Fakaʻilekitulōnika Pē: Ngāue Fakafaifekau Tokoní
Ko ʻEku Ngāue Fakafaifekau Tokoní: Ko e Hoko ko e Toʻukupu ʻo e ʻEikí
Naʻe ʻomi ʻe heʻeku palesiteni fakamisioná ha faingamālie naʻe ʻikai ke u lava ʻo fakafisingaʻi: ko e fili ke ngāue fakafaifekau tokoní.
Naʻe fakahā kiate au ʻi he kotoa ʻo ʻeku moʻuí ʻoku totonu ke ʻalu ʻa e kau talavou ʻoku malavá ʻo ngāue fakafaifekau. Ka neongo ia, ʻi he fakalau ʻa e taimí, naʻá ku ʻiloʻi ʻe faingataʻa moʻoni kiate au ʻa e talanoa fakaʻaho ki he niʻihi kehé ʻi he ʻaho kotoa pē ʻi ha taʻu ʻe ua.
Ko e Malimali mo Ngāue Tokoní
ʻI he hoko hoku taʻu 18, naʻe talamai ʻe heʻeku pīsopé ʻe hoko ʻa e ngāue fakafaifekaú ko e taha ʻo e ngaahi meʻa faingataʻa taha te u lava ʻo faí, ka ko e taha foki ia ʻo e ngaahi meʻa lelei taha te u lava ʻo aʻusiá. Hili ha ngaahi fakakaukau mo ha lotu lahi, naʻá ku fakakaukau ke u ʻahiʻahiʻi ia.
Naʻe vahe au ke u ngāue ʻi Kalefōnia, ʻi he ʻIunaiteti Siteiti ʻo ʻAmeliká. ʻI heʻeku aʻu pē ki aí, neongo ʻeku ngaahi feingá, naʻe ʻikai ke u mei lava ʻo lea ʻaki ha foʻi lea ʻi ha faʻahinga lēsoni pē. Naʻe talamai ʻe heʻeku palesiteni fakamisioná ke u kamata ʻaki haʻaku malimali pē ki he niʻihi kehé. Naʻe ngali faingofua ʻaupito ʻeni, ka ko ha meʻa ia naʻe teʻeki ke u fai. ʻI he kamata ke u feingá, naʻe ongo fakafiefia ke malimali mo fakaafeʻi ʻa e Laumālié ʻaki haʻaku fiefia.
Ko ha Faingamālie Naʻe ʻIkai Ke U Lava ʻo Fakafisingaʻi
Hili ha māhina ʻe ono, naʻá ku kei faingataʻaʻia pē. Naʻá ku maʻu ʻa e holi ke fai e ngāue ʻa e ʻEikí, ka naʻe ngali taʻemalava ke u talanoa ki he niʻihi kehé ʻi he ʻahó kakato.
Hili ʻa e talanoa mo ʻeku kau takí, naʻa mau fakakaukau naʻe ʻikai ke u ʻi he feituʻu lelei taha kiate aú. Naʻe ʻomi leva ʻe heʻeku palesiteni fakamisioná ha faingamālie naʻe ʻikai ke u lava ʻo fakafisingaʻi: ʻa e fili ke ngāue fakafaifekau tokoní. Naʻe tuai-e-kemo ʻeku talaange ʻio ʻi he taimi pē ko iá.
Neongo naʻe ʻikai ke u ʻilo ʻa e meʻa kotoa pē naʻe toka mei muʻa ʻiate aú, ka naʻá ku ʻiloʻi te u kei lava pē ʻo tokoni ki hoku ʻOtuá.
Ngāue Tokoni ʻo hangē ko ia Naʻe Mei Fai ʻe he Fakamoʻuí
ʻI heʻeku hoko ʻi he taimí ni ko ha faifekau ngāue tokoní, ʻoku ou kei tokoniʻi pē ʻa e niʻihi kehé ke nau haʻu kia Kalaisi ʻaki ʻeku tokoni ʻi he angaʻofa ʻo hangē ko ia naʻe mei fai ʻe he Fakamoʻuí. ʻOku ou ngāue ʻi ha senitā tokoni ʻofa fakaetangata, fale tukuʻanga koloa ʻa e pīsopé, ko e temipalé, pea ʻoku ou tokoni foki ʻi hono akoʻi ha kau tāmeʻalea ʻi ha ʻapiako māʻolunga.
ʻI hoʻo akoʻi ʻa e ongoongoleleí, ʻokú ke vahevahe ai e folofola ʻa e ʻEikí, pea ʻi hoʻo tokoni ki he niʻihi kehé, ko e toʻukupu koe ʻo e ʻEikí. Ko e hā pē foungá, ʻokú ke kei fakaafeʻi pē ʻa e niʻihi kehé ke haʻu kia Kalaisi mo ngāue fakaetauhi ʻo fakafou ʻi he mālohi ʻo e Laumālie Māʻoniʻoní.