Fakaʻilekitulōnika Pē: Ngāue Fakafaifekau Tokoní
ʻOku ʻIkai Faitatau ha Ongo Misiona
Ko e ngāue ʻeni ʻa e ʻEikí—ʻoku maʻu ʻe he tokotaha kotoa pē ha fatongia makehe ʻi ai.
Naʻá ku ngāue fakafaifekau ʻi ha māhina ʻe valu ʻi Losi ʻEniselesi, Kalefōnia, kimuʻa peá u toki hiki ki ʻapi ʻo ngāue fakafaifekau tokoni ʻi ʻIutaá. Neongo ʻa e kehekehe ʻa e ngāue naʻe vahe maí, ka ʻoku ou ʻiloʻi ʻoku tatau pē ʻa e uiuiʻi ke ʻalu ʻo ngāue fakafaifekaú mo hono tokoniʻi ʻo e niʻihi kehé ke nau haʻu kia Kalaisí.
Ko e Founga ʻo ʻEku Ngāué
ʻOku ngāue ʻa e faifekau kotoa pē ʻi ha ngaahi fatongia makehe, ko ia ai ʻoku ʻikai tatau tofu pē ʻa e ngaahi taimi-tēpilé. ʻOku ou ngāue fakauike ʻi ha ngaahi feituʻu kehekehe ʻe fā.
ʻOku ou ngāue ʻi ha fale tukuʻanga koloa ʻa e pīsopé tuʻo taha ʻi he uike. ʻOku ou tokoni ke faʻo ha ʻota meʻakai maʻá e ngaahi fāmili faingataʻaʻiá, pea ʻoku ou ʻoatu ha fakafiemālie kiate kinautolu kotoa pē ʻoku hū mai ʻi he ngaahi matapaá. ʻOku ou toe ngāue tokoni foki ʻi ha kiliniki taʻetotongi ko ha taha fakatonulea mo ha tokotaha ngāue fakatekinikale ki he kau mahakí. ʻOku ou tokoni ke vakaiʻi ʻa e kau mahakí, liliu lea maʻanautolu ʻoku lea faka-Sipeiní, mo ako ʻa e ngaahi founga ngāué mei he kau toketā fakaofó.
ʻI he taimi ʻoku ʻikai ke u ʻi he kilinikí aí, ʻoku ou ngāue mo e timi makasini Ki Hono Fakamālohia ʻo e Toʻu Tupú. Kuó u saiʻia ʻi he fanongo mei he toʻu tupú. ʻOku fakamālohia ʻe heʻenau ngaahi fakamoʻoní ʻeku fakamoʻoní! ʻI he fakaʻosinga ʻo e uiké, ʻoku ou hoko ko ha tokotaha ngāue temipale.
Ko e meʻa makehe fekauʻaki mo e ngāue fakafaifekau tokoní ko ʻenau fakaʻatā koe ke ke fakaʻaongaʻi ho taimi ʻataá ʻi ha feituʻu pē ʻe fiemaʻu ai koe ʻe he ʻEikí. Kiate aú, ʻoku ʻuhinga ia ʻe ʻi ai ha ngaahi ʻaho ʻe niʻihi te u ʻalu ai mo e kau faifekau akoʻí ki ha tā lēsoni, pe ngāue tokoni ʻi ha tauhiʻanga monumanu fakalotofonua. ʻI he ngaahi ʻaho kehé, ʻoku ʻuhinga ia ke feohi mo hoku fāmilí pe ʻaʻahi ki ha taha ʻoku fiemaʻu tokoni.
Ngaahi Tāpuaki mei he Ngāue Fakafaifekau Tokoní
Kuo hoko ʻeku ngāue fakafaifekaú ko ha meʻa mahuʻinga kiate au. Naʻe ʻikai ke u teitei fakakaukau te u maʻu ha faingamālie ke ngāue ʻi ha ngaahi founga lahi—ʻi he ʻaho kotoa pē. Kuó u maʻu mo hoku fāmilí ha ngaahi tāpuaki lahi ʻi he ngāue takitaha kuo vahe mai kiate aú. ʻOku ou houngaʻia ʻi he hokohoko atu ʻeku lava ʻo feʻiloaki mo ha kakai foʻoú mo kamataʻi ha ngaahi feohi fakakaungāmeʻa foʻou.
ʻOku ou ʻilo ʻoku tuku kitautolu ʻe he ʻOtuá ʻi he ngaahi feituʻu ʻoku fiemaʻu ai kitautolú. ʻOkú Ne ʻafioʻi kitautolu takitaha ʻi ha founga makehe mo ʻomi ha ngaahi faingamālie ke tau tupulaki ai ʻi he founga ʻokú Ne finangalo ke tau aʻusiá. Ko ʻEne ngāué ʻeni—ʻoku maʻu ʻe he tokotaha kotoa pē ha founga makehe ki hono fakahoko iá.