Ang mga Pakigsaad ngadto sa Dios Makapalingkawas, Dili Makalimita

Dili kita magpalimbong ni Satanas niining bahina. Ang istorya ni Korihor, sa Alma 30 diha sa Basahon ni Mormon, makahatag og pagtulun-an.

Si Korihor, ang anti-Kristo, mibiaybiay sa katawhan tungod sa pagtuo sa mga tradisyon sa ilang mga amahan ug mga inahan. Siya miingon nga sila “gihigtan ubos sa usa ka binuang ug kawang nga paglaom,” nag-ingon, “Nganong kamo nagyugo sa inyong kaugalingon sa ingon niana nga binuang nga mga butang?” (bersikulo 13).

Siya misangyaw nga walay panginahanglan alang sa usa ka Manluluwas tungod kay kita mouswag sumala sa atong kaugalingong kahawod sa salabotan ug makabuntog sumala sa atong kaugalingong kusog. Siya mitawag sa mga magtutuo nga nabuang ug nagsalimoang. Siya mitudlo nga kamo kinahanglan gayod nga makakita aron masayod. Iyang gisangyaw nga ang kamatayon mao ang kataposan—busa buhata ang bisan unsa nga makapabati kaninyo nga maayo. (Tan-awa ang mga bersikulo 13–28.)

Mahitungod sa mga ordinansa sa pagkapari, siya miingon, “Ako wala magtudlo niini nga katawhan sa paggapos sa ilang mga kaugalingon ubos sa binuang nga mga ordinansa … nga gipahimutang sa karaang mga pari, aron sa pagpahimulos sa gahom ug awtoridad diha kanila, aron magpabilin sila sa pagka-ignorante, aron dili sila magpasigarbo, apan magpaubos” (bersikulo 23).

Nakakita ba kita og susama nga mga pagtulun-an sa atong panahon karon?

• Kita ba sa samang paagi gibugalbugalan ug gitawag nga buang-buang tungod sa pagtuo sa Manluluwas?

• Gisultihan ba kita nga ang atong mga hunahuna nabuang sa pagtuo sa usa ka butang nga wala nato makita?

• Nakadungog ba kita nga ang pagbugkos ngadto sa Dios pinaagi sa mga ordinansa ug mga pakigsaad mapig-oton?

Litrato © Steve Callahan | Dreamstime.com

Ang Usa ka Relasyon sa Pakigsaad Makapalingkawas

Ang susama nga mga taktika nga gigamit ni Korihor aron sa pagpahisalaag sa daghang kababayen-an ug kalalakin-an gigamit batok kanato karon. Sama ni Korihor, ang kalibotan nagsulti kanato nga ang pagkabugkos o pagkayugo ngadto sa Manluluwas nagpasabot nga kita “gigapos” o “gihigot,” dili makahimo sa paglihok o pag-uswag. Kita kinahanglan nga makakaplag alang sa atong mga kaugalingon nga ang usa ka relasyon sa pakigsaad uban sa Dios Makapalingkawas, dili makalimita! “Wala nay lain nga ngalan diin kamo mahimong gawasnon,” gitudlo ni Hari Benjamin. “Mao nga, manghinaot ko nga kamo modala diha kaninyo sa ngalan ni Kristo,” (Mosiah 5:8).

Ang mga tighupot sa pakigsaad gipanalanginan pinaagi sa gahom sa Dios. Ang pagtuman sa atong mga pakigsaad makapalingkawas, makahatag og gahom, ug makadala kanato og kalinaw. Si Presidente Russell M. Nelson mitudlo: “ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan. Kadtong kinsa nagsunod sa mas taas nga mga balaod ni Jesukristo adunay agianan ngadto sa Iyang mas dako nga gahom. Sa ingon, ang [mga] tigtuman sa pakigsaad adunay katungod sa espesyal nga matang sa kapahulayan nga moabot ngadto nila sa ilang tibuok relasyon sa pakigsaad uban sa Dios.”

Nasayod ako nga tinuod kana.

Pinaagi sa pagpili nga mabugkos ngadto sa akong Manluluwas pinaagi sa mga pakigsaad nga akong gihimo uban sa Dios, “May kalig-on ako sa pagsagubang sa tanan tungod sa gahom nga gihatag kanako ni Kristo.” (Mga Taga-Filipos 4:13). Ang akong mga paningkamot sa pagtuman sa akong mga pakigsaad—bisan og dili hingpit—gigantihan og dugang nga kapasidad sa pagbuhat sa unsay gihangyo kanako. Napanalanginan ko og mas dakong kapasidad sa pagserbisyo. Napanalanginan ko sa inspirasyon nga akong gikinahanglan aron mahimo ang buhat sa Ginoo diha sa mga paagi nga Iyang ipabuhat kanako. Uban sa hugot nga pagtuo diha sa Ginoo, napanalanginan ko sa pag-atubang sa akong mga hagit uban ang pagkamalaomon. Ang gahom kini sa Dios nga makapagaan sa akong mga hagit—bisan og ang mga hagit lisod kaayo!

Apan kinahanglan natong gamiton ang atong kabubut-on aron magamit kini nga gahom. Sama sa gitudlo sa akong magtatambag nga si Sister Anette Dennis, “Kon atong gamiton ang atong kabubut-on sa pagpili sa pagsulod ngadto sa usa ka pakigsaad nga relasyon uban [sa Dios], kita nagsaksi ngadto Kaniya nga kita gusto nga Siya moapil gayod diha sa atong mga kinabuhi ug nga kita andam sa pagbayad sa bili aron madawat ang nagtubo nga gahom ug mga pribilihiyo nga moabot uban niana nga pakigsaad nga relasyon.”

Kita makadawat niana nga gahom samtang kita maglakaw subay sa dalan sa pakigsaad balik ngadto sa atong langitnong panimalay. Mosulod kita sa dalan sa pakigsaad sa diha nga kita gibunyagan ug gikompirmahan. Mas hingpit kitang mosulod niini diha sa balay sa Ginoo. Isip Kinatibuk-ang Kapangulohan sa Relief Society, nagtinguha kami nga ang tanan natong mga sister makagamit sa makapalingkawas nga mga panalangin sa usa ka relasyon sa pakigsaad uban sa Dios, lakip sa gahom sa Dios nga anaa niadtong mohimo ug motuman sa mga pakigsaad ug mosimba diha sa balay sa Ginoo.

Si Presidente Nelson mitudlo: “Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom.”

Ang panalangin sa pagdawat sa gahom sa Dios nagdepende sa atong paghimo og mga pakigsaad uban sa Dios pinaagi sa pag-apil sa mga ordinansa sa pagkapari, nga nagyugo kanato ngadto Kaniya.

Isip usa ka kapangulohan, kami nagtinguha sa pagtabang sa matag sister nga magtinguha ug magpalambo og relasyon sa pakigsaad ngadto sa Langitnong Amahan ug ni Jesukristo. Kami nagtinguha nga makita ang atong mga sister nga gitugahan diha sa balay sa Ginoo, nag-abli sa pultahan ngadto sa espirituhanong mga pribilihiyo ug kahimayaan, nabugkos ngadto sa Manluluwas ug gihatagan og gahom pinaagi sa mga ordinansa ug mga pakigsaad. Kami mosaad nga kon kamo mohimo ug motuman sa mga pakigsaad, kamo mapanalanginan pinaagi sa makapalingkawas nga gahom nga anaa sa mga tigtuman sa pakigsaad.