Te Tau Lava ʻo Kau Kotoa ʻia Sīsū Kalaisi
ʻE lava ke hoko ʻa hono tokoniʻi ʻo e niʻihi kehé ko ha solovaʻanga ʻo e ongoʻi ʻoku ʻikai ke tali lelei kitá.
Keeping Watch (Leʻo Maʻu Pē), fai ʻe Yongsung Kim, tā tuʻunga ʻi he angalelei ʻa e Havenlight
ʻI heʻetau hoko ko ha kāingalotu ʻo e Siasí, ʻoku tau feʻofaʻaki mo talitali lelei ʻa e taha kotoa. ʻOku tokoni ʻeni ke ne fokotuʻu ha feituʻu ʻo hono ongoʻi ʻo e kau mai ki he Siasí maʻá e taha kotoa pē.
ʻOku angamaheni pē ke ongoʻi he taimi ʻe niʻihi ʻoku ʻikai ke te kau. ʻI he taimi ʻoku hoko ai ʻení, ʻoku ʻomi ʻe he ongoongolelei ʻo Sīsū Kalaisí ha founga ke fakaleleiʻi ʻaki: ngāue tokoni.
Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ʻikai hoko mai ʻa e ongoʻi kau maí ʻi heʻetau tatali ki aí ka ʻi heʻetau ala atu ʻo fetokoniʻakí.” Ko e konga ia ʻo e meʻa ʻoku tau loto-fiemālie ke fai ʻi heʻetau fakahoko e fuakava ʻo e papitaisó, ke fakafiemālieʻi mo feʻofaʻaki mo fefuaʻaki ʻetau ngaahi kavengá (vakai, Mōsaia 18:8–9).
Ko Sīsū Kalaisi ʻa e sīpinga lelei taha ʻo e meʻá ni. Naʻá Ne fuesia e ngaahi mamahi, angahala, mo e faingataʻa ʻa e faʻahinga kotoa ʻo e tangatá (vakai, ʻAlamā 7:11–13). ʻI he fuakava ke muimui kiate Ia mo tauhi ʻEne ngaahi fekaú, te tau lava ʻo toe nofo fakataha mo Sīsū Kalaisi mo e Tamai Hēvaní ʻi ha ngaahi fāmili taʻengata.
“Ko ia, ko e tokāteline ʻo e kau maí ʻoku makatuʻunga ia ʻi heni—te tau lava kotoa ʻo fakapapauʻi: naʻe pekia ʻa Sīsū Kalaisi maʻaku; naʻá Ne ʻafioʻi ʻoku ou taau mo Hono taʻataʻá. ʻOkú Ne ʻofa ʻiate au pea ʻokú Ne lava ʻo fai ha liliu mahuʻinga ʻi heʻeku moʻuí. ʻI heʻeku fakatomalá; ʻe liliu au ʻe Heʻene ʻaloʻofá. ʻOku ou taha mo Ia ʻi he fuakava ʻo e ongoongoleleí; ʻoku ou kau ki Hono Siasí mo e puleʻangá; pea ʻoku ou kau ki Heʻene ngāue ke ʻomi e huhuʻí ki he fānau kotoa ʻa e ʻOtuá.”
ʻI heʻetau hoko ko e Kāingalotú, te tau lava ʻo fetokoniʻaki ke tau ongoʻi ʻoku tau kau ʻo fakafou ʻi he ʻofá, ngāue tokoní, mo e muimui ʻia Sīsū Kalaisí.