Russell M. Nelson

O Peresitene Russell M. Nelson na avea ma Peresitene lona 17 o le Ekalesia talu mai Ianuari 2018. Sa soifua mai o ia i le 1924 i le Aai o Sate Leki o le lona lua o le fanau e toafa a Edna ma Marion Nelson. A o talavou Russell, sa lei auai ona matua i le ekalesia ae sa lagolagoina o ia e auai i le Aoga Sa ma isi gaoioiga e fesootai ma le Ekalesia. Sa papatisoina o ia i le 1940 i le 16 o ona tausaga. Talu mai lona laitiiti, sa matuai ona fiailoa lava, lea na tata’i ai o ia agai i saienisi ma le suesueina o le tino o le tagata soifua. Ona o lona naunauga loloto e auauna atu i isi, sa tonu ai ia te ia e faaui mea sa ia fiafia i ai agai i polokalama o vailaau ma le tausiga o le soifua maloloina.

A o aoga i le Iunivesite o Iuta, sa tauave e Russell se mau kosi faigata tele—ma mae’a ai suesuega e tatau ona valu tausaga e fai ai, i le ono—ae na maua lava le taimi mo le faatinoina o tomai faatufugaga. Sa auai o ia i tala a le a’oga, o le ala lea na la feiloai ai ma lona faletua i le lumanai o Dantzel White. Sa faaipoipo i la’ua i le 1945, ma avea ai ma matua o le fanau e toasefulu, e aofia ai afafine e toaiva ma le atalii e toatasi, o le la ui’i lena. O le olaga faaleaiga sa aupito sili ona taua i le au Nelson. Sa tumau le avea o Russell o se tamā e ese le mataalia e ui i ana matafaioi lauiloa faapolofesa.

I le 1944, sa amata ai e Russell M. Nelson lana malaga agai i le avea ai o se fomai tipitipi lauiloa o le fatu, i lona lesitala lea i le a’oga faafomai i le Iunivesite o Iuta. I nai tausaga na sosoo ai, o lana aoga faafomai na aveatu ai o ia ma lona aiga i Minesota, Masatuseta, ma toe taliu ane ai i Iuta. I le 1975, sa filifilia ai o ia e fai ma peresitene o le Sosaiete o Taotoga o Alatoto, ma sa tofia mulimuli ane e avea ma faatonusili o le Fono Faatonu a Amerika o Taotoga o Fatafata. I le taimi o lana matata faafomai, sa ia faatinoina le silia ma le 7,000 taotoga, e aofia ai taotoga ua salalau le lipotia o Peresitene Spencer W. Kimball, ma se fafine sa i ai se patu i autafa o lona fatu, ae sa maitaga i se masaga. Sa sailia e Nelson le taitaiga faalelagi i taimi taitasi sa ia faatinoina ai se taotoga.

Sa galue foi Russell M. Nelson i se au epikopo ma se peresitene o le siteki. I le 1971, sa valaauina ai o ia e fai ma Peresitene Aoao o le Aoga Sa. Sa talosagaina o ia e taitai o le Ekalesia e talia le valaauga pe afai o le a mafai pea ona faaauau lana galuega o se fomai tipitipi. I le 1978, sa avea o ia ma sui risone o le Toasefululua (o le faailomua o se Fitugafulu Eria) i Iuta faatasi ai ma se tausimea e aofia ai uarota ma siteki a tamaiti a’oga i le Iunivesite o Polika Iaga. I le tolusefulu-lima tausaga o lana matata, o le tulaga e mafaufauina ai e le toatele o isi galuega o ausiaga faapena, e litaea, sa valaauina ai Nelson e galue o se Aposetolo. I le 1985, ina ua tasi le tausaga o Elder Nelson i lana misiona faaaposetolo, sa fesili ai se fomai i Saina sa ia iloaina mo le tele o tausaga, pe mafai ona ia faatinoina se taotoga o Fang Rongxiang, o se tagata pese lauiloa. I le mavae ai ona ia teenaina ma le faaaloalo i nai taimi, sa malie Elder Nelson, ma faatasi ai ma se paaga sa la galulue muamua i le Aai o Sate Leki, sa la faatinoina lana taotoga mulimuli o se fomai tipitipi.

