Sauniga Faavae o le Ekalesia a Keriso

I le Aso Lua, 6 Aperila, 1830, sa taloina ai e Iosefa Samita, Oliva Kaotui, ma isi e faatulaga le Ekalesia a Keriso. Sa latou faamoemoeina lenei sauniga talu mai le taumafanafana o le 1829, ina ua faatonuina e faaaliga ia Iosefa ma Oliva e faavae se ekalesia i le taimi lava e mafai ai ona lolomiina le Tusi a Mamona ma mafai ona faapotopotoina tagata talitonu. E lei umi ona valaauina faatasi “i latou o e ua uma ona papatisoina” ma isi “o e sa talitonu,” sa maua e Iosefa ma Oliva se poloaiga mai le Alii e faatulaga le Ekalesia i le aso 6 o Aperila e tusa ai ma tulafono o le laueleele. E leai ni minute o le fonotaga na faasaoina mai, ae na ta’u mai e ni nai punavai nisi o mea na tutupu. Sa amataina le sauniga i le tatalo, ona lagolagoina lea e le faapotopotoga ia Iosefa ma Oliva o ni toeaina ma ni aoao i le Ekalesia. Ona faauuina lea e Iosefa ma Oliva o le tasi ma le isi o ni toeaina o le Ekalesia, o tagata auai i le sauniga na aai ma feinu i le faamanatuga o le Tausamaaga a le Alii, ma sa faaee atu e Iosefa ma Oliva lima i luga o ulu o i latou o e na papatisoina muamua e tuuina atu ia i latou le meaalofa o le Agaga Paia ma faamauina i latou o ni tagata o le Ekalesia. Na maua foi e Iosefa le faaaliga o loo maua nei i le Mataupu Faavae ma Feagaiga 21 i lenei fonotaga pe e le’i leva mulimuli ane.

I le va o Aperila 6 ma le aso 9 o Iuni, ina ua faia le uluai konafesi a le Ekalesia, sa faatulagaina ai e Iosefa ma Oliva ia paranesi i Feiete, Manaseta, ma Kolasavile, Niu Ioka. O tala na faasaoina mai a i latou na i ai e feteenai le tasi ma le isi i le nofoaga o le fonotaga faavae, o nisi na lipotia mai o feiete ae o isi o Manaseta. Mo se faataitaiga, o se talafaasolopito o le Ekalesia na faia e Iosefa Samita i le 1839 na ta’ua ai Feiete. O se tusiga na ia tusia i le 1842 i le talafaasolopito o le Ekalesia na ta’ua ai Manaseta. E ui o loo i ai ni faafesili e faatatau i le nofoaga fitoitonu i Niu Ioka i sisifo na faia ai le fonotaga, ae ua manino lava na faataunuuina e Iosefa ma Oliva le poloaiga a le Alii e faatulaga le Ekalesia i le aso 6 o Aperila, 1830.

Autu Fesootai: Palamaira ma Manaseta