Pōpoaki ʻe Nima maʻá e Fānau Kotoa ʻa e ʻOtuá
Kapau te ke fiemaʻu, ʻe tataki koe ʻe he ʻOtuá ʻi hoʻo ʻofa kiate Ia ʻaki ho lotó kotoa mo feinga ke tāpuekina ʻa e niʻihi kehé.
ʻOku tau makehe kotoa pē pea kuo tākiekina kitautolu ʻe ha ngaahi aʻusia makehe. ʻOku tau maʻu foki mo ha ʻulungaanga mahuʻinga ʻe taha ʻoku tau faitatau ai—ko e fānau kotoa kitautolu ʻa e ʻOtuá.
Neongo ʻoku ngali kehekehe hotau ngaahi tūkungá, ʻoku ʻi ai ha ngaahi pōpoaki pau ʻe fiemaʻu ke fanongo kotoa ki ai e fānau ʻa e ʻOtuá. ʻOku ou fie vahevahe ha pōpoaki ʻe nima mo kimoutolu—ko ha ngaahi pōpoaki ʻoku ou ʻamanaki te mou ongoʻi ʻoku fenāpasi ia mo homou ngaahi tūkunga fakafoʻituituí mo e tūkunga ʻi he moʻuí, ʻa ia ʻoku fakafou mai ʻi he meʻafoaki mo e mālohi ʻo e Laumālie Māʻoniʻoní, maʻau pē.
1. ʻUnu ki he Māmá
ʻOku ʻikai pē ke toe liliu e halanga ʻo e laʻaá. ʻOku tuʻu ʻi hono tuʻuʻangá, tuʻu maʻu ʻi he langí, ʻo ʻomi ha māfana mo ha maama ki he māmaní.
ʻI he founga tatau pē, ʻoku ʻafio ʻa e ʻOtuá ʻi Hono ngaahi langí. ʻOku ʻikai ke Ne teitei liliu pe toe afe mei Hono hala fonongá, ko kitautolu pē ʻoku peheé.
ʻOku tau fiemaʻu kotoa e maama ʻa e ʻOtuá ʻi heʻetau moʻuí, ka ʻoku ʻi ai ha ngaahi taimi ʻoku tau ongoʻi ai ʻoku tau ʻi he fakapoʻulí. ʻI he hoko mai ʻa e ngaahi taimi peheé, te tau ʻiloʻi pau ʻe ʻi ai maʻu pē ʻa e ʻOtuá ʻo hangē pē ko e laʻaá. ʻI hoʻo fakatafoki ho lotó kiate Iá, te Ne tali lelei koe pea fakafonu ho laumālié ʻaki ha maama, māfana, ʻilo, mo ha fakahinohino. ʻOkú Ne ʻi ai maʻu pē.
2. ʻOkú ke Lelei Ange Koe ʻi he Tuʻunga ʻOkú ke Fakakaukau Ki aí
Kuo fakaʻaongaʻi maʻu pē ʻe he ʻEikí ʻa e fanga kiʻi meʻa iiki mo vaivai ʻo e māmaní ke fakahoko ʻaki ʻEne ngaahi taumuʻa nāunauʻiá. ʻOkú Ne faʻa fakahoko ʻa e lavameʻa lelei tahá meiate kinautolu ʻoku nau ongoʻi ʻoku siʻisiʻi taha ʻa e meʻa ʻoku nau malavá.
Mahalo, te ke fakakaukau ʻoku ʻikai ke fuʻu loko ʻi ai haʻo mahuʻinga. Taʻefeʻunga. Taʻetalēniti. ʻIkai makehe. ʻIkai ke maʻu e loto, ʻatamai, ngaahi maʻuʻanga tokoni, ʻulungaanga, pe kaukaua ke ʻaonga ki he ʻOtuá.
ʻOkú ke pehē ʻoku ʻikai ke ke haohaoa? ʻOku ʻikai ke ke lelei feʻunga? Sai, ʻoku ʻikai ko koe pē! Mahalo ko koe pē ‘a e taha ʻoku fekumi ki ai ʻa e ʻOtuá.