I le 33 tausaga sa ia auauna atu ai o se Aposetolo, ua 134 atunuu sa ia malaga i ai ma sa aofia ai i le tatalaina o le 31 o na atunuu mo le talaiina o le talalelei. Sa ia lagolagoina ia atina’ega o polokalama a le autalavou, aemaise o le fatuina o tulaga faatauaina ma autu a Tamaitai Talavou, ia na faasilasila a o le’i leva ona mae’a lona faauuga i le tofi faaaposetolo. Sa ia taitaiina foi mataupu a le Ekalesia i Europa Sasae i le taimi o le vevela o fetosoa’iga faavaomalo ma Europa Sisifo ma le Iunaite Setete i le 1980 ma le 1990. Sa ia galue i, ma sa umi se taimi sa taitaifono ai, i le Aufono Faapitoa a Faifeautalai i le vaitau o le 2000 ma le 2010, i le taimi na faia ai le tele o atina’e iloga i le aoaoina o faifeautalai ma tulaga manaomia mo le auaunaga faafaifeautalai.

I le 2005, i le mavae ai o le toeitiiti 60 tausaga o le la faaipoipoga, sa faafuasei ona maliu Dantzel Nelson ona o le fatu. I le 2006, sa faaipoipo ai Elder Nelson ia Dr. Wendy L. Watson, o se taulasea faufautua faaleaiga ma se polofesa i le Iunivesite o Polika Iaga. I le mavae ai o le maliu o Peresitene Boyd K. Packer i le 2015, sa avea Elder Nelson ma Peresitene o le Korama a Aposetolo e Toasefululua, lea na ia auauna ai seia oo ina maliu Peresitene Thomas S. Monson i le 2018.

Talu mai le 2018, sa pulefaamalumalu Peresitene Nelson i se soloa’iga o suiga i polokalama ma faagaoioiga a le Ekalesia, o vaega uma lava o mea sa ia faamoemoe o “se laasaga saoasaoa” mo se “lumanai lē mafaatusalia.” E tele fetuunaiga na tali ai le faaopoopoga o le toeitiiti tolu miliona tagata auai i le taimi o le nofoaiga a Peresitene Monson ma le tupuolaola faateleina o le salalau o faapotopotoga a le Ekalesia. Sa ia faamamafaina le taua o le faapotopotoina o Isaraelu mo le galuega faifaipea o le Toefuataiga, ma uunaia tagata uma ia “faamuamua le Atua” i o latou olaga ma ia vaai i le faataunuuga o feagaiga a le Alii ia latou auaunaga i le aiga ma i le Ekalesia. Sa ia fautuaina le faaaoga o le igoa atoa o le Ekalesia nai lo igoa valaau ma igoa faamata’itusi, ia tausisia le Sapati i le paia sili atu, ma ia taulamua “i le lafoa’ia o uiga faaalia ma faatinoga o le faasausili.” Sa faagaoioia e le Ekalesia ia malumalu e 159 i le 2018; ae talu mai i lena taimi na fofogaina mai ai e Peresitene Nelson le silia ma le 150 malumalu fou, o le tele lava o atunuu e 35 sa ia asia o se Peresitene o le Ekalesia. Sa ia taitaia foi faafouga tetele i malumalu na fauina e le uluai Au Paia o Aso e Gata Ai i Iuta, aemaise o le Malumalu o Sate Leki ma ona si’omaga i le Lotoa o le Malumalu. I le taimi o le faama’i oti o le KOVITI-19 lea na toetoe o vaega uma o le Ekalesia i le lalolagi atoa na aafia ai, sa ia vaavaaia le tali vave atu ma le faalautelega o fesoasoani alofa i tagata. I tausaga na sosoo ma le faama’i oti, sa patipatia ai e Peresitene Nelson le toe amatalia o le laasaga faanatinati o le auaunaga i le lalolagi ma le faasalalauina o le talalelei. I le 2023, sa ia aoao mai ai, “E manino lava le savali a le Faaola: O Ona so’o moni e atia’e, siitia, faamalosiau, uunaia, ma musuia—po o le a lava le faigata o le tulaga o i ai.” O le tausaga foi lena, sa atoa ai le 99 tausaga o lona soifua, ua sili ona umi i lo se isi lava Peresitene o le Ekalesia

1:29

Mo nisi faamatalaga e uiga i le soifuaga o Russell M. Nelson, tagai i lona atatosi i le Prophets of the Restoration collection on history.ChurchofJesusChrist.org.

Autu Fesootai: Sunday School, Temple Building, Gathering of Israel, Name of the Church, Growth of Missionary Work