Ngano Gud nga Dili Man Ko Mahimong Magmalipayon?

Ni Bradford G. Smith, Arizona, USA

Ako adunay makamatay nga sakit nga hinungdan sa akong pagkaparalisado, apan salamat sa teknolohiya nga nagtugot kanako nga maka-type gamit sa akong mga mata, mopadayon ko sa pagpakigbahin sa akong pagpamatuod sa plano sa kalipay sa Dios hangtod nga Siya motawag kanako pauli sa panimalay.

babaye uban sa iyang bana, usa ka paralisado

Ako adunay makamatay nga sakit nga 100 porsyento ang tsansa sa pagkamatay. Nganong wala man ako masuko sa Dios? Tungod kay Siya namatud-an nga matinud-anon diha sa malisod nga mga panahon, ug ako nakakat-on sa pagsalig Kaniya.

Wala madugay human sa natawo ang kinamagulangan namong anak, siya gidayagnos nga adunay depekto nga gitawag og sakit nga Hirschsprung Migahin siya og panahon diha sa neonatal intensive care unit, nanginahanglan og pag-atiman diha sa balay, ug gioperahan. Makahadlok kadto nga panahon.

Sa samang mga higayon, ang akong pangandoy nga trabaho nahimong usa ka mangil-ad nga damgo. Ang tanan sa akong palibot nahugno, nga natapos sa akong magtutudlo ug ako nga nangawad-an sa among trabaho. Mopauli ko human sa taas nga adlaw sa trabaho ug mohigda sa salog, nagbakho.

Ang akong anak nga babaye usab adunay sakit nga Hirschsprung. Dugang pa niana, siya nag-antos sa usa ka depekto sa kasingkasing ug adunay Down syndrome. Siya migahin sa iyang unang pipila ka semana dinhi sa yuta didto sa ospital. Human sa tulo ka dagkong operasyon, matam-is kaayo iyang pahiyom. Sa sinugdanan, ang iyang pagdayagnos daw sama sa trahedya ang pamati, apan karon mas sama kini sa usa ka panalangin. Bisan pa sa malisod nga mga panahon, siya nagtudlo sa among pamilya sa gugma ug pailob. Nagdala siya og kalipay ngadto sa yano nga mga gutlo, walay hunong sa pagsorprisa kanamo, ug nakalipay sa mga tawo bisan asa siya moadto.

Latas niining tanan, naghunahuna ko ni Propeta Joseph Smith nga nabilanggo diha sa gahong sa Liberty Jail. Ang Manluluwas mihupay kaniya uban sa mas dakong panglantaw: “Ikaw masayod, akong anak, nga kining tanan nga mga butang makahatag kanimo og kasinatian, ug alang sa imong kaayohan. Ang Anak sa Tawo mikunsad ubos kanilang tanan (Doktrina ug mga Pakigsaad 122:7–8).

Usa ka litrato nga gikuha sa wala pa ako nadayagnos nga adunay ALS. Samtang naghunahuna ko kabahin sa akong mga hagit, naningkamot ko sa paghinumdom kon unsa ako ka bulahan sa akong kinabuhi. Ang akong talagsaong asawa mahimong akong pares alang sa kahangtoran kon kami motuman sa among mga pakigsaad, ug ako makabaton og dakong kalipay sa akong kaliwatan.

Litrato pinaagi ni Lisa Harbertson

Usa ka Panglantaw sa Ebanghelyo

Latas sa akong mga pagsulay, ang akong pagpamatuod ni Jesukristo nakahatag kanako og usa ka pagbati sa panglantaw. Ako nakaamgo nga daghang mga anak nga lalaki ug mga anak nga babaye ang mikanaog og ubos pa kaayo kanako. Busa, nakat-on ko nga ako mahimong mapasalamaton sa akong mga pagsulay. Nasayod na karon kon unsa ka dako ang akong nakat-onan gikan sa kauyamot nga akong gilahutay, sa bisan unsang paagi kadtong mga hagit daw dili sama kalisod nga bation niadtong taknaa.

