Auaunaga Faaleagafesootai

Faapei foi o le tele o nuu lolotu, ua i ai i tagata o le Ekalesia se talafaasolopito umī o le fesoasoani i e matitiva ma le tali atu ia i latou e manaomia. I le vaitau o uluai tausaga o le Ekalesia, e tele sosaiete Amerika na aofia ai i le galuega alofa a tamaitai, ma se tele ina taitaia e tamaitai taumafaiga faaleuelefea i tulaga faalelotu ma tagata lautele. I lona faavaeina i le 1842 ma i le taimi o le toefaaolaolaina i le 1860, sa tilotilo le Aualofa e mulimuli i le faatulagaga faaKerisiano e tausia ai e matitiva e ala i le aoina o foai ma faasino atu punaoa faalenuu i le talanoaina o manaoga faaletino. Sa aoao atu e tamaitai o le Au Paia o Aso e Gata Ai ia vasega e uiga i le tausiga o e mama’i ma e uiga i le tino o le tagata soifua, faapea foi le aoina ma teu fatu, faatuina le Falema’i o le Tesareta, aoao faamasani ia tausisoifua ma le au faatosaga, ma faamaopoopo taumafaiga faatasi ma epikopo mo toomaga.

I le amataga o le seneturi 20, sa amata e le Aualofa ona faaaofia ia faiga fou faataitai e tausia ai tagata e manaomia le fesoasoani, sa tele ina ta’ua o le “alofa mama faasaienitisi” i lena taimi, e ala i le fauina o polokalama o le lagolago faaagafesootai, faalauiloaina o le faaaofia ai o nuu, ma galulue faatasi ai ma ofisa lautele. O le tulai mai foi o galuega ma le vaega o galuega faaleagafesootai, na maua ai e le tupulaga faia’e o tamaitai o le Au Paia o Aso e Gata Ai ni avanoa e auai i le mau o le alualu i luma faaleagafesootai i lena taimi, ma fefaasoaai le malamalama faatupulaia o taumafa maloloina ma le tausiga o aiga. Sa lolomi ma faasalalauina e faatonu o le Mekasini a le Aualofa ni tusiga sa fetaui ma na manaoga, ma sa atina’e ai ni mataupu aoaoina fou a le Aualofa e faatatau i nei mataupu. Sa faapotopoto e taitai o le Ekalesia se Komiti Faufautua Faaleagafesootai i le 1916, e talanoaina atugaluga i faalavelave faaleagafesootai, e aofia ai le soifua manuia lautele ma mataupu tausaafia. Sa vaavaai le komiti e aoao tagata faigaluega faaleagafesootai e avea o se vaega o taumafaiga toefaaolaola a nuu e lagolagoina e le Ekalesia. O Amy Brown Lyman, o le peresitene aoao o le Aualofa ma o se tagata faigaluega faaleagafesootai ua aoaoina faapolofesa, sa fesoasoani e atia’e ma faalautele ia polokalama e o faatasi ai.

I le taimi o le Taua Muamua a le Lalolagi, sa saofagā ai le aufaigaluega faaleagafesootai ma sui o le Aualofa i le taumafaiga taulamua mai o latou aiga mo le taua, fesoasoani i le gaosiga o meaai ma poloketi a le Koluse Mumu, e aofai ai le faia o fusimanu’a, totigilima ma totigivae. Sa latou tinoū e faaleleia le aofai o tina ma pepemeamea e feoti i le taimi e fananau ai, auai faatasi i faalauiloaga e faaleleia le tausiga o le soifua maloloina o tamaiti i le Iunaite Setete, ma faamaopoopo le galuega alofa i le Ekalesia ma faatasi ai ma paaga i fafo atu. A o le’i leva ae maliu o ia, sa tuu atu e le Peresitene o le Ekalesia o Iosefa F. Samita ia Amy Brown Lyman se galuega o le amataina lea o se matagaluega o auaunaga faaleagafesootai i le Aualofa, lea sa ia ausia i le 1919. I le faaiuga o le 1920, sa amata ai e le Matagaluega o le Auaunaga Faaleagafesootai ona vaavaaia le faatinoga o vaetamaga, o se faamaufaailoga o le galuega a le faalapotopotoga seia aulia le 2014.

