimong Magsugod ngari Kanako

Maglig-on sa Panaghiusa

Usa ka Zion nga ward o branch mapakita pinaagi kon giunsa sa mga miyembro sa pagtagad ang uban. Si Elder Christofferson nagtudlo nga kita makaugmad og mas dakong panaghiusa pinaagi sa pagsunod sa sugo sa Manluluwas “sa paghigugma sa usag usa dili lang sama sa paghigugma sa atong kaugalingon apan sama nga Siya nahigugma kanato.” Kita makahimo sa pagtuboy sa matahom nga panaghiusa sulod sa atong mga kongregasyon. Unsa ang atong mabuhat sa “usa sa kasingkasing ug usa sa hunahuna”? (Moises 7:18). Ania ang pipila ka ideya:

• Usa ka sister mibalibad sa pagsulti og usa ka negatibo nga pulong kabahin ni bisan kinsa diha sa iyang ward. Kini nakaapekto sa daghan pa kinsa misugod sa paglihok sa samang paagi.

• Usa ka brother masaligon nga makaila sa tanang ngalan sa mga miyembro sa ward ug motimbaya kanila sa kanunay kutob sa mahimo.

• Sa usa ka ward, ang bishopric modapit og bag-ong tawo sa pag-adto sa atubangan sa chapel human sa miting sa sakramento aron sila makatimbaya kanila ug makakonektar sa mga lider gikan sa matag organisasyon.

• Ang kapangulohan sa Relief Society sa akong ward midapit og bag-ong mga sister sa pagpaila sa ilang kaugalingon sa nagsunod nga unom ka semana. (Sa dili pa ang duha ka oras nga pagsimba, kon kami adunay Relief Society sa matag Dominggo.) Magkinataw-anay kami sa matag higayon, apan nakatugot kini kanamo nga magkailhanay sa bag-ong mga sister ug makakonektar.

Pagkahimong usa ka Balaan nga Katawhan

Si Elder Christofferson mipasabot, “Kadaghanan sa mga buluhaton nga pagahimoon sa pagtukod sa Zion naglakip sa atong indibidwal nga mga paningkamot nga mahimo ‘ang putli og kasingkasing’ [Doktrina ug mga Pakigsaad 97:21].”

Unsa ang piho natong mabuhat aron mahimong balaan nga tawo? Kini magsugod sa atong indibidwal ng mga paningkamot sa pagpakabuhi sumala sa mga pakigsaad nga atong gihimo uban sa Dios.

Ako nagpuyo sa usa ka ward diin ang usa ka babaye nahisama sa usa ka banwag sa pagkamatarong. Si Jessica (ngalan giusab) mipadan-ag sa gugma ug kaayo sa matag semana sa among mga miting. Iyang gitagsa tagsa sa pagduol ang tawo, motimbaya kanila ug mopangga nila—ilabi na kadtong mga “miyembro nga wala pa kaayo mailhi” sa ward. Iyang gidapit ang kadtong mga nagmagul-anon ngadto sa iyang panimalay, nakig-istorya sa mga maulawon, ug gipadayon ang iyang kamasaligon ni Kristo ug sa Iyang ebanghelyo. Kini nakaimpluwensiya og maayo sa tibuok ward.

Matag usa kanato makatampo usab ngadto sa espirituhanong kinaiyahan sa atong mga miting sa Simbahan pinaagi sa pagtuboy og panabot sa doktrina ug pasalig ngadto sa ebanghelyo.

• Kita mahimong makapangandam sa paghinumdom sa Manluluwas samtang kita moambit sa sakramento nga adunay usa ka “masulub-on nga kasingkasing ug mahinulsulon nga espiritu” (3 Nephi 9:20)—ug tudloan ang atong mga pamilya sa pagbuhat usab sa ingon.

• Mahimo kita nga magtinguha og makanunayong pakig-uban ug makabalaang gahom sa Espiritu Santo samtang kita “magdiskobre sa hingpit nga kalipay sa inadlaw nga paghinulsol.”

• Makahimo kita og mubo nga mga sulat sa mga miting sa Simbahan ug maningkamot sa paghimo og dinasig nga mga komento nga makapalambo sa pagkat-on sa matag klase.

• Ang mga magtutudlo makahimo og makugihon nga mga paningkamot aron maandam ug sa pagpasaka sa ang-ang sa pagkat-on sulod sa ilang mga klase. Ang dugang pang mga paningkamot diha sa taas nga mga ang-ang sa partisipasyon sa klase ug ang espirituhanong kinaiyahan sa mga klase.

• Kita makatuman sa mga pakigsaad nga atong gihimo diha sa templo. Ang pagsimba diha sa balay sa Ginoo kutob sa mahimo kon itugot sa kahigayonan makatabang kanato nga mas mapaduol ngadto Kaniya, ug kita makadapit sa uban nga mokuyog kanato aron sa pagsuporta kanila sa ilang pagtambong usab sa templo.

Samtang ang matag usa kanato kita mobuhat sa pagtuboy og espirituhanong kalig-on ug pagkamatarong sulod sa atong ward o branch uban sa mapaubsanon, makanunayong mga paningkamot, ang tibuok kongregasyon mapanalanginan ug madasig ngadto sa mas dakong espirituwalidad ug pagkamapahinungoron.

