Tokanga Taha ki he Meʻa Te Ke Lava ʻo Fakahokó

Ko e misiona ia naʻe ʻikai ke u teitei ʻamanaki ki aí, ka naʻá ku fakalataʻia ʻi he miniti kotoa pē.

ʻI heʻeku ʻi he senitā akoʻanga fakafaifekaú ʻo teuteu ke ʻalu ki Noaué, naʻe ʻaʻahi ange ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo lea kiate kimautolu. Naʻá ne akoʻi ha meʻa faingofua naʻá ku manatua ʻi he kotoa ʻo ʻeku misioná: “Tokanga taha ki he meʻa te ke lava ʻo fakahokó.”

Ko e Hā ʻa e Ngāue Fakafaifekau Tokoni?

Hili ha lau uike mei he lea ʻa Palesiteni ʻOakesí, naʻe fakafoki au ki ʻapi ki Kalefōnia ko ha ngaahi ʻuhinga fakafaitoʻo. Naʻá ku lotomamahi lahi. Naʻe faifai peá u ongoʻi hangē naʻá ku ako ʻa e lea fakafonuá pea naʻá ku vēkeveke ke hū ki he malaʻe ngāue fakafaifekaú.

Naʻá ku fakataha mo ʻeku palesiteni fakasiteikí, pea naʻá ne ʻeke mai pe te u fie ʻalu ʻo ngāue fakafaifekau tokoni.

Ngāue fakafaifekau tokoni? Naʻe ʻikai ke u ʻilo pe ko e hā ia.

Naʻá ku toki ʻiloʻi ʻe lava ke fili ʻa e kau faifekau tokoní mei ha ngaahi tafaʻaki kehekehe ʻo e feituʻu, taimi, mo e founga te nau ngāue aí. ʻOku nofotaha ʻa e ngāue fakafaifekau tokoní ʻi hono tokoniʻi ʻa e faifekaú ke fakaʻaongaʻi ʻa e meʻa ʻoku nau malavá ʻi ha founga te ne tokoniʻi ai ʻa e niʻihi kehé.

Ko Ha Fili Lelei Maʻaku

Naʻá ku fakakaukau ko e ngāue fakafaifekau tokoní ko ha fili lelei ia ke u tokanga taha ai ki heʻeku moʻui leleí mo ngāue maʻá e ʻEikí ʻi he taimi tatau. Naʻe kau ʻi he niʻihi ʻo ʻeku ngaahi ngāué ʻa e:

• Tataki ʻo ha ngaahi ʻaʻahi ʻo u hoko ko e tokotaha takimamata ʻi ha musiume.

• Hoko ko ha tokotaha talitali kakai ʻi he ʻōfisi fakamisioná.

• Tokoni ʻi he ngaahi fale tauhiʻanga meʻakaí mo ha kemi ʻa e Siasí.

• Tokoni ʻi he ngaahi vela fakatuʻutāmaki lalahi ʻoku mafolá.

• Ngāue ʻi he temipalé.

Naʻe fakaʻatā au ʻe heʻeku ngāue fakafaifekau tokoní ke u nofo ʻi ʻapi pea fakaleleiʻi ʻeku tuʻunga moʻui leleí lolotonga ʻeku ngāué. Ko e misiona ia naʻe ʻikai ke u teitei ʻamanaki ki aí, ka naʻá ku fakalataʻia ʻi he miniti kotoa pē. Naʻe tokoniʻi ai au ke u tokanga taha ki he meʻa te u lava ʻo faí mo fakatupulaki ʻa e ngaahi meʻa ʻoku ou malavá ke ʻomi ʻa e leleí ki he māmaní.

Ngaahi Lēsoni mei Heʻeku Ngāue Fakafaifekaú ki he Kotoa ʻo e Moʻuí

Naʻe ʻikai ngata pē ʻi he liliu ʻe he akonaki faingofua mo mālohi meia Palesiteni ʻOakesí ʻa ʻeku ngāue fakafaifekaú ka naʻe kau ai mo ʻeku moʻuí foki. Naʻe liliu ai ʻa e anga ʻo ʻeku fakakaukaú. ʻOku ʻikai ke u tokanga taha ki he ngaahi meʻa ʻoku ʻikai ke u lava ʻo mapuleʻí, ka ʻoku ou tokanga taha ʻi he taimí ni ke ʻomi ʻa e leleí ki he māmaní ʻaki ʻa e ngaahi maʻuʻanga tokoni mo e ngaahi talēniti ʻoku ou maʻú. ʻI heʻetau tokanga taha ki he ngaahi meʻa ʻoku tau malavá, te tau lava ʻo liliu ʻa e māmaní mo kinautolu ʻoku tau feohí, ki he leleí.