Sa ulahing bahin sa 2018, nadayagnos ko nga adunay amyotrophic lateral sclerosis, nga mas nailhan nga ALS o sakit nga Lou Gehrig—nga talagsa ra, makamatay, nga sakit sa utok. Patyon sa ALS ang mga neuron sa motor nga nagkonektar sa akong utok ngadto sa akong mga kaunoran. Ang akong hunahuna nagdagan gihapon sa normal nga kapaspason, ug makasabot sa tanan nga gisulti sa mga tawo ngari nako, apan dili na nako makontrol ang mga kaunoran gawas sa akong mga mata. Ang pagpakig-istorya lisod ug hinay para nako, karon nga kinahanglan gayod nakong gamiton ang akong mga mata sa pag-type diha sa usa ka device kon unsa ang gusto nakong isulti.

Ang ALS nagparalisa kanako, nagdepende sa usa ka makina sa pagpaginhawa ug sa akong asawa, si Tiffany, alang sa tanang butang. Ang akong sakit lagmit mohunos sa akong kinabuhi sa dili pa nako makita ang akong mga anak nga managko. Akong gimantala ang usa ka libro sa akong mga leksiyon ug mga pakigpulong alang kanila ug sa uban pa aron mabasa human nga mawala na ko.

Samtang naghunahuna ko kabahin sa akong mga hagit, hinoon, naningkamot ko sa paghinumdom kon unsa ko pagkabulahan sa akong kinabuhi. Nabiyahe nako ang kalibotan, nakat-on mahitungod sa nagkadaiyang mga kultura, nakigsulti uban sa usa ka presidente sa Estados Unidos, nakigpangaon uban sa pangunang ministro sa Syria, ug mitindog sa ibabaw sa mga bukid nga natabunan sa niyebe nahingangha sa katahom niini.

Labaw sa tanan, mikatawa ko—og kusog ug dugay—uban sa akong mga ginikanan, mga igsoon, pamilya, ug mga higala. Nakabarog ko sa balaan nga mga dapit, nakat-on gikan sa mga pagtulon-an sa buhing mga propeta, ug nag-alagad sa templo. Akong gidapit ang uban nga moduol ngadto ni Kristo ug makakaplag og kalipay. Ang akong talagsaong asawa mahimong akong pares alang sa kahangtoran kon kami motuman sa among mga pakigsaad, ug ako makabaton og dakong kalipay sa akong kaliwatan.

Uban niini nga panglantaw sa pagpasalamat, Ngano Gud nga Dili Man Ko Mahimong Magmalipayon? Ang ALS dili makalingaw, ug klaro nga kini ang ubos nga punto sa akong kinabuhi. Apan dili kini igo ang kaubos aron alkontrahon ang akong kamalipayon.

Unsa ang Akong Nakat-onan

Ako nakita ang ALS isip usa ka calling, ug akong gipaningkamotan nga mapalambo kini. Sa pagkatinuod, ako naglaom sa pagtan-aw og balik bahin niining sakit ug mokatawa—mapasalamaton tungod sa unsay natabang niining hagit sa akong gisangpotan. Ug kon ingon niana akong pagtan-aw sa mga butang sa kadugayan, nganong dili man tan-awon kini sa ingon niana karon?

Dili ko ganahan nga mohatag og impresyon nga kining hagit sayon. Taas nga panahon ang akong gigahin aron akong makontrolar ang akong mga emosyon ug mga kahadlok. Nakakat-on ko og daghan samtang ang akong pisikal nga lawas nagkakupas.

Akong nakat-onan kabahin sa paagi nga ang Dios usahay mohatag kanato og mga panalangin. Sa sinugdanan, kita gitawag sa pagbuhat og usa ka butang nga daw lisod—o gani imposible! Dayon ang Ginoo nagtudlo kanato ug nagbayaw kanato pinaagi sa Iyang grasya, o sa “makaabag nga gahom” nga nahimong posible pinaagi sa Iyang Pag-ula. Human lamang kita makaabot sa pikas nga bahin sa buluhaton atong makita ang Iyang impluwensiya ug ang iyang mga panalangin sa atong mga kinabuhi. Sama sa gitudlo ni Presidente Thomas S. Monson (1927–2018): “Ayaw pag-ampo alang sa mga buluhaton nga katumbas sa inyong mga abilidad, apan pag-ampo alang sa mga abilidad nga katumbas sa inyong mga buluhaton. Nan ang paghimo sa inyong tahas dili na milagro, apan kamo na ang milagro.”