Pag-atiman alang sa mga Kabos ug Timawa

Si Hari Benjamin mitudlo og daghang kamatuoran nga makatabang kanato sa pagtukod sa Zion. Sa pagtudlo kanato sa pag-atiman sa kabos ug niadtong anaa sa panginahanglan, siya nag-ingon “kamo mismo motabang niadtong nagkinahanglan sa inyong tabang; ipangalagad ninyo ang inyong kabtangan ngadto kaniya nga nagkinahanglan” (Mosiah 4:16).

Matag usa kanato mahimong kabahin sa pag-atiman ug pagpakigbahin. Kita mahimong mangutana, Unsa ang akong mahimo aron mahupay ang panginahanglan sa akong ward o branch? Unsaon nako sa paggamit ang akong mga kapanguhaan aron matabangan ang kabos ug kadtong nanginahanglan?

Sama sa gipasabot diha sa Kinatibuk-ang Tamdanan nga Basahon, “Ang mga lider kasagaran makatabang sa mga indibidwal ug mga pamilya nga makakita og mga kasulbaran sa ilang mga panginahanglan pinaagi sa pagggamit sa kahibalo, mga kahanas, ug serbisyo nga gitanyag sa mga miyembro sa ward ug stake.”

Ania ang pipila ka makapadasig nga mga ehemplo nga akong nakita:

• Usa ka sister nakigtambayayong sa mga miyembro sa ward nga nanglimbasog sa pinansyal ug nagtudlo kanila kon unsaon sa paghimo og usa ka badyet ug magpabilin niini.

• Usa ka brother nagtanyag og temporaryo nga panarbaho diha sa iyang kompanya aron makatabang sa mga miyembro samtang sila nangita og permanenteng trabaho.

• Usa ka sister sekretong mobutang og mga pinutos nga pagkaon diha sa balkon sa mga pamilya diha sa ilang ward nga nagkalisod.

• Usa ka brother nagtudlo sa uban kon unsaon sa pag-ayo og mga sakyanan aron sila makakat-on og usa ka bag-ong kahanas.

• Ang mga miyembro sa ward mitanyag og mga serbisyo—sama sa pagtupi sa buhok, paghikay sa mga buhis, pagbantay sa bata, pag-andam sa mga résumé­—nga magamit sa bishop aron sa pagtabang niadtong anaa sa panginahanglan. Tungod kay ang mga miyembro andam moserbisyo, kini nakaluwas sa pamilya gikan sa paggasto sa daghang gikinahanglan nga kwarta alang niadtong mga serbisyo.

• Usa ka tigpangalagad nga brother miorganisar og usa ka pagpanglimpyo sa tugkaran alang sa usa ka pamilya nga dugay nang nasakit.

• Usa ka tigpangalagad nga sister miorganisar og usa ka pagpanglimpyo sa balay alang sa usa ka naugtas nga inahan.

• Laing sister mipundok sa mga donasyon sa paglimpyo sa mga kagamitan alang sa mga dili minyo nga mga inahan diha sa iyang ward.

• Sa dihang ang akong bana walay trabaho sulod sa daghang buwan, usa ka batan-ong inahan gikan sa among ward miduol ngadto sa pultahan ug mitanyag kanamo og pipila ka kwarta aron sa pagtabang kanamo. Nakuratan ako! Dili gayod nako makalimtan ang iyang kamanggihatagon.

Kita mahimong magtinabangay aron sa pagtuboy og kapaigoan sa kaugalingon ug pagkagawasnon. Samtang ang matag usa kanato mohimo og usa ka paningkamot sa pag-atiman ug pakigbahin ngadto sa nanginahanglan, kita mobayaw sa temporal ug espirituhanong kaayohan sa atong mga ward ug mga branch.

Ang mga tawo nga gihulagway diha sa 4 Nephi nagpakita og pipila sa kahimtang nga mitumaw sa dihang ang tibuok katawhan nagtinguha sa pagtukod sa Zion. Ang ilang ehemplo naghatag og makatabang nga ehemplo aron atong masunod. Human sa pagbisita sa Ginoo ngadto sa mga Nephita:

• “Ang tanang katawhan nakabig ngadto sa Ginoo.” (bersikulo 2).

• “Mipakig-ambit sila tanan nila nga mga butang para sa tanan; mao nga walay adunahan ug kabos” (bersikulo 3).

• “Walay panagbingkil sa yuta, tungod sa gugma sa Dios nga anaa sa mga kasingkasing sa katawhan” (bersikulo 15).

• “Ni adunay mga Lamanita, ni bisan unsa nga matang sa mga -ita; apan nagkahiusa sila, ang mga anak ni Kristo, ug manununod sa gingharian sa Dios” (bersikulo 17).

• “Ug pagkabulahan nila!” (bersikulo 18).

Agig minubo, ang Ginoo nagsugo sa tanang miyembro sa pagtabang sa paglig-on sa Zion (tan-awa sa Doktrina ug mga Pakigsaad 6:6), ug kadtong kinsa midawat sa ilang pagtuga sa templo nakigsaad sa pagbuhat sa ingon. Kitang tanan mahimong magtinabangay aron nga atong mga miyembro sa ward o branch mausa sa kasingkasing ug usa sa hunahuna nga walay kabos taliwala kanato.