He “ko e ngaahi meʻa ʻoku ʻikai mafai ʻe he tangatá, ʻoku mafai ia ʻe he ʻOtuá.”
ʻE toʻo [ʻe he ʻOtuá] ho ngaahi talēnití mo e meʻa te ke malavá ʻo fakalahi ia—neongo ʻene hā ngali siʻisiʻi ʻo hangē ha fanga foʻi mā mo ha ongo mataʻiiká. Kapau te ke falala kiate Ia mo faivelenga, te Ne fakalahi hoʻo ngaahi leá mo e ngāué pea fakaʻaongaʻi ia ke tāpuakiʻi mo tokoniʻi ha kakai tokolahi!
ʻOku ʻikai fiemaʻu ʻe he ʻOtuá ha kakai ʻoku haohaoa. ʻOkú Ne fekumi kiate kinautolu ʻoku nau loto ke foaki honau “loto mo e ʻatamai fie faí,” pea te Ne ʻai ke nau “haohaoa ʻia Kalaisi.”
3. Ako ke ʻOfa ki he ʻOtuá mo Ho Kaungāʻapí
ʻI he taimi naʻe fehuʻi ai ʻe ha Fālesi kia Sīsū pe ko e fē ʻoku lahi taha ʻi he ngaahi fekaú, naʻe aofangatuku ʻe he Fakamoʻuí ʻa e meʻa ʻoku totonu ke tau fakamuʻomuʻa fakafoʻituitui pea ʻi he Siasí:
ʻI heʻetau feʻiloaki mo e Fakamoʻuí ʻi he fakamaauʻangá, te tau fakamatala ki he anga ʻetau moʻui ʻaki ʻa e ongo fekau lalahi ʻe uá.
Naʻa tau fekumi moʻoni nai ki he ʻOtuá? Naʻa tau ʻofa nai kiate Ia ʻaki e kotoa hotau lotó, iví, ʻatamaí, mo e mālohí?
Naʻa tau ʻofa nai ʻi hotau fāmilí, kaungāmeʻá, mo e kaungāʻapí? Naʻa tau fakahaaʻi fēfē ʻa e ʻofa ko iá?
Kuo pau ke tau manatuʻi maʻu pē ʻoku tuhu ʻa e “fono kotoa mo e kau palōfitá” ki he ongo fekau lalahí.
Ko e uho ʻeni ʻo e ongoongolelei ʻo Sīsū Kalaisí. Ko hotau fakavaʻé ia ʻi heʻetau hoko ko ʻEne kau muimuí.
4. Kuo Pau Ke ʻI Ai ʻa e Fetōkehekeheʻakí, Ko e Fakakikihí Ko ha Fili Ia
Mahalo te ke fakakaukau he taimi ʻe niʻihi ki he fakafiefia ʻo e moʻuí kapau pē naʻe ʻikai ke fuʻu lahi ʻa e fakafepakí, ka ko e fetōkehekeheʻakí ko ha meʻa ia kuo pau ke hoko. Ko ha tuʻunga ia ʻo e moʻui fakamatelié mo ha konga ʻo hotau siviʻí. Ka ko e fakakikihí, ko ha meʻa ia ke fili ki ai. Ko ha founga ia ʻe taha ʻoku fili ʻe ha kakai ʻe niʻihi ke talia ʻaki e fetōkehekeheʻakí.
ʻOku fonu mahuohua hotau māmaní ʻi he fakakikihí. ʻOku tau vakai ki ai ʻi he ʻaho kotoa: ʻi he ongoongó, ʻi he mītia fakasōsialé, pea taimi ʻe niʻihi, ʻi hotau vā fetuʻutaki mo kinautolu ʻoku tau ʻofa aí.