A o lumanai ai le Pau Tele o le Tamaoaiga i le 1930, sa faafoeina e le Matagaluega o le Auaunaga Faaleagafesootai mataupu tau uelefea a tagata o le Ekalesia i Iuta na lē manuia faaletamaoaiga. Sa faaauau pea lea faatulagaga o le galuega faaleagafesootai seia oo ina faatotogaina le aufaigaluega faaleagafesootai e le malo lautelei le tumutumuga o le Pa’ū. O le taimi lea o le le mautonu o le tamaoaiga, sa faavae ai e le Ekalesia se fuafuaga saogalemu lea na i’u ina avea ma Matagaluega tumau o le Uelefea. Sa faateleina foi le Matagaluega o le Auaunaga Faaleagafesootai ana taumafaiga e tausia ai tamaiti, ma i le 1937, sa toefaatulaga ai e le Aualofa le matagaluega e avea ma Matagaluega o le Auaunaga Faaleagafesootai ma le Uelefea o Fanau. O faagaoioiga o le auaunaga faaleagafesootai i le salafa o le Ekalesia, na faalautele atu i Los Angeles, Kalefonia, ma Ogden, Iuta i le 1930 ma le 1940. O le Auaunaga Faaleagafesootai ma le Matagaluega mo le Uelefea o Fanau sa faaauau pea ona faafaigaluegaina tagata polofesa faaleagafesootai, ma faaopoopo i ai punaoa, ma avea o se ofisa mo galuega mo tamaitai. Ona o lenei matagaluega sa laiseneina ia tuu atu ai auaunaga mo le uelefea o fanau, o le 1954 na faaliliu ai e taitai o le Ekalesia le Polokalama Faatulagaina mo Tamaitai Aoga Initia, ma polokalama e tali ai ma faaaumea mo tamaiti aoga o Tagatanuu Amerika, i lona vaaiga ua i ai.

I le fiasefulu tausaga mulimuli ane o le seneturi 20, sa galulue ai taitai o le Ekalesia e tuufaatasia ma faamaopoopo faalapotopotoga ma polokalama e avea o se vaega o se taumafaiga faamaopoopo i le Ekalesia atoa. O le taimi lea, sa vaavaaia ai e le Au Epikopo Pulefaamalumalu le galuega o auaunaga faaleagafesootai. E ala i le tele o suiga o igoa i le va o le 1969 ma le 2019, sa lagolagoina pea e le aunoa e le faalapotopotoga o auaunaga faaleagafesootai a le Ekalesia ia tina ma’itaga e le’i faaipoipo, ma le vaetamaina o fanau e aunoa ma se manatu i le faaaofia ai o le ekalesia ma sa faagaoioia o se tasi o ofisa sui tuma’oti mo vaetamaga i le Iunaite Setete. Sa maua e le Au Paia o Aso e Gata Ai ma isi le lagolago faaopoopo e ala i le faasinoga mai epikopo, aemaise ai mo fautuaga faapolofesa, polokalama o le toefaaleleia mai vaisu, vasega mo tulaga faamātua, le aapa atu faatulagaina i tagata i falepuipui. E oo mai i le 2000, sa faatumauina e le faalapotopotoga ni ofisa se 6 i Kanata, Peretania Tele, Ausetalia, ma Niu Sila, faapea foi ofisa e 57 i le Iunaite Setete. E ui ina sa faamutaina le faagaoioia o se ofisa o le vaetamaga i le 2014, e oo mai i le 2023 o faaauau e le Tautua mo Aiga ona lagolago ia le vaetamaina e ala i le taialaina o matua o faaolioli e vaetama ni fanau e ala i le faagasologa.

Autu Fesootai: Polokalama Uelefea, Aualofa, Amy Brown Lyman, Pau Tele o le Tamaoaiga, Tamaitai Paionia ma Vailaau