Iunivesite a le Ekalesia

Talu mai ona amata i le 1800, o iunivesite na lagolagoina e le Ekalesia sa saili e tuuina atu aoaoga maualuluga ia e tuufaatasia ai le suesue ma le faatuatua ia Iesu Keriso. Sa muai faalauiloa e le Au Paia o Aso e Gata Ai se iunivesite i Navu, Ilinoi, i le 1840. Peitai, o le Iunivesite o le Aai o Navu, sa lei mafai ona faatuina se nofoaga mautu a o lei malaga ese le toatele o le Au Paia o Aso e Gata Ai i Sisifo o Amerika i Matu i le 1846. E fa tausaga mulimuli ane, sa faalauiloa ai e le Au Paia o Aso e Gata Ai le Iunivesite o Tesareta i le Aai o Sate Leki, ae o faafitauli tautupe na faasalaveia ai vasega masani seia oo i le 1869, ina ua mae’a le auala faavaomalo o nofoaafi lea na aumaia ai pisinisi fou na faateleina ai le tamaoaiga i le lotoifale. I le 1875, sa liliu ai le lala i Provo o le Iunivesite o Tesareta ma avea ma Aoga Faavae o Polika Iaga, lea na faia ai se polokalama o vasega tulagalua, maualuga, ma kolisi lea na tuufaatasia ai suesuega faalelotu ma le poto salalau. Sa faatulaga e Faiaoga ma taitai o le Ekalesia le Aufaatonu Aoao o A’oga a le Ekalesia i le 1888, ma e lei leva ae suia le A’oga Faavae a Polika Iaga i le Iunivesite o Polika Iaga (BYU). Sa suia le Iunivesite o Tesareta i se a’oga mo tagata lautele ma toefaaigoa ai o le Iunivesite o Iuta i le 1892.

I le aluga o le fiasefulu o tausaga mulimuli ane, sa tatalaina ai e le Ekalesia ni isi aoga, o kolisi, ma iunivesite i nofoaga na i ai le Au Paia o Aso e Gata Ai i Mekisiko i matu, o le Iunaite Setete i sisifo, ma Kanata i saute. Mulimuli ane, o le tele o nei aoga na le toe faaauauina pe tuu atu i se isi tausimea, ae na o le BYU, le Iunivesite a le Au Paia o Aso e Gata Ai i le Aai o Sate Leki, ma le Kolisi o Ricks i Rexburg, Idaho, na faatumauina. O le taimi foi lava lea, sa faaauau ai e taitai o le Ekalesia ona faalauiloa aoaoga faaletalalelei i aso o le vaiaso mo tamaiti aoga maualuga ma kolisi e ala polokalama o le seminare ma le inisitituti. E oo atu i le ogatotonu o le seneturi 20, ua faamaopo e le Ekalesia ana mau taumafaiga faaleaoaoga i lalo o le taitaiga tuufaatasi ua faaigoaina o le Polokalama Faaleaoaoga a le Ekalesia (CES)

I le mavae ai o le Taua Lona Lua a le Lalolagi, sa faalautele ai e le autaitai polokalama o kolisi, aemaise ai o le BYU, e taulima ai le faitau aofai ua faatupula’ia o le Ekalesia. I le isi fiasefulu tausaga, ua tuputupu a’e ma le mautu le lesitala o le BYU, ma i’u ai ina oo i le 35,000, ma avea ai le BYU ma se tasi o iunivesite tuma’oti faalelotu aupito tele i le Iunaite Setete. I mata o le lautele, o le tele o le faateleina o le BYU na vaaia i ana polokalama tauva i taaloga. E le gata i lea, o le atina’ega o le Aoga Faaloia o le J. Reuben Clark ma le Aoga o Pisinisi o Marriott, faatasi ai ma isi polokalama faauu ma se faamamafa i sailiiliga a faiaoga, na faapupulaina ai le ola o le BYU i itu faaakatemia ma faapolofesa. O faamaumauga mautu a le BYU i le tuuina o le au faauu i ni matata malolosi ma le faatulagaina o ni pili e fai lava si maualalo, na lagolagoina ai lona igoa ta’uleleia o se aoga sili amata mo faailoga.