Kana nga sundanan balik-balik nga nahitabo ngari kanako. Busa, ako adunay hugot nga pagtuo nga ang ALS mosangpot gihapon sa samang paagi para nako.

inahan ug mga anak — Ang akong sakit lagmit mohunos sa akong kinabuhi sa dili pa nako makita ang akong mga anak nga managko. Akong gimantala ang usa ka libro sa akong mga leksiyon ug mga pakigpulong alang kanila ug sa uban pa aron mabasa human nga mawala na ko. Hangtod ang kataposan moabot alang kanako, ako maningkamot sa pagpalambo sa akong calling ug mahimong mas sama ni Jesus.

Kon ang ebanghelyo tinuod, si Presidente Gordon B. Hinckley (1910–2008) kausa mipakigbahin, “nan wala nay laing pang importante?” Nagkat-on kog daghan mahitungod sa unsa gayod ang importante. Sa akong mga pagsulay, akong nakat-onan nga ang Dios sa uniberso nahigugma kanako. Sa paghunahuna og balik, akong makita ang Iyang impluwensiya sa akong kinabuhi. Ang matag pagsulay nga akong giatubang nag-andam kanako alang sa sunod. Wala sa akong plano ang ALS, apan akong nakat-onan nga “ang Iyang mga pamaagi dili ang akong mga pamaagi.”

Ang Dios naghigugma kanato bisan asa kita karon, apan gusto pa gyod Niya og mas daghan pa gikan kanato. Kita layo pa kaayo sa kataposan. Taas pa kaayo ang atong latason, apan kita kinahanglan nga “sa ginagmay nga paagi mahimong mas maayo sa matag adlaw.” Tungod kay ang Dios nahigugma kanato, Siya naghangyo kanato sa pag-ako og responsibilidad, mahimong mas maayo, ug mosunod Kaniya.

Sa dihang gipangutana wala siya makahibalo unsaon sa pagtubag, ang propeta sa Basahon ni Mormon nga si Nephi misalig sa unsay iyaha nang nahibaloan: “Nahibalo ako nga siya nahigugma sa iyang mga anak; bisan pa niana, ako wala mahibalo sa kahulogan sa tanan nga mga butang’ (1 Nephi 11:17).

Nagtuo ko nga bisan unsa pa kalisod, dili makataronganon, dili makiangayon, o kasakit niining kinabuhia, kitang tanan magmalipayon kaayo sa kataposang pagbalanse. Ang atong mga pagpili mopatigbabaw sa atong mga kahimtang.

“Ang tanan mamaayo ra sa kataposan, ug kon kini dili maayo, dili pa kini ang kataposan,” miingon ang usa ka popular nga panultihon. Ang Ginoo Mismo nag-ingon:

“Dili kamo makakita pinaagi sa inyong kinaiyanhon nga mga mata, sa pagkakaron, sa plano sa inyong Dios mahitungod niadto nga mga butang nga moabot sa umaabot, ug sa himaya nga mosunod human sa daghan nga kalisdanan.

“Kay human sa daghan nga kalisdanan moabot ang mga panalangin. Mao nga moabot ang adlaw nga kamo pagakoronahan og daghan nga himaya” (Doktrina ug mga Pakigsaad 58:3-4).

Ako wala masayod sa kahulogan sa tanan nga mga butang. Apan kahibalo ko nga gihigugma ako sa Dios. Nahigugma usab Siya kaninyo. Ang Iyang hingpit nga gugma mosalikway sa akong mga kahadlok (tan-awa sa Moroni 8:16). Hangtod ang kataposan moabot alang kanako, ako maningkamot sa pagpalambo sa akong calling ug mahimong mas sama ni Jesus.

Salamat sa teknolohiya nga nagtugot kanako nga maka-type gamit sa akong mga mata, mopadayon ko sa pagpakigbahin sa akong pagpamatuod sa plano sa kalipay sa Dios hangtod nga Siya motawag kanako pauli sa panimalay.