Kamo Ba ang mga Mensahero?

Paghulagway pinaagi ni Bradley Clark

Usa ko sa upat lang ka misyonaryo nga nagsultig Kinatsila sa Misyon sa New England. Naningkamot kami nga makat-on sa pinulongan ug mopakigbahin sa ebanghelyo, apan kasagaran makasugat kami og pagsalikway.

Usa ka adlaw nanuktok kami sa pultahan nilang Hugo ug Niza Diaz, magtiayon sa Providence, Rhode Island. Pagkahuman midapit sila kanamo ngadto sa ilang apartment, nangutana ko kon unsa na sila kadugay nagpuyo didto.

“Bag-o lang kami mibalhin dinhi gikan sa New York,” miingon sila. “Ang Ginoo misulti kanamo sa pagbalhin ngadto sa Providence ug Siya mopadala kanamo og mga mensahero aron magtudlo kanamo sa kamatuoran. Kamo ba ang mga mensahero?”

Mitubag kami nga sigurado gayod, “Oo, kami ang mga mensahero.” Gitudloan namo si Hugo ug si Niza mahitungod sa ebanghelyo ni Jesukristo, ug sila daling midawat sa among mensahe ug sa wala madugay nabunyagan.

Wala madugay human sa ilang bunyag, si Hugo ug Niza mibisita sa ilang yutang natawhan sa Guayaquil, Ecuador. Sa dihang mibalik sila sa Providence, mipakigbahin sila og mga litrato sa ilang mga kaugalingon uban ni Presidente N. Eldon Tanner (1898-1982), kaniadto sa Unang Kapangulohan, ug sa iyang asawa nga si Sara, sa usa ka area nga komperensiya sa Ecuador. Sa didto pa, si Hugo ug Niza mipakigbahin sa ebanghelyo ngadto sa mga sakop sa pamilya. Napulog usa ang mipasakop sa Simbahan.

Ang akong kompanyon ug ako sa kadugayan nahibalo nga si Brother ug Sister Diaz parehong nagtrabaho alang sa minimum nga sweldo sa usa ka lokal nga pagamaan sa panapton ug nagpadala sa katunga sa ilang kinitaan ngadto sa Guayaquil aron sa pagtabang sa pagsuporta sa ilang mga pamilya. Sa dihang misugyot kami nga minusan na lang nga mokaon kami didto sa ilang balay aron kami dili mahimong palas-anon sa ilang pinansiyal, si Niza miingon, “Oy, dili, Elder Norman!”

Mipasabot siya nga sukad nga sila nabunyagan ug misugod sa pagbayad og ikapulo, sa unsang paagi ang ilang freezer ingon og nagpabilin nga puno sa manok ug isda, bisan og kanunay niyang gipakaon ang mga misyonaryo.

Sa Doktrina ug mga Pakigsaad 123:12 atong makat-onan, “Aduna pay daghan sa ibabaw sa yuta … kinsa natago gikan sa kamatuoran tungod kay sila wala masayud asa kini pangitaa.” Pinaagi sa misyonaryong paningkamot nilang Hugo ug Niza isip mga miyembro ug sa kaulahian isip mga misyonaryo sa stake, daghan ang nakahibalo sa kamatuoran sa ebanghelyo.

Kon kita, sama nilang Hugo ug Niza, makugihon nga magtinguha sa kamatuoran ug dayon madasigon nga mopakigbahin sa maayong balita sa ebanghelyo ni Jesukristo, atong makita ang daghang panalangin sa atong kinabuhi ug sa daghang mga kinabuhi nga atong natandog.