Sa faalauteleina foi e taitai o le CES le Iunivesite o le Au Paia o Aso e Gata Ai i le Aai o Sate Leki. Na amata le aoga o se Aoga Faavae a le Siteki o Sate Leki i le faaiuga o le 1880. E ui na muai vaai mamao i ai taitai o le aoga lauiloa a le Ekalesia, ae e oo atu i le amataga o le seneturi 20, ua amata ona latou si’i atu punaoa i le BYU. I le 1920, sa na o le kolisi faapisinisi na totoe, ma sa toefaaigoa le Iunivesite o le Au Paia o Aso e Gata Ai i le Kolisi o le Au Paia o Aso e Gata Ai i lena taimi, i le 1931, ua Kolisi Faapisinisi a le LDS. Sa tele taimi na fesiitai solo ai le aoga a o lei toe faatuina i se lotoa i le taulaga o le Aai o Sate Leki i le 2006. Sa toefaaigoaina o le Kolisi o Ensign i le 2020 ma sa amata ai ona ofoina atu ai tikeri i le fa tausaga i le 2021.

O le Kolisi o Ricks i Rexbourg, Idaho—na muai faaigoaina o le Bannock Stake Academy ae na toefaaigoa mulimuli ane e faamamalu ai Thomas Ricks, o le sa galue i le amataina o le aoga i le eria —ma sa taulai i le aoaoina o faiaoga i ona uluai tausaga. E ui lava ina sa ofoina atu ai faailoga tikeri i le 1950, ae na tele lava ina tumau le avea o Ricks College o se kolisi e lua-tausaga seia oo i le 2001, ina ua faasilasila mai e le Peresitene o le Ekalesia o Gordon B. Hinckley o le a faalauteleina i se polokalam ae fa-tausaga ma toefaaigoa ai o le Iunivesite o Polika Iaga–Idaho.

I Autmotu o le Pasefika, sa tupu ma ola le Kolisi o le Ekalesia o Hawaii ina ua mae’a lona faapaiaga i le 1958. Ina ua malaga taamilo le Peresitene o le Ekalesia o Tavita O. MaKei i matu o O’ahu i le fiasefulu tausaga ua mavae ma asia lona pitonuu ua lauolaola o le Au Paia o Aso e Gata Ai, sa ia silasila mamao i se kolisi ua faalauteleina iina, e mafai ona tautuaina ai tagata o le Ekalesia mai le Li’o o le Pasefika. Sa agavaa le aoga o se kolisi e fa-tausaga i le 1961, ma sa toefaaigoa ai o le Iunivesite o Polika Iaga–Hawaii i le 1974, ma sa avea o se iunivesite tutoatasi i lalo o le pulega a le Ekalesia i le 2003.

Talu mai le ogatotonu o le seneturi 20, sa faaaoga e taitai o le BYU isi magaala o le tuputupu a’e i talaatu o le Iunaite Setete. Sa faateleina polokalama suesue mai le 1950 i le tele o faalapotopotoga faavaomalo e suesue ai i fafo, ae na sili ona lauiloa i Salzburg, Lonetone, ma le Aai o Mekisiko. O le polokalama e suesue ai i fafo i Ierusalema, na amata i le 1968 na maua ai le lauiloa tele i tamaiti aoga, ma e oo atu i le faaiuga o le 1970, ua matuai olaola ma sa iloa ai e taitai ua manaomia ni fale tetele atu. O le Nofoaga Autu i Ierusalema mo Suesuega e Latalata i Sasae a le Iunivesite o Polika Iaga, na fauina i luga o le Mauga o Olive, lea e iloa atu ai le Aai Tuai, sa faapaiaina i le 1989.

Sa tagataga’i foi taitai o le CES e faalautele le polokalama a le BYU o aoaoga faaakatemia ma faapolofesa ia aapa atu ai i le lalolagi atoa. I le va o le 2009 ma le 2017, sa amatalia ai e faiaoga i le CES, BYU–Idaho, ma le BYU se polokalama i luga o le initoneti mo a’oga maualuluga atu e ta’ua o le BYU–Pathway i le Lalolagi Atoa. I le 2020, na tautuaina ai e le polokalama le silia ma le 50,000 tamaiti aoga o le Au Paia o Aso e Gata Ai i le silia ma le 150 atunuu.

Autu Fesootai: School of the Prophets, Church Academies, Seminaries and Institutes, Brigham Young