Fakaʻilekitulōnika Pē: Ngāue Fakafaifekau Tokoní
Ngāue Fakafaifekau Tokoní: ʻAonga ʻa e Hala Fonongá
ʻI hono tali mai ʻeku ʻū pepa ngāue fakafaifekaú, naʻá ku ʻamanaki ʻe vahe au ki ha ngāue fakafaifekau akoʻi. Naʻe kehe hoku halá, ʻi ha founga lelei ange.
ʻOku ou tui ko e taimi ʻoku vakai ai ʻa e kakaí ki he ngāue fakafaifekaú, ʻoku nau faʻa vakai ki he ngāue fakafaifekau tokoní ko ha misiona “māʻulalo ange” ʻi hono fakahoa ki he ngāue fakafaifekau akoʻí. Te u fakahā totonu pē, ko e taimi naʻá ku fakakakato ai ʻeku foomu ngāue fakafaifekaú, naʻá ku maʻu ha ngaahi ongo peheni. Naʻá ku ngāue mo ʻeku kau taki lakanga fakataulaʻeikí, Potungāue Ngāue Fakafaifekaú, pea naʻá ku ngāue ki heʻeku fōmú ʻo laka hake ʻi ha māhina ʻe ono. Naʻá ku fie ngāue ko ha faifekau akoʻi. Naʻá ku ongoʻi naʻe fiemaʻu ke pehē.
Ko ha Uiuiʻi naʻe toe Fakataautaha Ange
Naʻe faifai peá u fakataha mo ʻeku palesiteni fakasiteikí, peá u ʻiloʻi naʻe uiuiʻi au ke ngāue fakafaifekau tokoni. Naʻe huʻu hoku halá ki ha feituʻu kehe mei he meʻa naʻá ku tomuʻa ʻamanaki ki aí, ka naʻe fakaʻohovale ʻeku ongoʻi nongá. Naʻá ku ʻilo naʻe totonu pē ia.
Talu mei he kamata ʻeku ngāue fakafaifekaú, mo ʻeku lava ʻo tuku taimi maʻá e kakaí lolotonga ʻenau nofo toko taha ʻi he ngaahi loki huhu kanisaá mo ngāue ʻi he temipalé ko ha tokotaha ngāue ouau. Kuó u maʻu foki ʻa e faingamālie ke hiki ha ngaahi fakamatala ki he YA Fakauiké, ʻo fakaʻaongaʻi ʻeku manako ʻi he tohí ke tokoni ki hono ʻomi ʻo e māmá mo e ʻamanaki leleí ki he niʻihi kehé.
ʻOku ou tui mahalo naʻá ku mei lava pē ʻo ʻalu ʻo ngāue fakafaifekau akoʻi taimi kakato. Ka neongo iá, ʻoku ou ʻilo ko e taimi naʻe maʻu ai hoku fatongia ke u hoko ko ha faifekau ngāue tokoní, naʻe siʻisiʻi pē ʻene kaunga ki heʻeku moʻui lelei fakaeʻatamaí kae lahi ange ʻene fekauʻaki mo e feituʻu naʻe fiemaʻu lahi taha ai au ʻe he ʻEikí. ʻOku ou tui naʻe mei mole meiate au ʻa e ngaahi aʻusia fakataautaha kuó u maʻu ʻi heʻeku ngāue fakafaifekau tokoní.
ʻIkai Māʻulalo Ange kae Tuʻunga Tatau
ʻOku ʻikai māʻulalo ange ʻa e ngāue fakafaifekau tokoní ʻi hono fakafehoanaki ki he ngāue fakafaifekau akoʻí. Ko ha talanoa fakatātā ʻeni kuó u fanongo ai: Ko e kau faifekau akoʻí, ko e fofonga ia ʻo e Fakamoʻuí; ko Hono toʻukupú ʻa e kau faifekau ngāue tokoní. ʻOku fakamatalaʻi ʻe he taumuʻa ʻo e ngāue fakafaifekau tokoní ʻoku mau tokoni “ʻi he angaʻofa ʻo hangē ko ia naʻe mei fai ʻe he Fakamoʻuí.”
ʻOku mafao atu homau nima fakafiemālie mo tokangá kiate kinautolu ʻoku faingataʻaʻiá. Ko e meʻa ia naʻe fai ʻe he Fakamoʻuí, pea ko e meʻa ia ʻoku ui kimautolu ke mau faʻifaʻitaki ki aí.
ʻAlu ʻo Fakahoko
ʻOku ou ʻiloʻi ʻoku tokanga mai ʻa e Tamai Hēvaní kiate kitautolu kotoa pea ʻokú Ne ʻafioʻi ʻa e meʻa ʻoku lelei taha maʻatautolú. Tatau ai pē pe ko e hā ʻa e ngāue fakafaifekau ʻoku vahe atú, kapau ʻokú Ne ui koe ke ke ngāue, ngāue.
ʻI he ngaahi lea ʻo e Lea Fakatātā 3:5–6: “Falala [ki he ʻEikí] ʻaki ho lotó kotoa; pea ʻoua naʻá ke faʻaki ki ho poto ʻoʻoú. Ke ke fakaongoongo kiate ia ʻi ho hala kotoa pē, pea ʻe fakatonutonu ʻe ia ho ngaahi ʻaluʻangá.”
ʻOku ou fakapapauʻi atu ʻe hoko ia.