He ʻikai ke tau lava ʻo holoki e tāufehiʻa, ʻita, pe loto-sāuni ʻa e niʻihi kehé. Ka te tau lava ʻo fili ʻetau talí. Te tau lava ʻo fili ha founga lelei ange—ʻa e founga ʻa e ʻEikí! Ko hono moʻoní ʻoku faingofua ke lea ʻaki kae faingataʻa ke fakahoko.
ʻI heʻetau hoko ko e kau muimui ʻo Sīsū Kalaisí, ʻoku tau muimui ki Heʻene sīpingá. ʻOku ʻikai ke tau fakamaaʻi pe ʻohofi e niʻihi kehé. ʻOku tau feinga ke tau ʻofa ki he ʻOtuá mo tokoniʻi hotau kaungāʻapí. ʻOku tau feinga ke tauhi fiefia e ngaahi fekau ʻa e ʻOtuá mo moʻui ʻaki e ngaahi tefitoʻi moʻoni ʻo e ongoongoleleí. Pea ʻoku tau fakaafeʻi ʻa e niʻihi kehé ke fakahoko ʻa e meʻa tatau.
He ʻikai ke tau lava ʻo fakamālohiʻi ha taha ke liliu. Ka te tau lava ʻo ʻofa ʻiate kinautolu. Te tau lava ʻo hoko ko ha faʻifaʻitakiʻanga ʻo e ʻuhinga ʻo e ongoongolelei ʻo Sīsū Kalaisi kuo fakafoki maí. Te tau lava ʻo fakaafeʻi e taha kotoa ke haʻu ʻo kau ki ai. ʻOku tau fakahoko ia ʻi heʻetau ako ke ʻofa ki he ʻOtuá mo tokoni ke faitāpuekina ʻa e niʻihi kehé.
Ko e Halá, tā fakatātaaʻi ʻe Jeanette Borup
5. Ko ʻEtau Tamai Hēvaní ko ha ʻOtua ʻo e Ngaahi Kamataʻanga Foʻoú
Te tau fai ha ngaahi fehalaaki, lolotonga ʻetau moʻui fakamatelie ʻi he palanite fakaofo mo fakaʻofoʻofá ni.
ʻOku ʻikai fakaʻohovale ʻeni ki he ʻOtuá.
Naʻá Ne fekauʻi mai Hono ʻAlo tofu pē Taha naʻe Fakatupú ke moʻui haohaoa mo fai ha feilaulau maʻongoʻonga mo taʻengata ʻokú ne fakamaʻa ai kitautolu mei he angahalá mo fakaava e matapā ki he māʻoniʻoní, melinó, mo e nāunaú ʻi hono kotoa ʻo ʻitānití ʻi heʻetau fakatomala mo tui kiate Iá.
Ko ʻetau Tamai Hēvaní ko ha ʻOtua ʻo e ngaahi kamataʻanga foʻoú. Pea hangē pē ko hono fakaʻilongaʻi ʻe he hopo ʻa e laʻaá ʻa e kamataʻanga ʻo ha ʻaho foʻoú, ko e taimi kotoa pē ʻoku tau fakatomala aí ʻoku tau kamata foʻou ʻi hotau hala fakaākongá. Te ke lava ʻo toe kamata foʻou. Te ke lava ʻo toe kamata foʻou mei he ʻaho ki he ʻaho.
Tatau ai pē pe ko e hā hoʻo tōnounoú, hoʻo ngaahi fehalaākí, ʻe lava ʻe he ʻOtuá ʻo fakamoʻui, ueʻi fakalaumālie, mo fakamaʻa koe. He ko Ia ʻa e ʻOtua ʻo e ngaahi kamataʻanga foʻoú.
Siʻoku kaungāmeʻa ʻofeina, ʻoku ou lotua ke mou maʻu ha ʻamanaki lelei, mālohi, mo ha fiefia ʻi hoʻomou fonongá, ke mou lava ʻo maʻu ʻa e ʻOtuá pea ʻofa kiate Ia ʻaki homou lotó kotoa ʻi hoʻomou fāifeinga ke faitāpuekina e moʻui ʻa e niʻihi kehé.