Ila-ilaha ang Inyong Manluluwas

Nabatonan nato ang pribilihiyo ug oportunidad sa pagkat-on mahitungod ni Jesukristo pinaagi sa pagtuon sa mga kasulatan. Apan aron tinuod nga makaila Kaniya ug mahimong Iyang disipulo, ang pagbasa ug pagtuon dili igo. Kita mas makaila gayod sa Manluluwas pinaagi sa pagbuhat sa mga butang nga Iyang buhaton—ilabi na sa pagserbisyo sa uban sama sa Iyang pagserbisyo.

Human sa usa ka makatalagmanon nga linog sa Europe, mibisita ko sa mga kampo diin nagpuyo ang mga nawad-an og balay sa linog. Nahimamat nako ang daghang pamilya nga nagpuyo sa mga tolda. Wala sila makaila kon kinsa ako o nga ang Simbahan magdala og tabang. Apan samtang nahimamat nako sila, ang labing unang butang nga ilang gibuhat mao ang pagbutang sa usa ka makaon o mainom diha sa akong mga kamot uban sa mga pahiyom sa ilang mga nawong.

Kini nga mga tawo nawad-an sa tanan. Naa ko didto aron sa pagserbisyo kanila. Apan ang ilang mga kasingkasing andam sa pag-alagad. Kini nakahatag nako og kalipay ug nagpahinumdom nako nga usa sa labing maayo nga mga paagi nga makaila ni Jesukristo sa lawom ug tiunay nga paagi mao ang pagserbisyo Kaniya pinaagi sa pagserbisyo sa mga anak sa Dios.

Alang sa daghang tawo sa atong palibot, ang bugtong paagi nga sila makahibalo mahitungod sa Pagpahiuli ug sa tinuod nga Simbahan ni Jesukristo—ug usahay mahitungod ni Jesukristo Mismo—mao ang pinaagi kanato. Tungod niini nga rason, kita kinahanglan nga kanunay nga mahunahunaon sa kamahinungdanon sa pagkahimong usa ka maayo nga ehemplo.

Kita kinahanglang magpakabuhi sa ingon nga paagi nga kadtong naglibot kanato makaila sa Manluluwas. Kon kita magpakabuhi nga lahi sa unsay atong gituohan ug gitudlo, ang uban tingali dili motuo sa atong mga pulong o gani sa gahom sa Pag-ula sa Manluluwas. Hinuon, sila makaila ni Jesukristo tungod kay sila nakaila kaninyo ug makakita ug mobati sa Iyang kahayag diha sa inyong kinabuhi.

Kini ilabihang tinuod alang sa mga ginikanan. Sa dihang ang akong asawa ug ako nagpaabot sa among unang anak, gitawagan nako ang akong uyoan alang sa tambag. Siya mao ang nagpaila kanako ngadto sa Simbahan, ug ako nahigugma kaniya pag-ayo.

“Unsa man ang akong mahimo?” Nangutana ko. “Sa unsa nga paagi nga ako makatudlo sa akong mga anak sa pagtabang kanila nga motubo ug magmalig-on?”

Nakalitan ko sa unsay gisulti sa akong uyoan.

“Ayaw kabalaka mahitungod kanila,” miingon siya. “Kini mahitungod kanimo. Sila nag-uban kanimo ug makakita kanimo sa tanang higayon. Buhata ang imong labing maayo sa pagsunod sa mga sugo. Mahimong matinud-anon ug takos sa tanan nimong buhaton, ug sila mosunod sa imong ehemplo.”

Pipila ka tuig ang milabay, namalbas ko usa ka buntag sa dihang ang akong ikaduhang anak, nga mga upat ka tuig ang panuigon, misulod sa banyo uban sa usa ka stick ug gamayng sabon ug misugod sa pagsundog kanako. Sa dihang nakit-an nako siya, nakahinumdom ko sa unsay gisulti sa akong uyoan. Ang iyang tambag mibalik kanako sa usa ka tiunay nga paagi.

Daghan ang midawat sa ebanghelyo ni Jesukristo tungod kay nakakita sila og lahi nga butang diha sa mga miyembro sa Simbahan. Kita kinahanglan nga makasiguro nga ang ebanghelyo makita diha sa atong mga panagway. Dili kita kinahanglang mahimong hingpit, apan kita kinahanglang andam nga maningkamot nga mahimong mas mahisama ni Jesukristo sa tanan natong buhaton.

I See You [Ako Nakakita Kanimo], ni Greg Olsen, dili mahimong kopyahon

Mangita og Giya gikan sa Manluluwas

Si Elder Neal A. Maxwell (1926–2004) sa Korum sa Napulog Duha ka Apostoles kausa nakaobserbar, “Wala untay Pag-ula kon wala ang kinaiya ni Kristo!” Bisan sa labing lisod nga mga kahimtang sa Iyang kinabuhi, anaa sa kinaiya ni Jesukristo ang dili paghunahuna sa Iyang Kaugalingon. Kanunay Siyang naghunahuna sa uban.

