Mapasalamaton sa Pagkat-on sa Iyang Kabubut-on

Paghulagway pinaagi ni Bradley Clark

Sa usa pa ako ka estudyante sa unibersidad, ganahan gyod ko nga mokuha og usa ka piho nga dalan sa karera. Giplano nako ang tanan nakong klase hangtod sa akong paggradwar, ug ako nakabaton og usa ka oportunidad sa negosyo nga andam ako nga modawat. Ang tanang butang gipahimutang.

Human sa pakigtambag sa Langitnong Amahan diha sa pag-ampo, hinoon, gibati nako nga Siya miingon kanako, “Gikinahanglan ko ikaw nga moadto sa lahi nga direksyon.” Wala madugay human niana, usa ka oportunidad nga makatrabaho alang sa Simbahan mitunga. Kadto hingpit nga wala damha, apan giila ko kini ingon sa usa ka bag-ong direksyon nga giandam Niya nga akong dawaton.

Akong gipasabot sa akong pamilya nga usa ka bag-ong oportunidad ang mibukas isip manedyer sa pagbansay ug operasyon sa Pacific Missionary Training Center. Kini misangpot sa usa ka posisyon paglabay sa tulo ka tuig isip direktor sa institute diha sa Seminaries and Institutes of Religion. Ang akong orihinal nga plano sa karera lagmit nga mas temporaryo nga mauswagon, apan nakahukom kami nga tan-awon kon unsa ang mahitabo kon atong ibutang ang atong pagsalig sa Ginoo.

Kana nga desisyon miresulta sa mga panalangin nga daw giandam sa Ginoo alang kanamo. Maanindot kaayo kadto. Dili man kami adunahan, apan sa kanunay kami aduna sa mga butang nga among gikinahanglan, ug ang among mga anak napadagko diha sa maanindot nga palibot sa ebanghelyo.

Wala gyod ako nagmahay sa akong desisyon 23 katuig nang milabay, bisan og kinahanglan kong mobiya sa pipila ka butang ug biyaan ang pipila ka tawo, mga lugar, mga kabtangan, ug mga posisyon. Apan malipayon kami nga mobuhat niana alang sa Langitnong Amahan. Ang pagbuhat sa ingon nahimong usa ka dakong panalangin.

Akong nakat-onan nga kon ang Ginoo mogiya kanimo sa usa ka piho nga direksyon ug kamo maminaw ug motuman, ang mga panalangin nagpaabot. Si Presidente Russell M. Nelson nagtudlo: “Niining duha ka pulong—‘Paminaw Kaniya’—Ang Dios mihatag kanato og sundanan alang sa kalamposan, ug hingpit nga kalipay niini nga kinabuhi. Kita kinahanglan nga maminaw sa mga pulong sa Ginoo, mopatalinghog niini, ug mamati unsay Iyang gisulti kanato”

Usahay lagmit kita nga maninguha sa pagtambag sa Langitnong Amahan, nga maghunahuna, “Kahibalo ko sa labing maayo.” Hinoon, kita kinahanglan mobukas sa atong kasingkasing ug maminaw Kaniya, magpundok og panabot ug pagsabot. Kon kita moadto Kaniya ug ipakigbahin ngadto Kaniya ang atong mga panginahanglan ug mga tinguha sa atong mga kasingkasing, ug dayon maminaw pag-ayo, atong mahibaloan ang Iyang kabubut-on alang kanato.