Lauga a King Follett

I le aso 7 Aperila, 1844, sa tulai ai Iosefa Samita e lauga atu i le mea o le a faamaonia ai o lana konafesi mulimuli lea. Ina ua uma ona talosagaina le Au Paia mo lo latou “gauai tele atu,” sa ia faamalamalama atu o le a ia saunoa e uiga i e ua maliliu, i le tali atu i se talosaga mai le aiga ma uo a King Follett, o se tagata o le Ekalesia na maliu talu ai nei i se faalavelave. E leai se faamaumauga atoa po o se talafaamaumau o mea na fai mai ai Iosefa, ae sa i ai ni nai tagata na tusitusia ni faamatalaga, ua avea ai lenei mea ma se tasi o lauga sili ona faamaumauina lelei a Iosefa.

I le lauga, sa aoao atu ai Iosefa e uiga i le natura paia ma le alualu i luma e faavavau. Sa ia faafetaiaia tu ma aga masani ua loa faatelosia na matuai ese ai lava le faiga o le Atua nai lo le tagata. Sa ia faamalamalama mai e faapea, “afai e le malamalama tagata i uiga o le Atua latou te le malamalama foi ia i latou lava.” Sa ia aoao mai o le Atua “sa avea o se tasi o i tatou” ma “o agaga uma na auina mai e le Atua i le lalolagi” sa “mafai ona faalauteleina,” ua i ai le gafatia e avea ai e faapei o le Atua i le faavavau. Sa aoao mai foi e Iosefa e faapea o se vaega autu o tagata taitoatasi o le galulue faatasi ma le Atua, i le faatusatusaina o lenei autu paia i se mama, e leai se amataga po o se gataaga.

O le lauga a King Follett o le faamalamalamaga sili lea ona tuusao, faalauaitele o nei aoaoga faavae, ae e le o le taimi muamua lea na faailoa mai ai. O le Tusi a Mamona ma le tusi a Mose o loo i ai uma fuaitau e tulai mai e le tusa ai ma le tulaga faatelosia na lauiloa i ona po o Iosefa Samita e faapea, o le Atua e “leai se tino, itutino, po o ni naunauga.” O faaaliga na maua e Iosefa Samita i le amataga o le 1832 na aoao mai ai e faapea, sa i ai agaga “i le amataga faatasi ma le Atua” ma e ala i le mana o le Togiola a Iesu Keriso, e mafai ai e tagata taitoatasi ona “maua o latou tofi ma faia ia tutusa ma ia,” e avea ma atua. Sa faalautele e Iosefa Samita ia nei faaaliga i nofoaga eseese, e fesoasoani ai i isi ia malamalama i aafiaga o ana aoaoga.

E oo lava i tagata o e sa nofouta i aoaoga muamua a Iosefa Samita e uiga i le muai olaga, o le natura paia, ma le faaeaga, o le lauga a King Follett na tulaga ese o se taimi taua ina ua o mai faatasi na manatu autu ma le mamana. O se tasi o tagata o le Ekalesia na faalogo i le lauga na faamatalaina o se faamaoniga lofituina e faapea sa iai ia Iosefa Samita “le Agaga o Musumusuga.” Toeitiiti atoa le 50 tausaga talu ona uma le saunoaga, na tautino mai ai e Uilifoti Uitilafi, a o lauga atu i le faapaiaga o le Malumalu o Sate Leki, o le faalogo i le lauga o se aafiaga sili ona malosi faaleagaga o lona olaga. Ae o le lauga sa le’i aunoa ma le au faitio. E lua masina talu ona uma le lauga, ae lomia e tagata tetee o le Au Paia o Aso e Gata Ai se nusipepa e ta’ua o le Nauvoo Expositor, lea na latou tauleagaina ai aoaoga a le Perofeta o se upuleaga ma ta’ua ai o se mafuaaga lea mo lo latou tautatala e faasaga tau ia Iosefa Samita. Na osofaia foi e le au faitio mulimuli ane a le Ekalesia ia aoaoga a le lauga.

Talu mai le 1844, o loo faaauau pea ona aoao atu e le Ekalesia le tele o aoaoga faavae autu na tuuina atu e Iosefa i le lauga a King Follett. E ui e le o faapaiaina faatusitusiga paia le lauga, ae sa avea ma se aafiaga tele o le mamanuina o manatu o le Au Paia o Aso e Gata Ai e uiga i le muai olaga o tagata, aafiaga faaletino, ma gafatia paia e faavavau.

Autu Fesootai: Tina i le Lagi