Human nga nakahibalo nga gipatay si Juan Bautista, gidapit ni Jesus ang Iyang Apostoles nga mobiya uban Kaniya ngadto sa usa ka mingaw nga lugar aron mopahulay. Usa ka pundok nga labaw sa 5,000 ang misunod Kaniya. Gipadaplin ni Jesus ang Iyang gitinguha nga pagpahulay aron sa pagpang-ayo, pagtudlo, ug pagpakaon kanila—kanilang tanan (tan-awa sa Mateo 14:12–21).

Sa dihang nadiskobrehan niya ang Iyang mga disipulo nga nakigbisog sa ilang sakayan diha sa Dagat sa Galilea, si Jesus milakaw padulong ngadto kanila diha sa tubig ug miingon, “Ayaw kamo kahadlok. Ako kini” (tan-awa sa Mateo 14:22–27).

Sa wala madugay, samtang anaa sa kasakit diha sa krus, ang Manluluwas mitawag ni Apostol Juan sa pag-atiman sa Iyang inahan (tan-awa sa Juan 19:25–27). Human sa Iyang Paglansang sa Krus, Siya miadto sa kalibotan sa mga espiritu ug “gitugyan [sa matarong nga mga espiritu] ang paglakaw ngadto ug pagdala sa kahayag sa ebanghelyo ngadto kanila nga anaa diha sa kangitngit, bisan ngadto sa tanan nga mga espiritu sa mga tawo” (Doktrina ug mga Pakigsaad 138:30).

Sama sa giingon kaniadto ni Elder David A. Bednar sa Korum sa Napulog Duha ka Apostoles, isip mga tawo, natural nga kaugalingon ra ang hunahunaon nato atol sa atong mga hagit o kagul-anan, apan si Jesukristo mibuhat sa sukwahi gayod. Bisan sa Iyang labing lisod ug makaugtas nga mga higayon, Siya kanunayng mibukas sa Iyang Kaugalingon ngadto sa mga panginahanglan sa uban. Gibuhat gihapon Niya kini karon. Siya mituman sa Pag-ula alang kanato ug miabli sa pultahan aron kita makaduol pag-usab ngadto sa Amahan. Kita mahimong mangita og giya gikan Kaniya sa matag higayon, ug Siya anaa kanunay aron sa pagtabang kanato.

Nagpuyo kita sa usa ka napukan nga kalibotan. Ang maayong balita mao nga kini wala mahitabo sa sayop nga paagi. Kining napukan nga kalibotan adunay katuyoan, ug kini mahimayaon (tan-awa sa Moises 1:39). Bisan tuod kita nagpuyo sa malisod nga mga panahon uban sa daghan nga kadaotan sa kalibotan, adunay usa ka solusyon tungod ni Jesukristo. Siya ang rason sa tanang paglaom.

Ang matag templo sa kalibotan nagpamatuod sa atong paglaom sa Manluluwas. Sa usa ka paagi, sa matag higayon nga ang propeta mopahibalo og bag-ong templo kini usa ka pamahayag sa katinuod ni Jesukristo ug sa Iyang matubsanong gahom. Ang bugtong rason nganong kita adunay mga templo mao kay tungod Kaniya ug sa Iyang maulaon nga sakripisyo. Ug sa matag higayon nga kita mosimba diha sa balay sa Ginoo ug mohimo og mga pakigsaad uban sa Dios alang sa atong kaugalingon ug alang niadtong anaa sa pikas nga habig sa tabil, atong gimantala ang atong hugot nga pagtuo diha sa nabanhaw nga Kristo.

Si Jesukristo buhi. Siya naglakaw uban kanato niini nga mortal nga panaw. Siya puno sa grasya. Siya nahigugma gayod og maayo kanato nga Siya mianhi sa kalibotan aron sa pagbuhat sa unsay imposible alang kanato nga buhaton sa atong kaugalingon. Siya mao ang atong higala. “Ang labing dakong gugma nga ikahatag sa usa ka tawo ngadto sa iyang mga higala,” Siya miingon, “mao ang paghatag sa kaugalingon niyang kinabuhi alang kanila” (Juan 15:13).

Kini usa ka pribilihiyo alang kanako sa pagpamatuod ni Jesukristo. Sa tibuok nakong kasingkasing, gusto ko nga mahimong Iyang higala. Siya nangulo sa Iyang Simbahan pinaagi sa mga propeta ug apostoles. Siya naghunahuna sa matag usa kanato. Siya nakaila kanato pinaagi sa ngalan ug nasayod sa atong mga panginahanglan, sa atong mga pakigbisog, ug sa mga tinguha sa atong mga kasingkasing. Pinaagi Kaniya kita makapadayon sa paglaom. Samtang kita moserbisyo sa uban, maningkamot nga mahimong ehemplo, mangita og giya gikan kang Jesukristo, ug maghupot sa “usa ka hingpit nga kahayag sa paglaom” (2 Nephi 31:20), kita makaila Kaniya ug makadiskobre nga Siya kanunay uban kanato aron pun-on ang atong mga kinabuhi sa kalinaw ug kalipay.