Vaega o le Kenese
O ni nai aiga Amerika Aferika sa i ai faatasi ma uluai tagata o le Ekalesia ma sa toaaga i le tele o mea na tutupu i le talafaasolopito o le Au Paia o Aso e Gata Ai. Ae ui i lea, mo le tele o tausaga, sa masani ona maua e tagata uli fou i latou lava ua na o le pau lea o le tagata po o le aiga Uli i a latou uarota ma siteki i le lotoifale. O le vaavaai ai e fatu se nuu sili atu, sa galulue faatasi ai tagata Uli i le eria o le Aai o Sate Leki i le 1971 ma taitai o le Ekalesia e faatulaga le Vaega o le Kenese, o se faapotopotoga faalemasina ma se lala o gaoioiga a le Siteki o Sate Leki Liberty lea na tuuina atu ai i tagata o le vaega se lagolago faaopoopo.
Taualumaga o le fonotaga faavae a le vaega o le Kenese i le aso 19 Oketopa, 1971.
A o lei faatulagaina le Vaega o le Kenese, sa potopoto faatasi nisi o tagata Uli i le eria o le Aai o Sate Leki ma fuafuaina ni gaoioiga, e ui ina sa latou auai i uarota eseese. I le vaitau o le 1960, sa talimalo ai Eugene ma Leitha Orr i le mea na avea ma se faatasiga faaletausaga i lo latou fale. I le taimi o se tasi o faapotopotoga, sa fesili atu ai Eugene ia Darius Gray ma Ruffin Bridgeforth Jr. pe ono faapefea ona la tetee atu i nisi o [faamatalaga] faalotovaivai na faaalia e le toatele o a la uo ma tagata o le aiga Uli a o auai i le lotu. Sa anapopogi ma tatalo faatasi nei alii e toatolu mo le taitaiga faalelagi. Mo Gray, o le taimi muamua lenei sa ia tootuli ai i le tatalo ma isi tagata uli e toalua o le Au Paia o Aso e Gata Ai talu ona avea ma se tagata o le Ekalesia. I le 1971, sa latou o atu ai i taitai o le Ekalesia ma ni fesili e uiga i le tapulaa lea sa i ai i lena taimi e uiga i le perisitua ma le malumalu mo tagata e tupuga mai i Aferika Uli ma pe faapefea ona latou fesoasoani i le Ekalesia i le tuuina atu o le lagolago mo le nuu o Tagata Uli. Sa tofia e Peresitene Iosefa Filitia Samita ia Elders Gordon B. Hinckley, Thomas S. Monson, ma Boyd K. Packer e galulue ma Bridgeforth, Gray, ma Orr e atiina ae se fofo.
I le aso 19 o Oketopa , 1971, sa faia ai e le Vaega o le Kenese—lea na faaigoaina ona o la latou faalapotopotoga na faatusa i se "amataga fou" mo tagata Uli—lana fonotaga faavae. Na vaetofia e Elders Hinckley, Monson, ma Packer ia Bridgeforth e avea ma peresitene o le vaega faatasi ma Gray e avea ma fesoasoani muamua ma Orr o le fesoasoani lua. O Lucille Bankhead, o se e tupuga mai i paionia o Jane Manning James ma Green Flake o le Au Paia o Aso e Gata Ai, sa valaauina e avea ma Peresitene o le Aualofa a le vaega. Sa fofogaina e le au peresitene fou la latou fuafuaga mo tagata Uli o le au paia e faapotopoto faatasi i le masina e tuuina atu molimau, fausia se nuu e lagolagosua, ma faasoa atu ni aafiaga faaleaganuu. O le a faaauau pea ona auai atu tagata o le Vaega o le Kenese i a latou uarota tumau.
Sa auauna atu Ruffin Bridgeforth o le peresitene o le Vaega o le Kenese mai le taimi na faatuina ai le Kenese i le 1971 seia oo i lona maliu i le 1997. I lana saunoaga i le falelauasiga o Bridgeforth, na saunoa ai Peresitene Gordon B. Hinckley o ia o "se tagata faatuatua, o se alii sa latalata atu i lona nuu ma alofa ia i latou ma fautuaina i latou ma faamanuia i latou ma fesoasoani ia i latou i o latou tauiviga, o latou faafitauli, a latou fesili, lo latou aapa atu i fafo a o latou auauna ai i le Ekalesia. E tu o ia o se paionia maoae i lenei vaitaimi pe a tatou faamamaluina paionia." O peresitene na sosoo atu ai na aofia ai Darius Gray, Donald Harwell, ma Davis Stovall.
O faatasiga a le Vaega o le Kenese ua faamamafaina ai musika, aemaise lava musika o le talalelei, faatasi ai ma ona sootaga malolosi i le talatuu o tagata o le vaega i le tapuai ma viia le Atua e ala atu i pesepesega i aulotu Porotesano Amerika Aferika ae latou te lei auai i le Ekalesia. Na amata i le 1979, sa faapotopoto ai e le vaega se aufaipese mai tagata o le ekalesia o e sa auai i a latou faigalotu. I le 2016, na fatuina ai le Aufaipese a le Debra Bonner Unity Gospel, lea na aofia ai nisi o le aufaipese a le Vaega o Kenese, ma amata ona pepese i masina taitasi. O faatinoga mai aufaipese uma e lua sa avea ma se tapuaiga masani a le Vaega o le Kenese. I lona talafaasolopito e 50 tausaga, sa faamanatuina ai e le Vaega o le Kenese mea na tutupu e pei o le aso 8 o Iuni, 1978, o le faaaliga e faamutaina ai le tapulaa o le perisitua ma le malumalu faapea foi sauniga faamanatu lona 25 ma le 50 a le vaega i le 1996 ma le 2021. Talu mai lona faatulagaga, ua faatumauina lava e le Vaega o le Kenese se faatagaga aloaia mai le Ekalesia o se vaega o gaoioiga ma tumau ai le tuuto atu i lona faamoemoega o le faaaumeaina o tagata Uli o le Au Paia o Aso e Gata Ai.
Autu Fesootai: Civil Rights Movement, Priesthood and Temple Restriction, Racial Segregation