Na-release apan Mapuslanon Gihapon: Adunay Katuyoan nga Serbisyo sa bisan unsa nga Pangidaron

Karon nga siya wala nay pormal nga mga buluhaton sa Simbahan o sibiko, si Sister Beck nag-ingon nga siya aduna nay dugang panahon alang sa mga anak, mga higala, ug hilom nga pagserbisyo. “Sa kanunay ako mas mahisama ni Ammon kay ni Kapitan Moroni bisan sa unsang paagi,” miingon siya. “Tugoti ako sa pag-atiman sa mga karnero.” (Tan-awa sa Alma 17:25.) Uban sa libre nga oras sa sulod sa daghang katuigan nga wala siya nakabaton, natagamtam niya ang mga oportunidad nga makasalo sa pagpangaon ang mga apo, makaistorya ang daan nga mga higala, mag-ehersisyo sa gym, ug tagamtamon ang bakanteng oras nga anaa niya karon.

Si Sister Beck nagtan-aw usab sa ehemplo sa iyang amahan, si William Grant Bangerter. “Ang akong amahan miingon nga dili niya gusto nga mingawon og bisan unsang butang nga itanyag sa mortalidad,” miingon siya. “Kini naglakip sa pagkatigulang. Human siya nagserbisyo isip usa ka Kinatibuk-ang Awtoridad, usa ka presidente sa templo, usa ka tigselyo, ug sa ubang mga calling, gihangyo siya nga mahimong usa ka konsultant sa kasaysayan sa pamilya [family history] diha sa iyang ward.”

Siya mga 80 anyos niadtong panahona ug dili siya makamao kon unsaon sa paggamit sa kompyuter. “Siya kinahanglan nga makat-on,” mipasabot si Sister Beck. “Mitawag siya og usa ka deacon sa iyang ward aron sa pagtabang kaniya. Dayon ilang gitudloan ang ubang mga deacon kon unsaon sa pagsiksik sa kasaysayan sa pamilya. Ang mga deacon nagtudlo dayon sa tanan nga naghupot sa Aaronic nga Pagkapari diha sa ward. Sa kataposan, sila midala og kapin sa 10,000 ka mga ngalan ngadto sa templo.”

Si Sister Beck ug ang iyang bana, si Ramon, nakatutok sa unsay anaa sa ilang unahan, dili kon unsa ang ilang nang naagian. “Dili kaayo kita maghisgot sa unsay atong nabuhat. Kita dunay daghan kaayong buhatunon. Libre na ang oras karon. Kita kinahanglan modesisyon,“ miingon siya. “Kon dunay moingon nga gipapahawa na sila sa sibsibanan, kita moingon, ‘Ikaw kinahanglan modesisyon kon magpabilin ba kamo sa pagsibsib o moambak sa koral.’ Kadaghanan sa mga babag bisan unsa pa artipisyal ra. Ang pagserbisyo, panaghigalaay, pamilya, pagpangalagad—wala niini ang adunay bisan unsang mga utlanan.”

Kabataan ug mga Tuno

Si Sister Beck miingon nga ang usa sa labing maayo nga mga paagi nga magpabilin nga may kalabotan mao ang pagkonektar sa kabatan-onan diha sa inyong pamilya o ward. Kini mahimong maglakip sa pag-ila sa ilang paborito nga musika, ilang mga hilig, o sa ilang mga batasan. Ang kabatan-onan makabenepisyo gikan sa pagkonektar sa usa ka tawo kinsa maminaw, mopakigbahin og mga kasinatian, ug mohatag og dugay nga panglantaw.

Adunay nagkadaiya nga mga programa sa komunidad nga gipares ang mga tin-edyer ug mga retirado. Ang mga senior mahimo usab nga dili pormal nga mogahin og panahon nga makig-uban sa kabatan-onan bisan diha sa ilang kaugalingong dakong pamilya o sa ilang mga ward, nga makabenepisyo sa isig ka grupo.

“Adunay usa ka tigulang nga lalaki sa akong ward kinsa moabot sa akong mga dula sa high school basketball ug mga dula sa soccer,” miingon si Kimball Carter. “Siya gani usa ka puli nga magtutudlo sa seminary diha sa dapit. Ang mga bata ganahan niya tungod kay siya mangutana og daghang pangutana apan dili mohatag og daghang tambag. Gani maminaw siya sa atong musika ug nasayod og pipila sa labing bag-o nga mga artista. Siya dili usa ka lider sa kabatan-onan; usa lamang siya ka silingan. Gawas sa akong pamilya, sa akong hunahuna siya gyod ang akong pinakadako nga tigdayeg [fan].”

Nangita og mga Oportunidad sa Pagserbisyo

Si kanhi presidente sa misyon nga si Steven Fox mihatag og gibug-aton nga bisan unsa pa ang atong edad o kahimtang, adunay daghang oportunidad alang sa pagserbisyo—mapormal ug dili pormal, dako ug gamay, indibidwal ug sibika. Ang importanteng butang mao ang pagsunod sa sugo sa Ginoo “matinguhaon nga moapil diha sa usa ka maayo nga katuyoan, ug mobuhat og daghan nga mga butang sa atong kaugalingon nga gawasnon nga kabubut-on, ug magpahinabo sa daghan nga pagkamatarong” (Doktrina ug mga Pakigsaad 58:27).

Pagkahuman nga narelease isip usa ka presidente sa misyon, si Brother Fox miingon nga mibati sa emosyonal ug espirituhanong “nawala sa lugar.” Ang mopadayon gikan sa lisod nga calling ngadto sa wala gyoy buluhaton usa ka dakong kausaban.

Miingon siya, “Naa ra nako karon ang paghimo sa mga butang nga mahitabo sa akong kaugalingon kay sa magsalig sa inadlaw nga mga gipangayo gikan sa misyon sa pagpuno sa akong kalendaryo. Kini dili na mahitungod sa usa ka calling; kini mahitungod hinoon sa pagtan-aw sa palibot aron makakita og mga oportunidad sa pagserbisyo.”

F. Melvin Hammond, usa ka emeritus nga General Authority Seventy, nag-ingon nga ang tinuod nga pagpangalagad kanunay nga mahitungod sa pagpangita sa maong mga oportunidad. Sa edad nga 91, nagserbisyo siya sa templo, nagtudlo kausa sa usa ka bulan sa elders quorum, ug nagpabilin nga updated sa lokal ug nasyonal nga mga sports team aron siya makakaplag og komon nga dapit alang sa mga panag-istoryahanay uban sa batan-ong mga lalaki diha sa iyang ward.

Siya nakaila sa tanan niyang mga silingan ug kanunay nga mobisita kanila. Siya naningkamot sa pagsunod sa ehemplo sa Manluluwas, kinsa migahin og panahon uban sa mga tawo gikan sa tanang kahimtang sa kinabuhi. “Ganahan ko nga mobisita sa mga tawo bisan unsa pa ang ilang sitwasyon o giunongan nga ebanghelyo,” miingon si Elder Hammond. “Ang usa ka silingan usa ka naulian nga palahubog, laing silingan wala na nagsimba sulod sa mga katuigan, samtang ang lain adunay dementia ug ang iyang asawa mihangyo kanako nga motupad og lingkod sa iyang bana samtang siya magbuhat sa mga buluhaton. Parehas kami nga mahiligon sa kawboy nga mga salida, busa dungan kami sa pagpanan-aw.”

Human sa pagserbisyo sa templo usa ka gabii, si Elder Hammond mihapit sa usa ka fast food nga kan-anan. Misugod siya sa pagpakig-istorya sa usa ka trabahante kinsa nanglimpyo sa mga lamesa. Gipangutana ni Elder Hammond ang trabahante kon nganong nagsul-ob man siya og usa ka suit. “Gisultihan nako siya mahitungod sa templo,” miingon si Elder Hammond. “Kapin na sa 30 minutos ang among panag-estoryahay. Wala ko kahibalo kon magpakisayod ba siya og dugang mahitungod sa Simbahan, apan siya nasayod nga adunay tawo nga wala lang magtan-aw kaniya isip katabang sa kusina.”

Ang asawa ni Elder Hammond, si Bonnie, namatay duha ka tuig na ang milabay. Samtang gimingaw kaayo si Elder Hammond niya, midesisyon siya sa pagbuhat og butang nga maayo alang sa iyang mga silingan atol sa anibersaryo sa pagkamatay sa iyang asawa. Siya ug ang ubang mga sakop sa pamilya mihimo og mga kard alang sa iyang mga silingan sa pag-ila niini nga anibersaryo. Diha sa mga kard, gilakip niya ang usa ka hulagway sa usa ka cherry sa ibabaw sa usa ka lamian nga dessert nga adunay mga pulong nga “Siya sa kanunay mao ang cherry sa ibabaw.” Nanghatag siya og usa ka bag sa presko nga mga cherry uban sa matag kard. “Gusto nakong masayod ang akong mga silingan kon unsa ko siya kamahal ug nga naghinam-hinam ko nga mogahin og kahangtoran nga magkauban,” miingon si Elder Hammond.

Ang kinasingkasing nga pagserbisyo, pagdasig, ug pagbayaw sa uban wala magkinahanglan og pormal nga calling sa Simbahan. Kitang tanan gitawag ngadto niining matang sa Kristohanong pagserbisyo dili igsapayan sa atong edad o kahimtang.